មន្ត្រីបាននិយាយកាលពីម្សិលមិញថាក្រុមហ៊ុនរុករករ៉ែរបស់ចិនមួយបានផ្ដល់អំណោយជាទឹកប្រាក់ប្រហែល២០០.០០០ដុល្លារសម្រាប់សាងសង់ទីស្នាក់ការស្រុកថ្មីមួយ នៅក្នុងខេត្តព្រះវិហាររបស់គណបក្សប្រជាជនកម្ពុជាដែលកំពុងគ្រប់គ្រងអំណាច។
លោក គង់មករាប្រធានការិយាល័យឧស្សាហកម្ម រ៉ែនិងថាមពលខេត្តបានមានប្រសាសន៍ថាក្រុមហ៊ុនចិនឈ្មោះ Cambodian Iron Holding and Industrial Mining Co.Ltd. បានផ្ដល់មូលនិធិ សម្រាប់ការសាងសង់ការិយាល័យគណបក្សប្រជាជនកម្ពុជាថ្មីមួយនៅក្នុងស្រុករវៀងដែលត្រូវបានសម្ពោធ កាលពីក្នុងខែមករា។លោកបានថ្លែងថាក្រុមហ៊ុននេះ នៅតែធ្វើការសិក្សាពីលទ្ធភាពជីកយករ៉ែដែក ដែលជាធម្មតាគឺជាការជីកយករ៉ែពីរណ្ដៅចំហមួយ ដើម្បីរៀបចំដាក់ពាក្យសុំអាជ្ញាប័ណ្ណជីកយករ៉ែតែម្តង។
លោក មករាបានបញ្ជាក់ថាការចំណាយនេះ មិនពាក់ព័ន្ធជាមួយក្រុមហ៊ុន ដើម្បីឲ្យមានការយកចិត្តទុកដាក់ពីមន្ត្រីមូលដ្ឋាននោះទេហើយថាអំណោយនេះនឹងមិនមានឥទ្ធិពលលើការធ្វើសេចក្ដីសម្រេចរបស់រាជរដ្ឋាភិបាលឡើយ។លោកមានប្រសាសន៍ថា“តាមពិតវាជាកាយវិការសប្បុរសធម៌របស់ក្រុមហ៊ុននេះចំពោះការបរិច្ចាគដោយស្ម័គ្រចិត្តសម្រាប់ការចំណាយទំាងអស់ទៅលើការសាងសង់ទីស្នាក់ការស្រុករបស់គណបក្សប្រជាជនកម្ពុជា”។លោកបន្ថែមថាក្រុមហ៊ុនចិននេះក៏ចំណាយសម្រាប់ការសាងសង់ឧទ្យានមួយកន្លែងនៅក្នុងក្រុងខេត្តព្រះវិហារផងដែរ។
លោក អេសារ៉ូអភិបាលស្រុករវៀងបានមានប្រសាសន៍ថាក្រុមហ៊ុននេះបានផ្ដល់ទឹកប្រាក់ប្រមាណ២០០.០០០ដុល្លារដើម្បីសាងសង់អគារទីស្នាក់ការបក្ស។លោកបញ្ជាក់ថាគណបក្សប្រជាជនកម្ពុជានៅមូលដ្ឋានបានស្នើសុំក្រុមហ៊ុននេះជួយផ្ដល់ជំនួយសម្រាប់សាងសង់ការិយាល័យថ្មីរបស់ខ្លួន។លោកសារ៉ូថ្លែងថាមានអំណោយប្រហាក់ប្រហែលគ្នានេះដែរ លោក ទ្រី ភាព ម្ចាស់ចម្ការកៅស៊ូបានឧបត្ថម្ភថវិកាចំនួន៧០.០០០ដុល្លារដើម្បីសាងសង់ការិយាល័យឃុំមួយនៅក្នុងឃុំរមនា។
លោកបានប្រសាសន៍ថា“យើងមិនបានប្រើឈ្មោះរដ្ឋាភិបាលឬអាជ្ញាធរដើម្បីស្នើក្រុមហ៊ុនឲ្យផ្ដល់អំណោយសម្រាប់ការសាងសង់នោះទេ”។លោកបន្ថែមថាក្រុមហ៊ុន Cambodian Iron Holding and Industrial Mining Co.Ltd. ក៏បានជួយសាងសង់អនុវិទ្យាល័យមួយកន្លែងនៅក្នុងឃុំរៀបរយ ក្នុងស្រុកនេះផងដែរ។
យោងតាមលោក មករាបានឲ្យដឹងថាក្រុមហ៊ុននេះជាក្រុមហ៊ុនមួយក្នុងចំណោមក្រុមហ៊ុនចំនួន១៦ដែលទទួលបានអាជ្ញាប័ណ្ណរុករករ៉ែដែក ឬរ៉ែមាសនៅក្នុងខេត្តព្រះវិហារ។ ក្រុមហ៊ុនចិនមួយទៀតឈ្មោះ Guangxi Nonferrous Metal Croup ទើបបានទទួលអាជ្ញាប័ណ្ណរុករករ៉ែប៉ុណ្ណោះនៅក្នុងខេត្តនេះ កាលពីឆ្នាំមុន ហើយបានប្រកាសអំពីផែនការសាងសង់រោងចក្រស្លដែកដែលមានទឹកប្រាក់៥០០លានដុល្លារនៅក្នុងស្រុករវៀង។
លោក មករាបានថ្លែងថាក្រុមហ៊ុននេះក៏បានផ្ដល់ប្រាក់ ដើម្បីកសាងផ្លូវមួយខ្សែប្រវែង២៧គីឡូម៉ែត្រនិងសាងសង់សាលាមួយខ្នងក្នុងខេត្តនេះ។ លោក ឡៅម៉ុងហៃ អ្នកវិភាគនយោបាយឯករាជ្យបានថ្លែងថា“វាចម្លែកណាស់”ចំពោះអំណោយរបស់ក្រុមហ៊ុនមួយឲ្យទៅគណបក្សនយោបាយមួយ ជាជាងផលប្រយោជន៍សង្គម។លោកថ្លែងថា“ក្រុមហ៊ុនចិននេះកំពុងតែគិតថាគណបក្សគ្រប់គ្រង ក៏ដូចជាអាជ្ញាធរដែរដូចករណីនៅក្នុងប្រទេសចិន ដែលជារដ្ឋមានតែបក្សមួយអ៊ីចឹង”។
លោក រីឆាដស្ដេនជ័រ (Richard Stanger) ប្រធានសមាគមក្រុមហ៊ុនរុករករ៉ែនិងជីកយករ៉ែ នៅក្នុងប្រទេសកម្ពុជាបានថ្លែងថា លោកមិនបានដឹងអំពីអំណោយសម្រាប់សាងសង់អគារគណបក្សប្រជាជនកម្ពុជាទេតែបានមានប្រសាសន៍ថាក្រុមហ៊ុនជាច្រើនតែងតែជួយសហគមន៍ដែលខ្លួនកំពុងធ្វើប្រតិបត្តិការរកសុី។លោកបន្តថា “អ្វីៗអាស្រ័យលើក្រុមហ៊ុនឯកជន។អ្វីដែលពួកគេ យកប្រាក់ដើម្បីដោះស្រាយការងាររបស់ខ្លួន គឺមិនដូចគ្នាទេ សម្រាប់ក្រុមហ៊ុនដទៃទៀត”៕
ប្រែសម្រួលដោយចេវប៊ុននី