លោក កឹម សុខា មេដឹកនាំគណបក្ស សិទ្ធិមនុស្ស និងលោក សម រង្ស៊ី មេដឹកនាំគណបក្ស សម រង្ស៊ី បានប្រកាសពីទីក្រុងម៉ានីលប្រទេសហ្វីលីពីន កាលពីម្សិលមិញថា គណបក្សទាំងពីនេះនឹងរួមបញ្ចូលគ្នានៅក្នុងឆ្នាំ២០១៣ ឲ្យបានមុនការបោះឆ្នោតជាតិ។
លោក កឹម សុខា មានប្រសាសន៍អំឡុងសន្និសីទសារព័ត៌មានរួមមួយ ជាមួយលោក សម រង្ស៊ី តាមវីដេអូខន់ហ្វឺរិន ដែលអ្នកគាំទ្រនៅទីស្នាក់ការកណ្តាលរបស់គណបក្ស សម រង្ស៊ី ក្នុងរាជធានីភ្នំពេញ នាំគ្នាតាមដានមើល។ លោក កឹម សុខា និងលោក សម រង្ស៊ី បានបដិសេធមិននិយាយពីពេលវេលាជាក់លាក់ ដែលគណបក្សរបស់លោកទាំងពីរត្រូវរួមបញ្ចូលគ្នា ឬពីវិធីដែលពួកគេនឹងធ្វើ ដោយ មិនឲ្យគណបក្សណាមួយដើរចេញ ឬបាត់បង់អាសន:ព្រឹទ្ធសភា រដ្ឋសភា និងក្រុមប្រឹក្សាឃុំសង្កាត់របស់ខ្លួនឡើយ។
យោងតាមមាត្រា៣៥និងមាត្រា៣៦នៃច្បាប់ស្តីពីគណបក្សនយោបាយ ចែងថា គណបក្សមួយអាចរួមបញ្ចូលគ្នាជាមួយគណបក្សមួយទៀតបាន តែនៅពេលណាគណបក្សមួយត្រូវបានរម្លាយចោលប៉ុណ្ណោះ។
លោក សម រង្ស៊ី បានមានប្រសាសន៍ថា “ ពេលនេះ យើងមិនអាចលាតត្រដាងបានទេ ប៉ុន្តែគណបក្សថ្មីមួយនឹងចាប់កំណើតឡើងចេញពីគណបក្ស សម រង្ស៊ី និងគណបក្ស សិទ្ធិមនុស្ស ក្នុងពេលឆាប់ៗនេះ។ យើងនឹងដាក់បេក្ខភាពតែម្នាក់ក្នុងបញ្ជីឈរឈ្មោះ”។
លោក កឹម សុខា មានប្រសាសន៍បន្ថែមថា សមាជិកគណបក្សនឹងត្រូវពិនិត្យមើល“ យុទ្ធសាស្ត្រ ផ្នែកផ្លូវច្បាប់” ដើម្បីរួមបញ្ចូលគណបក្សទាំងពីរនេះឲ្យបានត្រឹមត្រូវ និងដើម្បីកុំឲ្យគណបក្សណាមួយបាត់បង់អាសនៈតំណាងរាស្ត្រ ជាប់ឆ្នោត។ លោក កឹម សុខា បានបន្តថា “ លក្ខខណ្ឌនិងពេលវេលា នឹងបញ្ជាក់ប្រាប់យើងក្នុងពេលវេលាសមស្របណាមួយ ដើម្បីបង្កើតគណបក្សថ្មីរបស់យើង។ យើងមានឆន្ទៈច្បាស់លាស់ក្នុងការបង្កើតវា ហើយយើងរង់ចាំសិក្សាពីផ្លូវច្បាប់ជាមុនសិន។ យើងនឹងដឹងពីវិធីរួមបញ្ចូលគណបក្សទាំងពីរ ដោយមិនឲ្យបាត់បង់អាសនៈនៅរដ្ឋសភា”។
ទន្ទឹមនឹងនេះដែរ គណបក្សទាំងពីរនេះយល់ព្រមរួបរួមគ្នាតាមអ្វីដែលពួកគេហៅថា “ ចលនាប្រជាធិបតេយ្យកម្ពុជាសម្រាប់សង្គ្រោះជាតិ” ដើម្បីចាប់ផ្តើមដំណើរការបង្រួបបង្រួមអ្នកគាំទ្ររបស់ខ្លួន។ មេដឹកនាំគណបក្សទាំងពីររូបនេះ បានមានប្រសាសន៍ថា ពួកលោកគ្មានការព្រួយបារម្ភចំពោះការប្រកាសក្នុងពេលថ្មីៗនេះរបស់គណៈកម្មាធិការជាតិរៀបចំការបោះឆ្នោត ដែលថាលោក សម រង្ស៊ី មិនអាចឈរឈ្មោះបោះឆ្នោតបានឡើយ ដោយសារតែលោកត្រូវបានចាត់ទុកជា “ ពិរុទ្ធជន”។ លោក សម រង្ស៊ី ដែលបាននិរទេសខ្លួនឯងទៅរស់នៅក្នុងទីក្រុងប៉ារីស ប្រទេសបារាំង ចាប់តាំងពីចុងឆ្នាំ២០០៩មកនោះ ត្រូវបានសាលាដំបូង និងសាលាឧទ្ធរណ៍សម្រេចផ្តន្ទាទោសឲ្យជាប់ពន្ធនាគារសរុប១២ឆ្នាំ ពីបទញុះញង់ ផ្សព្វផ្សាយព័ត៌មានមិនពិត និងបំផ្លិចបំផ្លាញទ្រព្យសម្បត្តិសាធារណៈ ដោយសារលោកបានដកបង្គោលតម្រុយព្រំដែន នៅតាមបណ្តោយព្រំដែនវៀតណាម។ ការចោទប្រកាន់ទាំងនោះត្រូវបានគណបក្សប្រឆាំងចាត់ទុកថា ដោយហេតុផលនយោបាយ។
លោក សម រង្ស៊ី បានមានប្រសាសន៍ថា “ ពេលនេះ វិធីរបស់គណបក្សប្រឆំាងរួបរួមគ្នាបែបប្រជាធិបតេយ្យ គឺរឹងមាំណាស់ ដែលគណបក្សកាន់អំណាចមិនអាចធ្វើព្រងើយកន្តើយបានឡើយ ចំពោះការទាមទាររបស់យើងឲ្យធ្វើកំណែទម្រង់គណៈកម្មាធិការជាតិរៀបចំការបោះឆ្នោត និងការទាមទារឲ្យខ្ញុំអាចវិលត្រឡប់មកវិញដោយមានសេរីភាព និងអាចឈរឈ្មោះក្នុងការបោះឆ្នោតឆ្នាំក្រោយនេះ”។
លោក ឡៅ ម៉ុងហៃ អ្នកវិភាគនយោបាយឯករាជ្យ បានមានប្រសាសន៍ថា លោកនៅតែមានទុទិដ្ឋិនិយមចំពោះជោគជ័យនៃរួមការបញ្ចូលគ្នានេះ ដោយសារតែការប៉ុនប៉ងរបស់គណបក្សទាំងពីរនេះ ដើម្បីរួមបញ្ចូលគ្នា ធ្លាប់ជួបប្រទះបរាជ័យរួចមកហើយពេលកន្លងមក។
លោកបានបន្ថែមថា “ ពួកគេធ្លាប់បរាជ័យនៅក្នុងការរួបរួមគ្នា នៅពេលឈានជិតដល់ដំណាក់កាល ត្រូវរួមបញ្ចូលគ្នា ឬសូម្បីតែនៅពេលបានឈានដល់ការរួបរួមគណបក្ស។ ពួកគេគួរតែផ្តោតលើការរួមបញ្ចូលគ្នារវាងគណបក្សទាំងពីរវិញ ជាជាងបង្វែរការប្រឹងប្រែងរបស់ខ្លួនទៅលើការបង្កើតចលនាប្រជាធិបតេយ្យកម្ពុជាសម្រាប់សង្គ្រោះជាតិ”៕
ប្រែសម្រួលដោយ តែម សុខុម