រដ្ឋមន្ត្រីក្រសួងព័ត៌មាន បានលើកឡើង កាលពីម្សិលមិញថា រដ្ឋាភិបាលនឹងអនុវត្តសាជាថ្មីនូវបម្រាមមិនឲ្យស្ថានីយវិទ្យុផ្សព្វផ្សាយអំពីបញ្ហាមិនប្រក្រតីពាក់ព័ន្ធនឹងការបោះឆ្នោតក្នុងអំឡុងពេលបោះឆ្នោតជាតិឆ្នាំក្រោយ។
សម្រាប់រយៈពេលពីរថ្ងៃ ក្នុងអំឡុងពេលបោះឆ្នោតឃំុ-សង្កាត់ កាលពីខែមុន ក្រសួងព័ត៌មាន បានហាមវិទ្យុសំឡេងសហរដ្ឋអាមេរិក (VOA) និងវិទ្យុអាស៊ីសេរី (RFA) មិនឲ្យផ្សាយជាភាសាខ្មែរ។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន មានប្រសាសន៍នៅឯសន្និសីទសារព័ត៌មានប្រចាំឆ្នាំរបស់ក្រសួងថា “ កាលពីលើកមុន យើងបានហាមស្ថានីយវិទ្យុ [បរទេស]ទាំងអស់មិនឲ្យផ្សព្វផ្សាយព័ត៌មានរយៈពេលពីរថ្ងៃ ប៉ុន្តែ ពួកគេនៅតែអាចផ្សព្វផ្សាយតាមអីុនធើណិត ឬតាមវិទ្យុរលកធាតុអាកាសខ្លី” ។
លោកបានបន្ថែមថា វិទ្យុ VOA និងវិទ្យុ RFA ព្រមទាំងវិទ្យុអូស្ត្រាលីផ្សាយជាភាសាខ្មែរ ក៏ត្រូវបានហាមឃាត់ផងដែរ។ លោកបានមានប្រសាសន៍បន្តថា “ យើងគ្រោងនឹងសំុឲ្យស្ថានីយវិទ្យុទាំងអស់រក្សាភាពស្ងប់ស្ងាត់រយៈពេលពីរថ្ងៃ ក្នុងអំឡុងពេលបោះឆ្នោត [ជាតិ] នៅឆ្នាំក្រោយ”។
កាលពីថ្ងៃទី៣ ខែមិថុនា ជាថ្ងៃបោះឆ្នោតឃំុ-សង្កាត់ វិទ្យុសំឡេងប្រជាធិបតេយ្យ ដែលគ្រប់គ្រងដោយមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ ក៏ត្រូវបានកាត់ផ្តាច់ផងដែរ នៅពេលវិទ្យុនេះ កំពុងតែផ្សាយអំពីភាពមិនប្រក្រតី ដែលកើតមាននៅតាមការិយាល័យបោះឆ្នោត។
ទោះជាយ៉ាងណា លោក ខៀវ កាញារីទ្ធ បានបញ្ជាក់ថា មិនមែនហាមឃាត់ទាំងស្រុងមិនឲ្យវិទ្យុរាយការណ៍ពីភាពមិនប្រក្រតីនោះទេ។ ក៏ប៉ុន្ដែ ការផ្សព្វផ្សាយក្នុងអំឡុងពេលបោះឆ្នោត មិនគួរលើកយកបញ្ហាមិនប្រក្រតីមកពិភាក្សាទេ ព្រោះសេចក្តីរាយការណ៍នោះ អាចនាំឲ្យមានការយល់ខុស។
លោក កាញារីទ្ធ បានមានប្រសាសន៍ថា “ តាមពិត ក្រសួងព័ត៌មាន មិនបានហាមមិនឲ្យផ្សព្វផ្សាយ អំពីភាពមិនប្រក្រតីនៃការបោះឆ្នោតនោះទេ ប៉ុន្តែ អ្នកកាសែតចេះតែមួលបង្កាច់រឿងនេះដោយខ្លួនឯងទៅវិញទេ”។ លោកបានបន្តថា “ យើងមិនបានហាម ក្នុងរយៈពេលពីរថ្ងៃទេ [ប៉ុន្តែ] សូមរក្សាភាពស្ងៀមស្ងាត់ អំពីបញ្ហានានា [ពាក់ព័ន្ធនឹងការបោះឆ្នោត]។ ឧទាហរណ៍ ប្រសិនបើលោកអ្នកសម្ភាសមនុស្សតែប្រាំនាក់ យើងស្តាប់ទៅហាក់ដូចជា ខ្មែរ ទូទាំងប្រទេសកំពុងនិយាយដូច្នេះដែរ”។
លោក ទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោត បានមានប្រសាសន៍ថា ច្បាប់បោះឆ្នោតចែងថា ការផ្សព្វផ្សាយនៅថ្ងៃបោះឆ្នោត និងមួយថ្ងៃមុនថ្ងៃបោះឆ្នោត ត្រូវបានហាមមិនឲ្យបង្ហាញនូវការគាំទ្រ គណបក្សនយោបាយណាមួយឡើយ។ ទោះជាយ៉ាងណា ពំុមានច្បាប់ណាមួយចែងថា វិទ្យុមិនអាចផ្សព្វផ្សាយព័ត៌មាន ស្តីពីភាពមិនប្រក្រតី ក្នុងអំឡុងពេលបោះឆ្នោតនោះទេ។ លោកបន្ថែមថា “ យើងមិនអនុញ្ញាតឲ្យស្ថានីយវិទ្យុផ្សព្វផ្សាយព័ត៌មានមិនប្រក្រតី ដោយសារតែព័ត៌មាននោះអាចធ្វើឲ្យប្រជាពលរដ្ឋភ្ញាក់ផ្អើល ហើយអាចធ្វើឲ្យប៉ះពាល់ដល់លទ្ធផលនៃការបោះឆ្នោត។
ទោះជាយ៉ាងណា អ្នករិះគន់ជាច្រើន បានលើកឡើងថា ការដាក់បម្រាមលើស្ថានីយវិទ្យុបែបនេះ គឺជាការកាត់បន្ថយកម្រិតសេរីភាពនៃការបញ្ចេញមតិក្នុងប្រទេសកម្ពុជា។
លោក គល់ បញ្ញា នាយកប្រតិបត្តិគណៈកម្មាធិការសម្រាប់ការបោះឆ្នោតដោយសេរីនិងយុត្តិធម៌នៅកម្ពុជា បានមានប្រសាសន៍ថា “ បញ្ហាសំខាន់នៅថ្ងៃបោះឆ្នោត គឺព័ត៌មាន។ អ្នកបោះឆ្នោតមានសិទ្ធិស្តាប់ព័ត៌មានពាក់ព័ន្ធនឹងការបោះឆ្នោត អំឡុងពេលបោះឆ្នោត។ បើមិនអ៊ីចឹងទេ វាពិតជាប៉ះពាល់ដល់តម្លាភាពនៃការបោះឆ្នោត និងធ្វើឲ្យទំនុកចិត្តលើដំណើរការលទ្ធិប្រជាធិបតេយ្យធ្លាក់ចុះ”៕
(រាយការណ៍បន្ថែមដោយ Simon Lewis)
ប្រែសម្រួលដោយ ហម សុផាណ្ណា