សមាជិកគណបក្ស សម រង្ស៊ី បានបោះឆ្នោតជ្រើសរើសមេដឹកនាំថ្មី កាលពីថ្ងៃសុក្រ ដែលការបោះឆ្នោតដោយគ្មានការតវ៉ាមួយបានបង្ហាញថា លោក គង់ គាំ គឺជាប្រធាន និងលោកស្រី ជូឡុង សូមួរ៉ា ជាអនុប្រធានថ្មីរបស់គណបក្សនេះ។
លោក សម រង្ស៊ី ស្ថាបនិក និងជាប្រធានគណបក្សនេះជាយូរមកហើយនោះ ជាប្ដីរបស់អ្នកស្រី សូមួរ៉ា។ លោកត្រូវបានបោះឆ្នោតជាទីប្រឹក្សាជាន់ខ្ពស់របស់គណបក្សដាក់ឈ្មោះខ្លួនឯងដែលគណបក្សនេះលោកបានបង្កើតឡើងពីដំបូងនៅក្នុងឆ្នាំ១៩៩៥ដោយដាក់ឈ្មោះថា គណបក្សជាតិខ្មែរ។
យុទ្ធសាស្ត្រគេចវេះពីតំណែងរបស់លោក សម រង្ស៊ី គឺជាការខិតខំប្រឹងប្រែងរបស់លោកក្នុងការដឹកនាំសម្ពន្ធគណបក្សប្រឆាំង គឺគណបក្សសង្គ្រោះជាតិ ដើម្បីប្រឆាំងនឹងគណបក្សកំពុងកាន់អំណាចរបស់លោកនាយករដ្ឋមន្ត្រីហ៊ុន សែន ក្នុងការបោះឆ្នោតជាតិក្នុងខែកក្កដា ឆ្នាំ២០១៣។
សមាជិកគណបក្ស សម រង្ស៊ី ជាង២.០០០នាក់បានចូលរួមក្នុងសមាជនៅឯអតីតទីស្នាក់ការគណបក្សនេះនៅក្នុងខណ្ឌចំការមនរាជធានីភ្នំពេញ កាលពីថ្ងៃសុក្រ។ក្នុងនោះដែរមានវត្តមានរបស់លោក កឹម សុខា ប្រធានគណបក្សសិទ្ធិមនុស្ស និងលោក សម រង្ស៊ី ខ្លួនឯងដែលចូលរួមតាមរយៈវីដេអូ ខន់ហ្វើរិន ពីសហរដ្ឋអាមរិក ដែលបច្ចុប្បន្ននេះលោកបានធ្វើដំណើរទៅទីនោះដើម្បីជំរុញឲ្យមានការគាំទ្រដល់គណបក្សសង្គ្រោះជាតិជាសម្ពន្ធនៃគណបក្សសិទ្ធិមនុស្ស និងគណបក្ស សម រង្ស៊ី ។
លោក សម រង្ស៊ី បានមានប្រសាសន៍មុនពេលបោះឆ្នោតគាំទ្រលោក គង់ គាំ ជាបេក្ខជនដែលនឹងត្រូវឈ្នះឆ្នោត ជាសមាជិកគណបក្សនេះជាយូរមកហើយ បច្ចុប្បន្នជាសមាជិកព្រឹទ្ធសភា និងកាលពីមុនគឺជាអនុប្រធានគណបក្ស សម រង្ស៊ី ថា “ ទោះបីជាខ្ញុំបានចាកចេញពីបក្ស ដើម្បីឲ្យមានការជ្រើសរើសប្រធានថ្មីរបស់បក្សនេះក៏ដោយ ក៏ចិត្តខ្ញុំនៅជាមួយគណបក្ស សម រង្ស៊ី ជានិច្ច”។
លោក សម រង្ស៊ី ថ្លែងថា “ យើងត្រូវបោះឆ្នោតជ្រើសរើសប្រធានថ្មីរបស់ គណបក្សសម រង្ស៊ី ដែលប្រធានថ្មីនេះគឺលោក គង់ គាំ”។ លោកបានបន្ថែមថា “ ការបង្រួបបង្រួមបក្សរវាងគណបក្ស សម រង្ស៊ី និងគណបក្សសិទ្ធិមនុស្ស ឲ្យកើតជាគណបក្សថ្មីនេះគឺជាព្រឹត្តិការណ៍ធំធេងបំផុតនៅក្នុងប្រវត្តិសាស្ត្ររបស់អ្នកស្នេហាជាតិដែលបានចូលរួមក្នុងការបង្កើតនេះ។ គណបក្សសង្គ្រោះជាតិនឹងសង្គ្រោះជាតិក្នុងឆ្នាំ២០១៣”។
បន្ទាប់ពីការលើកដៃជាសញ្ញាបោះឆ្នោតជាឯកច្ឆន្ទគាំទ្រលោក គង់ គាំ និងលោកស្រី សូមួរ៉ា រួចមក ប្រធានគណបក្សថ្មីរូបនេះបានថ្លែងបន្តថា លោកនឹងដើរតាមជំហានរបស់លោក សម រង្ស៊ី។ លោក គង់ គាំ បានថ្លែងបន្ថែមទៀតថា “ យើងសន្យាថា យើងនឹងចូលរួមក្នុងគណបក្សសង្គ្រោះជាតិ ដើម្បីទទួលបានជ័យជម្នះក្នុងការបោះឆ្នោតជាតិឆ្នាំ២០១៣”។
ថ្លែងក្នុងសមាជរបស់គណបក្ស សម រង្ស៊ី លោក កឹម សុខា ប្រធានគណបក្សសិទ្ធិមនុស្សបានលើកឡើងនូវប្រធានបទស្រដៀងគ្នានឹងនយោបាយទាំងអស់នៅក្នុងប្រទេសកម្ពុជាគឺផលវិបាកនៃការបែកបាក់បក្ស និងការរត់ចោលបក្ស។
លោក កឹម សុខា បានថ្លែងថា គណបក្សសង្គ្រោះជាតិគួរតែទទួលបានមេរៀនពីប្រវត្តិសាស្ត្រកម្ពុជា និងមិនគួរបណ្ដោយខ្លួនឲ្យក្លាយជាជនរងគ្រោះ បែកបាក់គ្នាដោយសារតែគណបក្សកំពុងកាន់អំណាចនោះទេ។ លោក កឹម សុខា ក៏បានអំពាវនាវដល់រដ្ឋាភិបាលដើម្បីអនុញ្ញាតឲ្យលោក សម រង្ស៊ី វិលត្រឡប់មកប្រកួតប្រជែងជាថ្មីក្នុងការបោះឆ្នោតជាតិឆ្នាំក្រោយផង។ លោក កឹម សុខា មានប្រសាសន៍បន្ថែមថា “ ខ្ញុំត្រេកអរ និងគាំទ្រឯកឧត្តម គង់ គាំ ជាប្រធានគណបក្ស សម រង្ស៊ី”៕
ប្រែសម្រួលដោយ ហម សុផាណ្ណា