កាលពីថ្ងៃអង្គារ សាលាដំបូងរាជធានីភ្នំពេញបានចេញដីកាកោះហៅលោក ចាន់សុវ៉េត អ្នកការពារសិទ្ធិមនុស្សរបស់អង្គការអាដហុក មកសាកសួរ ពីបទចោទប្រកាន់ ដែលគេជឿថា មានការពាក់ព័ន្ធនឹងចលនាអបគមន៍នៅក្នុងខេត្តក្រចេះ។
ដើមឡើយ តុលាការេនះបានកោះហៅលោក សុវេ៉ត មកសាកសួរ នៅថ្ងៃទី២៤ ខែសីហា ប៉ុន្តែបានយល់ព្រមផ្អាកជាបណ្តោះអាសន្នដោយគ្មានកំណត់ពេលច្បាស់លាស់ ដើម្បីឲ្យលោកអាចចូលរួមវគ្គបណ្តុះបណ្តាលស្តីពីសិទ្ធិមនុស្សនៅក្នុងប្រទេសថៃ។
លោកសុវ៉េតដែលបានវិលត្រឡប់មកដល់ប្រទេសកម្ពុជាមួយខែហើយនោះ បានមានប្រសាសន៍ថា លោកបានទទួលដីកាកោះថ្មីកាលពីថ្ងៃអង្គារ ឲ្យទៅជួបលោកចៅក្រមឆែវីរៈ នៅថ្ងៃទី២៤ខែធ្នូ។
លោកសុវ៉េត ដែលជាអ្នកធ្វើការដោះស្រាយបញ្ហាដីធ្លី និងបញ្ហាធនធានធម្មជាតិប្រចាំអង្គការសិទ្ធិមនុស្សអាដហុក បានមានប្រសាសន៍ថា “ ខ្ញុំនឹងទៅតុលាការដើម្បីឆ្លើយនឹងសំណួររបស់តុលាការ ព្រោះខ្ញុំគ្មានកំហុសអ្វីដូចគេចោទប្រកាន់ខ្ញុំឡើយ ប៉ុន្តែខ្ញុំបារម្ភថា គេនឹងមិនធ្វើឲ្យបានត្រឹមត្រូវតាមច្បាប់ទេ”។
មន្ត្រីតុលាការមិនអាចទាក់ទងសុំការអត្ថាធិប្បាយបានភ្លាមៗទេ។ តុលាការបានចោទប្រកាន់លោក សុវេ៉ត កាលពីថ្ងៃទី១៤ ខែសីហា ពីបទផ្តល់ជំនួយដល់ជនល្មើសម្នាក់ ដែលត្រូវបានតុលាការផ្តន្ទាទោសឲ្យជាប់ពន្ធនាគាររយៈពេលបីឆ្នាំ ប៉ុន្តែមិនបានបញ្ជាក់ ឈ្មោះជនល្មើស ឬបរិយាយល្អិតល្អន់អំពីជំនួយនោះទេ។
តែប៉ុន្មានថ្ងៃបន្ទាប់ពីចេញការចោទប្រកាន់លោកភ្លាម លោកនាយករដ្ឋមន្ត្រី ហ៊ុនសែន បានចោទប្រកាន់បុគ្គលិកអង្គការក្រៅរដ្ឋាភិបាល ដែលលោកមិនបញ្ចេញឈ្មោះជាសាធារណៈថា ជាអ្នកបានផ្តល់ជំនួយដល់ចលនាអបគមន៍ក្នុងខេត្តក្រចេះ។
កាលពីក្នុងខែឧសភា នគរបាល និងទាហានរាប់រយនាក់បានសម្រុកចូលភូមិប្រមា ក្នុងខេត្តនេះ ដោយបានបាញ់ស្លាប់ក្មេងស្រីអាយុ១៤ឆ្នាំម្នាក់។ អាជ្ញាធរមិនបានស៊ើបអង្កេតករណីបាញ់ប្រហារនេះទេ ដោយនិយាយថាវាគឺជា “ ឧបទ្ទវហេតុ”។កាលពីថ្ងៃទី១ខែតុលា សាលាដំបូងរាជធានីភ្នំេពញបានផ្តន្ទាទោសមនុស្សចំនួន១៤នាក់ ពីបទជាប់ពាក់ព័ន្ធក្នុងចលនាបង្កើតអបគមន៍ រាប់ទាំងលោកម៉ម សូណង់ដូ ម្ចាស់ស្ថានីយវិទ្យុសម្បុកឃ្មុំ ដែលត្រូវបានតុលាការផ្តន្ទាទោសឲ្យជាប់ពន្ធនាគាររយៈពេល២០ឆ្នាំ។
អង្គការសិទ្ធិមនុស្សបានរិះគន់ចំពោះការផ្តន្ទាទោសនេះ ដោយចាត់ទុកថា ជារឿងនយោបាយ និងបានច្រានចោលចំពោះការអះអាងអំពីការធ្វើអបគមន៍ ថាជាការយកលេសរបស់រដ្ឋាភិបាល ដើម្បីបណ្តេញអ្នកភូមិប្រមារាប់រយនាក់ចេញ ដើម្បីយកដីធ្វើចម្ការកៅស៊ូ។
នៅក្នុងសេចក្តីថ្លែងការណ៍កាលពីអង្គារ អង្គការអាដហុកបានបញ្ជាក់ថា លោកសុវ៉េតមិនបានរំលោភច្បាប់ទេ។ សេចក្តីថ្លែងការណ៍នេះលើកឡើងថា “ លោក សុវ៉េត បុគ្គលិកផ្នែកការពារសិទ្ធិុដ៏ល្អម្នាក់ ដែលជានិច្ចកាលតែងតែបំពេញការងាររបស់ខ្លួនស្របទៅតាមច្បាប់កម្ពុជា ក្នុងការស៊ើបអង្កេតករណីរំលោភសិទ្ធិមនុស្ស ព្រមទាំងរៀបចំវគ្គបណ្តុះបណ្តាល និងផ្តល់ជំនួយផ្នែកច្បាប់ដល់ប្រជាពលរដ្ឋ និងសហគមន៍ ដែលទទួលរងផលប៉ះពាល់ដោយសារបញ្ហាជម្លោះដីធ្លី”៕
ប្រែសម្រួលដោយចេវប៊ុននី