សិទ្ធិមនុស្ស សិស្ស និងជនរងគ្រោះដោយការបណ្តេញចេញប្រហែល២០០នាក់ ដែលប្រមូលផ្តុំគ្នានៅខាងក្រៅរដ្ឋសភា ដើម្បីចែកខិត្តប័ណ្ណ បានបបួលគ្នាចុះហត្ថលេខាប្រហែល១១.២០០ ខាងមុខ និងខ្នងអាវយឺតរបស់ខ្លួន។
ក្បាច់រាំដូចគេបំផាយសេះនេះ ដំបូងមើលទៅទំនងជាមានការទាក់ទងតិចតួចនឹងបញ្ហាសិទ្ធិមនុស្ស។ ប៉ុន្តែ លោក មឿន តុលា ប្រធានកម្មវិធីសិទ្ធិការងារ របស់មជ្ឈមណ្ឌលអប់រំច្បាប់សម្រាប់សហគមន៍ និងជាអ្នកបានជួយរៀបចំពិធីនេះ បានមានប្រសាសន៍ថា ក្រុមអ្នកតវ៉ាប្រើក្បាច់រាំរបស់តារាចម្រៀងកូរេ៉ខាងត្បូង ដើម្បីធ្វើឲ្យគេចាប់អារម្មណ៍ចំពោះបុព្វហេតុរបស់ខ្លួន។
លោក តុលា មានប្រសាសន៍ថា “ ក្បាច់រាំហ្គាងណាំ គឺជាក្បាច់រាំដ៏ពេញនិយម”។ លោកមានប្រសាសន៍ថា “ ការរំពឹងទុករបស់សហគមន៍នេះ គឺធ្វើយ៉ាងណាឲ្យមានការចាប់អារម្មណ៍មិនត្រឹមតែពីមនុស្សនៅក្នុងប្រទេសទេ ប៉ុន្តែ ពីអន្តរជាតិផងដែរ។ នោះជាមូលហេតុដែលពួកគេព្យាយាមឲ្យឃើញនូវបែបច្នៃប្រឌិតបន្ថែមទៀត។ ប្រជាពលរដ្ឋតវ៉ានៅថ្ងៃនេះ ពីព្រោះរដ្ឋសភាមិនដែលស្វែងរកដំណោះស្រាយឲ្យពួកគេ”។
អង្គការសិទ្ធិមនុស្សក្នុងស្រុក បានលើកឡើងថា ការចាប់យកដី និងការបណ្តេញអ្នកក្រចេញដោយបង្ខំ ពីសំណាក់អ្នកមានអំណាច បានក្លាយជាការព្រួយបារម្ភផ្នែកសិទ្ធិមនុស្សនៅក្នុងប្រទេសកម្ពុជា ដោយធ្វើឲ្យមនុស្សប្រមាណ៤០០.០០០នាក់ទទួលរងប៉ះពាល់ក្នុងប៉ុន្មានឆ្នាំកន្លងមកនេះ។
នៅទសវត្សរ៍ចុងក្រោយនេះក្រុមអ្នកតវ៉ាប្រឆាំងនឹងការបណ្តេញចេញ បានរិះរកវិធីច្នៃប្រឌិតជាច្រើន ដើម្បីធ្វើឲ្យគេយកចិត្តទុកដាក់ចំពោះបុព្វហេតុរបស់ខ្លួន ចាប់ពីការដោះសម្លៀកបំពាក់នៅតាមផ្លូវ រហូតដល់ការដុតរូបសំណាករបស់ “ មន្ត្រីពុករលួយ” និងការខ្ទាស់ញត្តិរបស់ខ្លួននៅលើក្រមាដ៏វែងជាងគេបំផុតនៅលើពិភពលោក។
ក្រុមអ្នកតវ៉ារាំក្បាច់ “ ហ្គាងណាំ” កាលពីម្សិលមិញ ក៏បានយក “ ដើមឈើណូអែល” បួនដើម តុបតែងលម្អដោយប័ណ្ណរាប់រយ ដែលក្រុមបុគ្គលិកស័្មគ្រចិត្តរបស់អង្គការលើកលែងទោសអន្តរជាតិនៅក្នុងប្រទេសបារាំង អាល្លឺម៉ង់ កូរ៉េខាងត្បូង និងនៅក្នុងប្រទេសនូវែលសេឡង់ បានប្រមូល ដើម្បីថ្កោលទោសចំពោះការបណ្តេញចេញទាំងបង្ខំនៅក្នុងប្រទេសកម្ពុជា។
មន្ត្រីនគរបាល ដែលទទួលបានប្រាក់ខែទាប ហើយពូកែខាងបំបែកក្រុមអ្នកតវ៉ា ក៏ឈរងក់ក្បាល នៅកន្លែងធ្វើបាតុកម្ម កាលពីម្សិលមិញ ផងដែរ។ អ្នកតវ៉ាជាច្រើនបានពាក់អាវយឺតមានរូបត្លុកនគរបាលនៅពីមុខ និងនៅខាងខ្នងអាវមានអក្សរអំពាវនាវឲ្យនគរបាលទទួលបានប្រាក់ខែខ្ពស់ជាងនេះ។
លោក ស ម៉ូរ៉ា ប្រធានសហព័ន្ធសហជីពកម្មករចំណីអាហារ និងសេវាកម្មករកម្ពុជា ដែលជួយរៀបចំកម្មវិធីនេះដែរ បានមានប្រសាសន៍ថា“ ប្រាក់ខែទាប បណ្តាលឲ្យមានបញ្ហាច្រើនណាស់។ មានអំពើពុករលួយច្រើនណាស់។ ជាពិសេសនគរបាលចរាចរជានិច្ចកាលតែងតែទារសំណូក”។ នៅថ្ងៃនោះ មានអ្នកតវ៉ាមួយចំនួន ក៏បានមកជួបជុំគ្នានៅទីនោះដែរ ដើម្បីទាមទារឲ្យដោះលែងអ្នកទោសនយោបាយ ជាពិសេសសកម្មជនប្រឆាំងការបណ្តេញចេញពីរនាក់ គឺអ្នកស្រី យ៉ម បុប្ឆា និងអ្នកស្រី ទឹម សាក់មុនី ដែលកំពុងជាប់ឃុំបណ្តោះអាសន្ននៅក្នុងពន្ធនាគារ ចាប់តាំងពីខែកញ្ញា ហើយគ្រោងនឹងឡើងតុលាការនៅសប្តាហ៍ក្រោយនេះ។ ស្ត្រីទាំងនេះត្រូវបានតុលាការចោទប្រកាន់ពីបទបង្កអំពើហិង្សាដោយចេតនា និងផ្តល់សេចក្តីប្រកាសក្លែងក្លាយ បើទោះជាអង្គការសិទ្ធិមនុស្សបានលើកឡើងថា ការចាប់ខ្លួននេះ គឺជារឿងនយោបាយ ព្រោះតែសកម្មភាពរបស់ពួកគេ។
អ្នកស្រី ទេព វន្នី ដែលនៅក្នុងឆ្នាំនេះបានជាប់ពន្ធនាគារជិតមួយខែ ដោយសារចូលរួមតវ៉ាប្រឆាំងនឹងការបណ្តេញចេញដោយសន្តិវិធី ក្នុងរាជធានីភ្នំពេញ បានមានប្រសាសន៍ថា “ ខ្ញុំសូមអំពាវនាវដល់រដ្ឋាភិបាលឲ្យដោះលែងស្ត្រីទាំងពីរនាក់នេះ និងអ្នកទោសផ្សេងទៀត ពីព្រោះពួកគេមិនបានធ្វើអ្វីខុសទេ”។
អ្នកស្រីមានប្រសាសន៍ថា “ ខ្ញុំសូមអំពាវនាវដល់សមាជិកសភា ដែលអង្គុយនៅក្នុងបន្ទប់ម៉ាស៊ីនត្រជាក់សុំជួយរកដំណោះស្រាយឲ្យយើងទាំងអស់គ្នា”។ ការតវ៉ាកាលពីម្សិលមិញ គឺចង់បង្ហាញ ឲ្យឃើញនូវព្រឹត្តិការណ៍ជាច្រើនដែលក្រុមអង្គការសិទ្ធិមនុស្សកម្ពុជា និងសមាគមក្នុងស្រុក បានប្រារព្ធទិវាសិទ្ធិមនុស្សអន្តរជាតិ នៅថ្ងៃទី១០ ខែធ្នូ។
លោក ញឹល ភាព ដែលបានចូលរួមតវ៉ា កាលពីម្សិលមិញ ជួសមុខឲ្យសមាគមកសិករ ដើម្បីសន្តិភាព និងការអភិវឌ្ឍន៍ បានមានប្រសាសន៍ថា ក្រុមរបស់លោកបានប្រារព្ធពិធីចំនួនទៀតនៅពេលកន្លងមក តែត្រូវអាជ្ញាធរបានទប់ស្កាត់។ លោកបានមានប្រសាសន៍នៅខាងក្រៅរដ្ឋសភាថា “ យើងត្រូវការសេរីភាព និងសិទ្ធិមនុស្ស ពីព្រោះអាជ្ញាធរជានិច្ចកាលតែងតែទប់ស្កាត់ពួកយើង និងប្រើអំពើហិង្សាមកលើក្រុមអ្នកតវ៉ា”។
សន្តិសុខរបស់រដ្ឋសភាមា្នក់ បានទទួលញត្តិរបស់អ្នកតវ៉ា តាមមាត់ច្រកជាប់ ប៉ុន្តែបដិសេធមិនបើកទ្វាទ ដើម្បួយកអាវយឺត ដែលមានចុះហត្ថលេខាដោយអ្នកតវ៉ារាប់ពាន់នាក់ ដែលត្រូវបានប្រមូលដាក់ក្នុងកន្ត្រក។
ទោះជាយ៉ាងណា លោក អ៊ូ ចាន់ឫទ្ធិ សមាជិកសភាមកពីគណបក្សសិទ្ធិមនុស្ស ដែលអ្នកតវ៉ាអញ្ជើញឲ្យចែកអាវយឺតមានញត្តិនោះ បានប្រមូលកន្ត្រកអាវយឺតដាក់ក្នុងរថយន្តរបស់លោក ហើយបើកចូលទៅក្នុងបរិវេណរដ្ឋសភាតាមមាត់ច្រកចូលម្ខាងទៀត។
លោក គាំ កុសល ប្រធានខុទ្ទកាល័យរដ្ឋសភា បានបញ្ជាក់ថា រដ្ឋសភា បានទទួលញត្តិរួចហើយ។ ដោយមានសំដៅដល់លោក ហេង សំរិន ប្រធានរដ្ឋសភា លោក កុសល មានប្រសាសន៍ ថា “ យើងបានទទួលញត្តិនេះហើយ ព្រមទាំងបានបញ្ជូនទៅជូនលោកអគ្គលេខាធិការ ដើម្បីដាក់ជូនសម្តេចប្រធាន”។ លោក កុសល បានបដិសេធមិនធ្វើអត្ថាធិប្បាយអំពីកន្ត្រកអាវយឺតនេះទេ៕
ប្រែសម្រួលដោយ ចេវ ប៊ុននី