មន្ត្រីសាលាដំបូងខេត្តស្វាយរៀង លើកឡើងកាលពីម្សិលមិញថាសាលាដំបូងខេត្តស្វាយរៀង បានលើកលែងរាល់ការចោទប្រកាន់ទាំងអស់ប្រឆាំងនឹងអតីតអភិបាលក្រុងបាវិត ដែលជាជនសង្ស័យដ៏សំខាន់នៅក្នុងការបាញ់ប្រហារកម្មការិនីរោងចក្រចំនួនបីនាក់ អំឡុងការតវ៉ាដោយហិង្សានៅឯតំបន់សេដ្ឋកិច្ចពិសេសមួយកាលពីខែកុម្ភៈ។
មេធាវីមួយរូបរបស់អង្គការសិទ្ធិមនុស្សលីកាដូបានមានប្រសាសន៍ថាសាលាដំបូងបានចោទប្រកាន់លោកសចន្ថានាយការិយាល័យព្រហ្មទណ្ឌក្រុងបាវិតពីបទបាញ់ប្រហារកម្មការិនីចំនួនបីនាក់នេះជំនួសវិញ។
លោកឈូកបណ្ឌិតអតីតអភិបាលក្រុងបាវិតតាំងពីដំបូងឡើយ គឺជាជនសង្ស័យតែម្នាក់គត់ ដែលមានឈ្មោះនៅក្នុងការស៊ើបអង្កេតរបស់ក្រសួងមហាផ្ទៃ ក្នុងករណីការបាញ់ប្រហារកាលពីថ្ងៃទី២០ ខែកុម្ភៈ នៅខាងក្រៅរោងចក្រផលិតស្បែកជើងកីឡាម៉ាកពូម៉ា (Puma) របស់ប្រទេសអាល្លឺម៉ង់។
លោកហ៊ឹងប៊ុនជាព្រះរាជអាជ្ញាអមសាលាដំបូងខេត្តស្វាយរៀង បានថ្លែងថា “ យើងបានលើកលែងការចោទប្រកាន់លោក [ឈូកបណ្ឌិត] ហើយខ្ញុំមិនចង់ធ្វើអត្ថាធិប្បាយអំពីហេតុផលនេះឡើយ”។ លោកបានថ្លែងថា “ ផ្អែកលើភ័ស្ដុតាងនិងការស៊ើបអង្កេតរបស់តុលាការ លោកមិនពាក់ព័ន្ធនៅក្នុងការបង្កឲ្យជនរងគ្រោះរងរបួសទេ”។
លោកជិនលីដាមេធាវីមកពីអង្គការលីកាដូ ដែលតំណាងឲ្យជនរងគ្រោះដោយការបាញ់ប្រហារទាំងបីរូបមានប្រសាសន៍ថា លោកបានទទួលដីកាពីតុលាការ ដែលបានលើកឡើងថា បទចោទប្រកាន់មកលើលោកឈូក បណ្ឌិត នឹងត្រូវលើកលែង រីឯការបើកសវនាការជំនុំជម្រះលើកក្រោយនឹងធ្លាក់ទៅលើលោកសចន្ថា។
ជិតប្រាំមួយខែបន្ទាប់ពីហេតុការណ៍នេះបានកើតឡើង លោកសចន្ថាបានទទួលរងការចោទប្រកាន់ កាលពីខែសីហាពីបទបង្ករបួសស្នាមដោយអចេតនា ចំពោះអំពើបាញ់ប្រហារកម្មការិនីទាំងបីនាក់។
លោកជិនលីដា លើកឡើងថាសេចក្ដីសម្រេចនេះមិនបានលើកឡើងពីមូលហេតុនៃការលើកលែងការចោទប្រកាន់លោក ឈូក បណ្ឌិត ឡើយ និងមិនបានបញ្ជាក់ពីពេលវេលា ដែលត្រូវកំណត់សម្រាប់បើកសវនាការជំនុំជម្រះរឿងក្ដីរបស់មន្ត្រីនគរបាលរូបនេះទេ។
លោកសចន្ថាដែលនៅបម្រើការជាមន្ត្រីនគរបាលនៅឡើយបានមានប្រសាសន៍ថាលោកមិនមានអ្វីភ្ញាក់ផ្អើលនោះទេ ដែលថាលោក ឈូក បណ្ឌិត ត្រូវបានតុលាការលើកលែងការចោទប្រកាន់នោះ។ លោកបានមានប្រសាសន៍ថា “ ខ្ញុំមិនខ្លាចចំពោះអ្វី ដែលគេបានចោទប្រកាន់ខ្ញុំនោះទេ ពីព្រោះខ្ញុំមិនបានប្រព្រឹត្តកំហុសណាមួយឡើយនៅក្នុងករណីនេះ”។
សាក្សីដែលអង្គការសិទ្ធិមនុស្សសម្ភាសបានឲ្យដឹងថា គេបានចោទថាលោក ឈូកបណ្ឌិត បានបាញ់យ៉ាងកៀកទៅលើកម្មករកម្មការិនីមួយក្រុម ដែលតវ៉ាដោយហិង្សា ដើម្បីទាមទារឲ្យដំឡើងប្រាក់ខែ និងប្រាក់ឧបត្ថម្ភផ្សេងៗទៀត។ ដើមឡើយ សាលាដំបូងខេត្តបានចោទប្រកាន់លោក ឈូក បណ្ឌិត ពីបទបង្ករបួសស្នាមដោយអចេតនា តែនគរបាលមិនបានចាប់ខ្លួនលោកឡើយ។
អ្នកស្រីគុយលក្ខណ៍ម្ដាយរបស់ ប៊ុនចិន្ដាដែលសួតរបស់នាងត្រូវរងរបួសដោយសារគ្រាប់កាំភ្លើងមួយគ្រាប ដែលបានបាញ់រះទៅលើក្រុមអ្នកតវ៉ានោះ បានហៅការសម្រេចរបស់តុលាការថា អយុត្តិធម៌។ អ្នកស្រីនិយាយថា “ ការសម្រេចបែបនេះនឹងធ្វើឲ្យគាត់បន្ដបាញ់អ្នកផ្សេងៗទៀត តាមអំពើចិត្ត។ ខ្ញុំឈឺចាប់ណាស់ ហើយខ្ញុំមិនពេញចិត្តចំពោះតុលាការ ដែលបានអនុញ្ញាតឲ្យគាត់រួចផុតពីសំណាញ់ច្បាប់នោះទេ”។
លោកស្រី ជិលថាក់ឃឺ (Jill Tucker) ប្រធានគ្រប់គ្រងបច្ចេកទេសរបស់អង្គការពលកម្មអន្តរជាតិ (ILO) បានមានប្រសាសន៍ថាវាគឺជាថ្ងៃមួយដ៏សោកសៅសម្រាប់កម្មការិនីកាត់ដេរនៅកម្ពុជា។
លោកស្រីបានថ្លែងថា “ អ្នកបញ្ជាទិញបានសរសេរលិខិតជាបន្ទាន់់ផ្ញើទៅរដ្ឋាភិបាលដោយជំរុញឲ្យពន្លឿនការបើកសវនាការជំនុំជម្រះប្រកបដោយយុត្តិធម៌ ហើយខ្ញុំគិតថា ប្រសិនបើគ្មានការបើកសវនាការដោយយុត្តិធម៌នៅក្នុងករណីនេះមែននោះ អ្នកបញ្ជាទិញទាំងអស់ប្រហែលជាមានការខកចិត្តយ៉ាងខ្លាំង។
លោក គឺស្ទីននូប៊ើ (Kerstin Neuber) ប្រធានផ្នែកទំនាក់ទំនងសាជីវកម្មរបស់ក្រុមហ៊ុនពូម៉ា លើកឡើងតាមអុីម៉េលមួយថា “ ក្រុមហ៊ុន ពូម៉ា ដែលជាក្រុមហ៊ុនប្រកបអាជីវកម្មមិនធ្វើអត្ថាធិប្បាយចំពោះបញ្ហានយោបាយ ឬក៏ប្រព័ន្ធតុលាការឡើយ”។ តែទោះជាយ៉ាងណា យើងសង្ឃឹមយ៉ាងមុតមាំថា រដ្ឋាភិបាលកម្ពុជា នឹងខិតខំវែកមុខឧក្រិដ្ឋជនដែលបានប្រព្រឹត្តបទល្មើសេនះ”។
ភ្លាមៗបន្ទាប់ពីការបាញ់ប្រហារនេះអាជ្ញាធរបានទៅជួបជនរងគ្រោះជាច្រើនលើកច្រើនសា រួមមានបុគ្គលមួយចំនួន ដែលអះអាងថា ជាតំណាងរបស់ឧបនាយករដ្ឋមន្ត្រី លោកស្រី ម៉ែន សំអន ដើម្បីបញ្ចុះបញ្ចូលជនរងគ្រោះកុំឲ្យដាក់ពាក្យបណ្ដឹងព្រហ្មទណ្ឌប្តឹងលោកឈូកបណ្ឌិតដើម្បីជាថ្នូរនឹងលុយកាត់ និងអំណោយផ្សេងៗ។
រឿងក្តីនេះត្រូវបានដោះស្រាយដោយមិនសមស្របឡើយ។ កាលពីខែមីនាលោកហ៊ឹងប៊ុនជាបានមានប្រសាសន៍ថាលោកឈូកបណ្ឌិតបានសារភាពថា បានដកកាំភ្លើងខ្លីរបស់ខ្លួនបាញ់ឡើងលើ នៅកន្លែងតវ៉ា។ប៉ុន្ដែប៉ុន្មានថ្ងៃក្រោយមកលោកបែរជាមានប្រសាសន៍ថា លោក ឈូកបណ្ឌិតគ្រាន់តែបានដកកាំភ្លើងខ្លីតម្រង់ទៅលើមែន តែគាត់មិនបានបាញ់មួយគ្រាប់ណាឡើយ៕
ប្រែសម្រួលដោយស៊ាស៊ុយឈាង