រយៈពេលជិតបួនឆ្នាំបន្ទាប់ពីបុរសពីរនាក់បានគាស់ផ្ទះមួយក្នុងខណ្ឌទួលគោក រាជធានីភ្នំពេញ កាលពីខែឧសភាឆ្នាំ២០០៩ ហើយបានធ្វើទារុណកម្មនិងសម្លាប់ក្មេងស្រីវ័យជំទង់ពីរនាក់និងបងប្អូនជីដូនមួយម្នាក់អាយុ៤ឆ្នាំរបស់ពួកគេយ៉ាងសាហាវព្រៃផ្សៃនោះ ពេលនេះសាលាដំបូងរាជធានីភ្នំពេញបានកាត់ទោសជនសង្ស័យម្នាក់ ដោយកំបាំងមុខពីបទឃាតកម្មខាងលើនេះ។
ជនសង្ស័យឈ្មោះ នាង ប៊ុនធឿន ដែលពេលនេះកំពុងរត់គេចខ្លួននៅឡើយ គឺជាអតីតមន្ត្រីម្នាក់នៅក្រសួងទំនាក់ទំនងជាមួយសភា ព្រឹទ្ធសភា និងអធិការកិច្ច។
អ្នកស្រី អឹុម សុវណ្ណផល្លា ម្តាយរបស់ក្មេងស្រីវ័យជំទង់ទាំងពីរដែលត្រូវឃាតករសម្លាប់ និងត្រូវជាម្តាយធំរបស់ក្មេងប្រុសរងគ្រោះអាយុ៤ឆ្នាំ បាននិយាយក្នុងតុលាការកាលពីម្សិលមិញថា ទោះបីជាឈ្មោះ ប៊ុនធឿន បិទមុខពេលធ្វើសកម្មភាពសម្លាប់មនុស្សក្តី ក៏អ្នកស្រីនៅតែអាចចំណាំជននេះបាន ពីព្រោះជននេះគឺជាមិត្តភក្តិរបស់គ្រួសារនេះជាយូរមកហើយ និងធ្លាប់បរិភោគអាហារពេលព្រឹកនៅហាងរបស់អ្នកស្រីរាល់ព្រឹក។
ស្វាមីរបស់អ្នកស្រី សុវណ្ណផល្លា គឺលោកទេព ដារ៉ុង ដែលជាប្រធានរាជបណ្ឌិត្យសភាវិជ្ជាជីវៈតុលាការនៅពេលមានករណីសម្លាប់កូនស្រីនិងក្មួយប្រុសរបស់លោក មិនបានបង្ហាញវត្តមានក្នុងតុលាការទេកាលពីម្សិលមិញ។
អ្នកស្រី សុវណ្ណផល្លា បាននិយាយថា “ នាងប៊ុនធឿន និងប្រពន្ធរបស់គេគឺជាមិត្តល្អរបស់ខ្ញុំតាំងពីឆ្នាំ១៩៩០ម្លេ៉ះ ខ្ញុំមិនដឹងថា មូលហេតុអ្វីបានជាពួកគេហ៊ានសម្លាប់កូនស្រីរបស់ខ្ញុំ និងក្មួយប្រុសរបស់ខ្ញុំយ៉ាងសាហាវព្រៃផ្សៃបែបនេះទេ ព្រោះពួកគេទើបតែមានអាយុ៤ឆ្នាំ និង១៧ឆ្នាំប៉ុណ្ណោះ”។
អ្នកស្រីបន្តថា “ នាង ប៊ុនធឿន គឺជាឃាតករសម្លាប់គ្រួសាររបស់ខ្ញុំ។ខ្ញុំចង់ឲ្យតុលាការរកយុត្តិធម៌ឲ្យខ្ញុំ ហើយខ្ញុំទាមទារឲ្យជនសង្ស័យផ្តល់សំណងចំនួន៧០០.០០០ដុល្លារ”។
លោក ជា ម៉េត ព្រះរាជអាជ្ញារងអមសាលាដំបូងរាជធានី មានប្រសាសន៍ថា តុលាការគួរតែធ្វើការចោទប្រកាន់ឈ្មោះ ប៊ុនធឿន ថ្វីបើជននេះមិនមានវត្តមាននៅសាលជំនុំជម្រះក្តី។លោកថ្លែងថា “ ទោះបីជាជនសង្ស័យបារត់រួចពីការចាប់ខ្លួនក្តី ក៏តុលាការនៅតែមានភ័ស្តុតាងគ្រប់គ្រាន់ដើម្បីចោទប្រកាន់ជននេះពីបទមនុស្សឃាតគិតទុកជាមុនដែរ”។
លោក ជួន ណារិន ស្នងការរងរាជធានីភ្នំពេញបានមានប្រសាសន៍ថា តុលាការបានចេញដីកាចាប់ខ្លួនឈ្មោះ ប៊ុនធឿន ហើយ ប៉ុន្តែនគរបាលមិនទាន់រកជននេះឃើញទេចាប់តាំងពីមានឃាតកម្មសម្លាប់មនុស្សទាំងបីនាក់ដោយការឆក់ខ្សែភ្លើងមក។
លោកបានមានប្រសាសន៍ថា “ យើងកំពុងសហការជាមួយក្រសួងមហាផ្ទៃដើម្បីតាមចាប់ខ្លួនជនសង្ស័យនេះ”។ លោក ទូច ណារ៉ុថ អតីតស្នងការនគរបាលរាជធានីភ្នំពេញ បានមានប្រសាសន៍នៅពេលមានឃាតកម្មនេះថា ការសម្លាប់ជនរងគ្រោះទាំងបីនាក់មានដូចជា អឹុម ចាន់បូរី អាយុ១៧ឆ្នាំ អឹុម ស្រីពេជ្រ អាយុ១៥ឆ្នាំ និង អឹុម រ៉ាសាអាយុ៤ឆ្នាំទំនងជាករណីសងសឹក។
លោក ទូច ណារុ៉ថ លើកឡើងនៅពេលនោះថា ឃាតករធ្វើទារុណកម្មជនរងគ្រោះដោយឆក់ខ្សែភ្លើង ហើយបានរង់ចាំម្ដាយជនរងគ្រោះត្រឡប់មកផ្ទះវិញអស់រយៈពេលប្រហែលមួយម៉ោង”។
បន្ទាប់ពីបានធ្វើទារុណកម្ម លើជនរងគ្រោះ និងបន្ទាប់ពីបានបង្ខំជនរងឲ្យទូរស័ព្ទហៅម្ដាយរបស់ខ្លួនត្រឡប់មកផ្ទះវិញ ឃាតករបានយកដែកបំពង់ទីបវាយក្បាលជនរងគ្រោះហើយបានយកគ្រឿងអលង្ការ និងប្រាក់ចំនួន២៩.០០០ដុល្លារចាកចេញទៅ។
នៅពេលអ្នកស្រី សុវណ្ណផល្លា ត្រឡប់មកផ្ទះវិញ អ្នកស្រីត្រូវបានឃាតករវាយក្បាលនឹងដែកបំពង់ទីប រួចយកក្រណាត់រុំមាត់ ហើយអ្នកស្រីបានត្រឹមតែឈរមើលឃាតករគេចខ្លួនប៉ុណ្ណោះ។
ទាំងលោក ទេព ដារ៉ុង និងភរិយារបស់លោកមិនបាននិយាយជាសាធារណៈអំពីអំពើឃាតកម្មដ៏សាហាវនេះឡើយ។
មួយសប្ដាហ៍មុនពេលឃាតកម្មនេះកើតឡើង មានសេចក្ដីរាយការណ៍មួយបានផ្សាយតាមវិទ្យុសំឡេងសហរដ្ឋអាមេរិកថា និស្សិតនៅរាជបណ្ឌិត្យសភាវិជ្ជាជីវៈតុលាការដែលបណ្ដុះបណ្ដាលចៅក្រមក្នុងប្រទេសកម្ពុជា បានបង់ប្រាក់ពី ២០.0០០ដុល្លារ ទៅ៣០.០០០ដុល្លារដើម្បីមានសិទ្ធិទទួលបានតំណែងមួយនៅក្នុងតុលាការ បន្ទាប់ពីបញ្ចប់ការសិក្សា។
លោក ទេព ដារ៉ុង បានចូលនិវត្តពីតំណែងរបស់លោកជានាយករាជបណ្ឌិត្យសភាវិជ្ជាជីវៈតុលាការជាច្រើនឆ្នាំមកហើយ។សាលាដំបូងរាជធានីភ្នំពេញគ្រោងនឹងប្រកាសសាលក្រមផ្តន្ទាទោសជងសង្ស័យ នាង ប៊ុនធឿន នៅថ្ងៃទី២៥ ខែធ្នូ៕
ប្រែសម្រួលដោយ តែម សុខុម