អ្នកនាំពាក្យកងរាជអាវុធហត្ថបាននិយាយកាលពីម្សិលមិញថា កងរាជអាវុធហត្ថលើផ្ទៃប្រទេសកំពុងតាមរកចាប់ខ្លួនជនល្មើសថែមទៀត ដែលគេសង្ស័យថាស្ថិតក្នុងក្រុមមួយដែលមានការរៀបចំក្នុងការលួចសម្លៀកបំពាក់នៅក្នុងកុងតឺន័រដឹកឆ្ពោះទៅកាន់ទីផ្សារអន្តរជាតិ។
កាលពីថ្ងៃសៅរ៍ ទាហានកងយោធពលខេមរភូមិន្ទចំនួនបីនាក់ និងស្ត្រីម្នាក់ត្រូវបានចាប់ខ្លួន នៅពេលពួកគេកំពុងលួចយកកេសដាក់សម្លៀកបំពាក់ពីកុងតឺន័រ ដាក់ទៅក្នុងរថយន្តពីរគ្រឿងនៅក្នុងខេត្តកំពង់ស្ពឺ។
ឈ្មោះ សុខ ណាវ អាយុ២៧ឆ្នាំ គឹម ឈាង អាយុ២៥ឆ្នាំ សាំង សារស់ អាយុ២៤ឆ្នាំនិងឈ្មោះ ពៅ អូន អាយុ៤១ឆ្នាំ ដែលត្រូវបានជួលឲ្យចាំមើលទំនិញ ដែលលួចបាននោះកំពុងត្រូវឃុំខ្លួនបណ្តោះអាសន្ននៅបញ្ជាការដ្ឋានកងរាជអាវុធហត្ថ។ ពួកគេត្រូវបានគេឃើញកំពុងតែដាក់កេស ដែលភាគច្រើន
ដាក់សុទ្ធតែខោខូវប៊យ និងអាវយឺត ដែលដឹកទៅសហរដ្ឋអាមេរិក និងមានតម្លៃប្រមាណ១០០.០០០ដុល្លារ។
លោក វរសេនីយ៍ឯក ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេសបានមានប្រសាសន៍ថា ពាក្យបណ្តឹងអំពីការលួចនេះ ត្រូវបានបញ្ជូនទៅសាលាដំបូងរាជធានីភ្នំពេញហើយ ចំណែកកងរាជអាវុធហត្ថបានពង្រីកការស៊ើបអង្កេតរបស់ខ្លួនក្នុងការតាមរកចាប់ខ្លួនមេសមគំនិតនៅពីក្រោយការលួចនេះ។
លោកវរសេនីយ៍ឯក ទីតូ មានប្រសាសន៍ថា “ យើងកំពុងស៊ើបអង្កេតលើមនុស្ស និងក្រុមផ្សេងទៀត។ ពួកគេទាំងនេះនៅក្នុងក្រុមតែមួយ”។ លោកបន្ថែមថា ក្រុមដែលរៀបចំឧក្រិដ្ឋកម្មបែបនេះ រីករាលដាល និងអាចនៅពីក្រោយការលួចដូចគ្នានេះ ដែលបានកើតឡើងនៅក្នុងឆ្នាំ២០១២។
លោកវរសេនីយ៍ឯក ទីតូ មានប្រសាសន៍ថា“ ពេលជនសង្ស័យលួចយកសម្លៀកបំពាក់ ពួកគេយកវាទៅលក់នៅទីកន្លែងផ្សេងទៀតនៅតាមទីផ្សារក្នុងប្រទេសកម្ពុជា។ អាចនៅផ្សារទួលទំពូង ឬផ្សារងងឹត”។
លោកបន្ថែមថា ក្នុងករណីនេះ សម្លៀកបំពាក់នៅក្នុងកុងតឺន័រមានទម្ងន់១០តោន។លោក ទីតូ បានមានប្រសាសន៍ថា ដើម្បីលាក់ផលចោរកម្ម ជនសង្ស័យបានយកដំុថ្មដាក់ជំនួសសម្លៀកបំពាក់វិញ ដើម្បីឲ្យមានទំងន់ដូចគ្នានៅពេលដឹកជញ្ជូន។
លោកបានមានប្រសាសន៍ថា “ យើងបានឮថា មានបណ្តឹងពីក្រុមហ៊ុនដឹកជញ្ជូនជាច្រើនលើកហើយ ប្រហែលជា១០ករណីនៅឆ្នាំនេះ។ យើងខកចិត្ត ពីព្រោះប្រទេសរបស់យើងនឹងខូចមុខមាត់ ប្រសិនបើមានទាហានលួចបែបនេះ”។
កាលពីខែមុន មនុស្សប្រាំនាក់ទៀត ត្រូវបានចាប់ខ្លួនពីបទលួចសម្លៀកបំពាក់ពីកុងតឺន័រ ដែលឆ្ពោះទៅសហរដ្ឋអាមេរិកដែរ។
លោកព្រះអាជ្ញារង សៀង សុខ បញ្ជាក់ថា សាលាដំបូងរាជធានីភ្នំពេញបានទទួលសំណុំរឿងនេះ ប៉ុន្តែនៅមិនទាន់ច្បាស់ថា តើជនសង្ស័យនឹងត្រូវចោទពីបទល្មើសអ្វីទេ។
លោក សៀង សុខ បានមានប្រសាសន៍ថា “មុនពេលនគរបាលចាប់ខ្លួនជនសង្ស័យបួន
នាក់ យើងបានទទួលពាក្យបណ្តឹងពីក្រុមហ៊ុនក្នុងស្រុក ដោយសារតែបានបាត់សម្លៀកបំពាក់ នៅពេលដឹកចេញទៅក្រៅប្រទេស។ វាបានកើតឡើងពីរឬបីដងហើយ”៕
ប្រែសម្រួលដោយ ចេវ ប៊ុននី