ទិន្នន័យពីរដ្ឋាភិបាល និងពីអ្នកគ្រប់គ្រងអាកាសយានដ្ឋានរបស់ប្រទេសកម្ពុជា បានបង្ហាញថា ការដឹកជញ្ជូនចូល និងចេញតាមផ្លូវអាកាស ក្នុងរាជធានីភ្នំពេញ បានកើនឡើងជិត៤០ភាគរយ កាលពីឆ្នាំមុន ហើយគេបានកត់ត្រាថា មានអ្នកធ្វើដំណើរ ដើម្បីធ្វើជំនួញមានជិត១០០.០០០នាក់ថែមទៀត បានចូលមកដល់រាជធានីភ្នំពេញ អំឡុង១១ខែដំបូង កាលពីឆ្នាំមុន បើប្រៀបធៀបទៅនឹងរយៈពេលដូចគ្នា នៅក្នុងឆ្នាំ២០១១។
សេដ្ឋវិទូមួយចំនួន បានលើកឡើងថា ការកើនឡើងនៃការដឹកជញ្ជូនតាមផ្លូវអាកាសគឺជាសូចនាករមួយ បង្ហាញពីសេដ្ឋកិច្ចរបស់ប្រទេសកម្ពុជា ដែលចាប់ផ្ដើមមានឧស្សាហកម្មច្រើន ហើយការដែលមានអ្នកធ្វើដំណើរមកប្រទេសកម្ពុជាកាន់តែច្រើន ដើម្បីធ្វើពាណិជ្ជកម្ម បង្ហាញឲ្យឃើញថា មានការកើនឡើងនៃការចាប់អារម្មណ៍របស់វិនិយោគិនបរទេសមកលើប្រទេសកម្ពុជា។
តួលេខដែលទទួលបានពីនគរបាលអន្ដោប្រវេសន៍ប្រចាំអាកាសយានដ្ឋានអន្ដរជាតិភ្នំពេញ កាលពីម្សិល មិញ បង្ហាញឲ្យឃើញថា នៅចន្លោះខែមករា និងខែវិច្ឆិកា អ្នកដំណើរដែលបានមកដល់ប្រទេសកម្ពុជា ដើម្បីធ្វើពាណិជ្ជកម្ម បានកើនឡើង១១ភាគរយ ពោលគឺកើនដល់៨៨១.៧៥៦នាក់ ប្រសិនបើប្រៀបធៀបទៅនិងរយៈពេលដូចគ្នា នៅក្នុងឆ្នាំ២០១១។
លើសពីនេះទៀត យោងតាមអាកាសយានដ្ឋានកម្ពុជា ដែលគ្រប់គ្រងអាកាសយានដ្ឋានអន្ដរជាតិ បានឲ្យដឹងថា ការដឹកជញ្ជូនចូល និងចេញតាមផ្លូវអាកាសក្នុងប្រទេសកម្ពុជា តាមរយៈរាជធានីភ្នំពេញ បានកើនឡើង៣៨ភាគរយ ពោលគឺកើនដល់២៩.០០០តោនក្នុងឆ្នាំ២០១២។
លោក ភីធើ ប្រីមបល (Peter Brimble) សេដ្ឋវិទូជាន់ខ្ពស់ប្រចាំប្រទេសរបស់ធនាគារអភិវឌ្ឍន៍អាស៊ី បានមានប្រសាសន៍ដោយសំដៅទៅលើការកើនឡើងនៃការដឹកជញ្ជូនចូល និងចេញតាមផ្លូវអាកាសរបស់ប្រទេសកម្ពុជាថា “ វាបង្ហាញថា ប្រទេសកម្ពុជា កំពុងតែមានផលិតផល ដែលមានគុណភាពខ្ពស់”។
លោកបានបន្ថែមថា សូចនាករទាំងពីរនេះ “បង្ហាញឲ្យឃើញច្បាស់ថា ប្រទេសកម្ពុជាបានចាក់ឫសយ៉ាងជ្រៅចូលក្នុងវិស័យឧស្សាហកម្ម”។
លោក ខែក នរិនដា អ្នកគ្រប់គ្រងផ្នែកទំនាក់ទំនងសាធារណរបស់អាកាសយានដ្ឋានកម្ពុជា បានយល់ស្របថា ការកើនឡើងនៃការដឹកជញ្ជូនតាមផ្លូវអាកាស និងអ្នកធ្វើដំណើរបែបពាណិជ្ជកម្ម បង្ហាញឲ្យឃើញថា សេដ្ឋកិច្ចរបស់ប្រទេសកម្ពុជាកំពុងតែរីកចម្រើន ក្នុងរយៈពេលប៉ុន្មានឆ្នាំចុងក្រោយនេះដែលសេដ្ឋវិទូបានជំរុញឲ្យរដ្ឋាភិបាលបង្កើតឲ្យមានឧស្សាហកម្មផ្សេងៗជាច្រើនទៀតក្រៅពីវិស័យកាត់ដេរ។
លោកបានមានប្រសាសន៍ថា “ មានអ្នកធ្វើដំណើរបែបពាណិជ្ជកម្មច្រើនមកប្រទេសកម្ពុជា មានន័យថា មានឱកាសពាណិជ្ជកម្មច្រើនក្នុងប្រទេសកម្ពុជា ហើយការដឹកជញ្ជូនចូល និងចេញតាមផ្លូវអាកាស ជាសូចនាករមួយដ៏ល្អនៃការផ្លាស់ប្ដូរទំនិញទៅវិញទៅមក”។
ជាការពិត នៅក្នុងរយៈពេលពីរឆ្នាំចុងក្រោយនេះ គេឃើញមានក្រុមហ៊ុនជប៉ុន ដែលមានជំនាញខាងផលិតផលិតផល ដែលមានបច្ចេកវិទ្យាខ្ពស់ បានចូលមករកសុីក្នុងប្រទេសកម្ពុជា។ កាលពីឆ្នាំ២០១១ ក្រុមហ៊ុន
Minebea Co. Ltd ដែលផលិតគ្រឿងបន្លាស់តូចៗសម្រាប់ឧបករណ៍អេឡិចត្រូនិក បានបើករោងចក្រមួយនៅក្នុងតំបន់សេដ្ឋកិច្ចពិសេសភ្នំពេញ។ ហើយកាលពីឆ្នាំមុន ក្រុមហ៊ុនសាជីវកម្មជប៉ុន យាហ្សាគី (Yazaki Corperation) ដែលជាក្រុមហ៊ុនផលិតខ្សែភ្លើង និងក្រុមហ៊ុនសាជីវកម្ម ស៊ូមីតូមូ (Sumitomo Corperation) សុទ្ធតែបានចូលមករកសុីក្នុងប្រទេសកម្ពុជា។
លោក ប្រីមបល បានមានប្រសាសន៍ថា “ការចាប់ផ្ដើមនេះ គឺវាដូចគ្នានឹងការរីកចម្រើនផ្នែកឧស្សាហកម្មនៅក្នុងប្រទេសថៃ ដែលប្រទេសជប៉ុន គឺជាអ្នកធ្វើឲ្យមានការរីកចម្រើនបែបនេះ”។
លោក នីកូឡាស ម៉ាស (Nicolas Masse) អ្នកគ្រប់គ្រងប្រចាំប្រទេសរបស់ក្រុមហ៊ុនអាកាសចរណ៍ កាថៃ ប៉ាសុី ហ្វិក (Cathay Pacific Airways) ដែល ចូល ហ៊ុនរក សុីជាមួយក្រុមហ៊ុនអាកាសចរណ៍ដ្រាហ្គនអ៊ែរ (Dragonair) របស់ហុងកុង ដែលជាក្រុមហ៊ុនដឹកជញ្ជូនតាមផ្លូវអាកាសធំបំផុតក្នុងប្រទេសកម្ពុជា បានលើកឡើងតាមរយៈអុីម៉េលមួយថា “ដោយមានក្រុមហ៊ុនឧស្សាហកម្មជាច្រើន ដែលស្វែងរកការចំណាយទាប បានចូលមកក្នុងប្រទេសកម្ពុជា ការនាំចេញតាមផ្លូវអាកាស បានកើនឡើងយ៉ាងខ្លាំងក្នុងឆ្នាំនេះ”។ លោកបានបន្ថែមថា ទំនិញដឹកជញ្ជូនតាមផ្លូវអាកាស គឺតិចជាង១ភាគរយនៃពាណិជ្ជកម្មអន្ដរជាតិ បើគិតជាបរិមាណ ប៉ុន្ដែ បើគិតជាតម្លៃវិញជិត៤០ភាគរយ។
លោក ម៉ាស មានប្រសាសន៍ថា បរិមាណនៃការដឹកជញ្ជូន ដែលក្រុមហ៊ុនអាកាសចរណ៍ដ្រាហ្គនអ៊ែរ បាននាំចេញពីប្រទេសកម្ពុជា កាលពីឆ្នាំមុនមានការកើនឡើងទ្វេដង បើប្រៀបធៀបទៅនឹងឆ្នាំ២០១១ ដោយបានកើនឡើងដល់១.៧០០តោន នៅក្នុងរយៈពេល១១ខែដំបូង ក្នុងឆ្នាំ២០១២។
លោកបានបន្ថែមថា ការដឹកជញ្ជូននេះ ធ្វើឲ្យក្រុមហ៊ុនអាកាសចរណ៍ដ្រាហ្គនអ៊ែរ ប្រមូលបានប្រាក់ចំណូល៤០ភាគរយពីជើងហោះហើរចំនួន១០លើកក្នុងមួយសប្ដាហ៍ ដែលខ្លួនបានប្រតិបត្តិការរវាងទីក្រុងហុងកុង និងរាជធានីភ្នំពេញ។
លោកបានលើកឡើងថា ទំនិញដែលក្រុមហ៊ុនអាកាសចរណ៍ដ្រាហ្គនអ៊ែរ បាននាំចូលភាគច្រើនមកក្នុងប្រទេសកម្ពុជា គឺវត្ថុធាតុដើមសម្រាប់ផ្គត់ផ្គង់រោងចក្រកាត់ដេរ រីឯផលធៀបនៃការនាំចូល និងការនាំចេញ គឺវាមានតុល្យភាពនឹងគ្នា។
នាយកគ្រប់គ្រងរបស់ក្រុមហ៊ុនដឹកជញ្ជូនឌីអេចអេល (DHL Express) ដែលបដិសេធមិនព្រមបញ្ជេញឈ្មោះ ព្រោះគេមិនអនុញ្ញាតឲ្យលោកនិយាយជាមួយប្រព័ន្ធផ្សព្វផ្សាយ បានមានប្រសាសន៍ថា ក្រុមហ៊ុនកំពុងជួលជើងហោះហើររបស់ក្រុមហ៊ុនអាកាសចរណ៍បាងកក អ៊ែរវ៉េ (Bangkok Airways) ពីរលើកក្នុងមួយថ្ងៃមកកាន់រាជធានីភ្នំពេញ ដើម្បីដឹកជញ្ជូនទំនិញចូល និងចេញក្នុងប្រទេសកម្ពុជា មានការកើនឡើង១៣ភាគរយ នៅក្នុងការដឹកជញ្ជូនតាមផ្លូវអាកាស កាលពីឆ្នាំមុន បើប្រៀបធៀបទៅនឹងឆ្នាំ២០១១។
លោក ហ៊ីរ៉ូស៊ី ស៊ុយហ្សុយគី (Hiroshi Suzuki) នាយកប្រតិបត្តិ និងសេដ្ឋវិទូរបស់វិទ្យាស្ថានស្រាវជ្រាវធុរកិច្ចកម្ពុជា បានមានប្រសាសន៍ថា ទំនិញដែលបាននាំចេញតាមផ្លូវអាកាស ភាគច្រើនគឺជាសម្លៀកបំពាក់ និងវាយណភណ្ឌផ្សេងៗទៀត។
លោក ស៊ុយហ្សុយគី បានលើកឡើងថា “មានហេតុផលពីរ ដែលនាំឲ្យមានការរីកចម្រើនបែបនេះ។ ផលិតផលរបស់ពួកគេ គឺជាផលិតផលដែលមានទម្ងន់ស្រាល ប៉ុន្តែ មានតម្លៃខ្ពស់”។
លោក ស៊ុយហ្សុយគី មានប្រសាសន៍ថា ក្រុមហ៊ុនមួយចំនួនដូចជាក្រុមហ៊ុនអូអេនអេម (O&M Co. Ltd) ដែលផលិតកាបូប និងផលិតផលធ្វើពីស្បែកផ្សេងៗទៀត ដែលមានតម្លៃនៅលើទីផ្សារចន្លោះពី២០០ទៅ៣០០ដុល្លារ និងមានស្នាក់ការនៅក្នុងតំបន់សេដ្ឋកិច្ចពិសេសភ្នំពេញ មានលទ្ធភាពដឹកជញ្ជូនផលិតផលរបស់ខ្លួនតាមផ្លូវអាកាសបាន ពីព្រោះផលិតផលមានទម្ងន់ស្រាល តែ មានតម្លៃខ្ពស់នៅតាមទីផ្សារ ទើបអាចមានលទ្ធភាពបង់ថ្លៃឈ្នួលនៃការដឹកជញ្ជូនបាន។
លោក ហៃ ស៊ីណា ប្រធានរដ្ឋបាលរបស់ក្រុមហ៊ុន FST PP Co. Ltd ដែលជាក្រុមហ៊ុនជប៉ុនផលិតសម្លៀកបំពាក់ធ្វើអំពីសូតប្រពៃណីជប៉ុន ឈ្មោះគីម៉ូណូ ក៏មានទីតាំងនៅក្នុងតំបន់សេដ្ឋកិច្ចពិសេសភ្នំពេញដែរ បានមានប្រសាសន៍ថា តម្លៃបន្ថែមនៃការដឹកជញ្ជូនតាមផ្លូវអាកាស គឺវាអាស្រ័យទៅលើរយៈពេលទៅដល់គោលដៅយឺត ឬក៏ឆាប់។
លោក ហៃ ស៊ីណា បានមានប្រសាសន៍បន្ថែមថា “វាមានតម្លៃថ្លៃមែន ប៉ុន្ដែ ការនាំចេញតាមផ្លូវអាកាសទៅកាន់ប្រទេសជប៉ុន គឺចំណាយពេលតែមួយថ្ងៃប៉ុណ្ណោះ”។
លោក ហ៊ីរ៉ូស៊ី អឺម៉ាស្យូ (Hiroshi Uematsu) នាយកគ្រប់គ្រងតំបន់សេដ្ឋកិច្ចពិសេសភ្នំពេញ បានលើកឡើងតាមអុីម៉េលមួយ សំដៅទៅលើក្រុមហ៊ុន FST និងក្រុមហ៊ុនជប៉ុនមួយទៀត ដែលផលិតសម្លៀកបំពាក់ធ្វើអំពីសូតតាមប្រពៃណីជប៉ុនគីម៉ូណូ ដែរ គឺក្រុមហ៊ុន Proceeding Co. Ltd ដែលមានទីតាំងនៅតំបន់សេដ្ឋកិច្ចពិសេសដូចគ្នាថា “ផលិតផលរបស់ពួកគេ គឺជាផលិតផលមានតម្លៃខ្ពស់ ហេតុដូច្នេះហើយគេអាចរកប្រាក់ចំណេញបាន ថ្វីបើផលិតផលរបស់ខ្លួនត្រូវនាំចេញតាមផ្លូវអាកាស ដែលមានតម្លៃថ្លៃក៏ដោយ ហើយគេថែមទាំងចំណេញពេលវេលាក្នុងការដឹកជញ្ជូនទៀតផង”។
លោកបានបន្ថែមថា “រោងចក្រដែលត្រូវនាំចេញទំនិញរបស់ខ្លួនតាមផ្លូវអាកាសទាំងនេះ គឺដោយសារតែ ពួកគេចង់ចំណេញពេលវេលា”។
អ្នកវិនយោគិនមួយចំនួនលើកឡើងថា ការនាំទំនិញចេញតាមរយៈកំពង់ផែស្វយ័តក្រុងព្រះសីហនុ អាចចំណាយពេលជាច្រើនសប្ដាហ៍។ ពួកគេក៏បានលើកឡើងដែរថា ថ្លៃឈ្នួលនៃការដឹកជញ្ជូន ក៏មានតម្លៃថ្លៃជាងកន្លែងផ្សេងទៀតនៅក្នុងតំបន់ដែរ។
លោក ប្រីមបល បានមានប្រសាសន៍ថា “ប្រសិនបើផលិតផលនោះ គឺជាផលិតផល ដែលតម្រូវការជាបន្ទាន់ គេចាំបាច់ត្រូវតេដឹកជញ្ជូនទៅកាន់ទីផ្សារឲ្យទាន់ ពេលវេលា។
ហេតុដូច្នេះហើយ ការដឹកជញ្ជូនតាមផ្លូវអាកាសអាចជួយសម្រួលដល់តម្រូវការបន្ទាន់នេះបាន”។ លោកបានមានប្រសាសន៍បន្ដថា “សូម្បីតែនៅក្នុងវិស័យកាត់ដេរ ដែលមានផលិតផលទំនើបៗ និងទាន់សម័យ គេក៏ដឹកជញ្ជូនតាមផ្លូវអាកាសដែរ ប្រសិនបើមានតម្រូវការបន្ទាន់”៕ស៊ុយឈាង
(រាយការណ៍បន្ថែមដោយ សាំង សុឥន្ទរិទ្ធ)