សារស្វាគមន៍អ្នកទស្សនាគេហទំព័ររបស់កងរាជអាវុធហត្ថជាតិ កាលពីព្រឹកម្សិលមិញ គឺជារូបភាពរបស់បុរសបិទមុខ ហើយពាក់មួកកាតិបពណ៌ក្រហម។នៅពីលើក្បាលរបស់បុរសរូបនោះ មានសរសេរអក្សរៗធំថា “ គេលួចវាយប្រហារហើយ”។
គេហទំព័ររបស់តុលាការកំពូល ដែលជាគេហទំព័រទទួលរងការវាយប្រហារដែរ ក៏មានសារមួយនៅលើជ្រុងខាងលើផ្នែកខាងឆ្វេង ដែលសរសេរថា “ ទទួលរងការវាយប្រហារពី Hmei7”ដោយមានហត្ថលេខារបស់អ្នកវាយប្រហារតាមបណ្ដាញអុីនធើណិត ជាជនជាតិឥណ្ឌូណេស៊ីម្នាក់ ដែលអះអាងថា ធ្លាប់បានវាយប្រហារគេហទំព័រចំនួន៧០.០០០នៅទូទាំងពិភពលោក។
នៅពេលគេហទំព័រទាំងពីរ ត្រូវបានកែតម្រូវមកវិញ ប្រហែលជានៅវេលាថ្ងៃត្រង់ ការវាយប្រហារទៅលើគេហទំព័រ របស់រដ្ឋ គឺវាមិនមែនជារឿងថ្មី នៅក្នុងប្រទេសកម្ពុជានោះទេ។ អ្នកជំនាញមួយចំនួនបាននិយាយថាអ្នកវាយប្រហារតាមបណ្ដាញអុីនធើណិតទាំងអស់ អាចបន្ដវាយប្រហារគេហទំព័ររបស់រដ្ឋាភិបាលបានដោយងាយស្រួល ដោយសារតែកង្វះអ្នកជំនាញខាងផ្នែកព័ត៌មានវិទ្យា ដែលមានសមត្ថភាពការពារគេហទំព័ររបស់រដ្ឋដោយប្រើលេខសម្ងាត់ ដែលមានសុវត្ថិភាពនិងប្រើប្រព័ន្ធការពារដ៏គួរឲ្យទុកចិត្តបាន។
ពួកគេក៏បានលើកឡើងដែរថា ប្រសិនបើសន្ដិសុខតាមបណ្ដាញអុីនធើណិតមិនមានការពង្រឹងទេ រដ្ឋាភិបាលនឹងខូចកេរ្ដិ៍ឈ្មោះរបស់ខ្លួនជាមិនខាន ជាពិសេសនៅលើឆាកអន្ដរជាតិ។
លោក ភូ លីវូដ សមាជិកក្រុមប្រឹក្សានាយកនិងជាអតីតអគ្គលេខាធិការនៃអាជ្ញាធរជាតិទទួលបន្ទុកកិច្ចការអភិវឌ្ឍន៍វិស័យបច្ចេកវិទ្យាគមនាគមន៍ ព័ត៌មានវិទ្យា មានប្រសាសន៍ថា “ខ្ញុំគិតថា ឥឡូវនេះរដ្ឋាភិបាលបានទទួលស្គាល់សារៈសំខាន់នៃបញ្ហានេះហើយ ប៉ុន្ដែ នៅមិនមានជំនាញ និងការបណ្តុះបណ្តាលក្នុងវិស័យនេះនៅឡើយទេ ហេតុដូច្នេះហើយគេត្រូវចំណាយពេលវេលាថែមទៀត”។
លោក លីវូដ បានបន្ថែមថា “ប្រសិនបើប្រជាពលរដ្ឋផ្ដល់ព័ត៌មានរទៅឲ្យរដ្ឋាភិបាល ហើយព័ត៌មានទាំងនោះត្រូវបានគេលួចនោះប្រជាពលរដ្ឋ នឹងលែងមានទំនុកចិត្តលើរដ្ឋាភិបាលទៀតហើយ”។
កាលពីឆ្នាំមុន អ្នកវាយប្រហារតាមបណ្ដាញអុីនធើណិត បានវាយប្រហារគេហទំព័ររបស់ន គរបាលជាតិ ក្រសួងកសិកម្ម ក្រសួងឧស្សាហកម្ម រ៉ែ និងថាមពល និងក្រសួងកិច្ចការនារី។
លោក លីវូដ បានពន្យល់ថា ចាប់តាំងពីឆ្នាំ២០១០មក ក្រសួងនីមួយៗបានទទួលខុសត្រូវចំពោះសន្ដិសុខតាមបណ្ដាញអុីនធើណិតដោយខ្លួនឯងផ្ទាល់ ហើយគេហទំព័រនីមួយៗមានកន្លែងផ្ទុកទិន្ន័យផ្ទាល់ខ្លួន ដោយភាគច្រើនមិនមានប្រព័ន្ធការពារ ដែលគេបង្កើតឡើង ដើម្បីរក្សាសុវត្ថិភាពបណ្ដាញអុីនធើណិតនោះឡើយ។
លោកបានថ្លែងថា “ឥឡូវនេះ គេហទំព័រទាំងអស់មានកន្លែងផ្ទុកទិន្នន័យផ្សេងៗពីគ្នា ហើយមិនមានប្រព័ន្ធការពារឲ្យបានត្រឹមត្រូវនោះទេ ពីព្រោះគ្មាននរណាចេះប្រើរបៀបប្រព័ន្ធការពារនោះឡើយ”។ លោកបានបន្ថែមថា បន្ទាប់ពីមានរបាយការណ៍លើកដំបូងរបស់រដ្ឋាភិបាលអំពីការវាយប្រហារតាមអុីនធើណិត កាលពីឆ្នាំ២០០២ គេហទំព័រទាំងអស់បានប្រើកន្លែងផ្ទុកទិន្នន័យតែមួយ ដោយមានការពង្រឹងប្រព័ន្ធការពារជាប្រចាំ។
លោក លីវូដ បានលើកឡើងថា លោកឆ្ងល់ណាស់ថា ហេតុអ្វីបានជាគេសម្រេចផ្ដល់ស្វ័យភាពបន្ថែមចំពោះគេហទំព័រ ដែលគ្រប់គ្រងដោយរដ្ឋាភិបាលរួចទៅហើយ ប៉ុន្ដែ បែរជាឲ្យមកប្រើកន្លែងផ្ទុកទិន្នន័យផ្ទាល់ខ្លួនទៅវិញ។
អ្នកជំនាញខាងព័ត៌មានវិទ្យាមួយចំនួនបានលើកឡើងថា ប្រសិនបើអ្នកវាយប្រហារតាម បណ្ដាញអុីនធើណិតទាំងនោះអាចផ្លាស់ប្ដូរគេហទំព័ររបស់រដ្ឋាភិបាលបាន អ៊ីចឹងវាមានភាពងាយស្រួលសម្រាប់ពួកលួចមើលព័ត៌មានសម្ងាត់នៅក្នុងកន្លែងផ្ទុកទិន្នន័យដែលគ្រប់គ្រងដោយរដ្ឋ។
លោក ណូបឺត គ្លេន (Nobert Klein) អ្នកជំនាញខាងការអភិវឌ្ឍប្រព័ន្ធអុីនធើណិត ក្នុងប្រទេសកម្ពុជា បានមានប្រសាសន៍ថា “នៅពេលនរណាក៏អាចចូលទៅកាន់ប្រព័ន្ធសុវត្ថិភាពបាន អ៊ីចឹងវាមិនពិបាកចូលទៅកាន់ប្រព័ន្ធសុវត្ថិភាពផ្សេងទៀតនោះទេ។ ប្រសិនបើអ្នកអាចទទួលបានជោគជ័យលើកដំបូង អ្នកអាចប្រើវិធីសាស្ត្រដដែលចូលទៅកាន់ប្រព័ន្ធស្រដៀងគ្នាមួយទៀត”។
ជាការពិត កាលពីខែកញ្ញា គេហទំព័ររបស់ក្រសួងការបរទេសត្រូវបានគេវាយ ប្រហារ ហើយឯកសារចំនួន៥.០០០ច្បាប់ដែលទាំងឯកសារធ្វើលិខិតឆ្លងដែន និងសំណើសុំទិដ្ឋាការ ត្រូវគេលួចបានពីកន្លែងផ្ទុកទិន្នន័យរបស់រដ្ឋាភិបាល។
អ្នកវាយប្រហារតាមបណ្ដាញអុីនធើណិតដែលអះអាងទទួលខុសត្រូវចំពោះការវាយប្រហារនេះ បាននិយាយថា វាគឺជាការសងសឹកចំពោះការចាប់ខ្លួន និងការនិរទេសខ្លួនលោក ហ្គតហ្វីត ស្វាតហម វ៉ាក (Gottfrid Svartholm Warg) សហស្ថាបនិកគេហទំព័រផាយរ៉េតបេ ដែលជាគេហទំព័រចែករំលែកព័ត៌មានដោយសេរី។ តែរដ្ឋាភិបាលបានបដិសេធយ៉ាងដាច់អហង្ការថា មិនមានការវាយប្រហារណាមួយតាមបណ្ដាញអុីនធើណិតមកលើគេហទំព័ររបស់ខ្លួននោះទេ។
លោក អ៊ូ ផាណ្ណារិទ្ធ ប្រធានសាខានៃអង្គការក្រុមអ្នកឆ្លើយតបបន្ទាន់ផ្នែកព័ត៌មានវិទ្យាប្រចាំកម្ពុជា ដែលជាអង្គការអន្តរជាតិមួួយ ដើម្បីសម្របសម្រួលការឆ្លើយតបចំពោះអសន្ដិសុខរបស់បណ្ដាញអុីនធើណិត បានលើកឡើងថា អ្នកវាយប្រហារតាមបណ្ដាញអុីនធើណិតមានមធ្យោបាយជាច្រើន ដើម្បីវាយប្រហារគេហទំព័ររបស់រដ្ឋាភិបាល ដោយឆក់ឱកា សវាយប្រហារ នៅពេលខ្វះការពង្រឹងប្រសិទ្ធភាពជាប្រចាំ ឬវាយប្រហារកន្លែងផ្ទុកទិន្នន័យ ដែលមិនមានប្រព័ន្ធការពារត្រឹមត្រូវ និងមិនមានលេខសម្ងាត់ល្អ។
លោកបានមានប្រសាសន៍ថា “វាមិនមែនងាយដឹងថា នរណាជាអ្នកនៅពីក្រោយការវាយប្រហារនេះណាស់ ហើយមិនដឹងថា ពួកគេមកពីទីណានោះឡើយ ពីព្រោះវិធីសាស្ត្រនៃការវាយប្រហារមានសមត្ថភាពខ្ពស់ណាស់ក្នុងពេលបច្ចុប្បន្ន”។
លោក សុខ ហួត អ្នកគ្រប់គ្រងប្រចាំគេហទំព័ររបស់កងរាជអាវុធហត្ថមានប្រសាសន៍ថាមានអ្នកវាយប្រហារម្នាក់ បានវាយប្រហារតាមបណ្ដាញអុីនធើណិត កាលពីម្សិលមិញ ដោយសារកម្មវិធីរបស់គេហទំព័រកងរាជអាវុធហត្ថ ជាកម្មវិធីចាស់ប្រើប្រាស់បួនឆ្នាំមកហើយ។
លោកបានមានប្រសាសន៍បន្ថែមថា “យើងបានពង្រឹងប្រសិទ្ធភាពប្រព័ន្ធការពារទៅកាន់កម្មវិធីថ្មីមួយហើយ ហេតុដូច្នេះហើយវាគ្មានបញ្ហាអ្វីទៀតនោះទេ ឥឡូវនេះ។ លោកបន្តថា គ្មានទិន្នន័យណាមួយត្រូវអ្នកវាយប្រហារតាមបណ្ដាញអុីនធើណិតទាញយកនោះទេ។
យោងតាមលោក បឺណាត អាល់ផុនសូ (Bernard Alphonso) អ្នកពិគ្រោះយោបល់ឯករាជ្យផ្នែកសន្ដិសុខតាមបណ្ដាញអុីនធើណិតប្រចាំប្រទេសកម្ពុជា បានឲ្យដឹងថា ការវាយប្រហារភាគច្រើន ត្រូវបានធ្វើឡើងដោយមិនឲ្យគេដឹងខ្លួននោះឡើយ។
លោកបានមានប្រសាសន៍ថា “យើងត្រូវតែរកវិធីដោះស្រាយគ្រោះថ្នាក់តាមបណ្ដាញអុីនធើណិតបន្ដទៅទៀត។ ការវាយប្រហារតាមគេហទំព័រ គឺវាកើតឡើងហើយកើតឡើងទៀត។ អ្នកវាយប្រហារតាមបណ្ដាញអុីនធើណិត ដែលពោរពេញទៅដោយភាពគ្រោះថ្នាក់បានវាយប្រហារគេហទំព័ររាប់ម៉ឺនទូទាំងពិភពលោក ជារៀងរាល់ឆ្នាំ”៕ ស៊ុយឈាង