ប៉ារីស-ទីភ្នាក់ងាររបស់អង្គការសហប្រជាជាតិ (United Nations) បានឲ្យដឹងកាលពីថ្ងៃច័ន្ទថា ប្រជាជនអត់មានការងារធ្វើមានចំនួនជាង១៩៧លាននាក់នៅទូទាំងសាកលលោក ហើយ៣៩លាននាក់ផ្សេងទៀតកំពុងស្វះស្វែងរកការងារធ្វើ។ ទីភ្នាក់ងារមួយនេះបានព្រមានថា កម្មវិធីតុល្យភាពថវិការបស់រដ្ឋាភិបាល បានបង្កផលប៉ះពាល់ដល់អនិកម្មភាព (ភាពមានការងារធ្វើ) ហើយប្រហែលជានឹងនាំឲ្យមានការបាត់បង់ការងារធ្វើកាន់តែច្រើន ក្នុងរយៈពេលឆាប់ៗខាងមុខ។
អង្គការពលកម្មអន្តរជាតិ (International Labor Organization) បានឲ្យដឹងតាមរយៈរបាយការណ៍ពិសេសរបស់ខ្លួនថា ដោយសារតែសាកលលោកជួបបញ្ហាកំណើនសេដ្ឋកិច្ច អស់រយៈពេលប្រាំឆ្នាំកន្លងមក បន្ទាប់ពីវិបត្តិហិរញ្ញវត្ថុបានទប់ល្បឿនកំណើនសេដ្ឋកិច្ចភាគច្រើននៅលើសាកលលោក ចំនួនប្រជាជនអត់មានការងារធ្វើត្រូវបានរំពឹងថា នឹងកើនឡើង៥,១លាននាក់នៅក្នុងឆ្នាំនេះ ដល់ជាង២០២លាននាក់។ លើសពីនេះទៅទៀត អង្គការនេះបានព្យាករថា ចំនួនប្រជាជនអត់មានការងារធ្វើ នឹងកើនឡើងបីលាននាក់ទៀត នាឆ្នាំក្រោយ។
អត្រានិកម្មភាព (ចំនួនប្រជាជនអត់មានការងារធ្វើគិតជាភាគរយ) នៅបណ្តាប្រទេសអភិវឌ្ឍន៍ ដែលមាន៧,៨ភាគរយនៅសហរដ្ឋអាមេរិក និង១១,៨ភាគរយនៅតំបន់ចាយប្រាក់អឺរ៉ូ បានដាក់សម្ពាធលើតម្រូវការនៅក្នុងសេដ្ឋកិច្ច និងទាញកំណើនសេដ្ឋកិច្ចឲ្យដើរថយក្រោយ។ អង្គការរូបិយវត្ថុអន្តរជាតិ (IMF) ផលិតផលក្នុងស្រុកសរុប (ជីឌីភី) នៅទូទាំងសាកលលោក ប្រហែលជាកើនឡើងក្នុងរង្វង់៣,៦ភាគរយសម្រាប់ឆ្នាំនេះ។ អត្រានេះស្ថិតនៅក្រោមអត្រា ដែលអង្គការនេះបានព្យាករកាលពីមុន។
ឆ្លើយតបទៅនឹងបញ្ហានិកម្មភាពកាលពីថ្ងៃសប្តាហ៍មុន លោកស្រី គ្រីស្ទីន ឡាហ្កាដ (Christine Lagarde) ជំរុញឲ្យរដ្ឋាភិបាលនានា ផ្តោតការយកចិត្តទុកដាក់ទៅលើ “ កំណើនដែលអាចបង្កើតការងារជាក់ស្តែងនៅក្នុងសេដ្ឋកិច្ច”។ លោកស្រីបានលើកឡើងនៅក្នុងពិធីសន្និសីទសារព័ត៌មាននារដ្ឋធានីវ៉ាស៊ីនតោន សហរដ្ឋអាមេរិកថា “ យើងបានបញ្ឈប់ដំណើរធ្លាក់ចុះហើយ”។ លោកបានព្រមានអំពីហានិភ័យចំពោះកំណើនសេដ្ឋកិច្ច ដែលអាចកើតចេញពីស្ថានភាពស្មុគស្មាញនៅតំបន់អឺរ៉ុប និងស្ថានភាពលំបាកនៃកិច្ចចរចាថវិកានៅសហរដ្ឋអាមេរិកថា “យើងមិនគួរគេចចេញពីដំណើរថយក្រោយនេះទេ ហើយស្ថានភាពមិនទាន់ធូរស្រាលនៅឡើយទេ”។
អង្គការពលកម្មអន្តរជាតិ បានរកឃើញថាអតុល្យភាពម៉ាក្រូសេដ្ឋកិច្ច “ ត្រូវបានរុញច្រានឲ្យធ្លាក់ចូលទៅក្នុងទីផ្សារការងារ ក្នុងកម្រិតមួយគួរឲ្យព្រួយបារម្ភ”។ ដោយសារតែតម្រូវការសរុបធ្លាក់ចុះខ្លាំង អនិកម្មភាព “បានទទួលរងផលប៉ះពាល់អវិជ្ជមានពីកម្មវិធីរឹតត្បិតសារពើពន្ធ នៅប្រទេសជាច្រើន។ កម្មវិធីទាំងនេះជារឿយៗ មានទំនាក់ទំនងទៅនឹងបញ្ហាធ្លាក់ចុះនៃចំនួនការងារ និងប្រាក់ឈ្នួលនៅក្នុងសេដ្ឋកិច្ច និងបង្កផលប៉ះពាល់ដល់ទីផ្សារការងារ”។
បញ្ហាកើតឡើងកាន់តែច្រើន នៅពេលរដ្ឋាភិបាលនានាបានព្យាយាមទប់ទល់ផលប៉ះពាល់កើតចេញពីវិបត្តិហិរញ្ញវត្ថុ តាមរយកម្មវិធីជំរុញសារពើពន្ធ ខណៈដែលវិធានការរឹតបន្តឹងថវិកានៅក្នុងប្រទេសចំនួន ហាក់ដូចជាជំរុញដំណើរថយក្រោយនៃសេដ្ឋកិច្ចបន្ថែមទៀត។
អង្គការពលកម្មអន្តរជាតិ បានរកឃើញទៀតថា ផលប៉ះពាល់អវិជ្ជមាន នៃដំណើរត្រឡប់ក្រោយនៃសេដ្ឋកិច្ចនៅតំបន់អឺរ៉ុប បានរាលដាលទៅតំបន់ផ្សេងៗទៀត តាមរយៈ “ឥទ្ធិពលសាយភាយ” ដែលភាគច្រើនសាយភាយតាមរយៈយន្តការនៃតម្រូវការទំនិញបរទេសធ្លាក់ចុះ ហើយកើតឡើងតាមរូបភាពនៃរំហូរចូលនៃមូលធនងាយធ្លាក់ចុះនៅតំបន់នានាដូចជា នៅតំបន់អាមេរិកឡាទីន និងតំបន់ការីបៀនជាដើម។ ឥទ្ធិពលទាំងនេះបានបន្សល់ទុក នូវជម្រើសលំបាកៗ ឲ្យក្រុមអ្នកបង្កើនតគោលនយោបាយក្នុងការដោះស្រាយបញ្ហាសេដ្ឋកិច្ច សំដៅសម្រេចបានកំណើនខ្ពស់វិញ។
អង្គការពលកម្មអន្តរជាតិ ក៏បានឲ្យដឹងបន្ថែមទៀតថា ការដែលអត្រាបង្កើតការងារ
មានល្បឿនយឺតក្រោយពេលវិបត្តិហិរញ្ញវត្ថុកើតឡើង គឺជារឿងធម្មតា ក៏ប៉ុន្តែមានការប្តេជ្ញាខ្លាំងក្លារយៈពេលខ្លី សម្រាប់បណ្តាប្រទេសអភិវឌ្ឍន៍ ដោយបានចាប់ផ្តើមកាលពីឆ្នាំ២០១០។ ពេលវេលានេះបានកន្លងផុតទៅហើយ ហើយជាថ្មីម្តងទៀត “សកម្មភាពកែលម្អប្រព័ន្ធការងារ ទំនងជាកើតឡើង មុនពេលកំណើនខ្ពស់ជាងមុនអាចត្រូវបានរំពឹងថា នឹងកើតឡើងនៅលើទីផ្សារការងារ”។
អង្គការពលកម្មអន្តរជាតិ បានឲ្យដឹងបន្ថែមទៀតថា ប្រជាជនកាន់តែច្រើនឡើងបានចាកចេញពីទីផ្សារការងារជាមួយគ្នា ជាពិសេសនៅបណ្តាប្រទេសអភិវឌ្ឍន៍ ជាហេតុបណ្តាលឲ្យអត្រាចូលរួមក្នុងកម្លាំងពលកម្មធ្លាក់ចុះ “ គួរឲ្យកត់សម្គាល់” ហើយអាចជំរុញឲ្យវិបត្តិការងារកើតឡើងទៀតផង។
ទីភ្នាក់ងារអង្គការសហប្រជាជាតិមួយនេះ បានធ្វើការកត់សម្គាល់ថា អនុបាតរវាងអនិកម្មភាព និងចំនួនប្រជាជនសរុបបានធ្លាក់ចុះរហូតដល់ទៅ៤ភាគរយ ឬក៏ច្រើនជាងនេះ
នៅតំបន់មួយចំនួន ហើយសូម្បីតែនៅតំបន់ឬប្រទេសដែលអត្រានិកម្មភាពបានថយចុះបន្តិចក៏ដោយ អត្រាចូលរួមក្នុងកម្លាំងពលកម្ម “មិនទាន់បានរើបឡើងវិញនៅឡើយទេ”៕ សុធា