ជនរងគ្រោះ និងមន្ត្រីនគរបាលបានឲ្យដឹងកាលពីម្សិលមិញថាមន្ត្រីនគរបាលពីរនាក់ត្រូវបានចាប់ខ្លួន កាលពីម្សិលមិញពីបទបាញ់បុរសអាយុ២៩ឆ្នាំម្នាក់ ឲ្យរងរបួសធ្ងន់ដោយសារតែបុរសនេះមិនព្រមសូកលុយពួកគេនៅឯបុ៉ស្តិ៍ត្រួតពិនិត្យតាមចិញ្ចើមផ្លូវនៅក្នុងខណ្ឌឫស្សីកែវរាជធានីភ្នំពេញកាលពីយប់ថ្ងៃអាទិត្យ។
នៅពេលកំពុងសម្រាកលើគ្រែក្នុងមន្ទីរពេទ្យកាល់ម៉ែតដែលនៅទីនោះគ្រូពេទ្យបានវះយកក្បាលគ្រាប់កាំភ្លើងចេញពីទ្រូងខាងឆ្វេង ខាងលើបេះដូងបន្ដិចនោះលោកឌីវិចិត្របានរៀបរាប់ពីព្រឹត្តិការណ៍ ដែលនាំឲ្យនគរបាលខឹង និងបាញ់គាត់។
លោក វិចិត្របាននិយាយថាលោកកំពុងបើកបររថយន្ដវែ៉ន ដោយមានប្រពន្ធ និងប្អូនប្រុសជិះជាមួយដើម្បីដឹកម្ទេសពីភ្នំពេញទៅខេត្តកំពង់ឆ្នាំងនៅប្រហែលម៉ោង១១ និង៤៥នាទីយប់ស្រាប់តែពេលនោះនគរបាលដែលដាក់ប៉ុស្ដិ៍ត្រួតពិនិត្យតាមបណ្ដោយផ្លូវលេខ៥៩៨ ក្នុងសង្កាត់ស្វាយប៉ាកបានទារលុយសំណូក ជាថ្នូរឲ្យគាត់អាចបន្ដដំណើរទៅមុខទៀតបាន។
លោក វិចិត្របាននិយាយថា “នគរបាលបានជេរម្ដាយខ្ញុំដូច្នេះខ្ញុំក៏មិនឲ្យលុយទៅពួកគេទេហើយមន្ត្រីនគរបាលពីរនាក់ក៏បានដេញតាមរថយន្ដរបស់ខ្ញុំ ហើយមន្ត្រីនគរបាលម្នាក់ក៏បានយកដុំថ្មវាយកញ្ចក់ចំហៀងសម្រាប់មើលក្រោយរបស់ខ្ញុំ”។
លោកវិចិត្រ បានមានប្រសាសន៍បន្ដទៀតថា “ពេលខ្ញុំចេញពីរថយន្ដ ដើម្បីពិនិត្យមើល [ការខូចខាត] មន្ត្រីនគរបាលម្នាក់ក៏បាញ់ខ្ញុំមួយគ្រាប់។ ពេលនេះខ្ញុំឈឺខ្លាំងណាស់ដូច្នេះខ្ញុំមិនអាចរៀបរាប់លម្អិតបានទៀតទេក៏ប៉ុន្ដែខ្ញុំស្គាល់មុខមន្ត្រីនគរបាល ដែលបានបាញ់ខ្ញុំនោះហើយ”។
អ្នកស្រីវ៉ាតស្រីលក្ខណ៍អាយុ២០ឆ្នាំ ត្រូវជាប្រពន្ធរបស់លោកវិចិត្រដែលបានឃើញមន្ត្រីនគរបាលបាញ់ប្ដីរបស់ខ្លួននៅពេលនោះបានរៀបរាប់ពីរបៀប ដែលមន្ត្រីនគរបាលទាំងពីរនាក់បាញ់ប្រហាររួចជិះម៉ូតូគេចខ្លួនបាត់ដោយទុកប្ដីអ្នកស្រីដែលរងរបួសនៅលើផ្លូវថា“មន្ត្រីនគរបាលបានប្រើកាំភ្លើងខ្លីបាញ់ប្ដីរបស់ខ្ញុំ នៅចម្ងាយប្រហែល១០ម៉ែត្រ បន្ទាប់មកពួកគេក៏បើកម៉ូតូចេញទៅ ហើយប្អូនថ្លៃរបស់ខ្ញុំ និងខ្ញុំក៏បានដឹកប្ដីរបស់ខ្ញុំមកកាន់មន្ទីរពេទ្យកាល់ម៉ែត”។
កាលពីល្ងាចម្សិលមិញលោកឧត្តមសេនីយ៍ឯកជួនសុវណ្ណស្នងការនគរបាលរាជធានីភ្នំពេញបានមានប្រសាសន៍ដោយមិនលម្អិតថា“យើងបានចាប់ខ្លួនជនសង្ស័យពីរនាក់ហើយ។ពួកគេគឺជានគរបាល។ ពេលនេះយើងកំពុងតែសួរចម្លើយពួកគេ”។
លោកឧត្ដមសេនីយ៍ឯកសុខផលអគ្គស្នងការរងនគរបាលជាតិ បានបដិសេធមិនធ្វើអត្ថាធិប្បាយពាក់ព័ន្ធនឹងករណីបាញ់ប្រហារដ៏ឃោរឃៅនេះទេ៕
(រាយការណ៍បន្ថែមដោយ Ben Woods)
ប្រែសម្រួលដោយហមសុផាណ្ណា