កាលពីម្សិលមិញ មន្ត្រីមកពីក្រសួងមហាផ្ទៃ និងមកពីស្ថានទូតបារាំងបានអញ្ជើញទៅមន្ទីរពេទ្យកាល់ម៉ែត ក្នុងរាជធានីភ្នំពេញ ដើម្បីពិនិត្យសាកសពស្ត្រីជនជាតិបារាំងអាយុ២៥ឆ្នាំដែលត្រូវបានគេប្រទះឃើញស្លាប់នៅក្នុងក្រុងកំពត កាលពីថ្ងៃអាទិត្យ។
ជនរងគ្រោះឈ្មោះអូហ្វេលីប៊េកនី (Ophelie Begnis) ដែលបានស្នាក់នៅផ្ទះសំណាក់ឡេម៉ង់ហ្គីយេនៅក្នុងស្រុកទឹកឈូ ខេត្តកំពតនិងត្រូវបានគេឃើញនាងជាលើកចុងក្រោយនៅពេលនាងជិះកង់ចេញពីផ្ទះសំណាក់នេះនៅពេលរសៀលថ្ងៃសៅរ៍។ សាកសពរបស់នាងត្រូវបានគេប្រទះឃើញនៅថៃ្ងបន្ទាប់ដោយខ្លួនអាក្រាតនិងបានរសាត់មកមាត់ព្រែកនៅក្នុងសង្កាត់អណ្ដូងខ្មែរ ក្រុងកំពត ដោយមានស្នាមរបួសនៅក្បាល និងដៃ។សាកសពស្ត្រីរូបនេះត្រូវបានគេបញ្ជូនមកមន្ទីរពេទ្យកាល់ម៉ែត នៅថ្ងៃបន្ទាប់ ។
លោកហេងសៀនប្រធានគ្រប់គ្រងកន្លែងតម្កល់សពនៅក្នុងមន្ទីរពេទ្យកាល់ម៉ែត បានមានប្រសាសន៍ថា “ ព្រឹកនេះ នគរបាល មកពីក្រសួងមហាផ្ទៃ និងមន្ត្រីមកពីស្ថានទូតបារាំងបានអញ្ជើញមកកន្លែងតម្កល់សព ដើម្បីពិនិត្យសាកសពនេះ។ខ្ញុំមិនដឹងអំពីលទ្ធផល នៃការពិនិត្យសាកសពនេះទេ” ។
លោក អឹុង សុផល នាយរងការិយាល័យនគរបាលផ្នែកកោសល្យវិច័យរបស់ក្រសួងមហាផ្ទៃបានបញ្ជាក់អំពីការពិនិត្យសាកសពនេះ ប៉ុន្តែ បានបដិសេធ មិនធ្វើអត្ថាធិប្បាយទេរីឯតំណាងស្ថានទូតបារាំងវិញគ្រាន់តែថ្លែងថាការសើុបអង្កេតកំពុងដំណើរការ។
លោក អិុន ជីវ៉ា ស្នងការរងនគរបាលខេត្តកំពតបានមានប្រសាសន៍ថានៅពេលនេះ នគរបាលមិនទាន់រកឃើញជនសង្ស័យណាមួយនោះទេ និងមិនទាន់បានកំណត់ទីកន្លែងប្រព្រឹត្តអំពើឧក្រិដ្ឋនេះនៅឡើយដែរ។
កាលពីម្សិលមិញស្ថានទូតបារាំងបានចេញសេចក្ដីថ្លែងការណ៍មួយដោយស្តីបន្ទោសការចេញផ្សាយរបស់សារព័ត៌មានក្នុងស្រុកមួយចំនួនដែលផ្សព្វផ្សាយរូបភាពជាច្រើនរបស់ជនរងគ្រោះនេះ។
សេចក្ដីថ្លែងការណ៍នេះបានលើកឡើងថា“ស្ថានទូតបារាំង សូមសម្ដែងការសោកស្ដាយជាថ្មីម្ដងទៀត ចំពោះសារព័ត៌មានខ្មែរ និងគេហទំព័រមួយចំនួន ដែលបានផ្សព្្វផ្សាយរូបថតជាច្រើនដោយរំលោភសេចក្ដីថ្លៃថ្នូររបស់ឯកជននិងមនុស្សជាតិហើយផ្ទុយទៅនឹងក្រមសីលធម៌វិជ្ជាជីៈវសារព័ត៌មាន”។
សេចក្ដីថ្លែងការណ៍នេះបានលើកឡើងទៀតថា “ ស្ថានទូតបារាំងបានអំពាវនាវម្ដងហើយម្ដងទៀតសូមឲ្យបញ្ឈប់នូវការផ្សព្វផ្សាយបែបនេះ ដែលធ្វើឲ្យក្រុមគ្រួសារជនរងគ្រោះមានការឈឺចាប់ហើយវាផ្ទុយទៅនឹងតម្លៃសារព័ត៌មាន” ។
លោក មឿន ឈានណារិទ្ធនាយកវិទ្យាស្ថានកម្ពុជាសម្រាប់ការសិក្សាផ្នែកសារព័ត៌មានមានប្រសាសន៍ថា សារព័ត៌មានក្នុងស្រុកមានបំណង“ចង់ធ្វើៗ”ឲ្យស្របតាមវិជ្ជាជីវៈរបស់ខ្លួនដើម្បីទាក់ទាញអ្នកអានឲ្យបានច្រើន។ ប៉ុន្តែបណ្ដាអ្នកកាសែតខ្មែរ ត្រូវតែរក្សាបទដ្ឋានវិជ្ជាជីវៈឲ្យបានខ្ពស់ថែមទៀត។
លោកមឿនឈានណារិទ្ធ មានប្រសាសន៍ថា “ប្រសិនបើអ្នកកាសែត មិនគោរពក្រមសីលធម៌ ដោយខ្លួនឯងទេនោះ មន្ត្រីរដ្ឋាភិបាលនឹងព្យាយាមតម្រែតម្រង់យើង។យើងដឹងថារឿងណា ដែលមិនគួរផ្សព្វផ្សាយ ដោយសារសេចក្ដីគោរពនិងរឿងផ្ទាល់ខ្លួនរបស់ជនរងគ្រោះហើយយើងដឹងថា រូបថតណា
ដែលយើងមិនគួរផ្សព្វផ្សាយ”៕
ប្រែសម្រួលដោយ ស៊ុំ សុខភុំ