សាច់ញាតិ មិត្តភក្តិ និងកម្មកររោងចក្រកាត់ដេរប្រហែល១០០នាក់រួមជាមួយនឹងព្រះសង្ឃ៥០អង្គ បានជួបជុំគ្នានៅជិតវត្តលង្កា
កាលព្រឹកថ្ងៃសុក្រ ដើម្បីសម្ពោធដាក់តាំងរូបសំណាកជាផ្លូវការដែលសាងសង់ឡើង ដើម្បីរំឭកដល់លោក ជា វិជ្ជា អតីតមេដឹកនាំសហជីពសេរីកម្មករដែលត្រូវឃាតករបាញ់ស្លាប់។
រូបសំណាកកម្ពស់១,៦៨ម៉ែត្រដែលភ្ជាប់នៅលើជើងទម្រនេះត្រូវបានគ្របក្រណាត់ក្រហមនៅមុនការសម្ពោធដាក់តាំងបង្ហាញជាផ្លូវការហើយបន្ទាប់ពីនោះមកអ្នកកាន់ទុក្ខបានតុបតែងលម្អដោយកម្រងផ្កាម្លិះ។
រូបសំណាកនេះគឺជារូបអតីតមេដឹកនាំសហជីពដ៏មានប្រជាប្រិយភាព ដែលត្រូវបានឃាតករបាញ់សម្លាប់ក្នុងចម្ងាយតែ
ប៉ុន្មានម៉ែត្រប៉ុណ្ណោះ កាលពីថ្ងៃទី២២ខែមករា ឆ្នាំ២០០៤ ដោយដៃស្តាំកាន់ក្បាលីក្រូ ហាក់ដូចជាលោកនិយាយទៅកាន់អ្នកចូលរួមអ៊ីចឹង។
ដោយសាររូបសំណាកដែលធ្វើពីថ្មនេះមិនសូវដូចលោក ជា វិជ្ជា នោះ គេបានព្យាយាមជាលើកទី២ដើម្បីសាងសង់រូបសំណាកនេះឲ្យដូចរូបលោក ជា វិជ្ជា ព្រោះរូបសំណាកលើកទី១ឆ្លាក់ដោយជាងចម្លាក់នៅខេត្តសៀមរាប ត្រូវបានដូរចេញវិញ បន្ទាប់ពីសហជីពសេរីកម្មករបានលើកឡើងថា ខ្លួនមិនពេញចិត្តនឹងរូបសំណាកនេះ។
លោក ជា មុនី ដែលត្រូវបានតែងតាំងជាប្រធានសហជីពសេរីកម្មករ បន្ទាប់ពីការស្លាប់បងប្រុសរបស់លោកកាលពីឆ្នាំ២០០៤នោះ មានប្រសាសន៍ថា “ ថ្ងៃនេះខ្ញុំមានកិត្តិយសណាស់ដោយបានចូលរួមក្នុងពិធីប្រោះព្រំ និងសម្ពោធដាក់តាំងជាផ្លូវការនូវរូបសំណាកលោក ជា វិជ្ជា អតីត មេដឹកនាំសហជីពសេរីកម្មករនៃប្រទេសកម្ពុជា”។
អ្នកដែលបានចូលរួមពិធីរំឭកនៅថ្ងៃនោះបានលើកឡើងថា រូបសំណាកដែលសាងសង់អស់ទឹកប្រាក់ចំនួន៧.០០០ដុល្លារ ហើយដែលសាលារាជធានីភ្នំពេញបានចេញចំនួន៥.០០០ដុល្លារនោះ ជានិមិត្តរូបនៃភាពក្លាហាននិងមេត្តាករុណា ដែលលោក ជា វិជ្ជា
បានធ្វើក្នុងការទាមទារសិទ្ធិសម្រាប់កម្មករ ជាការទាមទារដែលលោកបានទទួលជ័យជម្នះក្នុងការដំឡើងប្រាក់ខែអប្បបរមាដែលមានជាលើកដំបូងសម្រាប់កម្មករកាត់ដេរ។
អ្នកស្រី យន់ ចាន់ អាយុ៤០ឆ្នាំមកពីខណ្ឌមានជ័យ រាជធានីភ្នំពេញ មានប្រសាសន៍ថា អ្នកស្រីបានឈប់ធ្វើការមួយព្រឹកនៅរោងចក្រកាត់ដេរ ដើម្បីមកចូលរួមពិធីនេះ។
អ្នកស្រីបានមានប្រសាសន៍ថា “ ខ្ញុំចង់មកគោរពដល់រូបសំណាកនេះ ពីព្រោះ [លោក ជា វិជ្ជា] បានជួយយើងក្នុងការទាមទារសុំដំឡើងប្រាក់ខែ”។
កម្មករម្នាក់ទៀត ឈ្មោះ ពួន ស្រីមុំ អាយុ៤១ឆ្នាំ បាននិយាយថា លោក ជា វិជ្ជា ជាមនុស្សក្លាហាននិងស្លូតបូត ដែលបានពុះពារតស៊ូធ្វើឲ្យអនាគតកម្មករខ្មែរបានប្រសើរជាងមុន។
អ្នកស្រី ស្រីមុំ បាននិយាយខណៈអ្នកស្រីបានដឹកដៃកូនប្រុសអាយុ៣ឆ្នាំថា “ ខ្ញុំនៅតែចងចាំក្នុងចិត្តជានិច្ចតាំងពីខ្ញុំបានជួបគាត់លើកដំបូង។ គាត់បានហុចខិត្តប័ណ្ណឲ្យខ្ញុំដែលខិត្តប័ណ្ណនោះអំពាវនាវឲ្យផ្តល់ផលប្រយោជន៍បន្ថែមទៀតដល់កម្មករ។ ខ្ញុំមានមោទនភាពចំពោះគាត់ណាស់”។
ហើយខណៈដែលបុរសពីរនាក់ ឈ្មោះ ប៊ន សំណាង អាយុ៣២ឆ្នាំ និង សុខ សំអឿន អាយុ៤២ឆ្នាំ ដែលបានអនុវត្តទោសជាប់ពន្ធនាគាររយៈពេល២០ឆ្នាំពីបទជាប់ពាក់ព័ន្ធក្នុងអំពើឃាតកម្មនេះ អង្គការសិទ្ធិមនុស្សជាតិ និងអន្តរជាតិ និងក្រុមគ្រួសារផ្ទាល់របស់
លោក ជា វិជ្ជា បានអះអាងថា បុរសទាំងពីរនាក់នេះត្រូវគេទម្លាក់កំហុសពីបទសម្លាប់នេះ ហើយថា ឃាតករពិតប្រាកដកំពុងរត់គេចខ្លួននៅឡើយ។
អ្នកស្រី ស្រីមុំ និយាយដល់ ប៊ន សំណាងនិង សុខ សំអឿន ថា “ ពួកគេទាំងពីរនាក់គឺជាជនរងគ្រោះ”។ លោក ជា មុនី បានយល់
ស្របអ៊ីចឹងដែរ។
លោក ជា មុនី បានមានប្រសាសន៍នៅពិធីសម្ពោធដាក់តាំងរូបសំណាកនេះថា“ សហជីពសេរីកម្មករ និងខ្លួនខ្ញុំផ្ទាល់សូមស្នើឲ្យរដ្ឋាភិបាលស៊ើបអង្កេតដើម្បីស្វែងរកឃាតករពិត ដែលបានសម្លាប់លោក ជា វិជ្ជា ឲ្យមកទទួលទោសតាមច្បាប់ ពីព្រោះ ប៊ន សំណាង និង សុខ សំអឿន មិនមែនជាឃាតករពិតដែលបានសម្លាប់លោក ជា វិជ្ជា ឡើយ”៕
ប្រែសម្រួលដោយ សោម សារុន