ដោយនៅសល់តែបួនថ្ងៃទៀតប៉ុណ្ណោះសម្រាប់ឲ្យគណបក្សនយោបាយនានាទៅចុះឈ្មោះ ដើម្បីចូលរួមប្រកួតប្រជែងក្នុងការបោះឆ្នោតជ្រើសតាំងតំណាងរាស្ត្រ ក្រុមមន្ត្រីមកពីគណបក្សសង្គ្រោះជាតិ ដែលជាគណបក្សប្រឆាំង កាលពីម្សិលមិញ បានផ្តល់គំនិតផ្សេងៗគ្នាអំពីថា តើគណបក្សនេះនឹងទៅចុះឈ្មោះឲ្យបានមុនថ្ងៃទី១៣ ខែឧសភា ឬអត់។
ខណៈដែលលោក យឹម សុវណ្ណ អ្នកនាំពាក្យរបស់គណបក្សសង្គ្រោះជាតិបានលើកឡើងថា គណបក្សមិនទាន់សម្រេចថា តើខ្លួននឹងទៅចុះឈ្មោះ ឬយ៉ាងណានោះ លោក កឹម សុខា អនុប្រធានគណបក្សសង្គ្រោះជាតិ បានមានប្រសាសន៍ថា គណបក្សនេះនឹងទៅចុះឈ្មោះជាមួយគណៈកម្មាធិការជាតិរៀបចំការបោះឆ្នោត បន្ទាប់ពីពិនិត្យមើលបញ្ជីឈ្មោះបេក្ខជនរបស់គណបក្ស ដើម្បីសម្រេចថា តើត្រូវដាក់បេក្ខជនរបស់ខ្លួនឲ្យឈរឈ្មោះនៅមណ្ឌលមួយណា។ លោកស្រី មូរ សុខហួរ សមាជិកសភារបស់គណបក្សសង្គ្រោះជាតិបានផ្តល់ទស្សនប្រកបដោយសុទិដ្ឋិនិយមជាង ដោយលោកស្រីលើកឡើងថា គណបក្ស
សង្គ្រោះជាតិ មានផែនការទៅចុះឈ្មោះនៅថ្ងៃនេះ។
នៅពេលសួរថា តើគណបក្សសង្គ្រោះជាតិនឹងទៅចុះឈ្មោះឲ្យបានមុនថ្ងៃទី១៣ ខែឧសភា ឬយ៉ាងណានោះ លោក យឹម សុវណ្ណបានឆ្លើយតបថា “ យើងកំពុងតែសម្រេច យើងនៅមានពេលទៀត។ ពេលនេះ យើងកំពុងយកចិត្តទុកដាក់ចំពោះការទាមទារពីរចំណុច គឺការកែទម្រង់គណៈកម្មាធិការជាតិរៀបចំការបោះឆ្នោត និងធ្វើបញ្ជីឈ្មោះបោះឆ្នោតថ្មី”។ លោកបន្ថែមថា “ ការបោះឆ្នោតដោយសេរី និងយុត្តិធម៌ គឺសំខាន់ជាងបេក្ខជន”។
ក្នុងឱកាសជួបជុំគ្នានៅសួនសេរីភាពក្នុងរាជធានីភ្នំពេញ កាលពីថ្ងៃទី២៤ ខែមេសា លោក កឹម សុខា បានដាក់ញត្តិមួយឲ្យទៅគណៈកម្មាធិការជាតិរៀបចំការបោះឆ្នោតនៅចំពោះមុខអ្នកគាំទ្ររាប់ពាន់នាក់ ដោយទាមទារឲ្យដោះស្រាយបញ្ហាផ្សេងៗ ដូចជាការពិនិត្យបញ្ជីឈ្មោះបោះឆ្នោតនៅក្នុងប្រទេស
ឡើងវិញ សមភាពក្នុងការផ្សព្វផ្សាយគោលនយោបាយបក្សនៅតាមទូរទស្សន៍ និងសុំឲ្យលោក សម រង្ស៊ី ប្រធានគណបក្សសង្គ្រោះជាតិបានវិលត្រឡប់មកកម្ពុជាវិញ ដើម្បីចូលរួមប្រកួតប្រជែងក្នុងការបោះឆ្នោត។
លោក សម រង្ស៊ី កំពុងរស់នៅបែបនិរទេសខ្លួនឯងនៅក្នុងទីក្រុងប៉ារីស ប្រទេសបារំាងដើម្បីគេចពីការផ្តន្ទាទោសឲ្យជាប់ពន្ធនាគាររយៈពេល១១ឆ្នាំ ដែលត្រូវបានសម្រេចក្នុងឆ្នាំ២០០៩។
លោក កឹម សុខា បានលើកឡើងកាលពីម្សិលមិញថា ដោយសារលោក សម រង្ស៊ី នៅក្រៅប្រទេសនៅឡើយ គណបក្សសង្គ្រោះជាតិមិនមែនទុកពេលសម្រាប់តវ៉ាទេ ប៉ុន្តែដើម្បីរៀបចំយុទ្ធសាស្ត្រដាក់បញ្ចូលឈ្មោះបេក្ខជនរបស់ខ្លួន។
លោកមានប្រសាសន៍ថា “ យើងកំពុងរង់ចាំមើលថា តើបេក្ខជនមកពីគណបក្សផ្សេងទៀតនឹងចុះឈ្មោះឈរប្រកួតប្រជែងនៅទីកន្លែង
ណាមុនគេ ប៉ុន្តែយើងនឹងបញ្ជូនឈ្មោះបេក្ខជនទាំងនេះឲ្យបានមុនថ្ងៃកំណត់”។
លោកស្រី មូរ សុខហួរ បានលើកឡើង កាលពីម្សិលមិញថា គ្មានផ្លូវដែលគណបក្សសង្គ្រោះជាតិមិនទៅចុះឈ្មោះ ឬធ្វើពហិការមិនចូលរួមប្រកួតប្រជែងក្នុងការបោះឆ្នោតជ្រើសតាំងតំណាងរាស្ត្រនោះទេ។ លោកស្រីបន្តថា “ យើងនៅសល់បួនថ្ងៃទៀត យើងនឹងទៅចុះឈ្មោះនៅថ្ងៃស្អែក”។
គណបក្សប្រជាជនកម្ពុជាបានបញ្ជូនបញ្ជីឈ្មោះបេក្ខជនរបស់ខ្លួនទៅឲ្យគណៈកម្មាធិការជាតិរៀបចំការបោះឆ្នោតតាំងពីថ្ងៃទី២ ខែឧសភា ហើយជាគណបក្សមួយបានទៅចុះឈ្មោះនៅស្ថាប័នបោះឆ្នោតមុនគេបង្អស់។
កាលពីថ្ងៃច័ន្ទ លោកនាយករដ្ឋមន្ត្រី ហ៊ុន សែន បានផ្តល់ហេតុផលមួយទៀតអំពីមូលហេតុ ដែលគណបក្សសង្គ្រោះជាតិ មិនទាន់ទៅចុះឈ្មោះ ដោយលោកលើកឡើងថា គណបក្សនេះបែកបាក់ផ្ទៃក្នុង ក្នុងការបញ្ជូនឈ្មោះបេក្ខជន។ លោកមានប្រសាសន៍ថា “ សូមកុំលាក់អី។ អស់លោកមិនទាន់បានព្រមព្រៀងដាក់ឈ្មោះបេក្ខជនតំណាងរាស្ត្រនៅឡើយទេ”។
ទីស្តីការគណៈរដ្ឋមន្ត្រីក៏បាននិងកំពុងតែព្យាយាមបង្ខូចឈ្មោះគណបក្សប្រឆាំង ដោយចេញផ្សាយខ្សែអាត់សំឡេងផ្សព្វផ្សាយតាមវិទ្យុ ពីការវាយប្រហារគ្នារវាងលោក សម រង្ស៊ីនិងលោក កឹម សុខា នៅពេលអ្នកទាំងពីរធ្វើយុទ្ធនាការឃោសនាបោះឆ្នោតឆ្នាំ២០០៨។
លោក ឡៅ ម៉ុងហៃ អ្នកវិភាគនយោបាយឯករាជ្យបានលើកឡើងថា គ្មានអ្វីគួរឲ្យសង្ស័យថា គណបក្សសង្គ្រោះជាតិមិនទៅចុះឈ្មោះនោះទេ ដោយលោកបញ្ជាក់ថា ការពន្យារពេលរបស់ពួកគេ គឺជាល្បិចមួយ ដើម្បីដាក់គំនាបថែមទៀតលើគណៈកម្មាធិការជាតិរៀបចំការបោះឆ្នោត និងដើម្បីទាក់ទាញការចាប់អារម្មណ៍ពីសាធារណជន”។
ចំណែកឯការធ្វើយុទ្ធនាការរបស់គណបក្សប្រជាជនកម្ពុជា ដែលដឹកនាំដោយលោកហ៊ុន សែន គឺធ្វើយ៉ាងណាត្រូវបំបែកផ្ទៃក្នុងរបស់គណបក្សសង្គ្រោះជាតិ។ លោក ឡៅ ម៉ុងហៃ បានលើកឡើងថា “ គណបក្សគ្រប់គ្រងអំណាចកំពុងប្រើវិធីបំបែកបំបាក់ដោយផ្សព្វផ្សាយពីការខ្វែងគំនិតគ្នាពីអតីតកាល ដើម្បីធ្វើឲ្យមានការសង្ស័យគ្នា ក្នុងចំណោមអ្នកធ្លាប់គាំទ្រ របស់គណបក្សសិទ្ធិមនុស្ស និងអ្នកធ្លាប់គាំទ្រគណបក្ស សម រង្ស៊ី”៕
ប្រែសម្រួលដោយ ចេវ ប៊ុននី