មន្ត្រីតុលាការបាននិយាយកាលពីថ្ងៃអាទិត្យថា សាលាដំបូងខេត្តស្វាយរៀងបានចាប់ខ្លួន និងចោទប្រកាន់អតីតប្រធានមន្ទីរដែនដី នគរូបនីយកម្មនិងសំណង់ខេត្តស្វាយរៀងពីបទក្លែងឯកសារ កាលពីសប្តាហ៍មុន បន្ទាប់ពីគាត់បានក្លែងឯកសារសម្គាល់កម្មសិទិ្ធដីធ្លីឲ្យអ្នកជំនួញមានទ្រព្យសម្បត្តិម្នាក់ក្នុងតំបន់នោះ។
លោក ពេជ្រ ឈឿត ប្រធានសាលាដំបូងខេត្តស្វាយរៀង មានប្រសាសន៍ថា លោក បឿយ យ៉ា ត្រូវបានព្យួរពីតួនាទីរបស់ខ្លួនតាំងពីពាក់កណ្តាលឆ្នាំមុនម៉្លេះ បន្ទាប់ពីអាជ្ញាធរទទួលបានពាក្យបណ្តឹងពីម្ចាស់ដី ដែលប័ណ្ណកម្មសិទ្ធិដីរបស់ខ្លួនត្រូវបានប្រធានមន្ទីររូបនេះលួចចម្លងឲ្យមនុស្សផ្សេងទៀត។
លោក ពេជ្រ ឈឿត បញ្ជាក់ថា “ យើងបានចោទប្រកាន់គាត់ពីបទក្លែងឯកសារ ហើយពេលនេះគាត់ត្រូវបានឃុំខ្លួនបណ្តោះអាសន្ននិងត្រូវស្ថិតក្រោមការសើុបអង្កេត”។លោកបានបន្ថែមថា ជនសង្ស័យត្រូវបានចាប់ខ្លួន និងចោទប្រកាន់កាលពីថ្ងៃព្រហស្បតិ៍។
លោកបន្តថា “ យើងនឹងកោះហៅមនុស្សថែមទៀត ដើម្បីសាកសួរ រាប់ទាំងលោក នឹបសារុន អភិបាលក្រុងបាវិតផងដែរ”។ លោក នឹប សារុន ធ្លាប់ជាអភិបាលក្រុងស្តីទី អំឡុងពេលរបស់លោក បឿយ យ៉ា កាន់តំណែងជាប្រធានមន្ទីរដែនដី នគរូបនីយកម្ម និងសំណង់ខេត្ត ហើយកាលពីសប្តាហ៍មុនលោកបានលែងជំនួសលោក ឈូក បណ្ឌិត អតីតអភិបាលក្រុងបាវិត ដែលបច្ចុប្បន្នកំពុងឡើងតុលាការពីបទបាញ់ប្រហារកម្មកររោងចក្រកាត់ដេរបីនាក់ អំឡុងការតវ៉ាដោយហិង្សាមួយនៅក្នុងតំបន់សេដ្ឋកិច្ចពិសេសមួយ
ក្នុងក្រុងបាវិត។
លោក ពេជ្រ ឈឿត មិនបានរៀបរាប់លម្អិតអំពីចំនួនឯកសារកម្មសិទ្ធិដីធ្លីដែលលោក បឿយ យ៉ា បានក្លែងបន្លំ នោះទេហើយថា វាត្រូវការពេលយូរ ដើម្បីចាប់ខ្លួនជនសង្ស័យរូបនេះ ព្រោះនគរបាលត្រូវការពេល
វេលា សម្រាប់ស៊ើបអង្កេតសំណុំរឿងនេះ៕
ប្រែសម្រួលដោយ ចេវ ប៊ុននី