ទីភ្នាក់ងារព័ត៌មានបារាំង (AFP) បានរាយការណ៍ថា កាលពីម្សិលមិញ តុលាការម៉ាឡេស៊ី បានផ្ដន្ទាទោសប្ដីប្រពន្ធមួយគូឲ្យជាប់ពន្ធនាគាររយៈពេល២៤ឆ្នាំ ពីបទមនុស្សឃាត បន្ទាប់ពីស្ត្រីខ្មែរ ដែលជាអ្នកបម្រើពួកគេ ត្រូវបានបង្អត់អាហារឲ្យស្លាប់ ខណៈកំពុងធ្វើការឲ្យពួកគេ ក្នុងលំនៅដ្ឋានរបស់ពួកគេ នៅភាគពាយព្យនៃឆ្នេរសមុទ្រប៉េណាង (Penang)។
ស្ត្រីបម្រើតាមផ្ទះម្នាក់នេះ មានឈ្មោះម៉ី ស៊ីចាន់ អាយុ២៣ឆ្នាំ បម្រើការងារ នៅក្នុងផ្ទះ និងហាងលក់ហាតវែ (Hardware)របស់ប្ដីប្រពន្ធនេះ អស់រយៈពេលប្រាំបីឆ្នាំមុនពេលស្លាប់ កាលពីឆ្នាំមុន។ យោងតាមទីភ្នាក់ងារព័ត៌មានបារាំង បានឲ្យដឹងថា ជំនួយការគ្រូពេទ្យ បានរកឃើញសាកសពរបស់ ម៉ី ស៊ីចាន់ នៅក្នុងផ្ទះរបស់ប្ដីប្រពន្ធនេះ កាលពីខែមេសា ឆ្នាំ២០១២ ដោយមានទម្ងន់ត្រឹមតែ២៦គីឡូក្រាម និងមានស្នាមជាំពេញរាងកាយ។ នគរបាលម៉ាឡេស៊ី និយាយថា នាងបានស្លាប់ដោយសារតែជំងឺរលាកក្រពះ និងជំងឺមហារីក ដែលបណ្ដាលមកពីការអត់អាហាររយៈពេលយូរ។
ទីភ្នាក់ងារព័ត៌មានបារាំង ក៏បានរាយការណ៍ផងដែរថា ប្ដីប្រពន្ធពីរនាក់នេះ មានឈ្មោះ សោះ ជីវតុង (Soh Chew Tong) អាយុ៤៤ឆ្នាំ និងប្រពន្ធឈ្មោះ ជិន ជីវលីង (Chin Chui Ling) អាយុ៤២ឆ្នាំ ត្រូវបានចាប់ខ្លួនភ្លាម បន្ទាប់ពីការស្លាប់របស់ ម៉ី ស៊ីចាន់ និងត្រូវបានចោទប្រកាន់តាំងពីដំបូងពីបទមនុស្សឃាត ដែលមានទោសប្រហារជីវិតដោយការព្យួរកនៅក្នុងប្រទេសម៉ាឡេស៊ី។ ព្រះរាជអាជ្ញាបានសម្រាលការចោទប្រកាន់មកត្រឹមបទមនុស្សឃាតវិញ។
កាលពីម្សិលមិញ លោកស្រី មូរ សុខហួរ តំណាងរាស្ត្រគណបក្សប្រឆាំង និងជាអតីតរដ្ឋមន្ត្រីក្រសួងកិច្ចការនារី បានស្វាគមន៍ចំពោះការផ្ដន្ទាទោសនេះ ដោយបានលើកឡើងថា វាគឺជាសញ្ញាវិជ្ជមានមួយ ពីព្រោះនេះគឺជាលើកទី១ហើយ ដែលអាជ្ញាធរម៉ាឡេស៊ី បានផ្តន្ទាទោសជនល្មើស បន្ទាប់ពីមានការរំលោភ ឬក៏ការស្លាប់ស្ត្រីខ្មែរ ដែលជាអ្នកបម្រើតាមផ្ទះ ក្នុងប្រទេសម៉ាឡេស៊ី។
លោកស្រី មូរ សុខហួរ បានមានប្រសាសន៍ថា កាលពីមុន មិនដែលមានការចាប់ខ្លួនទេ ហើយសូម្បីតែការស៊ើបអង្កេតក៏គ្មានដែរ។ ក្នុងករណីនេះ ប្រព័ន្ធយុត្តិធម៌របស់ប្រទេសម៉ាឡេស៊ី និងរដ្ឋាភិបាលបានចាត់វិធានការ និងបានបង្ហាញនូវការប្ដេជ្ញាចិត្តរបស់ខ្លួន ហើយខ្ញុំចង់ឃើញ [ជនល្មើស] ទាំងអស់ត្រូវគេនាំមកកាត់ទោស”។
កាលពីខែតុលា ឆ្នាំ២០១១ លោកនាយករដ្ឋមន្ត្រី ហ៊ុន សែន បានដាក់បម្រាមមិនឲ្យស្ត្រីខ្មែរដែលធ្វើការជាអ្នកបម្រើតាមផ្ទះ ទៅកាន់ប្រទេសម៉ាឡេស៊ីទេ បន្ទាប់ពីទទួលបានសេចក្តីរាយការណ៍ជាច្រើន ពាក់ព័ន្ធនឹងការរំលោភបំពាន និងលក្ខខណ្ឌការងារដ៏ពិបាក និងគ្មានមនុស្សធម៌ ដែលបណ្ដាលឲ្យស្លាប់ស្ត្រីខ្មែរយ៉ាងហោចណាស់ចំនួនប្រាំបួននាក់ នៅក្នុងប្រទេសម៉ាឡេស៊ី ដែលភាគច្រើន ស្លាប់ដោយការធ្វើអត្តឃាត។ ចាប់តាំងពីមានការផ្អាកមិនឲ្យបញ្ជូនពលករទៅប្រទេសម៉ាឡេស៊ីមក ប្រទេសទាំងពីបានលើកឡើងថា ខ្លួននឹងចុះកិច្ចព្រមព្រៀង ដើម្បីការពារពលករខ្មែរ នៅក្នុងប្រទេសម៉ាឡេស៊ី។
សេចក្ដីព្រាងកិច្ចព្រមព្រៀងដំបូងរបស់ម៉ាឡេស៊ី បានទទួលការរិះគន់យ៉ាងខ្លាំង ចំពោះការមិនបានបញ្ចូលវិធានស្ដីពីប្រាក់ខែអប្បបរមា។ កម្ពុជាក៏បានពិនិត្យសេចក្ដីព្រាងនោះដែរ កាលពីចុងឆ្នាំមុន ហើយបានធ្វើការកែប្រែ ហើយបញ្ជូនត្រឡប់ទៅម៉ាឡេស៊ីវិញ។
លោក ហូ វុទ្ធី អគ្គនាយករងនៃអគ្គនាយកដ្ឋានការងារនៃក្រសួងការងារ បានថ្លែងកាលពីម្សិលមិញថា កិច្ចព្រមព្រៀងនោះត្រូវបានបញ្ជូនទៅវិញយូរហើយ។
លោក ហូ វុទ្ធី បានមានប្រសាសន៍បន្ថែមទៀតថា “ ពេលនេះវាស្ថិតនៅក្នុងប្រទេសម៉ាឡេស៊ី ហើយពួកគេទើបតែបោះឆ្នោតជ្រើសរើសរដ្ឋាភិបាលថ្មី ដូច្នេះគេត្រូវការពេលខ្លះទៀត… ខ្ញុំមិនប្រាកដថា ពេលណាយើងនឹងចុះហត្ថលេខាលើកិច្ចព្រមព្រៀងនោះទេ។ ខ្ញុំសង្ឃឹមថា ប្រហែលជាក្នុងឆ្នាំ២០១៤”៕
(រាយការណ៍បន្ថែមដោយ ជិន ចន្ទ)
ប្រែសម្រួលដោយ ហម សុផាណ្ណា