លោក សុន ឆ័យ សមាជិកសភាមកពីគណបក្សប្រឆាំងបានមានប្រសាសន៍កាលពីម្សិលមិញថា លោកនឹងសំុឲ្យរដ្ឋាភិបាលលុបចោលដីសម្បទានក្រុមហ៊ុនចម្ការកៅស៊ូវៀតណាមមួយក្នុងខេត្តរតនគិរី ដែលលោកបានចោទថាបានកាប់ឈើនិងនាំឈើចេញដោយខុសច្បាប់បន្ទាប់ពីការទៅចុះទៅពិនិត្យតំបន់នោះ។
លោក សុន ឆ័យ បេក្ខជនមួយរូបនៅក្នុងការបោះឆ្នាតជាតិនៅខែកក្កដាខាងមុខនេះរបស់គណបក្សសង្គ្រោះជាតិបានបញ្ចប់ដំណើរទស្សនកិច្ចរយៈពេលបីថ្ងៃនៅក្រុមហ៊ុនចម្ការកៅស៊ូ៧២នៅស្រុកអូរយ៉ាដាវកាលពីម្សិលមិញ ដែលនៅពេលនោះ លោកមានប្រសាសន៍ថា លោកបានឃើញបុគ្គលិកក្រុមហ៊ុននេះកំពុងកាប់ឈើក្នុងព្រៃក្រាស់។
ច្បាប់ព្រៃឈើរបស់កម្ពុជាអនុញ្ញាតឲ្យអ្នកកាន់កាប់ដីសម្បទានកាប់ព្រៃឈើតែនៅក្នុងព្រំដីរបស់ខ្លួនតែប៉ុណ្ណោះប្រសិនបើព្រៃឈើនោះមានការរេចរឹល។
លោកបានមានប្រសាសន៍ថា “ យើងនឹងយកភ័ស្តុតាងនេះទៅបង្ហាញរដ្ឋសភា និងរដ្ឋាភិបាលដើម្បីឲ្យចាត់វិធានការលើក្រុមហ៊ុននេះពីព្រោះពួកគេកំពុងកាប់ឈើនៅក្នុងព្រៃក្រាស់”។
លោក សុន ឆ័យ ដែលបានចុះទៅពិនិត្យមើលទីតាំងនោះជាមួយអ្នកភូមិជនជាតិភាគតិចចារ៉ាយ ដែលបានចោទក្រុមហ៊ុននេះថាបានទន្ទ្រានយកដីស្រែ និងដីព្រៃដូនតារបស់ពួកគាត់ មានប្រសាសន៍ថា កម្មករក្រុមហ៊ុន៧២បាននិយាយប្រាប់លោកថា ក្រុមហ៊ុននេះបានដឹកឈើតាមរថយន្ត៣០គ្រឿងដែលភាគច្រើនជាឈើមិនទាន់កែច្នៃក្នុងមួយថ្ងៃឆ្លងកាត់ព្រំដែនចូលទៅប្រទេសវៀតណាម។ ច្បាប់បច្ចុប្បន្នអនុញ្ញាតឲ្យនាំចេញតែឈើកែច្នៃរួចប៉ុណ្ណោះ។
លោក រម៉ាស ស្វាត អ្នកនាំផ្លូវម្នាក់ក្នុងចំណោមអ្នកនាំផ្លូវជាច្រើននាក់ដែលបាននាំលោក សុន ឆ័យ ចុះទៅពិនិត្យមើលនេះនិងជាប្រធានសហគមន៍ព្រៃឈើមូលដ្ឋានបាននិយាយថា ដំណើរទស្សនកិច្ចនេះបានរកឃើញឈើប្រហែល៣០០ដើមដែលត្រូវបានកាប់រំលំកាលពីប៉ុន្មានខែមុននេះ។
លោក រម៉ាស ស្វាត និយាយថា “ យើងបានឃើញឈើរាប់រយដើមត្រូវបានកាប់រំលំកាលពីពេលថ្មីៗនេះ ហើយឈើមួយចំនួនត្រូវបានកាត់ជាកំណាត់និងដឹកទៅប្រទេសវៀតណាម”។
លោក ម៉ា វិចិត្រ អធិការនគរបាលស្រុកបានបដិសេធមិនធ្វើអត្ថាធិប្បាយចំពោះការចោទប្រកាន់អំពីការកាប់ឈើនិងការនាំឈើចេញទាំងនេះដែលត្រូវបានអង្គការសិទ្ធិមនុស្សអាដហុកចោទប្រកាន់ដូចគ្នានេះទេ។ លោក ម៉ា វិចិត្រ បានបង្វែរសំណួរទាំងនេះទៅរដ្ឋបាលព្រៃឈើខេត្ត។ លោក វង្ស សុខសេរី នាយខណ្ឌរដ្ឋបាលព្រៃឈើខេត្តនិងអនុប្រធានរបស់លោកគឺលោក ផាន់ ភឿន សុទ្ធតែបានបដិសេធមិនធ្វើអត្ថាធិប្បាយពេលអ្នកយកព័ត៌មានទាក់ទង។ តំណាងក្រុមហ៊ុន៧២មិនអាចទាក់ទងបានទេ។
អង្គការសិទ្ធិមនុស្ស និងសហគមន៍មូលដ្ឋានបានចោទប្រកាន់ក្រុមហ៊ុនចម្ការកៅស៊ូនៅក្នុងខេត្តរតនគិរីជាយូរមកហើយថាបានទន្ទ្រានយកដីរបស់ជនជាតិភាគតិចដោយខុសច្បាប់ និងកាប់រានព្រៃសហគមន៍ដែលមានសារៈសំខាន់ដល់ក្រុមជនជាតិភាគតិចនៅក្នុងខេត្តនេះ។
រដ្ឋាភិបាលបានសន្យាជាច្រើនលើកច្រើនសាថា នឹងចាត់វិធានការចំពោះក្រុមហ៊ុនចម្ការកៅស៊ូណា ដែលបំពានច្បាប់របស់កម្ពុជា ប៉ុន្តែអ្នករិះគន់បានចោទរដ្ឋាភិបាលថាធ្វើមិនដឹងមិនឮចំពោះបញ្ហានេះ៕
ប្រែសម្រួលដោយ ស៊ុំ សុខភុំ