យោងតាមលិខិតមួយចេញកាលពីម្សិលមិញ អង្គភាពប្រឆាំងអំពើពុករលួយបានព្រមានព្រះអង្គម្ចាស់ ស៊ីសុវត្ថិ ធម្មិកោ ដែល ជាបេក្ខជនតំណាងរាស្ត្រគណបក្សសង្គ្រោះជាតិដែលជាគណបក្សប្រឆាំង ប្រាប់ព្រះអង្គឲ្យប្រកាសទ្រព្យសម្បត្តិរបស់ព្រះអង្គជាមួយអង្គភាពប្រឆាំងអំពើពុករលួយក្នុងរយៈពេលមួយសប្តាហ៍ បើមិនដូច្នេះទេ ត្រូវប្រឈមមុខនឹងការជាប់ពន្ធនាគារ។
លិខិតដែលចុះហត្ថលេខាដោយលោក ឱម យុិនទៀង កាលពីថ្ងៃច័ន្ទ ប្រធានអង្គភាពប្រឆាំងអំពើពុករលួយ និងជាទីប្រឹក្សារបស់លោកនាយករដ្ឋមន្ត្រី ហ៊ុន សែន ឲ្យដឹងថា ព្រះអង្គម្ចាស់ ធម្មិកោ គឺជាមន្ត្រីតែម្នាក់គត់ក្នុងចំណោមមន្ត្រីចំនួន១៤៩នាក់ ឬសមាជិករាជវង្សានុវង្ស ដែលមិនទាន់បានប្រកាសទ្រព្យសម្បត្តិរបស់ព្រះអង្គប្រាប់រដ្ឋាភិបាលក្នុងឆ្នាំ២០១៣ តាមច្បាប់ប្រឆាំងអំពើពុករលួយរបស់ប្រទេសកម្ពុជា។
លោក យុិនទៀង លើកឡើងក្នុងលិខិតនេះថា“ អង្គភាពប្រឆាំងអំពើពុករលួយសូមព្រមានព្រះអង្គម្ចាស់ ធម្មិកោ និងតម្រូវឲ្យព្រះអង្គប្រកាសទ្រព្យសម្បត្តិ និងបំណុលរបស់ព្រះអង្គ។ប្រសិនបើព្រះអង្គម្ចាស់ ធម្មិកោ មិនប្រកាសទ្រព្យសម្បត្តិនិងបំណុលរបស់ព្រះអង្គក្នុងរយៈពេលមួយសប្តាហ៍ បន្ទាប់ពីការចេញលិខិតព្រមាននេះ ដោយមិនគិតថ្ងៃឈប់សម្រាកនោះ អង្គភាពប្រឆាំងអំពើពុករលួយនឹងបញ្ជូនករណីនេះទៅតុលាការ”។
លិខិតនេះបានបន្ថែមថា អង្គភាពប្រឆាំងអំពើពុករលួយបានស្នើឲ្យព្រះអង្គម្ចាស់ ធម្មិកោ ប្រកាសទ្រព្យសម្បត្តិរបស់ព្រះអង្គពីរលើកមកហើយ ហើយថា ប្រសិនបើមិនគោពតាមច្បាប់ទេ ព្រះអង្គប្រឈមនឹងការជាប់ពន្ធនាគាររហូតដល់មួយឆ្នាំ។
ព្រះអង្គម្ចាស់ ធម្មិកោ ដែលថ្មីៗនេះបានចូលរួម ជាមួយគណបក្សសង្គ្រោះជាតិ និងជាលេខាផ្ទាល់របស់សម្តេច ព្រះរាជអគ្គមហេសីមុនីនាថ មានបន្ទូលថា មន្ត្រីមកពីព្រះបរមរាជវាំងបានទៅដល់ព្រះរាជដំណាក់របស់ព្រះអង្គកាលពីយប់ថ្ងៃច័ន្ទ និងថ្វាយស្រោមសំបុត្រពណ៌សមានលិខិតក្នុងនោះដល់ព្រះអង្គ។
ព្រះអង្គបានមានបន្ទូលថា ព្រះអង្គបានបដិសេធមិនទទួលលិខិតនេះទេ ព្រោះស្រោមសំបុត្រនោះមិនមានរូបសញ្ញារបស់អង្គភាពប្រឆាំងអំពើពុករលួយទេ។ ព្រះអង្គក៏មានបន្ទូលដែរថា រាជវង្សមិនពាក់ព័ន្ធក្នុងអំពើពុករលួយទេ។
ព្រះអង្គម្ចាស់ ធម្មិកោ បានមានបន្ទូលថា “ ដំបូង លិខិតនេះនៅក្នុងស្រោមសំបុត្រពណ៌សគ្មានចំណារអ្វីទាំងអស់។ ទី២ ខ្ញុំជាសមាជិករាជវង្សានុវង្ស ដែលជាស្ថាប័នឯករាជ្យមួយ ដែលមិនពាក់ព័ន្ធក្នុងអំពើពុករលួយ”។
ព្រះអង្គបន្ថែមថា ព្រះអង្គបានប្រកាសទ្រព្យសម្បត្តិរបស់ព្រះអង្គកាលពីពីរឆ្នាំមុន បន្ទាប់ពីព្រះបរមសពសម្តេចឪបានណែនាំព្រះអង្គឲ្យធ្វើដូច្នេះ ពេលព្រះអង្គធ្វើជាជំនួយការផ្ទាល់របស់សម្តេចឪអស់រយៈពេលជាច្រើនឆ្នាំ។
ព្រះអង្គមានបន្ទូលថា “ ពួកគេ[គណបក្សប្រជាជនកម្ពុជា] កំពុងប្រើបញ្ហានេះដើម្បីបំភិតបំភ័យខ្ញុំ។ អង្គភាពប្រឆាំងអំពើពុករលួយជាឧបករណ៍របស់គណបក្សប្រជាជនកម្ពុជានិងកំពុងត្រូវបានប្រើក្នុងមធ្យោបាយតែមួយក្នុងការប្រើប្រាស់ប្រព័ន្ធតុលាការកម្ពុជា ដើម្បីវាយប្រហារគណបក្សប្រឆាំង”។
លិខិតនេះមកដល់ព្រះអង្គម្ចាស់ ធម្មិកោ ក្នុងរយៈពេលតែប៉ុន្មានម៉ោងប៉ុណ្ណោះ បន្ទាប់ពីព្រះអង្គបានចូលរួមក្នុងការប្រមូលផ្តុំមួយមានអ្នកគាំទ្រចំនួន៣.០០០នាក់ រៀបចំដោយគណបក្សសង្គ្រោះជាតិ នៅសួនសេរីភាពក្នុងរាជធានីភ្នំពេញកាលពីថ្ងៃច័ន្ទ ដែលនៅទីនោះព្រះអង្គម្ចាស់ ធម្មិកោ បានមានបន្ទូលប្រឆាំងនឹងគោលនយោបាយរបស់រដ្ឋាភិបាល
និងការដឹកនាំរបស់លោកនាយករដ្ឋមន្ត្រីហ៊ុន សែន។
លោក តុប សំ ដែលជាប្រធានក្រុមប្រឹក្សាជាតិប្រឆាំងអំពើពុករលួយនិយាយការពារលិខិតព្រមានរបស់លោក ឱម យុិនទៀង។ លោកបានមានប្រសាសន៍ថា “ នេះមិនមែនជាការបំភិតបំភ័យទេ។ វាគ្រាន់តែជាការអនុវត្តច្បាប់ប៉ុណ្ណោះ ដែលគ្រប់ៗគ្នា ត្រូវតែអនុវត្តតាម”។
តាមច្បាប់ មន្ត្រីរដ្ឋាភិបាលទាំងអស់ចាប់ពីប្រធាននាយកដ្ឋាន ត្រូវតែប្រកាសទ្រព្យសម្បត្តិ និងបំណុលរបស់ខ្លួនរយៈពេលពីរឆ្នាំម្តង។ ការប្រកាសនោះ ត្រូវធ្វើឡើងជាលក្ខណៈឯកជនទៅអង្គភាពប្រឆាំងអំពើពុករលួយ៕
ប្រែសម្រួលដោយ ចេវ ប៊ុុននី