ការតវ៉ាប្រឆាំងប្រេសិតសិទ្ធិមនុស្សអង្គការសហប្រជាជាតិ លោក សុរិយា ស៊ូបេឌី (Surya Subediកាលពីសប្តាហ៍មុនបានបង្កឲ្យមានការឆ្លើយឆ្លងយ៉ាងខ្លាំងតាមបណ្តាញផ្សព្វផ្សាយសង្គមនៅក្នុងប្រទេសកម្ពុជា ដោយយុវជនជាច្រើនបានប្រើប្រាស់ប្រព័ន្ធអុីនធើណិត ដើម្បីបកស្រាយថា ខ្លួនមិនជាប់ពាក់ព័ន្ធនឹងក្រុមបាតុករ ដែលមានទំនាក់ ទំនងជាមួយគណបក្សកំពុងកាន់អំណាចឡើយ។
និស្សិតមួយក្រុម យ៉ាងហោចណាស់ពួកគេមួយចំនួនដែលមានទំនាក់ទំនងជាមួយសហភាពសហព័ន្ធយុវជនកម្ពុជា ជាសមាគមយុវជនដែលមានទំនាក់ទំនងជាមួយគណបក្សប្រជាជនកម្ពុជានោះ បានប្រើប្រាស់វេទិកាមួយបន្ទាប់ពីការធ្វើបាឋកថា របស់លោក ស៊ូបេឌី អំពីច្បាប់វិនិយោគអន្តរជាតិ ដើម្បីរិះគន់អ្នកធ្វើរបាយការណ៍ពិសេសរូបនេះថា មានការលម្អៀង ហើយអំពាវនាវឲ្យលោកបញ្ឈប់ការធ្វើរបាយការណ៍ស្តីពីស្ថានភាពសិទ្ធិមនុស្សនៅក្នុងប្រទេសកម្ពុជា។
រយៈពេលជាច្រើនម៉ោងក្រោយមក រូបភាពស្តីពីព្រឹត្តិការណ៍នោះបានផ្សព្វផ្សាយតាមបណ្តាញទំនាក់ទំនងសង្គម ហ្វេសប៊ុក ដែលជាបណ្តាញទំនាក់ទំនងសង្គមដ៏មានប្រជាប្រិយបំផុតក្នុងចំណោមយុវជនខ្មែរ ដោយមានទាំងការគាំទ្រអ្នកតវ៉ា និងកំហឹងផងដែរ។
មនុស្សមួយចំនួនបានប្តូររូបភាពរបស់អ្នកតវ៉ា ដើម្បីសម្តែងការមិនពេញចិត្តរបស់ខ្លួន ដោយប្តូរពាក្យស្លោកនៅលើបដារបស់ខ្លួន ទៅគាំទ្រប្រសាសន៍របស់លោក ស៊ូបេឌី វិញ។ មនុស្សមួយចំនួនទៀតបានកែរូបថតរបស់លោក ស៊ូបេឌី ដោយដាក់រូបថតរបស់លោកជាប់នឹងរូបថតសពលោក អៀង សារី អតីតមេដឹកនាំខ្មែរក្រហម ហើយបានលើកឡើងថា របាយការណ៍របស់អ្នកធ្វើរបាយការណ៍ពិសេសរូបនេះនិយាយតែពីរឿងអវិជ្ជមានអំពីប្រទេសកម្ពុជាប៉ុណ្ណោះ ពីព្រោះពួកគេផ្អែកទៅលើប្រទេសនេះពេលដែលប្រទេសកម្ពុជាស្ថិតក្នុងរបបខ្មែរក្រហម។
នៅក្នុងការបញ្ចេញយោបល់តាមខ្សែអាត់វីដេអូតាមរយៈប្រព័ន្ធវិបខេម ជម្រើសរបស់យុវជនខ្មែរចង់បញ្ចេញយោបល់របស់ខ្លួនតាមប្រព័ន្ធអុីនធើណិត ហើយបង្ហោះតាមបណ្តាញទំនាក់ទំនងសង្គមហ្វេសប៊ុក របស់ ជា ឆេង ជានិស្សិតនៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច បានភ្ជាប់សហភាពសហព័ន្ធយុវជនខ្មែរ ដែលបានចូលរួមក្នុងការតវ៉ាប្រឆាំងនឹងលោក ស៊ូបេឌី បានថ្លែងរិះគន់លោក ស៊ូបេឌី។
ការបង្ហោះនេះទទួលបានការចូលរួមយោបល់ចំនួន៣.១០៥ ទាំងគាំទ្រ និងប្រឆាំងខ្លឹមសាររបស់ខ្លួន ប៉ុន្តែ និស្សិត ជា ឆេង បានត្អូញត្អែរអំពីការប្រើភាសាមិនល្អនៅក្នុងការបញ្ចេញយោបល់នោះ។ និស្សិតរូបនេះបាននិយាយកាលពីម្សិលមិញថា “ គ្មានអ្វីត្រូវខឹងចំពោះការបង្ហោះរបស់ខ្ញុំទេ។ ខ្ញុំបានកត់សម្គាល់ឃើញថា អ្នកចូលរួមផ្តល់យោបល់ភាគច្រើនអសីលធម៌នៅពេលដែលពួកគេប្រើប្រាស់សេរីភាពនៃការបញ្ចេញមតិរបស់ខ្លួន”។
នៅក្នុងការចូលរួមផ្តល់យោបល់ដទៃទៀត យុវជនម្នាក់ដែលឥឡូវនេះរស់នៅក្នុងប្រទេសកូរ៉េខាងត្បូង បានប្រកាសថា ខ្លួនជាអតីតនិស្សិតសាកលវិទ្យាល័យភូមិន្ទនីតិសាស្ត្រនិងវិទ្យាសាស្ត្រសេដ្ឋកិច្ច ហើយបានសម្តែងការតក់ស្លុតចំពោះការតវ៉ានោះ។ និស្សិតរូបនេះបានពិពណ៌នាពីអ្នកដែលចង់ចូលរួមជាមួយក្រុមយុវជននៅសាកលវិទ្យាល័យនេះថា ត្រូវបានគេបង្ខិតបង្ខំឲ្យចូលរួមជាមួយគណបក្សប្រជាជនកម្ពុជា។
គាត់បាននិយាយថា “ និស្សិតដែលរៀនឆ្នាំទី១ ឬឆ្នាំមូលដ្ឋាន គឺជាគោលដៅ ហើយត្រូវគេបញ្ចុះបញ្ចូលឲ្យចូលរួមជាមួយគណបក្សប្រជាជនកម្ពុជា”។ “ សមាគមនិស្សិតគឺជាកន្លែងដែលគេបង្កើតឡើងដើម្បីគ្រប់គ្រងនិស្សិត និងដោះស្រាយបញ្ហាឲ្យនិស្សិត ប៉ុន្តែវាក៏ជាកន្លែងបម្រើឲ្យគណបក្សនយោបាយផងដែរ”។
អ្នកប្រើប្រាស់បណ្តាញទំនាក់ទំនងសង្គមមួយរូបទៀត ឈ្មោះ សាមឌី ឃេអេស បាននិយាយក្នុងខ្សែអាត់វីដេអូដែលថតដោយខ្លួនឯងថា “ អ្វីៗដែល [ជា ឆេង] បាននិយាយគឺខុសទាំងស្រុង”។ យុវជនរូបនេះនិយាយដាក់កាមេរ៉ាថា
“ [លោក ស៊ូបេឌី] បានលើកឡើងនូវបញ្ហាបីដូចជា ការធ្វើកំណែទម្រង់ [គណៈកម្មាធិការជាតិរៀបចំការបោះឆ្នោត] (គ.ជ.ប.) [ដោះស្រាយ] បញ្ហាពាក់ព័ន្ធនឹងសម្បទានដីសេដ្ឋកិច្ច និងការរំលោភសិទ្ធិមនុស្ស។តេីគាត់ខុសឬ? ពិតជាមិនខុសទេ!”។
“ យើងទាំងអស់គ្នាដឹងថា គ.ជ.ប. គឺជាអាជ្ញាកណ្តាលសម្រាប់គ្រប់គណបក្សនយោបាយទាំងអស់នៅក្នុងការបោះឆ្នោត ដូច្នេះតើវាខុសអ្វីដោយគ្រាន់តែអំពាវនាវឲ្យធ្វើការកែទម្រង់នោះ…? សមាជិក គ.ជ.ប.ទាំងអស់សុទ្ធតែមកពីគណបក្សកាន់អំណាច”។
យូ ធីរិទ្ធ អាយុ២៥ឆ្នាំ ជានិស្សិតថ្នាក់បរិញ្ញាបត្រច្បាប់រៀនជាភាសាអង់គ្លេស ដែលមានវត្តមាននៅក្នុងការតវ៉ាកាលពីសប្តាហ៍មុន បាននិយាយថា ឧបទ្ទវហេតុនេះបានបង្កឲ្យមានការពិភាក្សាដេញដោលខុសពីធម្មតាទាំងនៅក្នុង ថ្នាក់រៀន ព្រមទាំងតាមប្រព័ន្ធអុីនធើណិតផងដែរ។
និស្សិតរូបនេះបាននិយាយថា “ យុវជនគិតថា រឿងនេះធ្វើឲ្យប៉ះពាល់ដល់កេរ្តិ៍ឈ្មោះយុវជនទំាំងអស់នៅក្នុងប្រទេសកម្ពុជា”។ “ យុវជនភាគច្រើនមិនគិតថា និស្សិតតវា៉ទាំងនេះតំណាងឲ្យយុវជនខ្មែរឡើយ។ ពួកគេ
តំណាងឲ្យយុវជនតែមួយក្រុមប៉ុណ្ណោះ”។ ពៅ ជីវ័ន ដែលជានិស្សិតថ្នាក់បណ្ឌិតសិក្សា
អំពីការផ្លាស់ប្តូរសង្គម និងយុវជនខ្មែរនៅក្នុងប្រទេសកម្ពុជា នៅសាកលវិទ្យាល័យ មែលប៊ើន បាននិយាយថា ការឆ្លើយតបតាមប្រព័ន្ធអុីនធើណិតចំពោះការតវ៉ាក្នុងចំណោមយុវជនខ្មែរដែលអាចប្រើប្រាស់អុីនធើណិតបាននោះគឺ “ មិនដែលមានទេពីមុនមក”។
និស្សិត ពៅ ជីវ័ន លើកឡើងតាមអុីម៉េលថា “ ក្នុងរយៈពេលប៉ុន្មានថ្ងៃថ្មីៗនេះ បាន [បង្ហាញ] ឲ្យឃើញពីកំហឹងតាមប្រព័ន្ធអុីនធើណិតប្រឆាំងនឹងការតវ៉ានេះ ហើយអ្វីដែលគួរឲ្យភ្ញាក់ផ្អើលនោះ មានការការពារតិចតួចដល់ការតវ៉ានោះ”។ “ កំហឹងនេះហាក់ដូចជាបានកើនឡើងហួសពីការរំពឹងទុក សូម្បីតែអ្នករៀបចំ”។ និស្សិតរូបនេះនិយាយទៀតថា យុវជនខ្មែរចែករំលែក និងពិភាក្សាដេញដោលពីហេតុការណ៍នៅក្នុងប្រទេសរបស់ខ្លួនតាមប្រព័ន្ធអុីនធើណិត ដែលទំនងជាមានប្រយោជន៍ដល់យុវជនដែលមិនពាក់ព័ន្ធនឹងនយោបាយ។
និស្សិត ពៅ ជីវ័ន បាននិយាយថា “ ការបោះឆ្នោតសាកលនៅពេលខាងមុខនេះ និងឧបទ្ទវហេតុនៃការតវ៉ាប្រឆាំងនឹងប្រេសិតសិទ្ធិមនុស្សអង្គការសហប្រជាជាតិ កើតឡើងនៅពេលដែលមានតម្រូវការនិងទម្លាប់នៃការបញ្ចេញគំនិតនិងយោបល់កាន់តែច្រើនឡើង”៕
ប្រែសម្រួលដោយ សោម សារុន