កាលពីម្សិលមិញ សាលាដំបូងរាជធានីភ្នំពេញបានសម្រេចផ្តន្ទាទោសកូនប្រុសចំនួនពីរនាក់របស់លោក ដួង ងៀប ដែលជាអ្នកជំនួញដ៏លេចធ្លោម្នាក់ និងជាឧត្តមសេនីយ៍នគរបាល ពីបទយកកាំភ្លើងខ្លីវាយបុរសម្នាក់ និងបំផ្លាញទ្រព្យសម្បត្តិរបស់ភោជនីយដ្ឋានមួយកន្លែង។
កូនប្រុសបង ឈ្មោះ ដួង ឧត្តមជីវិន អាយុ២៤ឆ្នាំ ត្រូវបានផ្តន្តាទោសឲ្យជាប់ពន្ធនាគាររយៈពេលបីឆ្នាំកន្លះ ចំណែកកូនប្រុសប្អូនឈ្មោះ ដួង គីមឡុង អាយុ១៧ឆ្នាំ ត្រូវបានព្យួរទោសរយៈពេលប្រាំខែ។ ពួកគេក៏ត្រូវពិន័យជាប្រាក់សរុបចំនួន១២.០០០ដុល្លារផងដែរ។
ឧត្តមជីវិន និង គីមឡុង ត្រូវបានចាប់ខ្លួន បន្ទាប់ពីជម្លោះមួយបានផ្ទុះឡើងអំឡុងពេលបុណ្យឆ្នាំខ្មែរ នៅឯភោជនីយដ្ឋានមួយក្នុងរាជធានីភ្នំពេញ។
គីមឡុង ត្រូវបានចាប់ខ្លួន មួយថ្ងៃបន្ទាប់ពីមានការវាយតប់គ្នានោះ រួមជាមួយនឹងអង្គរក្សម្នាក់នៅឯខុនដូមួយកន្លែងរបស់លោក ដួង ងៀប នៅក្បែរសណ្ឋាគារកាំបូឌីយ៉ាណា។
ក្រោយមក ឧត្តមជីវិន ត្រូវបានឪពុករបស់ខ្លួនប្រគល់ឲ្យតុលាការរយៈពេលពីរបីថ្ងៃ ក្រោយ
ពីពាក់ព័ន្ធនឹងការវាយតប់ដូចគ្នានេះ។ លោក សេង នាង ចៅក្រមសាលាដំបូងរាជធានី បានមានប្រសាសន៍ពេលប្រកាសសាលក្រមកាលពីម្សិលមិញថា “ តុលាការបានសម្រេចផ្តន្ទាទោស ដួង ឧត្តមជីវិន អាយុ២៤ឆ្នាំ ឲ្យជាប់ពន្ធនាគាររយៈពេលបីឆ្នាំកន្លះនិងពិន័យជាប្រាក់ចំនួន៧លានរៀល និងប្រាក់សំណងជំងឺចិត្តចំនួន៤០លានរៀលទៀត”។
លោកបន្ថែមថា ប្អូនប្រុសរបស់ ឧត្តមជីវិនត្រូវបានព្យួរទោសរយៈពេលប្រាំខែ ប៉ុន្តែលោកមិនបានពន្យល់ថាហេតុអ្វីបានជាតុលាការសម្រេចផ្តន្ទាទោសផ្សេងៗគ្នាបែបនេះចំពោះបងប្អូនបង្កើតទាំងពីរនាក់នេះទេ។
ជនទាំងពីរនាក់នេះត្រូវបានចោទប្រកាន់ពីបទបង្ករបួសស្នាម ប្រើអាវុធខុសច្បាប់ និងបំផ្លាញទ្រព្យសម្បត្តិឯកជន។ ទោះជាយ៉ាងណា តុលាការបានដោះលែង គីមឡុង ឲ្យនៅក្រៅឃុំជាបណ្តោះអាសន្នកាលពីថ្ងៃទី១៧ ខែឧសភា បើទោះជានគរបាលបានរកឃើញកាំភ្លើងអាកា-៤៧ និងគ្រាប់ចំនួន២០គ្រាប់ក្នុងរថយន្តទំនើបរបស់ជននេះក៏ដោយ។
គីមឡុង មិនបាននិយាយថា ខ្លួននឹងប្តឹងឧទ្ធរណ៍ជំទាស់សាលក្រមនេះឬយ៉ាងណាទេ ចំណែក ឧត្តមជីវិន ត្រូវបានផ្តន្ទាទោសកំបាំងមុខ។ អំឡុងការបើកវសនាការជំនុំជម្រះកាលពីសប្តាហ៍មុន បងប្អូនទាំងពីរនាក់នេះបានអះអាងថា តាមពិតពួកគេជាជនរងគ្រោះនៅក្នុងជម្លោះនោះ ហើយថា អង្គរក្សរបស់ពួកគេបានការពារពួកគេមិនឲ្យមនុស្សមួយក្រុមនៅក្នុងភោជនីយដ្ឋានវាយប្រហារពួកគេ។ យី រ៉ាយុទ្ធ ដែលជាអង្គរក្សរបស់លោក ដួង ងៀប ក៏ត្រូវបានចាប់ខ្លួនផងដែរ ដោយសារពាក់ព័ន្ធនៅក្នុងជម្លោះនេះ ប៉ុន្តែមិនត្រូវបានរកឃើញពិរុទ្ធភាពឡើយ។
លោក ណាច ទ្រី មេធាវីរបស់បងប្អូនប្រុសទាំងពីរនាក់នេះ កាលពីម្សិលមិញបានថ្លែងថា លោកមិនបានដឹងថាតើកូនក្តីរបស់លោកនឹងប្តឹងឧទ្ធរណ៍ដែរឬអត់ទេ។ លោក ណាចទ្រី មានប្រសាសន៍ថា“ ខ្ញុំមិនទាន់បានពិភាក្សារឿងនេះជាមួយកូនក្តីរបស់ខ្ញុំនៅឡើយទេ”៕
ប្រែសម្រួលដោយ ចេវ ប៊ុននី