លោក កឹម សុខុន ជាប្អូនប្រុស ដែលលែងមានទំនាក់ទំនងជាមួយនឹងលោក កឹម សុខាអនុប្រធានគណបក្សសង្គ្រោះជាតិ នោះ ត្រូវបានតែងតាំងជាមន្ត្រីជាន់ខ្ពស់មួយរូបនៅនាយកដ្ឋាននគរបាលជាតិ នៃក្រសួងមហាផ្ទៃ មួយសប្ដាហ៍បន្ទាប់ពីលោកបាននិយាយរិះគន់បងប្រុសលោក តាមបណ្ដាញទូរទស្សន៍។
យោងតាមអនុក្រឹត្យមួយចុះថ្ងៃទី២២ ខែឧសភា ដែលលោកនាយករដ្ឋមន្ត្រី ហុ៊ន សែន បានចុះហត្ថលេខា និងព្រះមហាក្សត្រនរោត្តម សីហមុនី បានឡាយព្រះហស្តលេខា និងទទួលបាន កាលពីម្សិលមិញបានឲ្យដឹងថាលោក កឹម សុខុន ត្រូវបានតែងតាំងជាអនុប្រធាននាយកដ្ឋានសន្តិសុខកណ្តាល ជាតួនាទីមួយបង្កើតឡើងសម្រាប់រូបលោក និងបានទទួលឋានៈជាឧត្តមសេនីយ៍ទោ។
អនុក្រឹត្យនេះបានចុះហត្ថលេខាតែប៉ុន្មានថ្ងៃប៉ុណ្ណោះបន្ទាប់ពីឧត្តមសេនីយ៍ទោ កឹម សុខុន បានចេញមុខនៅតាមទូរទស្សន៍បាយ័នដែលជាទូរទស្សន៍របស់លោកស្រី ហ៊ុន ម៉ាណា កូនស្រីរបស់លោក ហ៊ុន សែន និងបានក្រើនរំឭកអ្នកទស្សនាថា គណបក្សប្រឆាំង សម រង្សុី និងគណបក្សសិទ្ធិមនុស្ស ដែលលោកធ្លាប់ធ្វើជាសមាជិក ហើយដែលបានរួមបញ្ចូលគ្នាបង្កើតជាគណបក្សសង្គ្រោះជាតិគឺគ្មានប្រយោជន៍ទេ រួមទាំងបងប្រុសរបស់
លោកផង ហើយថា មានតែគណបក្សប្រជាជនកម្ពុជាប៉ុណ្ណោះ ធ្វើការបម្រើប្រជាពលរដ្ឋ។
មុនការតែងតាំងលោកនេះ លោកឧត្តមសេនីយ៍ទោ កឹម សុខុន គឺជាទីប្រឹក្សាមួយរូបរបស់រដ្ឋាភិបាល និងជាឧត្តមសេនីយ៍ត្រី នៅលេខាធិការដ្ឋានក្រសួងមហាផ្ទៃ។ លោកឧត្តមសេនីយ៍ឯក គៀត ច័ន្ទថារិទ្ធ អ្នកនាំពាក្យនគរបាលជាតិបានមានប្រសាសន៍តាមទូរស័ព្ទ កាលពីម្សិលមិញថា “លោក កឹម សុខុន មានឋានៈជាឧត្តមសេនីយ៍ត្រីជាច្រើនឆ្នាំមកហើយ”។
លោកឧត្តមសេនីយ៍ឯក គៀត ច័ន្ទថារិទ្ធ បានមានប្រសាសន៍បន្ថែមថា “ដល់ពេលតំឡើងឋានៈឲ្យគាត់ហើយ ពីព្រោះគាត់បានធ្វើការងារជាច្រើនឆ្នាំមកហើយ ប៉ុន្តែលោកពុំបានបញ្ជាក់ថា លោក កឹម សុខុន មានឋានៈជាឧត្តមសេនីយ៍ត្រីរយៈពេលប៉ុន្មានឆ្នាំនោះទេ។
លោកឧត្តមសេនីយ៍ទោ កឹម សុខុន បានបដិសេធមិនធ្វើអត្ថាធិប្បាយអំពីការដំឡើងឋានៈរបស់លោក ឬក៏ទំនាក់ទំនងជាមួយនឹងបងប្រុសលោកជាអ្នកនយោបាយដ៏សកម្មនោះទេ។
នៅក្នុងការនិយាយរិះគន់តាមទូរទស្សន៍ ដែលលោក ហ៊ុន សែន បានមានប្រសាសន៍ កាលពីថ្ងៃសុក្រ ថា គួរតែត្រូវចាក់ផ្សាយម្តងទៀតនៅតាមភូមិនៅទូទាំងប្រទេសនៅមុនការបោះឆ្នោតជាតិនៅថ្ងៃទី២៨ ខែកក្កដានោះ លោក កឹម សុខុន បានមានប្រសាសន៍ថា “បងប្អូនត្រូវសម្រេច រវាងគណបក្សប្រជាជនកម្ពុជា និងគណបក្សប្រឆាំង។ តើគណបក្សណាកំពុងជួយបងប្អូន ហើយតើគណបក្សណាកំពុងបានតែនិយាយកុហក និងបោកប្រាស់បងប្អូន?”។
ពេលទាក់ទងតាមទូរស័ព្ទ លោក កឹម សុខា ក៏បានមានប្រសាសន៍ផងដែរថា លោកមិនចង់ធ្វើអត្ថាធិប្បាយអំពីការដំឡើងឋានៈប្អូនប្រុសលោកនោះទេ។ លោកបានមានប្រសាសន៍ថា “ខ្ញុំមិនធ្វើអត្ថាធិប្បាយទេ ប៉ុន្តែ ប្រជាពលរដ្ឋអាចធ្វើការវាយតម្លៃដោយខ្លួនឯងបាន និងដឹងអំពីល្បិចកលរបស់គណបក្សប្រជាជនកម្ពុជា”។
លោក យឹម សុវណ្ណ អ្នកនាំពាក្យរបស់គណបក្សសង្គ្រោះជាតិបានមានប្រសាសន៍ថា គណបក្សកាន់អំណាចនេះគ្រាន់តែប្រើលោក កឹម សុខុន ដើម្បីវាយប្រហារគណបក្សប្រឆាំងតែប៉ុណ្ណោះ។ លោកបានមានប្រសាសន៍ថា “នៅក្នុងគណបក្សប្រជាជនកម្ពុជា អ្នកណាដែលបិុនប្រសប់ជេរប្រមាថគណបក្សប្រឆាំង បានទទួលតួនាទី និងការដំឡើងឋានៈ។វាមិនធ្វើឲ្យប៉ះពាល់ដល់គណបក្សប្រឆាំងនេះទេ។ ប្រជាពលរដ្ឋខ្មែរយល់ដឹងអំពីប្រវត្តិសាស្រ្តជាតិ និងពិភពលោក”៕
ប្រែសម្រួលដោយ ស៊ុំ សុខភុំ