29 C
Phnom Penh

រថយន្តពន្លត់​អគ្គិភ័យ​រាជ​​​ធានី​​​បាញ់ទឹក​ដាក់​ក្រុម​អ្នក​តវ៉ាប្រឆាំងនឹង​ការ​បណ្តេញ​ចេញពី​ដីធ្លី

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ រថយន្ត​ពន្លត់​អគ្គិភ័យ​​​នៅក្នុង​រាជ​ធានី​ភ្នំពេញ​បាន​ប្រើ​ទុយោ​បាញ់​​​ទឹក​ដែល​មាន​កម្លាំ​ងខ្លាំង​​ដើម្បី​បំបែកក្រុម​អ្នក​តវ៉ាប្រ​ឆាំ​ងនឹង​ការ​បណ្តេញ​​ចេញ​ពី​ដី​ធ្លី​ ដែល​បាន​ព្យាយាម​​ចង់​ជួប​​លោក ប៉ា សុជាតិវង្ស អភិបាល​រាជ​ធានី​ភ្នំពេញ​នោះ ហើយ​បាន​ធ្វើ​ឲ្យ​ស្ត្រី​ម្នាក់​សន្លប់​។

រថយន្ដ​​​ពន្លត់​​​អគ្គិភ័យ​​​រាជ​​​ធានី​​​​​​​​​ប្រើ​​​ទុយោ​​​បាញ់​​​ទឹក​​​ដែល​​​មាន​​​កម្លាំង​​​ខ្លាំង​​​​​​ បាញ់​​​ទឹក​​​ដាក់​​​ក្រុម​​​អ្នក​​​តវ៉ា​​​ប្រឆាំង​​​នឹង​​​ការ​​​បណ្ដេញចេញ​​​ពីដី​​​ដែល​​​បាន​​​បិទផ្លូវ​​​​​​ដើម្បី​​​ទាម​​​ទារ​​​សុំជួប​​​​​​លោក ប៉ា សុជាតិវង្ស កាលពី​​​ម្សិលមិញ។ (ស៊ីវ ចាន់ណា)
រថយន្ដ​​​ពន្លត់​​​អគ្គិភ័យ​​​រាជ​​​ធានី​​​​​​​​​ប្រើ​​​ទុយោ​​​បាញ់​​​ទឹក​​​ដែល​​​មាន​​​កម្លាំង​​​ខ្លាំង​​​​​​ បាញ់​​​ទឹក​​​ដាក់​​​ក្រុម​​​អ្នក​​​តវ៉ា​​​ប្រឆាំង​​​នឹង​​​ការ​​​បណ្ដេញចេញ​​​ពីដី​​​ដែល​​​បាន​​​បិទផ្លូវ​​​​​​ដើម្បី​​​ទាម​​​ទារ​​​សុំជួប​​​​​​លោក ប៉ា សុជាតិវង្ស កាលពី​​​ម្សិលមិញ។ (ស៊ីវ ចាន់ណា)

អ្នក​តវ៉ា​ប្រមាណ​៤០នាក់​ ដែល​ពួកគាត់​ភាគច្រើន​ត្រូវ​បាន​បណ្តេញ​ចេញ​ពី​ដី ឬ​ប្រឈមនឹង​ការ​បណ្តេញ​ចេញពី​តំបន់​បឹង​កក់ និង​បុរី​កីឡានោះ បាន​ចាប់​ផ្តើម​នាំ​​​គ្នា​​​បិទផ្លូវ​នៅ​មុខ​សាលារាជធានី​ដែល​ស្ថិតនៅ​តាម​បណ្តោយ​មហា​វិថី​ព្រះ​មុនី​វង្ស​នៅ​ម៉ោង​ប្រហែល​៩​ព្រឹក។ រថយន្ត​ពន្លត់​អគ្គិភ័យ​បី​គ្រឿង​បានមកដល់ កន្លែង​នោះ​ប្រហែល​៣០នាទី​ក្រោយ​មក។

អ្នក​តវ៉ាមួយ​ចំនួន​បាន​លើ​កឡើង​ថា ពួកគាត់​បាន​ឃើញ និង​ឮថា​លោក ជួន សុវណ្ណ ​​​ស្នងការ​នគរ​បាល​រាជ​ធានី​ភ្នំពេញ​​ បាន​ដឹកនាំ​រថយន្ត​ពន្លត់​អគ្គិភ័យ​នេះ​ដោយ​ផ្ទាល់​ ហើយ​រថយន្ត​ទាំង​នោះ​បានធ្វើការ​បាញ់​ទឹក​ដាក់​អ្នក​តវ៉ានៅ​ម៉ោង ប្រហែល​៩ និង​៤៥នាទី​ព្រឹក​អស់​រយៈពេល​ជា​ច្រើន​នាទី ​និង​​បាន​ធ្វើ​ឲ្យ​អ្នក​តវ៉ាមួយ​ចំនួន​ដួល។

ស្ត្រី​ម្នាក់​ឈ្មោះ ខេន ចាន់រស្មី អាយុ​៣២​​​ឆ្នាំ​ទំនង​ជា​សន្លប់ ហើយត្រូវបាន​ដឹក​ទៅ​កាន់​ការិយាល័យ​អង្គការ​សិទ្ធិ​មនុស្ស​លីកាដូ ដើម្បី​ព្យាបាល។ អ្នកតវ៉ាម្នាក់ទៀត​ឈ្មោះ ​ង៉ែត​ ឃុន ​​​អាយុ៧២ឆ្នាំ​ ហាក់​ដូច​ជា​សន្លប់​បន្ទាប់ពី​ត្រូវ​រថយន្ត​បាញ់ទឹក​ដាក់​។ ស្ត្រី​​ទាំង​ពីរនាក់​មិន​បាន​រង​របួស​ធ្ងន់​ទេ ហើយ​បាន​ត្រឡប់ទៅ​ផ្ទះវិញ​នៅ​ម៉ោង​ប្រហែល​១​រសៀល​​​។

អ្នក​ស្រី ទេព វន្នី ​អ្នក​ភូមិ​បឹងកក់​បាន​មាន​ប្រសាសន៍ថា “ ពួកគេ​ប្រើ​អំពើ​ហិង្សា​មក​លើ​យើងដោយ​យក​រថយន្ត​ពន្លត់​អគ្គិភ័យ​បាញ់ទឹក​ដាក់​យើង​ ហាក់​ដូច​ជា​ពួកគេ​ចង់​សម្លាប់​ខ្មែរ​អ៊ីចឹង”។

អ្នក​ស្រី​បាន​មាន​ប្រសាសន៍ថា ពួកគាត់​​ធ្វើការ​តវ៉ា ពីព្រោះ​ពួកគាត់​ជឿថា  លោក ប៉ា សុជាតិវង្ស មិន​បាន​គោរពពាក្យ​សន្យា ដែល​លោក​បាន​សន្យា​ចំពោះ​ពួកគាត់​នៅ​ក្នុង​កិច្ច​ប្រជុំមួយ​កាលពី​ថ្ងៃ​ទី​៩ ខែ​ឧសភាថា ​នឹង​រក​ដំណោះ​ស្រាយ​ចំពោះ​វិវាទដីធ្លី​ជូន​ពួកគាត់​​​នៅ​ចុង​ខែ​នេះ​ទេ​។

កាលពី​ម្សិលមិញ អ្នកតវ៉ា​បាន​បន្ត​បិទផ្លូវ​មួយ​ផ្នែក ប៉ុន្តែ​ក្រោយ​មក​​បាន​បើក​ឲ្យ​ធ្វើ​ចរាចរវិញ ហើយ​បាន​ចាកចេញ​ពី​ផ្លូវ​​នោះ​​​នៅ​ម៉ោង​១១និង​៣០នាទី​ថ្ងៃ​ត្រង់។

ដោយ​ត្រូវ​បាន​​ទាក់​ទង​​តាម​ទូរស័ព្ទ​ នៅ​ពេល​ក្រោយ​មក លោក ប៉ា​ សុជាតិវង្ស ​បាន​មាន​ប្រសាសន៍ថា ​លោក​មិនដែល​សន្យា​ជាមួយ​អ្នក​តវ៉ាថា លោក​នឹង​ដោះ​ស្រាយ​វិវាទ​​​ដី​ធ្លី​របស់​ពួកគាត់​នៅ​ចុង​ខែ​ឧសភា​នេះ​ទេ។

លោក​បាន​មាន​ប្រសាសន៍ថា “ ខ្ញុំ​បាន​សុំ​ពេល​វេលា​បន្ថែម​ដើម្បី​ពិនិត្យ​មើល​ឯកសារ​​​សិន។ ក្នុង​រយៈពេល​បី​សប្តាហ៍ ​យើង​​មិន​អាច​​​​ធ្វើ​អ្វី​ៗ​ចប់​ឡើយ​។ ខ្ញុំ​ត្រូវ​ពិនិត្យ​មើល​កិច្ច​ការ​រដ្ឋបាល​និង​បច្ចេក​ទេស​ជាច្រើន”។

លោក​ ប៉ា សុជាតិ​វង្ស​ ដែល​បាន​ចូល​កាន់​តំណែង​កាលពី​ដើម​ខែ​ឧសភា បាន​មាន​ប្រសាសន៍ថា ​មន្ត្រី​​របស់​លោកបាន​ធ្វើ​ការ​ងារ​ច្រើន​ណាស់​ដើម្បី​រក​ដំណោះ​ស្រាយ​សម្រាប់​គ្រួសារ​ទាំង​នេះ​ ប៉ុន្តែ​បាន​បដិសេធ​មិន​បក​ស្រាយ​លម្អិតឡើយ។

លោក ជួន​ សុវណ្ណ បាននិយាយ​ការពារ​ការ​ប្រើ​ប្រាស់​រថយន្ត​ពន្លត់​អគ្គិ​ភ័យ​នេះ។ លោក​បាន​មាន​ប្រសាសន៍ថា “ ពួក​គាត់​​បាន​បិទ​ផ្លូវ។ យើង​គ្រាន់​តែ​សុំ​​កុំ​ឲ្យ​ពួក​គាត់​ធ្វើ​​ឲ្យ​ប៉​ះ​ពាល់​ដល់​សណ្តាប់ធ្នាប់​សាធារណៈ​ប៉ុណ្ណោះ​។​យើង​បាន​សុំ​ពួកគាត់​មួយដង​ជា ពីរដង តែ​​ពួកគាត់​នៅ​តែ​បិទផ្លូវ​ដដែល។ តើ​​មាន​ជម្រើសអ្វី​ដែល​យើង​ត្រូវ​ដោះ​ស្រាយ​បញ្ហានេះ​ដើម្បី​ជួយ​ដល់​សាធារណ​ជន​នោះ?។ យើង​មិន​ហ៊ាន​ប្រើ​កម្លាំង​នគរ​បាល​ទេ ពីព្រោះ​ ខែល​ [នគរបាល] និង​វត្ថុ​ផ្សេងៗទៀត​ អាច​ធ្វើ​ឲ្យ​ពួកគាត់​រងរបួស ដូច្នេះ​យើង​​​​បាន​ប្រើ​ទឹក​វិញ”។

មក​ដល់​ល្ងាច​ម្សិលមិញនេះ អ្នក​ត្រូវ​បណ្តេញ​ចេញ​ពី​បឹងកក់​មួយ​ក្រុម​ ដែល​បាន​ស្នើ​សុំ​សំណង​បន្ថែម​ទៀត​ពី​រដ្ឋា​ភិបាល​នោះ នៅ​តែ​បោះ​តង់​នៅ​មុខ​សាលារា​ជ​ធានី​នៅ​ឡើយ ​ដើម្បី​បង្ខំ​​ឲ្យ​លោក​អភិបាល​ក្រុង​​ចេញ​មក​​ជួប​​ពួកគាត់៕

(រាយការណ៍បន្ថែម​ដោយ ស៊ីវ ចាន់ណា)​
    ប្រែសម្រួល​ដោយ សោម ​​សារុន

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស