30 C
Phnom Penh

ដើម្បីទាក់​ទាញរកសន្លឹកឆ្នោត គណ​បក្ស​សង្គ្រោះ​ជាតិ​​ងាកទៅ​រក​​ឥទ្ធិពល​នៃសម្រស់​ស្ត្រី​វ័យ​ក្មេង​

ដោយ ឌឹ ខេមបូឌា ដេលី

បទវិភាគ

ដោយសារ​​​ការ​ខ្វះ​មូលនិធិ​ និង​បណ្ដាញ​​អ្នក​ស្ម័គ្រ​ចិត្ត​ដែល​គណបក្ស​ប្រជាជន​កម្ពុជា​​​មាន​​​មិន​​​ខ្វះ​​​សម្រាប់​​​យុទ្ធនាការ​ឃោសនា​បោះ​ឆ្នោត​ គណបក្ស​សង្គ្រោះ​ជាតិ​កំពុង​​​ងាក​​​ទៅ​រក​​​ធនធាន​​​មួយ​​​​​​ដែល​​​​​​ខ្លួន​​​​អួត​​​ថា​​​ កំពុង​​​មាន​​​ចំនួន​​​កើនឡើង​​​ នោះ​​​គឺ​​​​ស្ត្រី​វ័យ​ក្មេង​។

កាលពី​ថ្ងៃ​ព្រហស្បតិ៍​ នៅ​ពេល​គណបក្ស​សង្គ្រោះ​ជាតិ​កំពុង​ត្រៀម​ខ្លួន​​​សម្រាប់​ការ​បោះ​ឆ្នោត​ជាតិ​នា​ខែ​កក្កដា​​​ខាងមុខ​​​នេះ​​​ អ្នក​ស្ម័គ្រ​ចិត្ត​វ័យ​ក្មេង​ជាច្រើន​បាន​ទៅ​​​ប្រមូល​ផ្ដុំ​​​​​គ្នា​​​នៅ​ទី​ស្នាក់​ការ​កណ្ដាល​របស់​គណបក្ស​សង្គ្រោះ​ជាតិ​​ក្នុង​រាជធានី​ភ្នំពេញ​។ ក្នុង​ចំណោម​អ្នក​ស្ម័គ្រចិត្ត​ទាំង​នោះ ​មាន​ស្ត្រី​បង្ហាញ​ម៉ូត​វ័យ​ក្មេង​​​មួយ​​​ចំនួន​​​​​​ដែល​បាន​នាំ​គ្នា​ចង​ទង់​បក្ស​​​​យ៉ាង​​​ញាប់ដៃ​​​ញាប់​​​ជើង​​​។

ខណៈ​​​​ពួក​គេ​កំពុង​អង្គុយ​​​ធ្វើការ​​​យ៉ាង​​​យក​​​ចិត្ត​​​ទុកដាក់​​​​ សមាជិក​បក្ស​ម្នាក់​បាន​ថត​រូប​ពួក​គេ​ ហើយ​បន្ទាប់​មក​បាន​បង្ហោះ​រូបភាព​​​​សហការី​ទាំងនោះ​​​​លើ​​​​គេហទំព័រ​​​​ភ្ជាប់​​​បណ្តាញ​​​ទំនាក់​ទំនង​​​សង្គម​​​ហ្វេស​​ប៊ុក​ ​ដ៏​មាន​ប្រជា​ប្រិយ​ភាព​​​របស់​​​​គណ​បក្ស​សង្គ្រោះ​ជាតិ​។

សារ​​​មួយ​​​នៅ​ក្បែរ​រូប​ភាព​ដែល​បង្ហាញ​​​សកម្មភាព​​​របស់​​​​ស្ត្រី​វ័យ​ក្មេង​ក្នុង​​​ឯកសណ្ឋាន​​​​គណបក្ស​សង្គ្រោះ​ជាតិ​ មាន​​​ខ្លឹមសារ​​​​ថា“ យើង​គឺ​​​ជា​ស្ត្រី​​​​ដែល​​​បាន​ត្រៀម​ខ្លួន​​​រួច​​​ជា​​​ស្រេច​​​​សម្រាប់​ការ​សង្គ្រោះ​ជាតិ​ខ្មែរ​នៅ​ថ្ងៃ​ទី​២៨ ខែ​កក្កដា ឆ្នាំ​២០១៣​ ​​​ខាង​​​មុខ​​​នេះ​​​។ ចុះ​អ្នក​វិញ​ តើ​បាន​ត្រៀម​ខ្លួន​សម្រាប់​​​​ការ​​​សង្គ្រោះ​ជាតិ​ហើយ​ឬ​​​នៅ​?”។

រូប​ភាព​ដែល​មាន​ចំណង​ជើង​ថា “ អ្នក​ណា​​​​ក៏​​​ដឹង​​ថា ស្ត្រី​​​​សង្គ្រោះ​ជាតិ​​​សុទ្ធតែ​​​​​​​ក្មេងៗ​​​​​​​ស្អាត​​​ៗ​​​ និង​សុភាព​រាប​សា​នៅ​ពេល​អ្នក​ជួប​ពួកគេ​” បាន​​​ទទួល​ការ​ចុច​​​ឡែក​​​ (likes) ​​​បញ្ជាក់​​​ពី​​​ការ​​​ពេញចិត្ត​​​ពី​​​មនុស្ស​​​ជាង​៧០០​​​នាក់​​​នៅ​លើ​គេហទំព័រ​ហ្វេស​ប៊ុក​ ហើយ​ត្រូវ​បាន​ចេញ​រំលែក​ជាង​១៣៥​ដង​នៅ​លើ​ទំព័រ​​​ហ្វេសប៊ុក​​​នេះ​​​​។

ខណៈ​​​នៅ​សល់​​​តែ​​​​​​​​​​ជាង​មួយខែ​​​​ទៀត​​​ដល់​​​ថ្ងៃ​​​បោះ​ឆ្នោត​​​​​នោះ​​​ ពេលនេះ​គណបក្ស​សង្គ្រោះ​​​​ជាតិ​​​​កំពុង​​​សង្ឃឹម​ថា នឹង​​​អាច​​​ទទួល​បាន​ប្រជាប្រិយ​ភាព​បន្ថែម​​​ទៀត​​​តាមរយៈ​​​​ការ​បញ្ចូល​​​​ស្ត្រី​វ័យក្មេង​វាងវៃ​​​​ និង​គួរ​ឲ្យ​ទាក់​ទាញ​ទៅក្នុង​យុទ្ធនាការ​ឃោសនា​បោះ​ឆ្នោត​របស់​ខ្លួន​។ នៅ​ក្នុង​ប្រទេស​មួយ​ដែល​​ប្រជា​ពលរដ្ឋ​ជាង​ពាក់​កណ្ដាល​មាន​អាយុ​ក្រោម​៣០​​​ឆ្នាំ​នោះ​​​គណបក្ស​សង្គ្រោះ​ជាតិ​ក៏​កំពុង​​ព្យា​យាម​​​ប្រកួត​ប្រជែង​ជាមួយ​ចលនា​យុវ​ជន​​​​ដ៏​​​​ជោគ​ជ័យ​របស់​គណបក្ស​ប្រជាជន​កម្ពុជា​ផង​ដែរ​។

លោក លី សុវិជ្ជា ប្រធាន​​​​ផ្នែក​​​យុទ្ធនាការ​​​របស់​គណបក្ស​សង្គ្រោះ​ជាតិ​ប្រចាំ​​​​រាជធានី​ភ្នំពេញ ដែល​បាន​បង្ហោះ​រូប​ភាព​ស្ត្រី​វ័យ​ក្មេង​​​​ទើប​ជ្រើស​ចូល​​​​​ថ្មី​បំផុត​​ កាលពី​សប្ដាហ៍​មុន​​​នោះ​​​ ​បាន​ឲ្យ​​​ដឹង​​​ថា ចាប់​តាំង​ពី​មាន​ការ​បង្ហោះ​​​រូប​ភាព​ទាំង​នេះ​តាម​អ៊ីនធើណិត​មក​ គណ​បក្ស​សង្គ្រោះ​ជាតិ​ទាក់​ទាញ​​​​បាន​​​មនុស្ស​​​​ជា​​​ច្រើន​នាក់​​​ឲ្យ​មក​ចូល​រួម​ក្នុង​យុទ្ធនាការ​​របស់​ខ្លួន​។

លោក សុវិជ្ជា ​មាន​​​ប្រសាសន៍​​​​ថា“ ស្ត្រី​​ក្មេងៗ​​​ ​​ស្អាត​​​ៗ​ តែង​តែ​មាន​មិត្ត​ភក្តិ​ច្រើន ​ជា​ពិសេស​​​​គឺ​​​បុរស​​​ៗ ដែល​កំពុង​​សិក្សា​ជាមួយ​ពួកគេ​​​​។ ហើយ​ខ្ញុំ​បាន​ប្រាប់​ពួកគេ​ថា អ្នក​ត្រូវ​តែ​នាំ​មិត្ត​ភក្តិ​របស់​អ្នកឲ្យ​មក​ចូល​រួម​ជា​មួយ​យើង​ តើ​បាន​ទេ?”។ លោក​បាន​បន្ថែម​ថា ចាប់​តាំង​​ពី​​​ពេល​​​លោក​​​​​​​​​​​​បង្ហោះ​រូប​ភាព​ទាំងនេះ​កាលពី​ថ្ងៃ​ព្រហស្បតិ៍​មក  ​គណបក្ស​សង្គ្រោះ​ជាតិ​បាន​ទទួល​​​​សមាជិក​​​ជា​​​យុវជន​ប្រមាណ​២០០នាក់​មក​ចូល​រួម​ជាមួយ​គណបក្ស​នេះ​ក្នុង​​​នាម​​​ជា​​​អ្នក​​​​ស្ម័គ្រចិត្ត​។

កាលពី​ថ្ងៃ​​​សៅរ៍  ទី​ស្នាក់​ការ​កណ្ដាល​របស់​គណបក្ស​សង្គ្រោះ​ជាតិ​ បាន​​ក្លាយ​ជា​កន្លែង​ដ៏​មមាញឹក​មួយ ដោយ​យុវជន​ខិត​ខំ​កាត់​និង​ពុះ​ច្រៀក​ឫស្សី​នៅ​​​លើ​​​ទីធ្លា​​​ក្នុង​អគារ​ ខណៈ​នៅ​ជាន់​ខាង​​​លើ​ យុវជន​និង​យុវតី​មួយ​​​ក្រុម​​​​ដែល​​​ស្លៀក​ពាក់​យ៉ាង​ស្អាត​បាត​​​នាំគ្នា​​​​ដំ​ភ្ជាប់​កម្មវិធី​គោល​នយោបាយ​​បក្ស​ទៅ​នឹង​ឫស្សី។
​​​ក្រុម​​​អ្នក​ស្ម័គ្រចិត្ត​ទាំងនេះ​​​សម្រាក​តែ​​​នៅ​ពេល​​​ពួកគេ​​​​ប្រមូល​​​ភេសជ្ជៈ​​​​ដែល​​​បាន​​​បញ្ជា​ទិញ​ពី​ហាង​​ក្បែរ​នោះ​​​មក​​​ទុក​​​ និង​នៅ​ពេល​​​ឈរ​ថតរូប​​​​ខណៈ​​​​លោក សុវិជ្ជា យក​ទូរស័ព្ទ​ដៃ​​​​ស្មាតហ្វូន​​​មក​ថត​រូប​​​បន្ថែម​​​ទៀត​​​​​​​ប៉ុណ្ណោះ​​​។

ខណៈ​​​ការ​​​​ទាក់​ទាញ​​បុរស​​​​កាន់តែ​​​ច្រើន​​​មក​​​ចូលរួម​​​ក្នុង​​​បុព្វហេតុ​​​នេះ​​​មាន​​​​​​ប្រយោជន៍​​​ដល់​​​​​​ការ​​​​​​​​​​​​​​លើកតម្កើង​​​សមាជិក​​​បក្ស​​​ជា​​​ស្ត្រី​វ័យ​ក្មេង​​​នោះ​​​ លោកស្រី មូរ សុខ​ហួរ បេក្ខ​ជន​ឈរ​ឈ្មោះ​ក្នុង​​​ការ​​​បោះឆ្នោត​​​ជ្រើសតាំង​​​​តំណាង​រាស្ត្រ​របស់​គណបក្ស​សង្គ្រោះ​ជាតិ និង​​​ជា​​​អតីត​​​​រដ្ឋមន្ត្រី​ក្រសួង​កិច្ច​ការ​នារី​នៅ​ចន្លោះ​ឆ្នាំ​១៩៩៨ ដល់​​​ឆ្នាំ២០០៤ បាន​លើក​​ឡើង​​​​ថា​ យុទ្ធនាការ​បែប​នេះ​ក៏​ជា​ផ្នែក​មួយ​នៃ​កិច្ច​​​ប្រឹង​ប្រែង​​​ផ្តល់​​​ឥទ្ធិពល​​​ដល់​​​ស្ត្រី​វ័យ​ក្មេង​​នៅ​ទូ​ទាំាង​ប្រទេស​ផង​ដែរ។​

​លោកស្រី​បាន​លើក​ឡើង​ថា“ ធម្មតា​​​ស្ត្រី​​​មិនងាយ​​​ចេញ​មក​ធ្វើ​យុទ្ធនាការ​ទេ​​​​ ដូច្នេះ​នៅ​ពេលដែល​​​​បុរសៗ​ឃើញ​ពួកគេ​​​​មក​ចូល​រួម​ ពួកគេ​ក៏​​​មក​ចូល​រួម​ដែរ​”។ លោកស្រី​បាន​បន្ថែម​ថា“ ធម្មតា​​​វា​មិនមែន​​​អ៊ីចឹង​​​ទេ​​​ ដោយ​​បុរស​​​តែង​​​ដើរ​​​តួនាទី​​​ជា​​​អ្នក​​​ដឹកនាំ​​​​យុទ្ធនាការ​​​ ប៉ុន្តែ​​​តាមរយៈ​​​​​​បណ្តាញ​​​​ភ្ជាប់​​​ទំនាក់​ទំនង​សង្គម​ ​​​ក្នុង​​​ពេល​​​បច្ចុប្បន្ន​​​នេះ​​​ ស្ត្រី​អាច​ចេញ​មុខ​ដោយ​​​​គ្មាន​ការ​ភ័យ​ខ្លាច​អ្វី​ឡើយ​”។

លោកស្រី​ មូរ សុខហួរ ក៏​បាន​​​ធ្វើការ​​​​កត់​សម្គាល់​អំពី​​​ការ​ងារ​​​​របស់​​​គណបក្ស​ប្រឆាំង​អំឡុង​ការ​បោះ​ឆ្នោត​ឃុំ​-សង្កាត់​កាលពី​ឆ្នាំ​មុន​​​​ផងដែរ​​​ គឺ​​​ពេល​គណបក្ស​ សម រង្ស៉ី ព្យាយាម​​​ប្រមែប្រមូល​​​ពល​រដ្ឋ​វ័យ​ក្មេង​​​​​​​​មក​ចូលរួម​ក្នុង​យុទ្ធនាការ​​របស់​ខ្លួន​​​ឲ្យ​​​បាន​​​កាន់​​​តែ​​​ច្រើន​​​​​​​ ហើយ​​​​បាន​ឃើញ​ស្ត្រី​វ័យ​ក្មេង​​មក​ចូលរួម​​​ជាមួយ​​​​គណបក្ស​នេះក្នុង​​​ចំនួន​​​ច្រើន​​​មិន​​​ធ្លាប់​​​មាន​​​ពី​​​មុន​​​មក​​​ ។

លោកស្រី​ មូរ សុខហួរ មាន​ប្រសាសន៍​ថា “ ស្ត្រី​វ័យ​ក្មេង​ នៅ​ពេល​​ធ្វើ​យុទ្ធនាការ​ គឺ​​​យក​​ចិត្ត​​​ទុកដាក់​​​ចំពោះ​​​សារ​របស់​គណបក្ស​​​​ណាស់​​​ ពួកគេ​​​សុខចិត្ត​​​​ធ្វើការ​​​ពី​​​​១០ ទៅ​១២​ម៉ោង​ក្នុង​មួយ​ថ្ងៃ”។​ ម្នាក់​​​​ក្នុង​​​​ចំណោម​​​ស្ត្រី​​​​​​មាន​​​មុខ​​​ក្នុង​​​រូប​ភាព​​​ដែលត្រូវ​បាន​បង្ហោះ​តាម​​​​អ៊ីនធើណិត​ គឺ​សិស្ស​​វិទ្យាល័យ​ម្នាក់​ឈ្មោះ​ ធី វណ្ណថា អាយុ​១៨​ឆ្នាំ ។ នាង​​និយាយ​ថា ខ្លួន​​​រីករាយ​​​នឹង​​​ឲ្យ​​​គេ​​​​ថត​រូប​​​​ពេល​​​កំពុង​​​ធ្វើ​យុទ្ធនាការ​​ ទោះបី​​​ជា​​​ការ​​​ធ្វើ​​​បែបនេះ​​​មាន​​​ន័យ​​​ថា​​​ នាង​​​កំពុង​​​​​​​​​ជួយ​ទាក់​ទាញ​សមាជិក​ថ្មី​ៗឲ្យ​​​​ចូល​រួម​ជាមួយ​​​​គណបក្ស​នេះ​​​ក៏​​​ដោយ​​​ចុះ​​​។

យុវសិស្ស​ ធី វណ្ណថា បាន​និយាយ​កាលពី​ថ្ងៃសុក្រថា“ ពេលខ្លះ​​​ គេ​បង្ហោះ​រូបថត​របស់​ខ្ញុំ​​​​តាម​​​ហ្វេសប៊ុក ហើយ​ក្រោយ​មក​​​​ក៏​​​មាន​មនុស្ស​ជាច្រើន​​មក​ចូល​រួម​​​ដែរ​​​​ដោយសារ​​​ពួកគេ​ឃើញ​​​ខ្ញុំ​មិន​ខ្លាច​។​​​ ​​​ពួកគេមើល​ឃើញ​ថា ខ្ញុំ​គ្រាន់​តែ​ជា​សិស្ស​វិទ្យាល័យ​ម្នាក់​ប៉ុណ្ណោះ​​​​ប៉ុន្តែ ខ្ញុំ​​​​មិន​​​ទាំង​​​​ខ្លាច​​​ផង​​​។ ខ្ញុំ​គិត​ថា ពួកគេ​ឃើញ​​​ថា ខ្ញុំ​នៅ​ក្មេង​ ហើយ​មាន​ភាព​ក្លាហាន​ក្នុង​​​ការ​​​​​​ចេញ​​​មក​​​ជួយ ដូច្នេះ​ពួក​គេ​ត្រូវ​​​ឆ្លៀត​ពេល​​​​​​​ហើយ​​​បង្ហាញ​​​ភាព​​​ក្លាហាន​ដែរ។​

លោក​ គឹម​​​ សុភា​​​ លេខាធិការ​​​​​​នៃ​គណៈ កម្មា​ធិការ​ប្រតិបត្តិ​​​​ទទួល​​​បន្ទុក​​​យុទ្ធនាការ​​​​ឃោសនា​​​របស់​គណបក្ស​សង្គ្រោះ​ជាតិ​​​ បាន​​​ឲ្យ​​​ដឹង​​​​ថា ​​​ការ​​​បង្ហាញ​​​រូបភាព​​​សមាជិក​បក្ស​​​​​​ជា​​​ស្ត្រី​​​វ័យ​ក្មេង​ទាំង​នោះ​​​គឺ​​​​មិន​មែន​​​ផ្តោត​​​ជា​​​សំខាន់​​​លើ​​​ការ​​​ទាក់​ទាញ​អ្នក​បោះ​ឆ្នោត​​​​ជា​​​បុរស​ទេ​ ប៉ុន្ដែ​​​​ តាមពិត​​​គឺ​​​ផ្តោត​​​ជា​​​សំខាន់​​​ទៅ លើ​​​ការ​​​ទាក់​ទាញ​​យុវវ័យ​​​ឲ្យ​ចាប់​អារម្មណ៍​លើ​គណបក្ស​​​នេះ​​​។

លោក​មាន​​​ប្រសាសន៍​ថា “ ពល​រដ្ឋ​មួយ​ចំនួន​ ជា​ពិសេសគឺ​​​​បុរសៗ ប្រាកដ​​​ជា​​​​​និយាយ​ថា អីយា! ស្រី្ត​​​ទាំងនោះ​​​ស្អាត​​​ៗ​​​ណាស់​​​។ ស្រី​ស្អាត​ចូលរួម​​​ជាមួយ​​​​គណបក្ស​សង្គ្រោះ​ជាតិ​​​អស់ហើយ។ តើ​យើង​គួរ​ទៅ​មើល​ស្រី​ស្អាត​ទាំង​អស់​​​នោះ​នៅ​ក្នុង​ទី​ស្នាក់​ការ​បក្ស​ឬ​​​អត់​​​ហ្នឹង​​​?”។លោក​ពន្យល់​​​​ថា“ ប្រការ​​​​​​សំខាន់​គឺ​​​​នៅ​​​ត្រង់​​​ថា យុវវ័យ​​​មាន​​​ឆន្ទៈ​​​ហើយ​​​” ប៉ុន្ដែ​​​លោក​​​​​បន្ថែម​​​ថា​​​ ជា​​​ដំបូង​ គេ​​​ត្រូវ​​​មានចិត្ត​​​​​ចង់​ចូល​រួម​ជា​មួ​យ​គណបក្ស​សង្គ្រោះ​ជាតិ​​​សិន​​​។

​កញ្ញា​​​ ប្រណម្យ កល្យាណី និស្សិត​សាកល​វិទ្យា​ល័យ​ឆ្នាំ​ទី​១​ដែល​​​កំពុង​​​ចូលរួម​​​ក្នុងការ​​​ត្រៀម​​​​រៀប​ចំ​យុទ្ធ​នាការ​ឃោស​នា​បោះ​ឆ្នោត​​​របស់​គណបក្ស​សង្គ្រោះ​ជាតិដែរ​នោះ បាន​នាំ​​​​មិត្តភក្តិ​របស់​ខ្លួន​​​ម្នាក់​ទៅ​​​​ចុះ​​​ឈ្មោះ​​​ចូល​រួម​ជាមួយ​​​​បក្ស​សង្គ្រោះ​ជាតិ​​​ កាលពី​​​ថ្ងៃ​​​សោរ៍​​​។ កញ្ញា​​​​​​បាន​និយាយ​​​ថា“ ខ្ញុំ​គិត​ថា ប្រសិន​បើ​យើង​មាន​ស្ត្រី​​​​ចូលរួម​​​កាន់តែ​​​ច្រើន ​​បុរសៗ​នឹង​​​​​​​​មានចិត្ត​​​​ចង់​ចូល​រួម​ដែរ”។

​កិច្ច​​​ប្រឹងប្រែង​​​លើកស្ទួយ​​​​ស្រ្តី​​​វ័យ​ក្មេងក្នុង​យុទ្ធ​នាការ​របស់​គណបក្ស​ប្រឆាំង​​ជៀស​​​មិនផុត​​​ពី​​​​ការ​រិះ​គន់​ទេ។ ​លោក​ សុវិជ្ជា ដែល​​​ជា​​​អ្នក​រៀបចំ​​​របស់​​​គណបក្ស ​​​នេះ​​​ បាន​ឲ្យ​ដឹង​ថា ប្រធាន​​​ផ្នែក​​​យុទ្ធនាការ​​​របស់​គណបក្ស​សង្គ្រោះ​ជាតិប្រចាំ​​​រាជធានី​ភ្នំពេញ​ត្រូវ​បាន​សមាជិក​គណបក្ស​ប្រជា​ជន​កម្ពុជា​រិះ​គន់​រួច​ទៅ​​​ហើយ​ថា​ បាន​ប្រើ​​​វិធីសាស្ត្រ​​​មិន​​​ស្មោះ​ត្រង់​​​ ហើយ​​​ថែម​​​ទាំង​​​ត្រូវបាន​​​ចោទ​​​ថា​​​ បាន​​​ជួល​ស្ត្រី​​​​​វ័យ​ក្មេង​ឲ្យ​ទៅ​បង្ហាញ​​​មុខ​​​នៅ​​​​ទី​ស្នាក់​ការ​របស់​គណបក្ស​សង្គ្រោះ​ជាតិ ដើម្បី​ធ្វើ​យុទ្ធ​នាការ​​​ទៀតផង​​​។

​យុទ្ធសាស្ត្រ​​​នេះ​មិន​មែន​ប្រើ​​​ផ្តាច់មុខ​​​តែ​​​នៅ​​​ក្នុង​​​ចង្កោម​​​​​​គណបក្ស​សង្គ្រោះ​ជាតិ​​​ទេ។ ​ទំព័រ​​ហ្វេសប៊ុក​​​​មួយ​​​របស់​សហភាព​សហព័ន្ធ​យុវ​ជន​​កម្ពុជា​​​ (UFFC)​​​ ប្រចាំ​​​​រាជធានី​ភ្នំពេញ​ដែល​​​មាន​​​សម្ពន្ធភាព​​​ជាមួយ​​​គណបក្ស​ប្រជា​ជន​កម្ពុជា​ ក៏​មាន​បង្ហាញ​​​រូប​ភាព​​​នៃ​​​ព្រឹត្តិការ​ណ៍​​​របស់​​​ខ្លួន​​​ដែល​​​មាន​​​ការ​​​ចូលរួមពី​​​ស្ត្រី​​​វ័យក្មេង​​​យ៉ាង​​​​ច្រើន​ដែរ។​

​ទោះ​ជា​យ៉ាង​ណា លោក ផៃ ស៊ី​ផាន អ្នក​នាំ​ពាក្យ​ទី​ស្ដី​ការ​គណៈ​រដ្ឋ​មន្ត្រី​បាន​អះអាង​​​​ថា ការ​បង្ហោះ​រូបភាព​​​​​​​បែប​នេះ​​​មិន​មែន​ជា​យុទ្ធ​សាស្ត្រ​របស់​គណ​បក្ស​ប្រជា​ជន​កម្ពុជា​ទេ​​​ ហើយ​​​ថា​​​ រូប​ភាព​​​ណា​​​ក៏ដោយ​​​​​​ដែល​​​ត្រូវ​បាន​​​បង្ហោះ​​​តាម​​​ហ្វេសប៊ុក​​​ស្តីពី​​​ស្ត្រី​​​​​​​មាន​​​សម្រស់​​​គួរ​​​ឲ្យ​​​ទាក់ទាញ​ដែលបាន​​​​ចូល​រួម​ក្នុង​ព្រឹត្តិ​ការណ៍​​​ឧបត្ថម្ភ​​​ដោយ​​​គណបក្ស​​​នេះ​​​​គឺ​ជា​​​​ការ​​​ស្ម័គ្រចិត្ត​​​របស់​​​​​​សមាជិក​​​វ័យក្មេង​​​ប៉ុណ្ណោះ​​​​​​។​​ ​លោក​បាន​មានប្រសាសន៍​ថា “ វាមិន​មែន​​​​ជា​​​​គោល​ការណ៍​របស់​គណបក្ស​ទេ។​យើង​មិនមែន​​​​ធ្វើ​ការ​ដើម្បី​​​​​​វ័យ​​​និង​​​សម្រស់​​​​​​ទេ​​​ យើង​ធ្វើ​ការ​ដើម្បី​យុវ​ជន​ និង​​គោល​ការណ៍”​។​​​

​លោកបន្ថែមថា លោក​​មិន​បារម្ភ​ខ្លាច​​​រូប​ភាព​​​ស្ត្រី​​​ស្អាតៗ​​​​ដែល​បាន​​​​ចូល​រួម​ធ្វើ​យុទ្ធ​នាការ​ឲ្យ​​​​គណបក្ស​សង្គ្រោះ​ជាតិ​​​ ​ទាក់​ទាញ​សមាជិក​វ័យ​​ក្មេង​​​​ឲ្យ​​​ដើរ​​​ចេញ​ពី​គណបក្ស​ប្រជា​ជន​កម្ពុជា​​ទេ ព្រោះ​ថា ភាគ​ច្រើន​នៃ​​ពល​រដ្ឋ​វ័យ​ក្មេង​នៅ​ក្នុង​ប្រទេស​កម្ពុជា​មិន​យល់​ស្រប​នឹង​​​ការ​​​ប្រើ​​​វិធីសាស្ត្រ​​​បែបនេះ​​​ឡើយ​​​។​

​លោក​​​មាន​ប្រសាសន៍​ថា “ ខ្ញុំ​មិន​គិត​ថា​​​ការយក​​​ស្ត្រី​​​​ស្អាតៗ​​​វ័យក្មេង​​​​​​មក​​​ជួយ​​ឃោស​នា​ឲ្យបក្ស​​​គឺ​​​​ជា​គំនិត​ល្អ​ទេ។ វា​មិនជួយ​​​គណ​បក្ស​​​​នោះ​​​ ​​[គណបក្ស​សង្គ្រោះ​ជាតិ] ឡើយ ព្រោះ​យុវវ័យ​​​​កម្ពុជា​នៅ​​​មាន​​​ការ​​​​អភិ​រក្ស​ខ្លាំង​ណាស់​។ នៅ​តាម​ហ្វេសប៊ុក​​​ យុវ​ជន​តែង​តែ​លើកឡើង​​​ពី​​បញ្ហា​ជាតិ​ ពួកគេ​មិន​​​និយាយ​​​ពី​​​សម្បក​​​ក្រៅ​​​របស់​​​មនុស្ស​​​ទេ”៕

ប្រែ​សម្រួល​ដោយ ស៊ា ស៊ុយ​ឈាង​​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស