កាលពីថ្ងៃសុក្រ សាលាដំបូងរាជធានីភ្នំពេញបានផ្តន្ទាទោសស្ត្រីជនជាតិថៃចំនួនបួននាក់ឲ្យជាប់ពន្ធនាគារអស់មួយជីវិតពីបទប៉ុនប៉ងជួញដូរថ្នាំញៀនតាមអាកាសយានដ្ឋានអន្តរជាតិភ្នំពេញក្នុងករណីពីរដោយឡែកពីគ្នាកាលពីក្នុងខែសីហា ឆ្នាំមុន។
កាលពីថ្ងៃទី៧ និងទី៨ ខែសីហា អំឡុងពេលមានរំហូរថ្នាំញៀនយ៉ាងច្រើននៅអាកាសយានដ្ឋានអន្តរជាតិភ្នំពេញ និងអាកាសយានដ្ឋានអន្តរជាតិសៀមរាប ស្ត្រីឈ្មោះ ធំឌី វ៉ារ៉ាងកាណា អាយុ២៩ឆ្នាំ និងអ្នករួមគំនិតឈ្មោះ ថាំងប៊ូន កេតកាន់ អាយុ៣១ឆ្នាំ ត្រូវបានអាជ្ញាធរកម្ពុជាចាប់ខ្លួនបន្ទាប់ពីពួកគេបានប៉ុនប៉ងរត់ពន្ធគ្រឿងញៀនកាកូអ៊ីន៣,៦គីឡូក្រាមចូលក្នុងប្រទេសកម្ពុជា ពីប្រទេសអេក្វាឌ័រកាត់តាមប្រទេសសិង្ហបុរី។
បើទោះជាស្ត្រីទាំងពីរនាក់នេះបានបដិសេធនៅក្នុងតុលាការកាលពីដើមខែនេះថា ពួកគេមិនបានដឹងថា អីវ៉ាន់របស់ពួកគេមានផ្ទុកថ្នាំញៀនកូកាអ៊ីនក៏ដោយ ក៏ចៅក្រម លី លីបម៉េង កាលពីថ្ងៃសុក្របានសម្រេចផ្តន្ទាទោសស្ត្រីទាំងពីរនាក់នេះឲ្យជាប់ពន្ធនាគារអស់មួយជីវិត និងពិន័យជាប្រាក់១០០លានរៀល ស្មើនឹងប្រហែល២៥.០០០ដុល្លារ។
លោកចៅក្រម លីបម៉េង មានប្រសាសន៏ថា “ ប្រសិនបើអ្នកឯងមិនទទួលស្គាល់ការផ្តន្ទាទោសនេះទេ អ្នកឯងមានពេលមួយខែដើម្បីប្តឹងទាស់ បន្ទាប់ពីចេញសាលក្រម”។
នៅតុលាការកាលពីថ្ងៃសុក្រនោះដែរ លោកចៅក្រម សួស សំអាត បានផ្តន្ទាទោសឈ្មោះ ពីវចាន់សូត អ៊ុតសាន់នី អាយុ២០ឆ្នាំ និងឈ្មោះ ហូលឡាស់ ណាន់ធីយ៉ា អាយុ២៧ឆ្នាំ ដែលត្រូវបានចាប់ខ្លួននៅអាកាសយានដ្ឋានអន្តរជាតិភ្នំពេញកាលពីថ្ងៃទី១៣ ខែ សីហាខណៈពេលពួកគេកំពុងប៉ុនប៉ងនាំចូលថ្នាំញៀនមេតំហ្វេតាមីន៤,៧៨គីឡូក្រាម ឲ្យជាប់ពន្ធនាគារអស់មួយជីវិត និងពិន័យឈ្មោះ ពីវចាន់សូត អ៊ុតសាន់នី ជាប្រាក់ចំនួន៦០លានរៀល ស្មើប្រហែល១៥.០០០ដុល្លារ និងឈ្មោះ ហូលឡាស់ ណាន់ធីយ៉ា ៨០លានរៀល ស្មើប្រហែល២០.០០០ដុល្លារ។
ស្ត្រីឈ្មោះ ពីវចាន់សូត បានអះអាងនៅក្នុងសវនាការជំនុំជម្រះមួយកាលពីក្នុងខែឧសភាថា ខ្លួនបានទទួលអីវ៉ាន់នោះនៅក្នុងប្រទេសហ្គាណា ពីបុរសម្នាក់ឈ្មោះ ចន ដលជាមិត្តភក្តិរបស់ប្តីខ្លួន ហើយមិនបានដឹងថាវាមានថ្នាំញៀននៅក្នុងនោះទេ។
ស្ត្រីឈ្មោះ ហូលឡាស់ បាននិយាយនៅខាងក្រៅតុលាការ ខណៈពេលខ្លួនត្រូវបានបញ្ជូនទៅកាន់ពន្ធនាគារថា ខ្លួនមិនប្រាកដថាត្រូវប្តឹងឧទ្ធរណ៍ជំទាស់នឹងការផ្តន្ទាទោសឬយ៉ាងណានោះទេ។
កាលពីឆ្នាំមុន ក៏មានការចាប់ខ្លួនមនុស្សជាច្រើនទៀតដែរពាក់ព័ន្ធនឹងគ្រឿងញៀន។
កាលពីក្នុងខែសីហាដដែលនោះ នៅក្នុងករណីផ្សេងទៀត ស្ត្រីជនជាតិថៃពីរនាក់ត្រូវបានចាប់ខ្លួនជាមួយថ្នាំញៀនកាកូអ៊ីនសរុប២៦គីឡូក្រាមនៅអាកាសយានដ្ឋានអន្តរជាតិភ្នំពេញ ដែលចេញមកពីប្រទេសអេក្វាឌ័រដែរ។ ក្រោយមក កាលពីក្នុងខែតុលា ស្ត្រីជនជាតិថៃពីរនាក់ទៀត ត្រូវបានចាប់ខ្លួនជាមួយថ្នាំញៀនកាកូអ៊ីនសរុប១១គីឡូក្រាមនៅអាកាសយានដ្ឋានអន្តរជាតិសៀមរាប។
ករណីទាំងនេះបានធ្វើឲ្យមានកង្វល់កាន់តែខ្លាំងឡើងថា ប្រទេសកម្ពុជាកំពុងត្រូវក្រុមឧក្រិដ្ឋជនអន្តរជាតិនានាប្រើប្រាស់ជាចំណុចឆ្លងកាត់ដើម្បីផ្គត់ផ្គង់តម្រូវការថ្នាំញៀនតម្លៃខ្ពស់នេះដែលកំពុងតែកើនឡើងនៅក្នុងប្រទេសថៃ។នៅក្នុងឆ្នាំ២០១១ទាំងមូល នគរបាលកម្ពុជា ចាប់បានថ្នាំញៀនកាកូអ៊ីនត្រឹមតែ១,១គីឡូក្រាមប៉ុណ្ណោះ៕
ប្រែសម្រួលដោយ ចេវ ប៊ុននី