ប្រាំថ្ងៃបន្ទាប់ពីសាលាដំបូងខេត្តស្វាយរៀង បានផ្តន្ទាទោសលោក ឈូក បណ្ឌិត អតីតអភិបាលក្រុងបាវិត ឲ្យជាប់ពន្ធនាគាររយៈពេល១៨ខែចំពោះការបាញ់ប្រហារកម្មការិនីរោងចក្រកាត់ដេរបីនាក់ឲ្យរងរបួសកាលពីឆ្នាំ២០១២នោះ នគរបាលបាននិយាយកាលពីម្សិលមិញថា ពួកគេមិនទាន់បានចាប់ខ្លួនគាត់នៅឡើយទេ។
ទោះបីជាតុលាការបានសម្រេចឲ្យលោក ឈូក បណ្ឌិត ជាប់ពិរុទ្ធភាពក្តី ក៏បណ្តាអង្គការសិទ្ធិមនុស្សបានត្អូញត្អែរដោយការខកចិត្តចំពោះការមិនដែលបានឃុំខ្លួនគាត់ ហើយបានលើកឡើងថា ការផ្តន្ទាទោសកាលពីសប្តាហ៍មុនគឺស្រាលពេក បើធៀបទៅនឹងស្ថានទម្ងន់ទោសដែលគាត់បានប្រព្រឹត្ត។
លោក កឹង កន ស្នងការនគរបាលខេត្តស្វាយរៀងបានមានប្រសាសន៍ថា “ យើងកំពុងធ្វើការទាក់ទិននឹងសំណុំរឿងនេះ ប៉ុន្តែក្នុងពេលថ្មីៗនេះយើងមមាញឹកពេកជាមួយនឹងការបោះឆ្នោត”។
លោក កែវ គង់ អធិការនគរបាលក្រុងបាវិត បានបដិសេធមិនផ្តល់សេចក្តីលម្អិតស្តីពីកិច្ចខិតប្រឹងប្រែងក្នុងការតាមស្វែងរកចាប់ខ្លួនលោក ឈូក បណ្ឌិត ទេ ដោយគ្រាន់តែមានប្រសាសន៍ថា “ ប្រសិនបើខ្ញុំដឹងពីតម្រុយរបស់លោក ឈូក បណ្ឌិត ខ្ញុំនឹងចាប់ខ្លួនគាត់”។
លោក ឈូក បណ្ឌិត មានពិរុទ្ធភាព បន្ទាប់ពីនាយរងប៉ុស្តិ៍នគរបាលសង្កាត់ប្រាសាទ ក្រុងបាវិត បានឡើងផ្តល់សក្ខីកម្មថា បានឃើញអតីតអភិបាលក្រុងរូបនេះប្រើកាំភ្លើងរបស់ខ្លួនបាញ់ទៅកម្មករកម្មការិនីដែលកំពុងធ្វើការតវ៉ាទាំងកំហឹងដើម្បីទាមទារសុំដំឡើងប្រាក់ឈ្នួលនៅក្នុងរោងចក្រមួយក្នុងតំបន់សេដ្ឋកិច្ចពិសេស ដែលផលិតស្បែកជើងឲ្យក្រុមហ៊ុនលក់សម្លៀកបំពាក់កីឡាពូម៉ា (Puma) ដ៏ល្បីរបស់អាល្លឺម៉ង់៕
ប្រែសម្រួលដោយ តែម សុខុម