នគរបាលរាជធានីភ្នំពេញ បានឲ្យដឹងកាលពីម្សិលមិញថា ខ្លួនកំពុងតែស៊ើបអង្កេតករណីវាយប្រហារលើបុរសអាយុ៧០ឆ្នាំម្នាក់ ដែលមានសាច់ញាតិជាប់ពាក់ព័ន្ធនឹងជម្លោះរឿងដីធ្លី ជាមួយសាលារាជធានីភ្នំពេញ ហើយមិនព្រមបោះបង់លំនៅដ្ឋានរបស់ខ្លួនទេ ប្រសិនបើសាលារាជធានីភ្នំពេញមិនបង្កើនប្រាក់សំណងឲ្យខ្លួន។
លោក លី ស៊ាងហេង បានឲ្យដឹងថាលោក និងមិត្តភក្ដិរបស់លោកបានកំពុងជិះម៉ូតូ នៅក្បែរលំនៅដ្ឋានរបស់លោក ក្នុងខណ្ឌទួលគោក នៅវេលាម៉ោងប្រហែល១២ថ្ងៃត្រង់ ដែលនៅពេលនោះ លោកត្រូវគេវាយចំក្បាលពីក្រោយ ហើយលោកជឿថា គេបានវាយនឹងដំបងដែក។ លោក ស៊ាងហេង បានឲ្យដឹងបន្ថែមទៀតថា លោកបានឃើញបុរសពីរនាក់ជិះម៉ូតូមួយគ្រឿង មុនពេលលោកទទួលរងនូវការវាយប្រហារនោះ ហើយលោកបានអះអាងបន្តទៀតថា លោកបានស្គាល់ម៉ូតូនោះ ពីព្រោះជាម៉ូតូដែលគេធ្លាប់បានជិះតាមលោកម្តង។
លោកបាននិយាយថា “ ខ្ញុំគិតថា មានបុរសពីរនាក់ជិះម៉ូតូមួយគ្រឿង ហើយមនុស្សម្នាក់បានវាយខ្ញុំចំក្បាល ពីព្រោះពួកគេបានតាមខ្ញុំកាលពីមុន”។ លោកបានរៀបរាប់ឲ្យដឹងបន្ថែមទៀតថា មិត្តភក្ដិរបស់លោកបានទប់លោកមិនឲ្យធ្លាក់ ពីលើម៉ូតូ មុនពេលលោកបានបាត់បង់ស្មារតី ហើយត្រូវបញ្ជូនទៅមន្ទីរសម្រាកព្យាបាលមួយកន្លែង។
គ្រួសាររបស់លោក ស៊ាងហេង ស្ថិតក្នុងចំណោមបីគ្រួសារ ដែលមានផ្ទះនៅជាប់អគារសាលាខណ្ឌទួលគោក ជាមួយសាលាសង្កាត់ និងការិយាល័យគណបក្សប្រជាជនកម្ពុជា ហើយរដ្ឋាភិបាលចង់ទិញយកអគារនោះបន្ទាប់ពីរដ្ឋាភិបាលបានដោះដូរអគារនេះជាមួយក្រុមហ៊ុនឯកជនមួយឈ្មោះ ឃ៊ុនសៀ អាហរ័ណ នីហរ័ណ (Khun Sear Import Export Company)។ គ្រួសារនេះត្រូវបានផ្តល់ឲ្យនូវទឹកប្រាក់ចំនួន១៥.០០០ដុល្លារ ដើម្បីរើចេញ ក៏ប៉ុន្តែ ខ្លួនទាមទារ៣០0.០០០ដុល្លារ។
បន្ទាប់ពីសាកសួរលោក ស៊ាងហេងលោក ហម គា នាយប៉ុស្តិ៍នគរបាលសង្កាត់ បឹងកក់១បានឲ្យដឹងថា លោកគិតថា របួសនេះមិនធ្ងន់ខ្លាំងទេ។លោកបានមានប្រសាសន៍ថា “ ខ្ញុំបានឃើញចំណុចមួយនៅលើក្បាលរបស់គាត់។ មានឈាមហូរ ប៉ុន្តែ ខ្ញុំគិតថា វាមិនមែនជារបួសធ្ងន់ទេ”។ លោកបានលើកឡើងថា លោក ស៊ាងហេង ក៏បានផ្តល់ព័ត៌មានតិចតួចដល់នគរបាល ដើម្បីធ្វើការស៊ើបអង្កេតផងដែរ។ លោកបានមានប្រសាសន៍បន្ថែមទៀតថា “យើងកំពុងស៊ើបអង្កេត ហើយបានសួរជនរងគ្រោះអំពីអ្នកដែលបានវាយគាត់។ គាត់បានប្រាប់នគរបាលថាគាត់អត់ស្គាល់ជននោះទេ”។
កញ្ញា លី ស៊ីវមីង ត្រូវជាកូនស្រីរបស់លោក ស៊ាងហេង ត្រូវបានគេប្រាប់ថា ហេតុការណ៍វាយប្រហារនេះពាក់ព័ន្ធនឹងរឿងជម្លោះដីធ្លីរបស់ពួកគាត់។គាត់បាននិយាយថា “ ខ្ញុំគិតថា វាពាក់ព័ន្ធនឹងរឿងជម្លោះដីធ្លីនៅផ្ទះរបស់ខ្ញុំ។ ឥឡូវនេះ យើងបារម្ភពីសន្តិសុខរបស់យើងណាស់។ កញ្ញា ស៊ីវមីង ក៏បានអះអាងផងដែរថា ជនមិនស្គាល់មុខបានវាយជញ្ជាំងផ្ទះរបស់គាត់ ហើយគប់ដុំថ្មមកលើផ្ទះរបស់គាត់ស្ទើររាល់យប់ផងដែរ។ នគរបាលបានឃាត់ខ្លួនលោក ស៊ាងហេង និងអ្នកជាប់ពាក់ព័ន្ធពីរនាក់ផ្សេងទៀត ដើម្បីធ្វើការសាកសួរ កាលពីខែមុន ហើយបានចោទប្រកាន់ពួកគេថា បានធ្វើឲ្យខូចអគារនេះ អំឡុងពេលមានឧបទ្ទវហេតុមួយកើតឡើង កាលពីខែមេសា ដែលនៅពេលនោះ គ្រួសារទាំងនេះបានឃាត់ក្រុមហ៊ុននេះមិនឲ្យធ្វើរបងព័ទ្ធអគារនេះ៕
ប្រែសម្រួលដោយ កង សុធា