ទីផ្សារហាងកាហ្វេបានរីកព្រោងព្រាតក្នុងរាជធានីភ្នំពេញនៅរយៈពេលប៉ុន្មានឆ្នាំថ្មីៗនេះ។ ក៏ប៉ុន្តែ ហាងកាហ្វេដ៏ល្បីដែលមិនបានចូលមកប្រកួតប្រជែងនោះ គឺហាងកាហ្វេ ស្តាបាក់ (Starbucks) ដែលជាហាងកាហ្វេដ៏ធំរបស់សហរដ្ឋអាមេរិក។
ក៏ប៉ុន្តែ ការមិនបានចូលមកប្រកួតប្រជែងនៅក្នុងទីផ្សារកម្ពុជាមិនបានបញ្ឈប់ពលរដ្ឋវ័យក្មេងមិនឲ្យនាំគ្នាទៅផ្សារក្នុងប្រទេសកម្ពុជា ដើម្បីទិញអាវយឺតដែលមានស្លាកសញ្ញារបស់ហាងកាហ្វេលំដាប់ថ្នាក់ពិភពលោកនេះឡើយ។
ភាគច្រើនគេមិនសូវដឹងថា ស្តាបាក់ ជាអ្វីនោះទេ ប៉ុន្តែ គេឃើញយុវវ័យ និងមនុស្សពេញវ័យក្មេងៗនៅក្នុងរាជធានីនាំគ្នាទិញអាវយឺតនេះ ដែលបានក្លាយជាសម្លៀកបំពាក់ដ៏ពេញនិយមបំផុតដែលគេឃើញក្មេងៗពាក់ធ្វើដំណើរតាមដងផ្លូវ។ យុវជនអាយុ១៦ឆ្នាំម្នាក់ ឈ្មោះ ហែម សុវណ្ណារិទ្ធ ដែលកំពុងឈរនៅ ក្រៅវិទ្យាល័យព្រះស៊ីសុវត្ថិ តាមបណ្តោយមហាវិថីព្រះនរោត្តមបាននិយាយថា “ នៅពេលខ្ញុំពាក់វា ខ្ញុំមានអារម្មណ៍ថា ឡូយ ហើយសង្ហា ពីព្រោះវាស្អាតសម្រាប់ខ្ញុំ មានសិស្សពាក់អាវយឺតនេះច្រើនណាស់នៅក្នុងសាលារបស់ខ្ញុំ។ ខ្ញុំមិនដឹងថា ស្តាបាក់ ជាអ្វីនោះទេ ក៏ប៉ុន្តែ វាពេញនិយមណាស់”។
ក្មេងជំទង់អាយុ១៤ឆ្នាំម្នាក់ឈ្មោះ មឿន ថាន់រ័ត្ន ជាសិស្សនៅអនុវិទ្យាល័យចតុមុខបាននិយាយថា អាវយឺតនេះធ្វើឲ្យខ្លួនគេមានអារម្មណ៍ថា ទាន់សម័យ។ គេបាននិយាយថា “ ខ្ញុំមានអារម្មណ៍ថា ឡូយជាងមុន នៅពេលខ្ញុំពាក់វា”។ ក្រុមហ៊ុនហាងកាហ្វេ ស្តាបាក់ មានហាងរាប់រយកន្លែងនៅក្នុងតំបន់អាស៊ីអាគ្នេយ៍ដូចជា នៅប្រទេសថៃ និងប្រទេសវៀតណាមជាដើម ប៉ុន្តែ ក្រុមហ៊ុននេះមិនមានហាងនៅក្នុងប្រទេសកម្ពុជានោះទេ ហើយតំណាងក្រុមហ៊ុនបានឲ្យដឹងកាលពីម្សិលមិញថា ក្រុមហ៊ុនគ្មានគម្រោងបើកហាងកាហ្វេ ស្តាបាក់ នៅក្នុងប្រទេសកម្ពុជានោះទេ។
លោក បាវណា ចាធានី (Bhavna Jagtiani) អ្នកនាំពាក្យក្រុមហ៊ុន ស្តាបាក់ បាននិយាយថា “ ក្រុមហ៊ុន ស្តាបាក់ មានគម្រោងបន្តបង្កើនការពង្រីកហាងនៅក្នុងតំបន់អាស៊ីអាគ្នេយ៍ ក៏ប៉ុន្តែ នៅពេលនេះ យើងមិនមានគម្រោងចូលទៅក្នុងទីផ្សារថ្មីៗនៅតំបន់អាស៊ីនោះទេ។
រូបារម្មណ៍ ដែលគេគិតចំពោះអាវយឺត ស្តាបាក់ គឺស្លាកសញ្ញារាងរង្វង់មូលដែលមានពណ៌បៃតង ខ្មៅ និងស ដោយមានរូបនាងសុវណ្ណមច្ឆាកន្ទុយពីរ ឬនារីស្រស់ស្អាតនៅកណ្តាលរង្វង់ ព្រមទាំងមានពាក្យ “Starbucks Coffee” នៅព័ទ្ធជំុវិញស្លាកសញ្ញានេះ។
នៅផ្សារធំថ្មីកាលពីម្សិលមិញ គេឃើញអាវយឺតនេះមានលក់ស្ទើរតែគ្រប់តូប។ គេឃើញអ្នកដើរផ្សារមួយចំនួនកំពុងតែពាក់អាវយឺតនេះ។ អាជីវករម្នាក់អាយុ៥៦ឆ្នាំ ឈ្មោះ គុម ចន្នី បានឲ្យដឹងថា “ វាទើបតែចាប់ផ្តើមកាលពីខែមុនប៉ុណ្ណោះ ហើយកាលពីខែមុន ខ្ញុំលក់អាវយឺតនេះដាច់អស់៥០អាវ ក្នុងមួយថ្ងៃ។ ភាគច្រើនគឺយុវវ័យ។ ពួកគេនាំគ្នាមកទិញអាវយឺតនេះ ពីព្រោះវាជាម៉ូតថ្មី”។
អាជីវករម្នាក់ទៀត អាយុ២៣ឆ្នាំ ឈ្មោះ អុ៊ក ពៅ បាននិយាយថា នាងលក់អាវយឺត ស្តាបាក់ ពីរប្រភេទ មួយផលិតនៅថៃ ហើយមួយទៀតផលិតនៅកម្ពុជា។ ស្លាកសញ្ញាដែលគេបោះពុម្ពនៅលើអាវយឺតនេះ គឺដូចគ្នា។ អាជីវកររូបនេះនិយាយថា “ ខ្ញុំអាចលក់ដាច់អស់១០អាវក្នុងមួយថ្ងៃ ភាគច្រើនគឺលក់ទៅឲ្យសិស្ស។ វាមានតម្លៃ៥ដុល្លារសម្រាប់អាវយឺតថៃ ហើយ៣ដុល្លារសម្រាប់អាវយឺតខ្មែរ”។
ខណៈដែលអាវយឺតនេះកំពុងតែមានការនិយមចូលចិត្ត អាជីវករ គុម ចន្នី និង អ៊ុក ពៅ បាននិយាយថា អតិថិជនបានប្រាប់ពួកគាត់ថា វាគឺជារឿងធម្មតានោះទេ។
អ្នកស្រី គុម ចន្នី បាននិយាយថា “ ក្មេងៗ ចូលចិត្តអាវយឺតទាន់សម័យ។ ពួកគេបង្ហោះរូបថតរបស់ខ្លួនដែលមានពាក់អាវយឺតនេះនៅលើបណ្តាញហ្វេសប៊ុក(Facebook) ឲ្យមិត្តភក្តិរបស់ពួកគេមើលដើម្បីឲ្យមិត្តភក្តិរបស់គេទិញវាពាក់ដែរ”៕
ប្រែសម្រួលដោយ ហួង កុកទៀន