31 C
Phnom Penh

ចៅក្រម​​ស៊ើប​អង្កេត​របស់​សាលា​ក្ដី​ខ្មែរ​ក្រហម​​បន្ត​ការស៊ើប​​អង្កេត​សំណុំរឿង​ដែលរដ្ឋាភិបាល​បាន​ជំទាស់​

ដោយ ឌឹ ខេមបូឌា ដេលី

បទវិភាគ

សហ​ចៅក្រម​​អន្តរជាតិ​នៅ​សាលា​ក្ដី​ខ្មែរ​​ក្រហម​ លោក ម៉ាក ហាម៉ុន (Mark Harmon) កំពុង​តែ​​ដំណើរ​​ការ​​​សំណុំរឿង​០០៣​​និង​សំណុំ​រឿង​​០០៤​ ដោយ​ចុះ​ហត្ថលេខា​​​តែង​តាំង​មេធាវី​​តំណាង​​ដើម​បណ្តឹង​រដ្ឋ​ប្បវេណី​ពីរ​រូប​ថែម​ទៀត​ ដែល​​នឹង​ចូល​រួម​​ការ​ស៊ើប​អង្កេត​​ដែល​​​​រដ្ឋាភិបាល​បាន​លើក​ឡើង​ថា​​ ​មិន​គួរ​​ប្រព្រឹត្ត​​ទៅ​​​ឡើយ។

ឯកសារ​តែង​តាំង​​មេធាវី​​ទាំង​ពីរ​រូប​នេះ​​​ដែល​ចុះ​ហត្ថលេខា​ដោយ​​​ចៅក្រម​ ហាម៉ុន កាល​ពីថ្ងៃ​ច័ន្ទ​ ហើយ​​ប្រកាស​ជា​សាធារ​ណៈ​​កាល​ពី​ថ្ងៃ​សុក្រ ទទួល​ស្គាល់​មេធាវី​​ គង់ ផល​លក្ស​ និង​លោក ម៉ាដេវ មូ៉ហាន់ (Mahdev Mohan) ជា​មេធាវី​​តំណាង​ភាគី​​ដើម​បណ្តឹង​រដ្ឋប្បវេណី​ក្នុង​សំណុំ​រឿង​ទាំង​ពីរ​នេះ​ ហើយ​​ផ្ដល់​សិទ្ធិ​ឲ្យ​ពួកគេ​​ពិនិត្យ​ឯកសារ​ក្នុង​សំណុំ​រឿង​ទាំង​នេះ​។

ការ​តែង​តាំង​មេធាវី​​ទាំង​ពីរ​រូប​នេះ គឺ​ជា​ដំណើរ​ឆ្ពោះ​ទៅមុខ​ចុង​ក្រោយ​បំផុត​ដែល​លោក​ ហាម៉ុន បាន​ជំរុញ​ឲ្យ​ការ​ស៊ើប​អង្កេត​របស់​ខ្លួន​ដំណើរ​ការ​បាន​លឿន​​ក្នុង​សំណុំ​រឿង​ទាំង​ពីរ​នេះ ​ប៉ុន្តែ​ ភាគី​ជាតិ​របស់​លោក​ គឺ​សហ​ចៅក្រម​ស៊ើប​អង្កេត​ យូ ប៊ុនឡេង បាន​​លើក​ឡើង​ម្ដង​ហើយ​ម្ដង​ទៀត​ថា លោក​នឹង​មិន​អាច​ស៊ើប​អង្កេត​បន្ត​ទៀត​ទេ​។

រហូត​មកដល់​ថ្ងៃ​ទី​១៩​ខែ​មិថុនា​នេះ​ របាយ​​ការណ៍​របស់​តុលាការ​បាន​បង្ហាញ​ថា ពាក្យ​បណ្ដឹង​រដ្ឋប្បវេណី​សរុប​ទាំង​​​ក្នុង​សំណុំ​រឿង​០០៣ និង​០០៤មាន​ចំនួន​១.១៣១​ករណី​។

ប្រជា​ពល​រដ្ឋ​៣០​នាក់​បាន​ដាក់​ពាក្យ​បណ្ដឹង​​រដ្ឋប្បវេណី​ក្នុង​សំណុំ​រឿង​០០៣​ និង​ប្រជា​ពល​រដ្ឋ​៨០២​នាក់ បាន​ដាក់​ពាក្យ​បណ្ដឹង​​រដ្ឋប្ប​វេណី​​ក្នុង​សំណុំ​រឿង​០០៤ ហើយ​ប្រជា​​ពល​រដ្ឋ​៣១៦​នាក់​ផ្សេង​ទៀត​កំពុង​ស្វែង​រក​ការ​​ទទួល​ស្គាល់​ជា​ភាគី​ដើម​បណ្ដឹង​រដ្ឋប្បវេណី​ក្នុង​សំណុំ​រឿង​ទាំង​ពីរ​នេះ​​។

លោក​​ចៅក្រម​ ហាម៉ុន ក៏បាន​ជំរុញ​ឲ្យ​សាក្សី​​រដ្ឋប្បវេណី​ផ្សេង​ទៀត​មក​ដាក់​ពាក្យ​បណ្ដឹង​ ប្រសិន​បើ​​​ពួកគេ​មាន​ព័ត៌មាន​ពាក់​ព័ន្ធ​នឹង​សំណុំ​រឿង​ទាំង​ពីរ​នេះ​។

ប៉ុន្តែ​ ខណៈ​ពេល​ការ​ស៊ើប​អង្កេត​នៃ​​សំណុំ​រឿង​០០៣​ និង​សំណុំ​រឿង​០០៤​កំពុង​តែ​​ដំណើរ​ការ​​នោះ សាលា​ក្ដី​ខ្មែរ​ក្រហម​ក៏​កំពុង​​​​ប្រឈម​នឹង​បញ្ហា​​កង្វះ​មូលនិធិ​ផង​ដែរ​។ ការ​បើក​សវនាការ​តូចៗ​ក្នុង​​​​សំណុំ​រឿង​០០២​​ជា​លើក​ដំបូង​​​នឹង​នៅ​​តែ​​​ប្រព្រឹត្តទៅ​ ប៉ុន្តែ​តុលា​ការ​​​មិន​​មាន​ថវិកា​សម្រាប់​បើក​ប្រាក់​ខែ​ឲ្យ​បុគ្គលិក​​ជាតិ​ទេ​​ ហើយ​បុគ្គលិក​ជាតិ​ចំនួន​១០​ភាគរយ ​គឺ​​ស្មើនឹង​៣០​នាក់​​មិន​​ត្រូវ​បាន​បន្ត​​កិច្ច​សន្យា​ការ​ងារ​ថ្មី​ទេ​​រហូត​មក​ដល់​ថ្ងៃ​ទី​១ ខែ​កក្កដា​នេះ។

ការ​​វិវឌ្ឍ​នៃ​​សំណុំ​រឿង​០០៣ និង​សំណុំ​រឿង​០០៤ក៏​ត្រូវ​បាន​រារាំង​ដោយ​សារ​ជន​សង្ស័យ​មាន​វ័យ​ចំណាស់​ផង​ដែរ​។ ជន​សង្ស័យ​ក្នុង​សំណុំ​រឿង​​០០៣​​​ឈ្មោះ ស៊ូ ម៉េត ជា​អតីត​មេបញ្ជាការ​កង​ទ័ព​អាកាស​ខ្មែរ​ក្រហម​ បាន​ស្លាប់​កាលពី​ខែ​មុន​ ដោយ​បន្សល់​ទុក​ជន​សង្ស័យ​តែ​ម្នាក់​គត់​ គឺ​លោក មាស​ មុត ជា​មេបញ្ជាការ​កង​ទ័ព​ខ្មែរក្រហម​​ក្នុង​សំណុំ​រឿង​នេះ​។ ហើយ​ជន​សង្ស័យ​នៅ​ក្នុង​សំណុំ​រឿង​០០៤​បីនាក់​ផ្សេង​ទៀត​ គឺ​ឈ្មោះ តា អាន  តា ទិត្យ និង​ អុឹម ចែម គឺសុទ្ធ​តែ​មាន​វ័យ​ចំណាស់​ទៅ​ហើយ​។

លោក ឡុង បញ្ញាវុធ មន្ត្រី​កម្មវិធី​ប្រចាំ​អង្គការ​គំនិត​​ផ្ដួច​ផ្ដើម​យុត្តិធម៌​កម្ពុជា​មាន​ប្រសា​សន៍​ថា ការ​ទទួល​ស្គាល់​​មេធាវី​ពីរ​រូប​នេះ​ គឺ​ជា​​សញ្ញា​មួយ​ល្អ​ ប៉ុន្តែ​មាន​ការ​អភិវឌ្ឍ​តិច​តួច​។

លោក បញ្ញាវុធ បាន​លើក​ជា​សំណួរ​ថា “ តើ​​ការ​ស៊ើប​អង្កេត​ក្នុង​សំណុំ​រឿង​០០៣ ​និង​​សំណុំរឿង​០០៤​​គួរ​ឲ្យ​ទុក​ចិត្ត​បាន​ ហើយ​​​សិទ្ធិ​​របស់​ជន​សង្ស័យ​ត្រូវ​បាន​​​គោរព​​ឬ​ទេ?​”។

លោក​ថ្លែង​បន្ត​ថា “ ការ​ស្លាប់​របស់​ ស៊ូ ម៉េត ​និង​ អៀង សារី ហើយ​ អៀង ធីរិទ្ធ ត្រូវ​បាន​តុលាការ​ប្រកាស​ថា មិន​អាច​យក​មក​ជំនុំ​ជម្រះ​​បាន​ និង​បញ្ហា​​កង្វះ​មូលនិធិ​​នោះ វា​គឺ​ការ​ល្អ​​​បំផុត​សម្រាប់​​សាធារណជន និង​ជន​រងគ្រោះ​​ក្នុង​ការ​​ដឹង​នូវ​អ្វី​ដែល​​កំពុង​តែ​កើត​មាន​នៅ​ក្នុង​សំណុំ​រឿង​០០៣ និង​០០៤​”។

លោក​នាយក​រដ្ឋមន្ត្រី​ ហ៊ុន សែន បាន​ប្រកាស​ជា​យូរ​មក​ហើយ​ជំទាស់​នឹង​សំណុំ​រឿង​០០៣​ និង​០០៤​នេះ ដោយ​អះអាង​ថា​ ប្រទេស​កម្ពុជា​នឹង​ធ្លាក់​ទៅ​ក្នុង​សង្គ្រាម​ស៊ីវិល​​ ប្រសិន​បើ​សាលា​ក្ដី​ខ្មែរ​ក្រហម​ធ្វើការ​ចោទ​ប្រកាន់​ថែម​ទៀត​​ពី​បទ​ឧក្រិដ្ឋ​ដែល​ប្រព្រឹត្ត​ឡើង​​ក្នុង​របប​​ខ្មែរ​ក្រហម​៕

ប្រែសម្រួល​ដោយ ឃិន ណៃ​​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស