យោងតាមតួលេខចេញផ្សាយកាលពីម្សិលមិញបានបង្ហាញថា ទម្ងន់សរុបនៃទំនិញដែលត្រូវបានដឹកជញ្ជូនកាត់កំពង់ផែស្វយ័តក្រុងព្រះសីហនុ ក្នុងរយៈពេលប្រាំមួយខែដំបូងនៃឆ្នាំនេះបានកើនឡើង១៥ភាគរយ បើធៀបនឹងរយៈពេលដូចគ្នាកាលពីឆ្នាំមុន។ តួលេខនេះបង្ហាញថា ទំនិញប្រហែល១,៥១លានតោនបានចរាចរនិងឆ្លងកាត់កំពង់ផែនេះ ក្នុងរយៈពេលពីដើមឆ្នាំរហូតដល់ដំណាច់ខែមិថុនា ពោលគឺច្រើនជាងរយៈពេលដូចគ្នាកាលពីឆ្នាំមុនដែលមាន១,៣១លានតោន។
មន្ត្រីមួយរូបបានឲ្យដឹងថា តួលេខនេះឆ្លុះបញ្ចាំងឲ្យឃើញថា សេដ្ឋកិច្ចរីកចម្រើនរបស់ប្រទេសកម្ពុជាកំពុងត្រូវការសម្ភារអគារយ៉ាងច្រើន។ ភាគច្រើននៃទំនិញទាំងនេះជាទំនិញនាំចូល ដែលមានទម្ងន់សរុប១,១៦លានតោន ពោលគឺបានកើនឡើងជិត១២ភាគរយ បើធៀបនឹងរយៈពេលដូចគ្នាក្នុងឆ្នាំ២០១២។
លោក លូ គឹមឈុន អគ្គនាយកកំពង់ផែស្វយ័តក្រុងព្រះសីហនុបានមានប្រសាសន៍ថា “ នៅពេលសេដ្ឋកិច្ចកំពុងរីកចម្រើន បរិមាណទំនិញនៅផ្នែកដឹកជញ្ជូនបានកើនឡើង។ មានតម្រូវការខ្ពស់នៅផ្នែកគ្រឿងសំណង់”។
តួលេខទាំងនេះ ក៏បានបង្ហាញពីសញ្ញាវិជ្ជមានសម្រាប់វិស័យកសិកម្មផងដែរ ពីព្រោះអត្រាកំណើននៃបរិមាណទំនិញគ្រឿងចក្រនាំចូលបានកើនឡើង១៥ភាគរយ ហើយបរិមាណនាំចេញអង្ករ ក៏បានកើនឡើងជិតទ្វេដងដល់ជាង១៤០.០០០តោនក្នុងរយៈពេល៦ខែដំបូងនៃឆ្នាំនេះ បើធៀបនឹងរយៈពេលប្រាំមួយខែដំបូងនៃឆ្នាំមុន ដែលមានបរិមាណនាំចេញអង្ករ៧៣.០០០តោន។
លោក គឹមឈុន បានមានប្រសាសន៍ថា “ អង្ករភាគច្រើនត្រូវបាននាំចេញទៅផ្គត់ផ្គង់នៅលើទីផ្សារនៃប្រទេសក្នុងតំបន់អឺរ៉ុប”។
លោក ច័ន្ទ សាវុធ ប្រធាននាយកដ្ឋានគ្រឿងចក្រនៃក្រសួងកសិកម្ម រុក្ខាប្រមាញ់ និងនេសាទបានលើកឡើងថា កសិករកាន់តែច្រើនកំពង់តែប្រើប្រាស់បច្ចេកទេសគ្រឿងចក្រ ហើយប្រជាជនជាច្រើនបានធ្វើចំណាកស្រុកទៅទីក្រុងនានា ទើបធ្វើឲ្យបរិមាណទំនិញគ្រឿងចក្រកើនឡើង។ លោកបានមានប្រសាសន៍ថា “ មូលហេតុមួយទៀតគឺថា កសិករយើងបច្ចុប្បន្នកំពុងបង្កើនពេលវេលាដាំដុះ ម្តង ពីរដង ឬក៏បីដងក្នុងមួយឆ្នាំៗ”៕
ប្រែសម្រួលដោយ កង សុធា