ប្រធាននាយកប្រតិបត្តិក្រុមហ៊ុនទូរគមនាគមន៍មួយចំនួនដែលជំពាក់ប្រាក់ក្រុមហ៊ុនប្រតិបត្តិករទូរស័ព្ទចល័តក្ស័យធន អឹមហ្វូន បានឲ្យដឹងកាលពីម្សិលមិញថា ខ្លួនជំពាក់ប្រាក់ក្រុមហ៊ុននេះក្នុងចំនួនតិចជាងចំនួនដែលក្រុមហ៊ុននេះបានអះអាង ហើយត្រៀមចរចាជាមួយអភិបាលបណ្តោះអាសន្នរបស់ក្រុមហ៊ុន អឹមហ្វូន ដើម្បីរកឲ្យឃើញដំណោះស្រាយណាមួយ មុនពេលមានការប្តឹងទៅតុលាការ។
លោក អៀន វ៉ាត់សុន (Ian Watson) បានមានប្រសាសន៍ថា “ យើងពិតជាជំពាក់ប្រាក់ក្រុមហ៊ុន អឹមហ្វូន មែន ក៏ប៉ុន្តែ ប្រាក់ជំពាក់ទាំងនេះមានចំនួនតិចជាងចំនួនដែលពួកគេបានអះអាង។ យើងបានសរសេរលិខិតផ្ញើជូនលោកអភិបាលក្រុមហ៊ុននេះប៉ុន្មានដងហើយ ដើម្បីចាត់ចែងជម្រះបញ្ហាបំណុលរបស់យើង ក៏ប៉ុន្តែ យើងមិនទាន់ទទួលបាននូវចម្លើយតបណាមួយនៅឡើយទេ”។
លោក អ៊ុក រី អភិបាលបណ្តោះអាសន្នរបស់ក្រុមហ៊ុន អឹមហ្វូន ដែលទទួលបន្ទុកការលក់ទ្រព្យសម្បត្តិរបស់ក្រុមហ៊ុននេះ បានលើកឡើងកាលពីថ្ងៃពុធថា លោកមានផែនការដាក់ពាក្យបណ្តឹងទៅសាលាដំបូងរាជធានីភ្នំពេញ ដើម្បីប្តឹងក្រុមហ៊ុន ម៉ូប៊ីថែលនិងក្រុមហ៊ុនទូរគមនាគមន៍ប្រាំមួយផ្សេងទៀត ដោយសារតែក្រុមហ៊ុនទាំងនេះមិនបានទូទាត់ប្រាក់ថ្លៃសេវាកម្ម ដែលខ្លួនបានផ្តល់ឲ្យ ចំនួនជាង១លានដុល្លារ។
លោក អ៊ុក រី បានមានប្រសាសន៍កាលពីថ្ងៃពុធថា ក្រុមហ៊ុនម៉ូប៊ីថែលតែឯងជំពាក់ក្រុមហ៊ុន អឹមហ្វូន ចំនួន៣៥៩.០៥៣ដុល្លារ។ លោក វ៉ាត់សុន បានបដិសេធមិនប្រាប់ថា តើក្រុមហ៊ុនម៉ូប៊ីថែលជំពាក់តិចជាងនេះប៉ុន្មានទេ។ លោក អ៊ុក រី មានប្រសាសន៍ថា “ ពួកគេគួរតែមកជួបពិភាក្សាជាមួយយើង ប្រសិនបើពួកគេមិនឯកភាពនឹងចំនួននេះ… យើងនឹងដាក់ពាក្យប្តឹងក្រុមហ៊ុនទាំងប្រាំមួយនេះទៅសាលាដំបូងរាជធានី យ៉ាងយូរនៅសប្តាហ៍ក្រោយ ប្រសិនបើពួកគេមិនសងទេនោះ”។
ក្រៅពីក្រុមហ៊ុន ម៉ូប៊ីថែល ក្រុមហ៊ុន មិត្តហ្វូន ជំពាក់៥៥២.៤៥២ដុល្លារ ក្រុមហ៊ុនវីង ខេមបូឌា ជំពាក់១៥៧.១៩១ដុល្លារ ក្រុមហ៊ុន តែលខូតិច ជំពាក់៩៧.៩០០ដុល្លារ ក្រុមហ៊ុនរ៉ូយ៉ាល់ តេលេខេម អីុនធើណេសិនណល ខូ អិលធីឌី ជំពាក់៥៦.៤៥៣ដុល្លារ និងក្រុមហ៊ុនអេធូ ខំម្ញូនីខេសិន ខូ អិលធីឌី ជំពាក់១.០០៤ដុល្លារ។
លោក អាន់ថូនី ភើគីន (Anthony Perkins) ប្រធាននាយកប្រតិបត្តិ ក្រុមហ៊ុនវីង បានលើកឡើងកាលពីម្សិលមិញថា ក្រុមហ៊ុនរបស់លោកកំពុងចរចាជាមួយក្រុមហ៊ុន អឹមហ្វូន អំពីបំណុលដែលក្រុមហ៊ុនទាំងពីរជំពាក់គ្នាទៅវិញទៅមក ពីព្រោះមុនពេលក្ស័យធន ក្រុមហ៊ុន អឹមហ្វូន មិនបានប្រគល់ឧបករណ៍ដែលខ្លួនបានខ្ចីពីក្រុមហ៊ុន វីង ឲ្យក្រុមហ៊ុនវីង វិញទេ។
លោកបានមានប្រសាសន៍ថា “ ទោះបីជាមានសំណើសំុឲ្យប្រគល់ឧបករណ៍ទាំងនេះជាច្រើនលើកក៏ដោយ ក៏មិនមានការឆ្លើយតបមកវិញដែរ។ ដូច្នេះ ទំនាក់ទំនងរបស់យើងជាមួយលោកអភិបាល មានគោលបំណងកាត់ថ្លៃឧបករណ៍ចេញពីចំនួនប្រាក់ជំពាក់។ នៅពេល [ចំនួននេះត្រូវបាន] ឯកភាពជាមួយអភិបាល ក្រុមហ៊ុន វីង នឹងទូទាត់សងពេញចំនួន”៕
ប្រែសម្រួលដោយ កង សុធា