កាលពីម្សិលមិញ បេក្ខជនតំណាងរាស្ត្រមកពីគណបក្សសង្គ្រោះជាតិ បានធ្វើពហិកាមិនចូលរួមក្នុងវេទិកាពិភាក្សាដេញដោលផ្នែកនយោបាយនៅក្នុងខេត្តកណ្ដាល ដែលទាក់ទាញអ្នកចូលរួមប្រហែល៥.០០០នាក់ និងដែលត្រូវបានចាក់ផ្សាយផ្ទាល់តាមវិទ្យុ ព្រោះអ្នកចូលរួមមួយក្រុមដែលអះអាងថា ខ្លួនជាអ្នកគាំទ្រគណបក្សសង្គ្រោះជាតិ មានគម្រោងធ្វើឲ្យវេទិកានេះមានបញ្ហាតាមរយៈការផ្ដាច់ខ្លួនចុះចូលជាមួយគណបក្សប្រជាជនកម្ពុជាកំពុងកាន់អំណាច។
លោក អ៊ូ ចាន់រិទ្ធ បានឲ្យដឹងថា ខ្លួនបានទៅចូលរួមនៅក្នុងវេទិកានេះដែលស្ថិតក្នុងវត្តមួយក្នុងឃុំស៊ីធរ ក្នុងបំណងចូលរួមនៅក្នុងវេទិកាពិភាក្សាដេញដោលនេះ ប៉ុន្តែក្រោយពីបានដឹងពីគម្រោងបង្កបញ្ហានេះ លោកក៏បានដើរចេញពីវេទិកា ដោយទុកនាទីនេះជូនលោក អូន ព័ន្ធមុនីរ័ត្ន ជាបេក្ខជនតំណាងមកពីគណបក្សប្រជាជនកម្ពុជា និងលោក មាស ឆាយ៉ាណា បេក្ខជនតំណាងរាស្ត្រមកពីគណបក្សហ៊្វុនស៊ិនប៉ិច។
លោក អ៊ូ ចាន់រិទ្ធ មានប្រសាសន៍ថា “ ខ្ញុំបានសម្រេចចិត្តធ្វើពហិកាមិនចូលរួមនៅក្នុងព្រឹត្តិការណ៍នោះដោយសារមានការរៀបចំគម្រោងអុកឡុកវេទិកានៅចំពោះមុខម៉ាស៊ីនថតរបស់អ្នកយកព័ត៌មានឲ្យស្ថានីយទូរទស្សន៍”ដោយលោកអះអាងថា អ្នកគាំទ្រគណបក្សប្រជាជនកម្ពុជាមួយក្រុមត្រូវបានគេជួលឲ្យស្លៀកពាក់ជាអ្នកគាំទ្រគណបក្សសង្គ្រោះជាតិនិងឲ្យក្រោកឈរនៅពេលណាមួយអំឡុងកិច្ចពិភាក្សានោះដើម្បីប្រកាសផ្ដាច់ខ្លួនចុះចូលជាមួយគណបក្សប្រជាជនកម្ពុជា។
លោក ចាន់រិទ្ធ បានចោទប្រកាន់ថា “ ក្រុមនោះត្រូវបានគេជួលឲ្យប្តូរសម្លៀកបំពាក់របស់ពួកគេ។ យើងបាននិយាយជាមួយពួកគេខ្លះក្នុងចំណោមពួកគេទាំងនោះ ហើយពួកគេបាននិយាយថា ខ្លួនត្រូវបានគេផ្ដល់ប្រាក់ឲ្យចំនួន ៣០.០០០រៀល និងអាវយឺតនិងមួករបស់គណបក្សសង្គ្រោះជាតិ ដើម្បីបង្កការរំខាននៅក្នុងវេទិកានេះ”។
លោកស្រី ឡូរ៉ា ថនតុន (Laura Thornton) នាយកវិទ្យាស្ថានជាតិប្រជាធិបតេយ្យ ហៅកាត់ថា NDI ដែលបានរៀបចំវេទិកានេះឡើង បានឲ្យដឹងថា លោក អ៊ូ ចាន់រិទ្ធ បានដើរចេញពីវេទិកានេះ បន្ទាប់ពីវិទ្យាស្ថាន NDI បានបដិសេធមិនបណ្តេញមនុស្សមួយក្រុម ឬបង្ខំឲ្យពួកគេដោះសម្លៀកបំពាក់គណបក្សសង្គ្រោះជាតិចេញ។
លោកស្រី ថនតុន មានប្រសាសន៍បន្តថា “ វិទ្យាស្ថានជាតិប្រជាធិបតេយ្យមិនអាចស្នើឲ្យនរណាម្នាក់ចាកចេញពីវេទិការបស់យើងបានឡើយ លុះត្រាតែពួកគេបានរំលោភក្រមប្រតិបត្តិ ឬបំពានច្បាប់។ដូច្នេះវិទ្យាស្ថានជាតិNDI មិនអាចចាត់វិធានការណាមួយចំពោះប្រជាពលរដ្ឋនៅក្នុងខេត្តកណ្ដាលដោយផ្អែកលើការចោទប្រកាន់ពីបេក្ខជនតំណាងរាស្ត្រមកពីគណបក្សសង្គ្រោះជាតិអំពីអ្វីដែលគាត់គិតថា ពួកគេអាចធ្វើឡើយ”។ លោកស្រីបានបន្ថែមថា “ អ្នកចូលរួមក្នុងវេទិកានេះមានសិទ្ធិសេរីភាពក្នុងការស្លៀកសម្លៀកបំពាក់អ្វីក៏ដោយដែលពួកគេបានជ្រើសរើស ក្នុងនោះរួមមានទាំងអាវយឺតដែលមានស្លាកសញ្ញាគណបក្ស ផងដែរ ហើយត្រង់ថា តើពួកគេជាអ្នកគាំទ្រពិត ឬមិនពិតនោះ គឺជារឿងមួយផ្សេងទៀត”។
លោកស្រី ថនតុន ក៏បានលើកឡើងថា ការសម្រេចចិត្តរបស់លោក ចាន់រិទ្ធ ក្នុងការធ្វើពហិកាព្រឹត្តិការណ៍មុនការបោះឆ្នោតនេះគឺ ជាការខាតបង់យ៉ាងធំមួយនិងជាការបាត់បង់ឱកាសសម្រាប់គណបក្សសង្គ្រោះជាតិ។ ទោះជាយ៉ាងណា លោក ចាន់រិទ្ធ ឆ្លើយតបថា ហានិភ័យនៃការបន្តស្ថិតក្នុងវេទិកាដែលនឹងមានការចាក់ផ្សាយព័ត៌មានមិនពិតអំពីការផ្ដាច់ខ្លួននេះ គឺធំធេងជាងផលប្រយោជន៍សម្រាប់គណបក្សសង្គ្រោះជាតិទៅទៀត។
លោកបានមានប្រសាសន៍បន្តថា “ យើងមិនអាចទទួលបានប្រយោជន៍អ្វីពីវេទិកានេះទេ។ ពិតណាស់ថា វានឹងត្រូវបានចាក់ផ្សាយដោយនឹងបានឮដល់ប្រជាពលរដ្ឋរាប់លាននាក់ ប៉ុន្តែយើងពុំមានប្រព័ន្ធផ្សព្វផ្សាយដើម្បីឆ្លើយតបវិញមុនការបោះឆ្នោត ដើម្បីជៀសវាងការខូចមុខមាត់គណបក្សដោយសារមានអ្នកបន្លំខ្លួនធ្វើជាអ្នកគាំទ្រគណបក្សសង្គ្រោះជាតិ រួចចុះចូលជាមួយបក្សប្រជាជនទេ”៕
ប្រែសម្រួលដោយ ឃិន ណៃ