កាលពីម្សិលមិញ សាលាដំបូងរាជធានីភ្នំពេញបានបើកសវនាការកាត់ក្តីជនជាប់ចោទបួននាក់ក្នុងចំណោមជនជាប់ចោទប្រាំមួយនាក់ដែលត្រូវបានចោទប្រកាន់ពីបទប្លន់មានស្ថានទម្ងន់ទោស និងការប្រើប្រាស់អាវុធខុសច្បាប់ រួមទាំងការអះអាងពីចុងចោទមួយចំនួនថា អាវុធនេះពិតជាអាវុធក្លែងក្លាយ។
យោងតាមលោក សេង នាង ចៅក្រមប្រធានក្រុមប្រឹក្សាជំនុំជម្រះបានឲ្យដឹងថា ជនសង្ស័យប្រាំនាក់ក្នុងចំណោមជនសង្ស័យទាំងនោះត្រូវបានចាប់ខ្លួនកាលពីខែកក្កដា ឆ្នាំ២០១២ បន្ទាប់ពីតាមចោទថា បានប្លន់ម៉ូតូពីមនុស្សពីរនាក់ ចំណែកឯជនសង្ស័យទី៦ប្រឈមនឹងការចោទប្រកាន់ពីបទទទួលផលចោរកម្ម។
ប៊ុត ឧត្តម អាយុ២០ឆ្នាំ បានប្រាប់តុលាការថា “ខ្ញុំជិះម៉ូតូពីរគ្រឿងជាមួយបុរសបួននាក់ទៀត ហើយនៅពេលនោះយើងបានហៅជនរងគ្រោះឲ្យឈប់នៅតាមផ្លូវ។ ខ្ញុំបានដកកាំភ្លើងជ័រភ្ជង់ពួកគេ ដើម្បីបំភ័យឲ្យរត់ ដូច្នេះយើងប្លន់យកម៉ូតូតែម្តង”។ ជននេះបានបន្ថែមទៀតថា “ យើងមិនមានគម្រោងប្លន់ទេ ប៉ុន្តែ យើងទាំងអស់គ្នាសុទ្ធតែស្រវឹងស្រា”។
ចុងចោទម្នាក់ទៀតឈ្មោះ ហៅ តុលា អាយុ២១ឆ្នាំ ក៏បានអះអាងផងដែរថា ឈ្មោះ ឧត្តម បានប្រើកាំភ្លើងជ័រជំនួសកាំភ្លើងពិត។ ឈ្មោះ ឧត្តម និយាយថា ក្រោយពីប្លន់ម៉ូតូរួចខ្លួនបានយកម៉ូតូនេះទៅលក់នៅអូរប្ញស្សីក្នុងតម្លៃ ៧៥០ដុល្លារ ដោយចែកគ្នាក្នុងម្នាក់ៗបាន១៥០ដុល្លារ។ តុលាការនឹងប្រកាសសាលក្រមនៅថ្ងៃទី២៥ខែកក្កដា ៕
ប្រែសម្រួលដោយ សោម សារុន