កាលពីម្សិលមិញ តុលាការកំពូលបានបើកសវនាការលើបណ្ដឹងឧទ្ធរណ៍សុំនៅក្រៅឃុំបណ្ដោះអាសន្នរបស់អតីតក្រឡាបញ្ជីសាលាដំបូងរាជធានីភ្នំពេញម្នាក់ ដែលត្រូវបានតុលាការនេះផ្តន្ទាទោសពីបទរំលោភសេចក្តីទុកចិត្តដោយសារបានទទួលប្រាក់ចំនួន២៥០.០០០ដុល្លារពីអ្នកជំនួញម្នាក់ពាក់ព័ន្ធរឿងក្តីមួយ។
លោក គ្រួច បូរ័ត្ន អាយុ៤០ឆ្នាំត្រូវសាលាដំបូងរាជធានីភ្នំពេញសម្រេចផ្តន្ទាទោសឲ្យជាប់ពន្ធនាគាររយៈពេល៤ឆ្នាំកន្លះកាលពីខែឧសភា បន្ទាប់ពីតុលាការរកឃើញថា លោកបានទទួលប្រាក់ពីបុរសម្នាក់ឈ្មោះ សួន លី។
លោក បូរ័ត្ន ដែលសំណើសុំនៅក្រៅឃុំរបស់លោកត្រូវបានសាលាដំបូងរាជធានីភ្នំពេញច្រានចោលកាលពីខែតុលា ហើយសាលាឧទ្ធរណ៍ក៏បានច្រានចោលបណ្ដឹងនេះកាលពីខែធ្នូផងដែរនោះ កាលពីម្សិលមិញបានស្នើសុំឲ្យតុលាការកំពូលដោះលែងរូបលោកដោយសារជាបទល្មើសមជ្ឈិម ហើយលោកនិយាយថា លោកមានបំណងសងប្រាក់ចំនួនពាក់កណ្ដាលទៅឲ្យលោក លី វិញ។
លោក បាន អះអាងថា លោក កែ សាខន អតីតអនុប្រធានសាលាដំបូងរាជធានីដែលលោកបាននិយាយថា បានប្រគល់ប្រាក់របស់លោក សួន លី ចំនួន២៥០.០០០ដុល្លារឲ្យទៅលោកនោះ គួរតែសងប្រាក់ចំនួនពាក់កណ្ដាលទៀត។
លោក គ្រួច បូរ័ត្ន ដែលបានប្តឹងទាស់នឹងសាលក្រមនេះបានប្រាប់តុលាការ កាលពីម្សិលមិញថា “ ខ្ញុំបានផ្តល់ប្រាក់របស់ខ្ញុំចំនួន៧៥.០០០ដុល្លារឲ្យទៅតុលាការរួចហើយ ហើយខ្ញុំនឹងផ្តល់ទឹកប្រាក់ចំនួន៥០.០០០ថែមទៀត ដើម្បីឲ្យតុលាការដោះលែងរូបខ្ញុំពីពន្ធនាគារ”។
លោក ពុទ្ធ ធាវី មេធាវីរបស់លោក បូរ័ត្ន បានមានប្រសាសន៍ថា កូនក្តីរបស់លោក បានទទួលប្រាក់តែ៧៥.០០០ប៉ុណ្ណោះ លើកដំបូង ហើយថា លោក បូរ័ត្ន គ្រាន់តែធ្វើតាមបញ្ជាររបស់លោក សាខន តែប៉ុណ្ណោះ ដែលលោក សាខន មិនត្រូវបានតុលាការផ្តន្ទាទោសទេ ហើយបច្ចុប្បន្ននេះលោកធ្វើជាអនុប្រធានសាលាដំបូងខេត្តតាកែវទៀតផង។ លោក ធាវី បន្តថា “ ប្រសិនបើ [លោក បូរ័ត្ន] ជាប់ពន្ធនាគារមែននោះពួកគេត្រូវតែដាក់ពន្ធនាគារទាំងពីរនាក់ ទើបស្មើគ្នា”។ តុលាការកំពូលនឹងប្រកាសសាលក្រមក្នុងរឿងក្តីនេះ នៅថ្ងៃទី២៤ ខែកក្កដា ខាងមុខនេះ៕
ប្រែសម្រួលដោយ ឃិន ណៃ