កាលពីម្សិលមិញ សាលាដំបូងខេត្តកណ្តាលបានចោទប្រកាន់អ្នកគាំទ្រគណបក្សសង្គ្រោះ ជាតិម្នាក់ពីបទបង្ករបួសស្នាម ក្រោយពីមានការប៉ះទង្គិចគ្នារវាងអ្នកគាំទ្រគណបក្សនេះនិងអ្នកគាំទ្រគណបក្សប្រជាជនកម្ពុជា។
ឈ្មោះ ប៊ុន សាខន អាយុ៣១ឆ្នាំកំពុងត្រូវបានឃុំខ្លួនរង់ចាំការកាត់ក្តី បន្ទាប់ពីមានការប៉ះទង្គិចគ្នា ដែលបានកើតឡើងកាលពីថ្ងៃច័ន្ទ ពេលក្រុមធ្វើយុទ្ធនាការឃោសនាទាំងពីរជួបគ្នានៅក្នុងឃុំកំពង់អុស ស្រុកពញាឮ អំឡុងពេលថ្ងៃត្រង់ ហើយបានវាយតប់គ្នា បណ្តាលឲ្យមនុស្សចំនួនបីនាក់រងរបួស។
លោក អ៊ាវ ចំរើន ស្នងការនគរបាលខេត្តកណ្តាល បានមានប្រសាសន៍ថា “ ព្រះរាជអាជ្ញាបានចោទប្រកាន់ ប៊ុន សាខន ពីបទបង្ករបួសស្នាម ហើយគាត់កំពុងត្រូវបានឃុំខ្លួនរង់ចាំការកាត់ក្តី”។ លោកបានមានប្រសាសន៍បន្តថា “ យើងមិនដឹងថា តើគាត់ជាសមាជិកគណបក្សប្រជាជនកម្ពុជា ឬគណបក្សសង្គ្រោះជាតិទេ។ យើងចាប់ខ្លួនគាត់ ព្រោះគាត់ជាប់ពាក់ព័ន្ធក្នុងការបង្ករបួសស្នាម”។
លោក សេង ស្រាំង អធិការនគរបាលស្រុកពញាឮ បានឲ្យដឹងថា មន្ត្រីរបស់លោកបានចាប់ខ្លួន សាខន បន្ទាប់ពីមានការចោទប្រកាន់ថា គាត់បានវាយតប់ជាមួយក្រុមអ្នកគាំទ្រគណបក្សប្រជាជនកម្ពុជា នៅក្នុងការប៉ះទង្គិចគ្នានោះ។
លោក សេង ស្រាំង បានមានប្រសាសន៍ថា “ យើងបានចាប់ខ្លួន សាខន កាលពីព្រឹកថ្ងៃពុធ តាមការចោទប្រកាន់ថា គាត់បានបង្ករបួសស្នាមដល់សកម្មជនគណបក្សប្រជាជនកម្ពុជាម្នាក់”។ អ្នកគាំទ្រគណបក្សប្រជាជន ដែលនគរបាលមិនបានបញ្ចេញឈ្មោះនេះ បានអះអាងថា លោក សាខន បានវាយគាត់ត្រូវចំក្បាល ប៉ុន្តែ គាត់រងរបួសស្រាលទេ ហើយមិនបានចូលមន្ទីរពេទ្យឡើយ។
លោក ម៉ៅ ឌីយ៉ាម៉ង់ ប្រធានគណបក្សសង្គ្រោះជាតិប្រចាំស្រុកពញាឮ បានអះអាងថា ការចាប់ខ្លួននេះគឺមិនយុត្តិធម៌ទេ ហើយបានរៀបរាប់តាមការមើលឃើញរបស់លោកពីអ្វីដែលបានកើតឡើងកាលពីថ្ងៃច័ន្ទ។ លោកបានមានប្រសាសន៍បន្តថា “ វាមិនយុត្តិធម៌ទេដែលអ្នកគាំទ្រគណបក្សសង្គ្រោះជាតិរូបនេះត្រូវបានចាប់ខ្លួនដូច្នេះ ព្រោះគាត់មិនបានជាប់ពាក់ព័ន្ធក្នុងការប្រើអំពើហិង្សាឡើយ”។
លោក ឌីយ៉ាម៉ង់ អះអាងថា គណបក្សសង្គ្រោះជាតិបានដឹកនាំយុទ្ធនាការឃោសនាបោះឆ្នោតនៅក្នុងឃុំកំពង់អុស ដោយបានចាប់ផ្តើមនៅម៉ោង៧ព្រឹក ហើយអ្វីៗបានដំណើរការដោយសន្តិវិធី រហូតដល់វេលាថ្ងៃត្រង់ពេលអ្នកគាំទ្រគណបក្សប្រជាជនកម្ពុជាឡោមព័ទ្ធក្រុមរបស់លោក រួចបានចោលដបទឹកសុទ្ធលើពួកគេ និងរាំងផ្លូវមិនឲ្យពួកគេបន្តដំណើរទៅមុខទៀត។ លោកបានមានប្រសាសន៍ថា “ សមាជិកគណបក្សប្រជាជនកម្ពុជានៅក្នុងស្រុកពញាឮ ជានិច្ចកាលតែងរំខានគណបក្សសង្គ្រោះជាតិ នៅពេលយើងធ្វើយុទ្ធនាការឃោសនាបោះឆ្នោត។ ពួកគេមកវាយពួកយើង”។
លោក តុង ស៊ីវមី ជាអភិបាលស្រុកបានបដិសេធថា គណបក្សប្រជាជនកម្ពុជាមិនបានបង្កការរំខាននោះទេ។ លោកបានមានប្រសាសន៍ថា “ វាមិន ពិតទេដែលថា សកម្មជនគណបក្សប្រជាជនកម្ពុជាប្រើហិង្សាលើអ្នកគាំទ្ររបស់គណបក្សសង្គ្រោះជាតិនោះ។ អ្នកគាំទ្រគណបក្សសង្គ្រោះជាតិបានចោលដបទឹកសុទ្ធ និងបានព្រួតគ្នាវាយសកម្មជនគណបក្សប្រជាជន”។
លោក ទេព នីថា អគ្គលេខាធិការនៃគណៈកម្មាធិការជាតិរៀបចំការបោះឆ្នោត(គ.ជ.ប.) បានឲ្យដឹងថា គ.ជ.ប. បានទទួលពាក្យបណ្តឹងចំនួន៣១៧ករណីហើយ ពាក់ព័ន្ធនឹងការរំខានយុទ្ធនាការឃោសនាប្រហាក់ប្រហែលគ្នានេះ ប៉ុន្តែថា មានតែ១០ករណីប៉ុណ្ណោះដែលពាក់ព័ន្ធនឹងការប្រើអំពើហិង្សា៕
ប្រែសម្រួលដោយ ចេវ ប៊ុននី