កាលពីម្សិលមិញ នគរបាលខេត្តព្រៃវែងបានសាកសួរមន្ត្រីគណបក្សប្រឆាំងចំនួនបីរូបពាក់ព័ន្ធនឹងលទ្ធផលនៃការស្ទង់មតិដែលបង្ហាញថា គណបក្សសង្គ្រោះជាតិមានសំឡេងគាំទ្រជាងគណបក្សប្រជាជនកម្ពុជា ក្នុងការបោះឆ្នោតជាតិថ្ងៃទី២៨ កក្កដា។
ការសាកសួរនេះធ្វើឡើងរយៈពេលមួយថ្ងៃបន្ទាប់ពីទីស្តីការគណៈរដ្ឋមន្ត្រីបានអំពាវនាវឲ្យមានការចាប់ខ្លួនជនណាដែលជាប់ពាក់ព័ន្ធក្នុងការផលិតឯកសារ ដែលរដ្ឋាភិបាលអះអាងថា ជាការក្លែងបន្លំទិន្នន័យទាក់ទងនឹងការបោះឆ្នោត ដែលចងក្រងដោយវិទ្យាស្ថានសាធារណរដ្ឋអន្តរជាតិ (IRI)។
លោក ឈិត សុផល សមាជិកក្រុមប្រឹក្សាមកពីគណបក្សប្រឆាំងប្រចាំស្រុកកញ្ច្រៀច បានឲ្យដឹងថា មន្ត្រីឃុំមកពីគណបក្សប្រឆាំងទាំងបីនាក់នេះត្រូវបាននគរបាលស្រុកហៅទៅសាកសួរដើម្បីឲ្យដឹងថា តើពួកគេបានទទួលឯកសារមានលទ្ធផលនៃការស្ទង់មតិនេះដោយរបៀបណា ហើយក៏ត្រូវបានដោះលែងវិញនៅពេលក្រោយមក។
លោក សុផល មានប្រសាសន៍ថា“ ពួកគេបានឆ្លើយថា ខិត្តប័ណ្ណនេះបានមកពីសកម្មជនគណបក្សសង្គ្រោះជាតិមា្នក់ក្នុងខេត្តកំពង់ចាម ប៉ុន្តែពួកគេមិនស្គាល់ឈ្មោះគាត់ទេ”។ ក្នុងចំណោមអ្នកទាំងបីនេះ គ្មាននរណាម្នាក់អាចទាក់ទងសុំការអត្ថាធិប្បាយបានឡើយ។
លោក ឈាង វុត្ថា អធិការរងនគរបាលស្រុកកញ្រ្ចៀច បញ្ជាក់ថា បុរសទាំងបីនាក់នេះពិតជាត្រូវបានសាកសួរអំពីឯកសារដែលត្រូវបានអះអាងថា ជាលទ្ធផលនៃការស្ទង់មតិរបស់វិទ្យាស្ថានសាធារណរដ្ឋអន្តរជាតិមែន ប៉ុន្តែបានបដិសេធមិនអធិប្បាយបន្ថែមឡើយ។
លោក វណ្ណ សារឿន ស្នងការនគរបាលខេត្ត ដែលមុននេះបាននិយាយថា “ គ្មានអ្វីកើតឡើង” នោះ ក៏បានបដិសេធមិនឆ្លើយសំណួរបន្ថែមទៀតដែរ។ តាមរយៈសេចក្តីថ្លែងការណ៍មួយដែលបានចេញផ្សាយកាលពីថ្ងៃពុធ ទីស្តីការគណៈរដ្ឋមន្ត្រីបានជំរុញឲ្យអាជ្ញាធរចាប់ខ្លួន និងដាក់ទោសជនណាដែលផលិត “ ឯកសារក្លែងក្លាយ” ទាក់ទងនឹងការបោះឆ្នោត ព្រោះវាអាច “ បង្កឲ្យមានចលាចលសង្គម”។
ប៉ុន្តែរដ្ឋាភិបាលមិនទាន់ពន្យល់ថា តើការផលិតឯកសារនេះជាការបំពានច្បាប់អ្វីខ្លះទេ។ លោក គង់ បូរា បេក្ខជនតំណាងរាស្ត្ររបស់គណបក្សសង្គ្រោះជាតិប្រចាំខេត្តព្រៃវែង លើកឡើងថា នគរបាលបានសាកសួរមន្ត្រីឃុំទាំងបីនាក់ដើម្បីបំភ័យពួកគេមុនការបោះឆ្នោតប៉ុណ្ណោះ។ លោកបន្តថា “ ខ្ញុំគិតថា នេះជាការគំរាមកំហែងមួយដល់សកម្មជនទាំងអស់របស់យើងនៅក្នុងខេត្តព្រៃវែង និងនៅទូទាំងប្រទេសដើម្បីបំភ័យពួកគេ”។
ឯកសារក្លែងក្លាយនេះមានលទ្ធផលនៃការស្ទង់មតិដែលបង្ហាញថា គណបក្សសង្គ្រោះជាតិនឹងទទួលបាន៦៤អាសនៈក្នុងចំណោម១២៣អាសនះនៅក្នុងសភា ខណៈគណបក្សប្រជាជនកម្ពុជាទទួលបាន៥៩អាសនៈ។ បច្ចុប្បន្ន គណបក្សប្រជាជនកម្ពុជាមាន៩០អាសនៈហើយត្រូវបានរំពឹងជាទូទៅថា នឹងរក្សាបានអាសនៈភាគច្រើនក្នុងសភា ក្រោយការបោះឆ្នោតនៅពេលខាងមុខនេះ។
វិទ្យាស្ថាន IRI ឲ្យដឹងថា គណបក្សទាំងពីរបានបកស្រាយខុសម្តងហើយម្តងទៀតអំពីទិន្នន័យរបស់ខ្លួន ប៉ុន្តែវិទ្យាស្ថាននេះមិនព្រមចែករំលែកទិន្នន័យ “ ផ្ទៃក្នុង” ដែលគណបក្សទាំងពីរអះអាងថា ខ្លួនបានយកមកធ្វើជាសម្អាងសម្រាប់អំណះអំណាងអំពីជ័យជម្នះរបស់ខ្លួនឡើយ៕
ប្រែសម្រួលដោយ ចេវ ប៊ុននី