លោក យឹម សារ៉ាន់ អធិការនគរបាលខណ្ឌដង្កោបានឲ្យដឹងថា កាលពីថ្ងៃព្រហស្បតិ៍ នគរបាលរាជធានីភ្នំពេញបានចាប់ខ្លួនបុរសពីរនាក់ពីបទកាន់កាប់អាវុធខុសច្បាប់ បន្ទាប់ពីពួកគេជាប់ពាក់ព័ន្ធក្នុងការប៉ះទង្គិចគ្នាមួយដោយសារគ្រោះថ្នាក់ចរាចរណ៍នៅក្នុងខេត្ត កណ្ដាល។
នគរបាលបានឲ្យដឹងថា ឈ្មោះ ព្រីង ធី អាយុ ៤៣ឆ្នាំ មកពីខេត្តព្រៃវែង និង ឈ្មោះ ជា ភារិទ្ធ អាយុ ២៧ឆ្នាំ ជានគរបាលនៅខេត្តកំពង់ឆ្នាំង បានជាប់ពាក់ព័ន្ធក្នុងករណីគ្រោះថ្នាក់ចរាចរណ៍មួយនៅខេត្តកណ្តាល ខណៈពួកគេកំពុងជិះទោចក្រយានយន្តស្ព័រមួយគ្រឿង។ ពួកគេបានយកកាំភ្លើងខ្លីគំរាមជនរងគ្រោះមិនស្គាល់អត្តសញ្ញាណម្នាក់មុនពេលគេចខ្លួនចូលរាជធានី ភ្នំពេញ។
នគរបាលខេត្តកណ្តាលត្រូវគេរាយការណ៍ប្រាប់អំពីរឿងនេះ ហើយក៏បានទាក់ទងមន្ត្រីនគរបាលរាជធានីភ្នំពេញដែលជួយចាប់ខ្លួនជនសង្ស័យទាំងពីរនាក់នេះបាននៅក្នុងខ័ណ្ឌដង្កោ រាជធានីភ្នំពេញ។ លោក សារ៉ាន់ បានឲ្យដឹងថា បុរសទាំងពីរនាក់នេះស្ថិតក្នុងស្ថានភាពស្រវឹងនៅពេលចាប់ខ្លួន ហើយនគរបាលបានរកឃើញអាវុធខ្លីម៉ាក C៧៥មួយដើម គ្រាប់ចំនួន១២គ្រាប់ វិទ្យុទាក់ទងមួយគ្រឿង កាបូបដៃស្រ្តីមួយមានប្រាក់១០០ដុល្លារ គ្រឿងអលង្ការស្ត្រីមួយចំនួន និងទូរស័ព្ទបីគ្រឿង។
លោកបានធ្វើការកត់សម្គាល់ថា សម្ភារទាំងអស់ត្រូវបាននគរបាលរឹបអូសយកទៅរក្សាទុក ក្នុងនោះរួមមានទាំងទោចក្រយានយន្តមួយគ្រឿងផងដែរ។លោកមានប្រសាសន៍ថា “ ឈ្មោះធី គឺជាអ្នកមានអាវុធ។ខ្ញុំកំពុងតែសាកសួរពួកគេនៅឡើយ ហើយកំពុងបន្តស៊ើបអង្កេតពីកន្លែងរស់នៅនិងការងារពីមុនរបស់ពួកគេ”៕
ប្រែសម្រួលដោយ ឃិន ណៃ