ថ្លែងទៅកាន់អ្នកគាំទ្រជាយុវជនជាង១០.០០០នាក់កាលពីម្សិលមិញ លោក ហ៊ុន ម៉ានី ដែលត្រូវជាកូនប្រុសរបស់លោក ហ៊ុន សែន បានអំពាវនាវដល់អ្នកចូលរួមស្តាប់ទាំងអស់ឲ្យរួបរួមគ្នាប្រឆាំងនឹងការអំពាវនាវឲ្យមានការផ្លាស់ប្តូររដ្ឋាភិបាល ដោយបានព្រមានថា បរាជ័យរបស់គណបក្សកាន់អំណាចក្នុងការបោះឆ្នោតជ្រើសតាំងតំណាងរាស្ត្រនៅថ្ងៃអាទិត្យនេះ នឹងបណ្តាលឲ្យមានអស្ថិរភាព និងចលាចល។
ជាការបន្ទរតាមសុន្ទរកថាដែលធ្វើឡើងដោយឪពុករបស់ខ្លួនក្នុងរយៈពេលប៉ុន្មានខែមុនការបោះឆ្នោត លោក ម៉ានី បានធ្វើការព្រមានតាមរយៈសុន្ទរកថាសង្ខេបនិងត្រៀមទុកជាមុនរបស់ខ្លួន អំពីការរលាយសាបសូន្យនូវសណ្តាប់ធ្នាប់សង្គមបច្ចុប្បន្ន ប្រសិនបើគណបក្សប្រជាជនកម្ពុជា បាត់បង់អំណាច។
លោកបានថ្លែងថា “ ជួសមុខឲ្យយុវជនគណបក្សប្រជាជនកម្ពុជា យើងចាំបាច់ត្រូវរក្សាជំហរនយោបាយច្បាស់លាស់ដើម្បីរួបរួមគ្នាការពារសមិទ្ធិផលរបស់គណបក្សប្រជាជនកម្ពុជា…។ ជាពិសេស យើងត្រូវការពារដើមឈើសន្តិភាព ដែលបានផ្តល់ផ្លែផ្កាច្រើនបំផុតសម្រាប់យើងទាំងអស់គ្នា”។
លោក ម៉ានី ព្រមានថា “ ប្រសិនបើយើងធ្វេសប្រហែសនិងខ្វះការពិចារណា ហើយគ្មានឆន្ទៈនយោបាយរឹងមាំដើម្បីការពារភាពរុងរឿងនេះទេនោះ វាអាចបាត់បង់ភ្លាមៗ ដោយប្រទេសយើងទាំងមូលនឹងធ្លាក់ក្នុងអស្ថិរភាព ហើយសង្គមនឹងជួបភាពចលាចល”។ លោក ម៉ានី អាយុ៣០ឆ្នាំ ជាកូនពៅគេក្នុងចំណោមកូនប្រុសទាំងបីនាក់របស់លោក ហ៊ុន សែន គឺជាប្រធានសហភាពសហព័ន្ធយុវជនកម្ពុជារបស់គណបក្សកំពុងកាន់អំណាចនេះ និងជាបេក្ខជនតំណាងរាស្ត្រលើកដំបូងប្រចំាមណ្ឌលកំពង់ស្ពឺ។
ជាការអនុវត្តតាមទម្លាប់របស់ខ្លួនមុនការបោះឆ្នោតជាតិ លោក ហ៊ុន សែន កំពុងរក្សាភាពស្ងាត់ស្ងៀមរយៈពេលមួយខែមុនការបោះឆ្នោតនៅថ្ងៃទី២៨ខែកក្កដា ដែលមានការរំពឹងជាទូទៅថា គណបក្សកំពុងកាន់អំណាចរបស់លោកនឹងទទួលបានជ័យជម្នះហើយបន្តគ្រប់គ្រងប្រទេសអាណត្តិទីបួនទៀត។
ទំនងជាការឆ្លើយតបចំពោះក្រុមអ្នកគាំទ្រជាយុវជនរបស់គណបក្សសង្គ្រោះជាតិរាប់ពាន់នាក់ដែលបាននាំគ្នាធ្វើការដង្ហែក្បួនតាមដងផ្លូវក្នុងរាជធានីដោយអំពាវនាវឲ្យមានការផ្លាស់ប្តូរក្នុងរយៈពេលបីសប្តាហ៍ចុងក្រោយនេះ លោក ម៉ានី បានប្រាប់យុវជនដែលបានប្រមូលផ្តុំគ្នាកុំឲ្យទោរទន់តាមការអំពាវនាវនេះ។ លោកបានថ្លែងថា “ មានការបង្កបរិយាកាសមួយពីសំណាក់គណបក្សនយោបាយខ្លះដែលព្យាយាមព្រងើយកន្តើយនឹងសមិទ្ធិផល[របស់គណបក្សប្រជាជនកម្ពុជា] ហើយបានធ្វើយុទ្ធនាការវាយប្រហារគណបក្សប្រជាជនកម្ពុជាដោយប្រើពាក្យសម្ដីនិងពាក្យស្លោកនយោបាយអយុត្តិធម៌និងគ្មានការទទួលខុសត្រូវ”។
លោក ម៉ានី បានបន្តថា គណបក្សប្រជាជនកម្ពុជាត្រូវតែបន្តធ្វើយុទ្ធនាការរបស់ខ្លួនដោយភាពថ្លៃថ្នូរ។ លោកបានថ្លែងថា “ យើងត្រូវតែប្រើវិធីធ្វើយុទ្ធនាការប្រកបដោយវិជ្ជាជីវៈត្រូវបន្តរក្សាភាពស្លូតបូតសុភាពរាបសារ ថ្លៃថ្នូរ ឈ្លាសវៃ និងក្លាហាន ក្នុងការបញ្ចុះបញ្ចូលសាធារណជននិងមនុស្សគ្រប់ជំនាន់ឲ្យកាន់តែមានការជឿជាក់លើគណបក្សប្រជាជនកម្ពុជា និងបោះឆ្នោតឲ្យគណបក្សប្រជាជនកម្ពុជា ព្រោះមានតែគណបក្សប្រជាជនកម្ពុជាមួយប៉ុណ្ណោះដែលមានសមត្ថភាពទទួលខុសត្រូវ ថែរក្សាសន្តិភាព និងរក្សាការអភិវឌ្ឍបាន”។
ឈរនៅពីក្រោយលោក ម៉ានី ដែលបានកោរសក់និងចិញ្ចើមដើម្បីកាន់ទុក្ខជីតារបស់ខ្លួន គឺលោក ហ៊ុន នាង ដែលបានធ្វើអនិច្ចកម្មកាលពីថ្ងៃទី១២ ខែកក្កដានោះ គឺបេក្ខជនតំណាងរាស្ត្រជួរមុខរបស់គណបក្សប្រជាជនកម្ពុជា មណ្ឌលភ្នំពេញ ពោលគឺក្រុមដ៏មានអំណាចមួយ ដែលរួមមានលោក គាត ឈន់ រដ្ឋមន្ត្រីក្រសួងហិរញ្ញវត្ថុ លោក អុិត សំហេង រដ្ឋមន្ត្រីក្រសួងសង្គមកិច្ច លោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារី និងលោក កែប ជុតិមា ដែលបានលាលែងពីតំណែងជាអភិបាលរាជធានីភ្នំពេញកាលពីខែឧសភា។
ខណៈយុវជនគាំទ្រគណបក្សប្រជាជនកម្ពុជារាប់ពាន់នាក់ធ្វើដំណើរជាជួរតាមទោចក្រយានយន្តតាមដងផ្លូវនិងចំណតរថយន្តនៅចុងខាងជើងកោះពេជ្រនោះ យុវជនពីរបីរយនាក់បានដើរក្បួនសំដៅទៅវេទិកាមុនការថ្លែងសុន្ទរកថារបស់លោក ម៉ានី ដោយពួកគេបានគ្រវីទង់ពណ៌ខៀវខ្ចីដែលមានស្លាកសញ្ញាគណបក្សប្រជាជនកម្ពុជា។
បើធៀបនឹងការប្រមូលផ្តុំគ្នារបស់អ្នកគាំទ្រគណបក្សប្រឆាំងដើម្បីស្វាគមន៍លោក សម រង្ស៊ី ប្រធានគណបក្សសង្គ្រោះជាតិ ដែលមានការចូលរួមពីមនុស្សប្រមាណ១០០.០០០នាក់ ដែលមើលទៅដូចជាមានលក្ខណៈស្ម័គ្រចិត្តគ្មានការរៀបចំទុកជាមុនច្រើននោះ ការជួបជុំរបស់អ្នកគាំទ្រគណបក្សប្រជាជនកម្ពុជាកាលពីម្សិលមិញនេះ ភាគច្រើនគឺបានប្រព្រឹត្តទៅតាមការរៀបចំទុកជាមុន។
ទោះបីជាអ្នកដែលបានចូលរួមកាលពីម្សិលមិញនេះបានសម្តែងការគាំទ្ររបស់ខ្លួនចំពោះគណបក្សកំពុងកាន់អំណាចជាឯកច្ឆន្ទក៏ពិតមែន ប៉ុន្តែទស្សនៈរបស់ពួកគេចំពោះអនាគតរបស់គណបក្សប្រជាជនកម្ពុជា គឺមិនដូចគ្នាទេ។
យុវជន គឹម សារុណ អាយុ២២ឆ្នាំ បាននិយាយថា ខ្លួនចង់ឃើញលោក ម៉ានី បន្តអំណាចពីលោក ហ៊ុន សែន ពេលលោកលាលែងពីតំណែងជានាយករដ្ឋមន្ត្រី។ យុវជនរូបនេះបាននិយាយថា “ លោក ហ៊ុន ម៉ានី គឺជាមនុស្សល្អ ព្រោះគាត់បម្រើប្រជាពលរដ្ឋ ហើយលោកនឹងបន្តអភិវឌ្ឍហេដ្ឋារចនាសម្ពន្ធ និងធ្វើឲ្យប្រទេសរីកចម្រើនដូចឪពុករបស់លោកដែរ”។
ឈ្មោះ តាន់ ចិន្តា អាយុ២៦ឆ្នាំ ជានិស្សិតសាកលវិទ្យាល័យសិក្សាផ្នែកហិរញ្ញវត្ថុ បានលើកឡើងថា ខ្លួនសង្ឃឹមថា គណបក្សប្រជាជនកម្ពុជាដឹកនាំដោយលោក ហ៊ុន សែន នឹងបន្តអភិវឌ្ឍប្រទេសដោយផ្តោតលើការសាងសង់ស្ពាន និងអគារធំៗ។
និស្សិតរូបនេះបាននិយាយថា “ ពួកគាត់មានផែនការសេដ្ឋកិច្ចដ៏ល្អមួយ ព្រោះវាបានស្រូបទាញវិនិយោគទុនកាន់តែច្រើននៅក្នុងប្រទេសកម្ពុជា និងជួយនិស្សិតឲ្យមានការងារធ្វើ ពេលពួកគេបញ្ចប់ការសិក្សា”។ ទោះជាយ៉ាងណា និស្សិតមួយចំនួនទៀតដែលបានចូលរួមកាលពីម្សិលមិញដែរបានលើកឡើងថា ដោយសារយុវជនដើរតួនាទីកាន់តែសំខាន់ក្នុងយុទ្ធនាការឃោសនារបស់គណបក្សប្រជាជនកម្ពុជានោះ ការផ្លាស់ប្តូរថ្នាក់ដឹកនាំចាស់ៗរបស់គណបក្សនេះ នឹងធ្វើឡើងដែរ។
ឈ្មោះ នំ វុត្ថា អាយុ២០ឆ្នាំ ជាសិស្សវិទ្យាល័យចតុមុខ ដែលបានគ្រវីទង់ជាតិកម្ពុជាយ៉ាងស្វាហាប់ នៅកន្លែងជួបជុំគ្នាកាលពីម្សិលមិញនោះ បាននិយាយថា “ គណបក្សប្រជាជនកម្ពុជា បានជួយឲ្យប្រជាពលរដ្ឋមានជីវភាពល្អប្រសើរ។ ប៉ុន្តែខ្ញុំចង់ឃើញការផ្លាស់ប្តូរថ្នាក់ដឹកនាំ ព្រោះនៅសហរដ្ឋអាមេរិក តែងមានការផ្លាស់ប្តូរថ្នាក់ដឹកនាំ។ ពួកគេ[ថ្នាក់ដឹកនាំថ្មី] អាចធ្វើឲ្យសាលារៀនប្រសើរឡើង និងអភិវឌ្ឍប្រទេសបានកាន់តែលឿន”។
សមាជិកម្នាក់ក្នុងចំណោមសមាជិករបស់គណបក្សប្រជាជនកម្ពុជា ដែលបានជួយរៀបចំព្រឹត្តិការណ៍កាលពីម្សិលមិញ និងដែលបានប្រាប់ត្រឹមតែនាមខ្លួនថា ឌី សព្វថ្ងៃធ្វើការនៅសាលារាជធានីភ្នំពេញនោះ បាននិយាយថា ខ្លួនសង្ឃឹមថា មេដឹកនាំជំនាន់ថ្មីរបស់គណបក្សប្រជាជនកម្ពុជានឹងផ្តល់ជីវិតថ្មីដល់គណបក្សដែលស្ថិតនៅក្រោមការគ្រប់គ្រងរបស់មេដឹកនាំដដែលៗអស់រយៈពេលជាងបីទសវត្សរ៍មកហើយនេះ។
ឌី បាននិយាយថា “ យុវជនគណបក្សប្រជាជនកម្ពុជាខ្លះបានរៀនសូត្រនៅក្រៅប្រទេស ហើយពួកគេមានគំនិតថ្មីនិងទស្សនៈថ្មី។ ចំណេះដឹងរបស់មន្ត្រីគណបក្សប្រជាជនកម្ពុជាពីជំនាន់៧៩ គឺមិនបានប្រសើរឡើងទេរហូតមកទល់នឹងពេលនេះ។ ខ្ញុំគិតថា យុវជនគណបក្សប្រជាជនកម្ពុជា គឺជាអនាគតរបស់គណបក្សនេះ។ ប្រហែលជាយើងនឹងឃើញមានការផ្លាស់ប្តូរក្នុងជួរគណបក្សប្រជាជនកម្ពុជានៅថ្ងៃអនាគត ប៉ុន្តែអនាគតនោះគឺមិនមែនពេលនេះទេ”៕
ប្រែសម្រួលដោយ ចេវ ប៊ុននី