កាលពីម្សិលមិញលោក សម រង្ស៊ី មេដឹកនាំគណបក្សប្រឆាំងបានបង្ហាញបំណងចុងក្រោយ ចង់ឈរឈ្មោះជាបេក្ខជនតំណាងរាស្ត្រក្នុងការបោះឆ្នោតជាតិនាថ្ងៃអាទិត្យ នេះ ដោយស្នើឲ្យលោក ហេង សំរិន ប្រធានរដ្ឋសភាអនុញ្ញាតឲ្យលោកធ្វើជាសមាជិកសភាឡើងវិញ។
ការស្នើនេះត្រូវបានធ្វើឡើង បន្ទាប់ពីគណៈកម្មាធិការជាតិរៀបចំការបោះឆ្នោតហៅកាត់ថា គ.ជ.ប. បានច្រានចោលសំណើរបស់លោក សម រង្ស៊ី កាលពីថ្ងៃច័ន្ទ ដែលស្នើសុំឈរឈ្មោះក្នុងឋានៈជាប្រធានគណបក្សសង្គ្រោះជាតិ។ គណៈកម្មាធិការជាតិរៀបចំការបោះឆ្នោតបានលើកឡើងថា នៅសល់តែប៉ុន្មានថ្ងៃទៀតប៉ុណ្ណោះនឹងដល់ថ្ងៃបោះឆ្នោតហើយ ហេតុដូច្នេះវាយឺតពេលហើយនៅក្នុងការកែប្រែបញ្ជីបេក្ខជនឈរឈ្មោះជាតំណាងរាស្ត្រ ដើម្បីបញ្ចូលរូបលោក។
ឈ្មោះរបស់ លោក សម រង្ស៊ី ត្រូវបានដកចេញពីបញ្ជីបេក្ខជនឈរឈ្មោះជាតំណាងរាស្ត្រកាលពីឆ្នាំមុន ក៏ដូចជាពីបញ្ជីឈ្មោះបោះឆ្នោតដែរ ដោយផ្អែកលើមូលហេតុថា លោកជាទណ្ឌិត។ ប៉ុន្តែបន្ទាប់ពីមានការព្រះរាជទានលើកលែងទោសចំពោះការចោទប្រកាន់ដែលលោកហៅថា ជារឿងនយោបាយនោះ មេដឹកនាំគណបក្សប្រឆាំងរូបនេះបានវិលត្រឡប់មកកាន់ប្រទេសកម្ពុជាវិញ ដោយមានការទទួលយ៉ាងអធិកអធមបំផុតកាលពីសប្ដាហ៍មុន។
លោក សម រង្ស៊ី បានសរសេរលិខិតមួយច្បាប់ផ្ញើទៅលោក ហេង សំរិន ថា “ខ្ញុំមានកិត្តិយសសូមជម្រាបជូនសម្ដេច [ហេង សំរិន]មេត្តាជ្រាបថា យោងតាមមាត្រា១៥ នៃច្បាប់ស្ដីពីលក្ខន្តិកៈតំណាងរាស្ត្រចែងថា តំណាងរាស្ត្រណាមួយជាទណ្ឌិត ហើយត្រូវបានព្រះរាជទានលើកលែងទោស តំណាងរាស្រ្តរូបនោះនឹងបានទទួលសុពលភាពអភ័យឯកសិទ្ធិនិងបុព្វសិទ្ធិឡើងវិញជាតំណាងរាស្ត្រ”។
លោក ឈាង វុន សមាជិកសភាមកពីគណបក្សប្រជាជនកម្ពុជាបានបញ្ជាក់ថា រដ្ឋសភាទទួលបានលិខិតរបស់លោកសម រង្ស៊ី ហើយខណៈលោក គាំ កុសល ប្រធានខុទ្ទកាល័យរបស់លោក ហេង សំរិន បានបដិសេធមិនធ្វើអត្ថាធិប្បាយអំពីលិខិតនេះ។
លោក យឹម សុវណ្ណ អ្នកនាំពាក្យរបស់គណបក្សសង្គ្រោះជាតិបានលើកឡើងថា លិខិតនេះត្រូវបានបញ្ជូនផ្ទាល់ទៅដល់មន្ត្រីរបស់លោក ហេង សំរិន ហើយ។ លោក យឹម សុវណ្ណ បានថ្លែងថា “ឥឡូវនេះយើងកំពុងតែរង់ចាំការឆ្លើយតប”។
រដ្ឋាភិបាលកំពុងស្ថិតក្រោមសម្ពាធពីសាធារណជន ឲ្យអនុញ្ញាតលោក សម រង្ស៊ី ចូលរួមប្រកួតប្រជែងក្នុងការបោះឆ្នោតជាតិហើយបើគ្មានការចូលរួមរបស់លោកទេ ការបោះឆ្នោតលំបាកនឹងអះអាងថា ជាការបោះឆ្នោតដោយសេរី និងយុត្តិធម៌ណាស់។
លោក សៀន ម៉ាកខិនតូស (Sean McIntosh) អ្នកនាំពាក្យស្ថានទូតសហរដ្ឋអាមេរិកបានលើកឡើងក្នុងអ៊ីម៉េលមួយថា “យើងជឿជាក់ថា លោក សម រង្ស៊ី នឹងត្រូវបានគេអនុញ្ញាតឲ្យចូលរួមពេញទំហឹងនៅក្នុងការបោះឆ្នោតជាតិ”។ តែទោះជាយ៉ាងណា លោក សុក សំអឿន នាយកប្រតិបត្តិក្រុមអ្នកច្បាប់ការពារសិទ្ធិកម្ពុជា ជាអង្គការជំនួយផ្នែកច្បាប់បានលើកឡើងថា លិខិតរបស់លោក សម រង្ស៊ី ផ្ញើទៅលោក ហេង សំរិន ទំនងជាមានឥទ្ធិពលតិចតួចប៉ុណ្ណោះ។
លោក សុក សំអឿន បានថ្លែងថា “គណៈកម្មាធិការជាតិរៀបចំការបោះឆ្នោតបានបដិសេធសំណើរបស់លោក ពីព្រោះលោកបានមកចុះឈ្មោះជាបេក្ខជនតំណាងរាស្ត្រយឺតពេលពេក។ គ្មាននរណាម្នាក់អាចចុះឈ្មោះជាបេក្ខជនតំណាងរាស្ត្រពីរបីថ្ងៃមុនការបោះឆ្នោតជាតិបានឡើយ”។
អាសនៈក្នុងរដ្ឋសភារបស់លោក សម រង្ស៊ី មេដឹកនាំគណបក្សប្រឆាំងនៅទំនេរនៅឡើយ បន្ទាប់ពីលោកបានចាកចេញពីប្រទេស ដើម្បីគេចវេះពីការផ្ដន្ទាទោសកាលពីឆ្នាំ២០០៩។ចាប់តាំងពីពេលនោះមកគណបក្ស សម រង្ស៊ី បានរួមបញ្ចូលគ្នាជាមួយ គណបក្សសិទ្ធិមនុស្ស ដើម្បីបង្កើតជាគណបក្សសង្គ្រោះជាតិ ដែលជាចំណាត់ការមួយធ្វើឲ្យគណៈកម្មាធិការអចិន្ត្រៃយ៍របស់រដ្ឋសភាដកតំណាងរាស្ត្រចំនួន២៧រូបរបស់គណបក្សសង្គ្រោះជាតិពីអាសនៈរដ្ឋសភារបស់ខ្លួនកាលពីដើមឆ្នាំនេះ។
លោក សុក សំអឿន មានប្រសាសន៍ថាជាលទ្ធផលនៃការរួមបញ្ចូលគ្នា គ្មានសមាជិកណាម្នាក់របស់គណបក្សប្រឆាំង មានតំណែងជាសមាជិកសភាឡើយ។ ហេតុដូច្នេះហើយសម្រាប់លោក សម រង្ស៊ី ប្រសិនបើចង់ទទួលបានតំណែងរបស់ខ្លួនមកវិញ គឺលោកត្រូវតែលាលែងពីតំណែងជាប្រធានគណបក្សសង្គ្រោះជាតិ ហើយចូលរួមសាជាថ្មីឡើងវិញជាមួយគណបក្ស សម រង្ស៊ី របស់លោក ដែលមានតែឈ្មោះនោះ។
លោកបានថ្លែងថា “ ប្រសិនបើលោកលាលែងពីគណបក្សសង្គ្រោះជាតិវាមិនអីទេ។ ប៉ុន្តែហេតុអ្វីបានជាលោកចង់ធ្វើដូច្នេះ? វានៅសល់តែប៉ុន្មានថ្ងៃទៀតប៉ុណ្ណោះ នឹងដល់ថ្ងៃបោះឆ្នោតហើយ ហេតុដូច្នេះគ្មានអ្វីអាចកែប្រែបានទៀតទេ”៕
ប្រែសម្រួលដោយ ស៊ា ស៊ុយឈាង