កាលពីម្សិលមិញ រដ្ឋាភិបាលបានបដិសេធការចោទប្រកាន់ដែលបានលើកឡើងនៅក្នុងសេចក្តីថ្លែងការណ៍មួយដែលចេញផ្សាយដោយអង្គការឃ្លាំមើលសិទ្ធិមនុស្ស (Human Right Watch) កាលពីថ្ងៃច័ន្ទដែលបានចោទប្រកាន់នគរបាលនិងយោធាជាន់ខ្ពស់ថា បានធ្វើការបំភិតបំភ័យដល់បរិយាកាសសម្រាប់អ្នកបោះឆ្នោតដោយធ្វើយុទ្ធនាការឃោសនាឲ្យគណបក្សប្រជាជនកំពុងកាន់អំណាច។
សេចក្តីថ្លែងការណ៍របស់អង្គការឃ្លាំមើលសិទ្ធិមនុស្សបានបញ្ចេញឈ្មោះលោក ប៉ុល សារឿន អគ្គមេបញ្ជាការកងយោធពលខេមរភូមិន្ទ និងលោក ហ៊ីង ប៊ុនហៀង អគ្គមេបញ្ជាការរង លោក គន់ គីម នាយសេនាធិ ការ ចម្រុះ និងលោក ហ៊ុន ម៉ាណែត កូនប្រុសលោកនាយករដ្ឋមន្ត្រី ហ៊ុន សែន ថាបានធ្វើយុទ្ធនាការឃោសនាបោះឆ្នោតឲ្យគណបក្សប្រជាជនកាលពីឧសភា និងខែមិថុនា។
ប៉ុន្តែលោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីបានមានប្រសាសន៍ថា មិនមានអ្វីទាស់ខុសចំពោះឥរិយាបថរបស់ពួកគេទេ ពីព្រោះមន្ត្រីទាំងនេះមិនតំណាងឲ្យស្ថាប័នរដ្ឋទេ ពេលពួកគេបានធ្វើយុទ្ធនាការ និងស្លៀកពាក់ឯកសណ្ឋានជាស៊ីវិលនោះ។ លោក ផៃ ស៊ីផាន បានមានប្រសាសន៍ថា “ នេះគឺជាផ្នែកមួយនៃការឃោសនាប្រឆាំងរដ្ឋាភិបាល ហើយប្រឆាំងនឹងប្រទេសកម្ពុជា។
វាលម្អៀងណាស់ ហើយការធ្វើយុទ្ធនាការប្រឆាំងពួកយើងគឺមិនត្រឹមត្រូវឡើយ។ អ្នកគួរយល់ថា ពួកគេមិនបានស្លៀកពាក់ឯកសណ្ឋានធ្វើយុទ្ធនាការឡើយ។ ពួកគេចូលរួមក្នុងសិទ្ធិជាលក្ខណៈផ្ទាល់ខ្លួន ដោយសុំច្បាប់ឈប់សម្រាកពីការងារ…។ ពួកគេមិនបានស្លៀកពាក់ឯកសណ្ឋាន និងប្រើប្រាស់ឋានៈដើម្បីកៀងគររកសំឡេងឆ្នោតពីប្រជាពលរដ្ឋឡើយ។ លោកបានមានប្រសាសន៍បន្ថែមទៀតថា“ ពួកគេគឺជាអ្នកដែលប្រយុទ្ធក្នុងសមរភូមិប្រឆាំងនឹងរបប ប៉ុល ពត ហើយពួកគេបានរំដោះប្រទេសកម្ពុជាចេញពីរបប ប៉ុលពត”។
មាត្រា១៥នៃច្បាប់ស្តីពី គណបក្សនយោបាយចែងថា “ ព្រះសង្ឃ មន្ត្រីតុលាការ ទាហានកងយោធពលខេមរភូមិន្ទនិងនគរបាលជាតិអាចចូលរួមជាសមាជិកគណបក្សនយោបាយបាន ប៉ុន្តែពួកគេមិនត្រូវធ្វើសកម្មភាពណាមួយគាំទ្រ ឬប្រឆាំងនឹងគណបក្សនយោបាយណាមួយឡើយ”។
លោកឧត្តមសេនីយ៍ត្រី ខេង ទីតូ អ្នកនាំពាក្យកងរាជអាវុធហត្ថបានថ្លែងថា ច្បាប់មិនបានហាមឃាត់មន្ត្រីបែបនេះមិនឲ្យចូលរួមជាមួយគណបក្សនយោបាយរបស់ខ្លួននៅពេលដែលពួកគេសម្រាកពីការងារឡើយ។
លោកឧត្តមសេនីយ៍ត្រី ខេង ទីតូ បានមានប្រសាសន៍ថា “ ពួកគេមានសិទ្ធិគាំទ្រគណបក្សមួយ ប៉ុន្តែពួកគេមិនអាចប្រើប្រាស់តួនាទីរបស់ខ្លួននៅពេលដែលពួកគេធ្វើយុទ្ធនាការ ឬគាំទ្រគណបក្សឡើយ។ មន្ត្រីរដ្ឋាភិបាលអាចធ្វើយុទ្ធនាការបាននៅពេលដែលពួកគេឈប់សម្រាកពីការងារ”។
លោក ទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោត (គ.ជ.ប.) ក៏បានមានប្រសាសន៍ផងដែរថា លោកបាន “ បញ្ជាក់ពីបញ្ហានេះច្រើនលើកច្រើនសាមកហើយថា មន្ត្រីគ្រប់រូបអាចធ្វើយុទ្ធនាការឃោសនាបោះឆ្នោតបាននៅពេលដែលពួកគេឈប់សម្រាកពីការងារ”។
ប៉ុន្តែលោក គល់ បញ្ញា នាយកប្រតិបត្តិនៃគណៈកម្មាធិការ ដើម្បីការបោះឆ្នោតដោយសេរីនិងយុត្តិធម៌នៅក្នុងប្រទេសកម្ពុជាបានមានប្រសាសន៍ថា ត្រូវមានភាពច្បាស់លាស់ចំពោះការបកស្រាយច្បាប់។ លោកមានប្រសាសន៍ថា “ ច្បាប់ស្តីពីគណបក្សនយោបាយហាមឃាត់យ៉ាងច្បាស់មិនឲ្យពួកគេធ្វើសកម្មភាពនយោបាយ គាំទ្រគណបក្សណាមួយ ឬគណបក្សផ្សេងទៀតឡើយ”។
លោកបានមានប្រសាសន៍បន្ថែមទៀតថា “ ពួកគេមានសិទ្ធិធ្វើជាសមាជិកគណបក្ស ឬពួកគេអាចគ្រាំទ្រគណបក្សបាន ប៉ុន្តែពួកគេមិនអាចធ្វើយុទ្ធនាការឃោសនាបានឡើយ។ មន្ត្រីយោធាមានកាតព្វកិច្ចការពារសន្ដិសុខដល់គណបក្សនយោបាយទាំងអស់។ តើពួកគេអាចឲ្យប្រជាពលរដ្ឋមានជំនឿទុកចិត្តលើខ្លួន និងការពារសន្ដិសុខជូនប្រជាពលរដ្ឋដូចម្តេចបាន [បើពួកគេរវល់ធ្វើយុទ្ធនាការនោះ]?”៕
ប្រែសម្រួលដោយ សោម សារុន