គណៈកម្មាធិការជាតិរៀបចំការបោះឆ្នោតហៅកាត់ថា គ.ជ.ប. កាលពីថ្ងៃសុក្របានលើកឡើងថា យុទ្ធនាការឃោសនាបោះឆ្នោតដែលមានរយៈពេល៣០ថ្ងៃក្នុងឆ្នាំនេះបាបប្រព្រឹត្តទៅដោយរលូន ដោយអំពើហិង្សាបានធ្លាក់ចុះគួរឲ្យកត់សម្គាល់ បើប្រៀបធៀបទៅនឹងការបោះឆ្នោតកាលពីឆ្នាំ២០០៨ និងគ្មានអ្នកនយោបាយណាម្នាក់ត្រូវបានសម្លាប់ឡើយ។
លោក ទេព នីថា អគ្គលេខាធិការគ.ជ.ប. បានលើកឡើងអំឡុងសន្នីសិទកាសែតមួយនៅទីស្នាក់ការរបស់ គ.ជ.ប.ក៏បានកត់សម្គាល់ដែរថា ការកើនឡើងនៃការចូលរួមរបស់យុវជននៅក្នុងយុទ្ធនាការឃោសនាបោះឆ្នោតនេះជាសញ្ញាវិជ្ជមានមួយ ប៉ុន្តែបានរកឃើញថា យុវជនភាគច្រើនបានចូលរួមគឺគ្រាន់តែជាការកម្សាន្តប៉ុណ្ណោះ។
លោកបានថ្លែងថា “ នៅក្នុងឆ្នាំនេះយើងបានឃើញថា មានយុវជនចូលរួមយ៉ាងច្រើនក្នុងយុទ្ធនាការឃោសនាបោះឆ្នោត ហើយវាគឺជារឿងល្អ ដែលយុវជនផ្ដោតអារម្មណ៍លើនយោបាយ”។ ប៉ុន្តែលោកបន្ថែមថា យុវជនដែលចូលរួមយុទ្ធនាការឃោសនាមួយចំនួនមិនទាន់គ្រប់អាយុបោះឆ្នោតនៅឡើយទេ ហើយមានអ្នកខ្លះមិនបានទៅចុះឈ្មោះបោះឆ្នោតឡើយ។
លោកអះអាងថា “ ការចូលរួមរបស់ពួកគេគឺគ្រាន់តែដើម្បីការសប្បាយប៉ុណ្ណោះ”។លោកបានពន្យល់ថា អ្នកខ្លះបានពាក់មួកគណបក្សមួយនៅពេលព្រឹក ហើយបន្ទាប់មកចូលរួមឃោសនាឲ្យគណបក្សមួយផ្សេងទៀតនៅពេលរសៀល។ លោកបន្ថែមទៀត គ.ជ.ប. គ្មានតួលេខអ្នករបួសដែលកើតចេញពីការប្រឈមមុខដាក់គ្នារវាងអ្នកចូលរួមឃោសនាក្នុងរយៈពេល៣០កន្លងមកនេះ ពិតប្រាកដឡើយ។
លោកបានលើកឡើងថា កាលពីឆ្នាំ២០០៨ មានរបាយការណ៍ថា មានអំពើឃាតកម្មចំនួន១១ករណី ពាក់ព័ន្ធនឹងការបោះឆ្នោត ដែលកើតឡើងអំឡុងយុទ្ធនាការឃោសនាបោះឆ្នោត ប៉ុន្តែនៅក្នុងឆ្នាំនេះគ្មានអំពើឃាតកម្មណាមួយកើតឡើងឡើយ។ លោកបន្ថែមថា គ.ជ.ប. ក៏បានលើកឡើងដែរថា មានការប៉ុនប៉ងធ្វើឃាតចំនួន៨ករណី និងការបំភិតបំភ័ចំនួន១៣ករណី បានកើតឡើងនៅមុនថ្ងៃបោះឆ្នោតកាលពីឆ្នាំ២០០៨ ប៉ុន្តែក្នុងឆ្នាំនេះមានការប៉ុនប៉ងធ្វើឃាតមួយករណី និងការបំភិតបំភ័យ១៥ករណី។
លោក ទេព នីថា បានថ្លែងថា “ អ្វីដែលបានកើតឡើងច្រើននោះគឺការបំផ្លិចបំផ្លាញស្លាកសញ្ញាគណបក្ស។លោកបានបន្ថែមថា មានការបំផ្លិចបំផ្លាញស្លាកសញ្ញាគណបក្សចំនួន៧៨ករណីត្រូវបានរាយការណ៍ បើធៀបទៅនឹងឆ្នាំ២០០៨ ដែលមានតែ១៣ស្លាកសញ្ញាប៉ុណ្ណោះ។
យោងតាមលោក ទេព នីថា បានឲ្យដឹងថា សន្លឹកឆ្នោតជាង១២លានសន្លឹកត្រូវបានបោះពុម្ពសម្រាប់ការបោះឆ្នោតនាថ្ងៃអាទិត្យ ហើយត្រូវបានបញ្ជូនទៅកាន់មណ្ឌលបោះឆ្នោតចំនួន១៩.០០៩នៅទូទាំងប្រទេសសម្រាប់អ្នកបោះឆ្នោតដែលបានចុះឈ្មោះចំនួន៩,៦លាននាក់។លោកបន្ថែមថា មណ្ឌលបោះឆ្នោតនីមួយៗទទួលបានសន្លឹកឆ្នោតបន្ថែមចំនួន៧៤សន្លឹក ដែលត្រៀមសម្រាប់អ្នកបោះឆ្នោតណាដែលជ្រើសរើសគណបក្សរបស់ខ្លួនខុសនៅលើសន្លឹកឆ្នោតដំបូងនោះ។
លោកថ្លែងថា អំឡុងយុទ្ធនាការឃោសនាបោះឆ្នោតមានបណ្ដឹងសរុប៣២២ត្រូវបានប្ដឹងទៅកាន់គណៈកម្មការរៀបចំការបោះឆ្នោតថ្នាក់ខេត្ត ថ្នាក់ឃុំ និងគ.ជ.ប. ពីបទអំពើហិង្សា ការបង្ករបួសស្នាម ការបំភិតបំភ័យ ការបង្ខូចកេរ្តិ៍ឈ្មោះ ការរំខាន និងការបំផ្លិចបំផ្លាញស្លាកសញ្ញាគណបក្ស។ ហើយក្នុងចំណោមបណ្ដឹងភាគច្រើន គឹជាបណ្ដឹងរបស់គណបក្សសង្គ្រោះជាតិ។
លោក ហាវ៉ាណ ស៊ីវិល័យ បានអំពាវនាវឲ្យមានការរក្សាសណ្ដាបធ្នាប់នៅក្នុងថ្ងៃបោះឆ្នោតនាថ្ងៃអាទិត្យ។ លោកថ្លែងថា គ.ជ.ប. ក៏សូមអំពាវនាវឲ្យប្រជាពលរដ្ឋខ្មែរទាំងអស់ដែលមានឈ្មោះនៅក្នុងបញ្ជីឈ្មោះបោះឆ្នោតទៅចូលរួមបោះឆ្នោតនៅថ្ងៃអាទិត្យទាំងអស់គ្នា ហើយសូមអំពាវនាវឲ្យអ្នកបោះឆ្នោតចៀសវាងការពិសាស្រានៅមុនថ្ងៃបោះឆ្នោត និងថ្ងៃបោះឆ្នោត៕
ប្រែសម្រួលដោយ ស៊ាស៊ុយឈាង