ក្រុងច្បារមន,ខេត្តកំពង់ស្ពឺ-លោក ហ៊ុន ម៉ានី ជាកូនប្រុសពៅរបស់លោកនាយករដ្ឋមន្ត្រី ហ៊ុន សែន មិនទាន់នឹងកើតផងទេ នៅក្នុងឆ្នាំ១៩៨១ នៅពេល លោក ប៉ែន សុវណ្ណ ដែលកាលនោះជានាយករដ្ឋមន្ត្រីត្រូវបានសម្ពន្ធមិត្តវៀតណាមរបស់ខ្លួន ទម្លាក់ចេញពីតំណែង ហើយនិរទេសទៅកាន់ទីក្រុងហាណូយ។
ជាងមួយទសវត្សរ៍ក្រោយមក លោក ប៉ែន សុវណ្ណ ត្រូវបានឃុំខ្លួននៅក្នុងផ្ទះក្នុងរដ្ឋធានីនៃប្រទេសវៀតណាម ដោយបន្ទោសលោក ហ៊ុន សែន ថា ជាអ្នករារាំងលោកមិនឲ្យចូលរួមនយោបាយនិងត្រឡប់មកប្រទេសកម្ពុជាវិញ។ ទោះជាយ៉ាងណា កាលពីម្សិលមិញ ខណៈពេលប្រជាពលរដ្ឋនៅខេត្តកំពង់ស្ពឺចេញទៅបោះឆ្នោតនោះ ឆាកជីវិតរបស់លោកទាំងពីរ ដែលតំណាងឲ្យរយៈពេលខុសគ្នាច្រើននៃប្រវត្តិសាស្ត្ររបស់ប្រទេសនេះស័ក្ដិសមខ្លាំងណាស់ ខណៈពេលលោក ហ៊ុន ម៉ានី និងលោក ប៉ែន សុវណ្ណ ប្រជែងគ្នាក្នុងនាមជាបេក្ខជនឈរនៅលេខរៀងទី១តំណាងឲ្យគណបក្សរៀងៗខ្លួននៅក្នុងខេត្តនេះ។
បន្ទាប់ពីទៅដល់សាលាគរុកោសល្យនៅក្រុងច្បារមន ក្នុងខេត្តកំពង់ស្ពឺនៅម៉ោង៦និង៤៥នាទីព្រឹកថ្ងៃម្សិលមិញ លោក ហ៊ុន ម៉ានី ត្រូវគេផ្តល់បង្កាន់ដៃលេខរៀង ដើម្បីចូលបោះឆ្នោត ដែលបង្កាន់ដៃនេះ មានសរសេរលេខពណ៌ខ្មៅធំមួយបញ្ជាក់ថា លោកស្ថិតនៅលេខរៀងទី៧។ ដោយរក្សាសំឡេងឆ្នោតរបស់លោកជាសម្ងាត់ លោក ហ៊ុន ម៉ានី បានចូលតម្រង់ជួរ ហើយអ្នកនៅក្បែរលោកហាក់ដូចជាមិនចាប់អារម្មណ៍ទេ មុនពេលលោកចូលទៅបោះឆ្នោត។
បន្ទាប់ពីបោះឆ្នោតរួច លោក ហ៊ុន ម៉ានី បានបដិសេធមិននិយាយអំពីការបោះឆ្នោតដែលលោកស្ទើរតែជឿជាក់ថា ឈ្នះនេះទេ។ មុនពេលត្រូវបានបញ្ចុះបញ្ចូលឲ្យធ្វើអត្ថាធិប្បាយអំពីការគាប់ជួន បន្ទាប់ពីទទួលបានបង្កាន់ដៃលេខរៀងតម្រង់ជួរបោះឆ្នោតដែលជាលេខរៀងរបស់គណបក្សសង្គ្រោះជាតិនៅលើសន្លឹកឆ្នោតនោះ លោកបានមានប្រសាសន៍ថា “ខ្ញុំមិនធ្វើការជាមួយខេមបូឌា ដេលី ទេ”។
លោកបានថ្លែងសំដៅដល់ថ្ងៃដែលគណបក្សរបស់ឪពុកលោកអបអរជ័យជម្នះលើរបបខ្មែរក្រហមថា “ខ្ញុំមានសំណាងនៅថ្ងៃនេះ។លេខ៧គឺជាលេខថ្ងៃ៧មករា” ។ ខណៈពេលលោក ហ៊ុន ម៉ានី ចាប់ផ្តើមធ្វើដំណើរត្រឡប់មកក្រុងភ្នំពេញវិញកាលពីម្សិលមិញ គឺកន្លះម៉ោង បន្ទាប់ពីលោកបោះឆ្នោតរួច អ្នកបោះឆ្នោតភាគច្រើននៅក្រុងច្បារមន បានសម្តែងការគាំទ្រយ៉ាងខ្លាំងចំពោះលោកនិងគណបក្សប្រជាជនកម្ពុជា។
សត្យាវុធ សេរីវឌ្ឍានា អាយុ៣១ឆ្នាំដែលបោះឆ្នោតភ្លាមៗ បន្ទាប់ពីលោក ហ៊ុន ម៉ានី នោះបាននិយាយថា “ខ្ញុំសប្បាយចិត្តណាស់ ដែលបានឃើញគាត់មកបំពេញកាតព្វកិច្ចក្នុងនាមជាពលរដ្ឋខ្មែរធម្មតាម្នាក់”។
លោក ឆាយ ថន រដ្ឋមន្ត្រីក្រសួងផែនការនិងស្ថិតិ ជាបេក្ខជនតំណាងរាស្ត្រមកពីគណបក្សប្រជាជនកម្ពុជាប្រចាំខេត្តកំពង់ស្ពឺ បានមានប្រសាសន៍ បន្ទាប់ពីលោកបានដាក់សន្លឹកឆ្នោតចូលទៅក្នុងហិបឆ្នោតថា កូនប្រុសរបស់លោកនាយករដ្ឋមន្ត្រីរូបនេះ នឹងជួយបញ្ចូលយុវជនវ័យក្មេងទៅក្នុងជួររដ្ឋាភិបាល។
លោក ឆាយ ថន បានមានប្រសាសន៍ថា “គាត់ក្លាហាន មានសមត្ថភាពនិងសុខភាពល្អ ដូច្នេះ គាត់ស័ក្តិសមនឹងឈ្នះ [អាសនៈរបស់គាត់]”។ដោយបញ្ជាក់ពីគោលដៅរបស់លោកក្នុងការទទួលបានសំឡេងពី៨០ទៅ៩០ភាគរយនៃសំឡេងឆ្នោតនៅក្នុងខេត្តនេះ លោកបានបន្ថែមថា “ ខ្ញុំសង្ឃឹមថា គណបក្សប្រជាជន នឹងឈ្នះអាសនៈច្រើន”។
ចំណែកឯនៅវត្តមួយស្ថិតនៅចម្ងាយប្រហែល១០គីឡូម៉ែត្រពីទីនេះ វាជាសំណាងលើកទី៣សម្រាប់លោក ប៉ែន សុវណ្ណ អតីតនាយករដ្ឋមន្ត្រីនិងជាបេក្ខជនតំណាងរាស្ត្រលេខរៀងទី១របស់គណបក្សសង្គ្រោះជាតិនៅខេត្តកំពង់ស្ពឺ ដែលកន្លងមកធ្លាប់ឈរឈ្មោះជាតំណាងរាស្រ្តសម្រាប់គណបក្សទ្រទ្រង់ជាតិរបស់លោក ដែលបានរលាយបាត់ទៅហើយនិងសម្រាប់គណបក្សសិទ្ធិមនុស្ស។
លោក ប៉ែន សុវណ្ណ បានអះអាងកាលពីដើមខែនេះថា ក្នុងនាមជាបេក្ខជនតំណាងរាស្ត្រលេខរៀងទី១របស់គណបក្សសង្គ្រោះជាតិប្រចាំនៅខេត្តកំពង់ស្ពឺ លោកជឿជាក់ថា នៅទីបំផុតលោកនឹងជាប់ឆ្នោតជាតំណាងរាស្ត្រ ហើយលោកបានបញ្ជាក់ឡើងវិញកាលពីម្សិលមិញ។ បន្ទាប់ពីបោះឆ្នោតរួចកាលពីម្សិលមិញ លោក ប៉ែន សុវណ្ណ មានប្រសាសន៍ថា “ខ្ញុំគិតថា គណបក្សសង្គ្រោះជាតិនឹងឈ្នះ យ៉ាងហោចណាស់ក៏បីកៅអីដែរនៅក្នុងខេត្តកំពង់ស្ពឺ ប៉ុន្តែប្រជាពលរដ្ឋនិយាយថា យើងប្រហែលជាឈ្នះបួនកៅអី។ប្រសិនបើការបោះឆ្នោតនេះ ប្រព្រឹត្តិទៅដោយយុត្តិធម៌នោះ ខ្ញុំជឿជាក់មួយរយភាគរយថា គណបក្សសង្គ្រោះជាតិនឹងឈ្នះ”។
ដោយប្រើពាក្យបែបប្រមាថចំពោះជនជាតិវៀតណាម លោកបានបន្ថែមថា “ប៉ុន្តែខ្ញុំខ្លាចយួនចូលមកស្រុកខ្មែរ។មានច្រកជាច្រើនដែលអាចឆ្លងពីវៀតណាមមកខេត្តតាកែវក្បែរផ្ទះរបស់ខ្ញុំ។ពួកគេមកទីនេះដើម្បីបោះឆ្នោត”។ លោកបានបន្ថែមថា “ខ្ញុំសង្ឃឹមថា ខ្ញុំនឹងអង្គុយនៅក្នុងសភាជាមួយលោក ហ៊ុន សែន ក្នុងពេលឆាប់ៗនេះ”។
នៅខាងក្រៅវត្ត អ្នកស្រី ហន ភា អាយុ៤៣ឆ្នាំបាននិយាយថា អ្នកស្រីបានបោះឆ្នោតឲ្យគណបក្សប្រឆាំងកាលពីបោះឆ្នោតឃុំសង្កាត់ឆ្នាំមុន ប៉ុន្តែអ្នកស្រីបានប្តូរការគាំទ្រវិញ បន្ទាប់ពីគណបក្ស សម រង្ស៊ី មិនបានធ្វើតាមការសន្យារបស់ខ្លួន។ អ្នកស្រីបាននិយាយថា “ខ្ញុំចង់ឲ្យគណបក្សសម រង្ស៊ី ទាមទារឲ្យមន្ត្រីរដ្ឋាភិបាលកសាងផ្លូវនិងអភិវឌ្ឍនៅទីនេះ ប៉ុន្តែពួកគេមិនអាចបំពេញតាមអ្វីដែលខ្លួនបានសន្យា។ដូច្នេះនៅអាណត្តិនេះ ខ្ញុំបានប្តូរទៅបោះឆ្នោតឲ្យគណបក្សប្រជាជនកម្ពុជាវិញ។គណបក្សសង្គ្រោះជាតិបានតែសន្យាខ្យល់”៕
ប្រែសម្រួលដោយ អ៊ូច សូនី