29 C
Phnom Penh

លោក ស ខេង​ ព្រមាន​ថា​នឹង​មាន​បញ្ហា​ ប្រសិន​បើ​ការ​ចរចា​ជាប់​គាំង

ដោយ ឌឹ ខេមបូឌា ដេលី

បទវិភាគ

កាល​ពី​ម្សិលមិញ​ លោក ស ខេង រដ្ឋ​មន្ត្រី​ក្រសួង​មហា​ផ្ទៃ​បាន​ព្រមាន​ថា នឹង​មាន“ បញ្ហា​” ប្រសិន​បើ​លោក​ សម រង្ស៊ី មេដឹកនាំ​គណ​បក្ស​​សង្គ្រោះ​ជាតិ​ មិន​វិល​​ទៅ​តុ​ចរចា​ ដើម្បី​​ស្វែង​រក​ដំណោះ​ស្រាយ​ចំពោះ​ការ​ជាប់​គាំង​រវាង​គណ​បក្ស​ប្រជាជន​កម្ពុជា​ និង​គណបក្ស​ប្រឆាំង​ជុំ​វិញ​​ភាព​មិន​ប្រក្រតី​ អំឡុង​ការ​បោះ​ឆ្នោត​ជាតិ​ កាលពី​ថ្ងៃ​ទី​២៨ ខែ​កក្កដាទេ​នោះ​។

លោក ស ខេង រដ្ឋ​មន្ត្រី​ក្រសួង​មហា​ផ្ទៃ​បាន​​ថ្លែង​ទៅ​កាន់​អ្នក​សារ​ពត៌មាន​​នៅ​ក្រសួង​​មហា​ផ្ទៃ​កាល​ពីម្សិល​មិញ​ថា នឹង​មាន​បញ្ហា​ប្រសិន​បើ​លោក​ សម រង្ស៊ី មេ​ដឹកនាំ​គណ​បក្ស​​សង្គ្រោះ​ជាតិ​ មិន​វិល​​ទៅ​តុ​ចរចា​ជាមួយ​គណបក្ស​ប្រជា​ជន​កម្ពុជា។ (Sive Channa)
លោក ស ខេង រដ្ឋ​មន្ត្រី​ក្រសួង​មហា​ផ្ទៃ​បាន​​ថ្លែង​ទៅ​កាន់​អ្នក​សារ​ពត៌មាន​​នៅ​ក្រសួង​​មហា​ផ្ទៃ​កាល​ពីម្សិល​មិញ​ថា នឹង​មាន​បញ្ហា​ប្រសិន​បើ​លោក​ សម រង្ស៊ី មេ​ដឹកនាំ​គណ​បក្ស​​សង្គ្រោះ​ជាតិ​ មិន​វិល​​ទៅ​តុ​ចរចា​ជាមួយ​គណបក្ស​ប្រជា​ជន​កម្ពុជា។ (Sive Channa)

លោក ស ខេង បាន​ធ្វើ​អត្ថាធិប្បាយ​បែប​នេះ​ បន្ទាប់​ពី​លោក​បាន​ជួប​ជាមួយ​ឯក​អគ្គ​រដ្ឋទូត​បារំាង និង​អាល្លឺ​ម៉ង់ ជា​លក្ខណៈ​ឯក​ជន​ និង​ដាច់​ដោយ​ឡែក​ពី​គ្នាកាលពី​ម្សិល​មិញ​និង​បន្ទាប់​ពី​គណៈ​កម្មាធិការ​ជាតិ​រៀប​ចំ​ការ​បោះ​ឆ្នោត​ ហៅ​កាត់​ថា គ.ជ.ប. បាន​លើក​ឡើង​កាលពី​ថ្ងៃ​អាទិត្យ​ថា គម្រោង​​ឲ្យ​មាន​គណៈកម្មាធិការ​មួយ​ ដែល​មាន​គណបក្ស​ចម្រុះ​ចូល​រួម​ ដើម្បី​ស៊ើប​អង្កេត​​ភាព​មិន​ប្រក្រតី​អំឡុង​ពេល​បោះឆ្នោត​ ត្រូវ​បាន​បោះ​​បង់​ចោល​។

គណបក្ស​សង្គ្រោះ​ជាតិ​ ដែល​​អះអាង​​ថា ខ្លួន​ក៏​ជា​អ្នក​ទទួល​ជ័យ​ជម្នះ​នៅ​ក្នុង​ការ​បោះ​ឆ្នោត​ដែរ​នោះ​ កំពុង​ទាមទារ​ឲ្យ​អង្គការ​សហ​​ប្រជាជាតិ​ចូល​រួម​ពាក់ព័ន្ធ​នៅ​ក្នុង​គណៈ​កម្មា​ធិការ​ណាមួយ​ ដើម្បី​ស៊ើប​អង្កេត​លើ​អ្វី​ដែល​​ខ្លួន​លើក​ឡើង​ថា ជា​ភាព​មិន​ប្រក្រតី​ដែល​កើត​មាន​គ្រប់​ទីកន្លែង​នៅ​ក្នុង​ថ្ងៃ​បោះ​ឆ្នោត​ ជា​លក្ខខណ្ឌ​មួយ​ដែលគណៈ​កម្មាធិ​ការ​ជាតិ​រៀប​​ចំ​ការ​បោះឆ្នោត​បាន​បដិសេធ​មិន​ព្រម​ធ្វើ​តាម​។

កាលពី​ម្សិលមិញ​ លោក​ ស ខេង​ បាន​​គាំទ្រ​សេចក្ដី​សម្រេច​​របស់​គណៈកម្មាធិការ​​​​ជាតិ​រៀប​ចំ​ការ​បោះឆ្នោត​។ លោក​បាន​មាន​ប្រសាសន៍​នៅ​ក្រសួង​មហាផ្ទៃ​ ដោយ​មាន​​មន្ត្រី​អម​​សងខាង​​ថា “ខ្ញុំ​បាន​ចរចា​ជាមួយ​លោក​ សម រង្ស៊ី តាម​ទូរស័ព្ទ​ ហើយ​បាន​ប្រាប់​គាត់​ថា ប្រសិន​បើ​យើង​​ច្រាន​ចោល​​យន្តការ​ ដែល​មាន​ប្រាប់​របស់​គ.ជ.ប. ហើយ​ព្យាយាម​ស្វែង​រក​យន្តការ​មួយ​ផ្សេង​ទៀត​នោះ​ នឹង​មាន​បញ្ហា​កាន់​តែ​ច្រើន​”។

លោក​បាន​មាន​ប្រសាសន៍​ទៀត​ថា “គ្មាន​លក្ខខណ្ឌ​ចាំ​បាច់​ ដែល​តម្រូវ​ឲ្យ​​អ្នក​នេះ​ ឬ​អ្នក​នោះ​ចូល​រួម​​ឡើយ​”។ លោក​ ស ខេង​ មិន​បាន​​មាន​ប្រសាសន៍​លម្អិត​ថា “ បញ្ហា​” ដែល​លោក​​សំដៅ​នោះ​ជា​អ្វី​ទេ​ ប៉ុន្តែ​មាន​ប្រសាសន៍​ទៀត​ថា ការ​អភិវឌ្ឍ​របស់​ប្រទេស​កម្ពុជា​អាច​នឹង​​រង​ផល​ប៉ះពាល់​​ ដោយ​សារ​​ស្ថានភាព​ជាប់​គាំង​​នា​ពេល​បច្ចុប្បន្ន​។

លោក​ ស ខេង​ ក៏​បាន​មាន​ប្រសាសន៍​ដែរ​ថា គណបក្ស​សង្គ្រោះ​ជាតិ​ចាំបាច​់​ត្រូវ​​មាន​ការ​ប្រុង​ប្រយ័ត្ន​ចំពោះ​ការ​ធ្វើ​ឲ្យ​​បាត់​បង់​សន្ដិភាព​ ហើយ​​មាន​ប្រសាសន៍​ថា បាតុកម្ម​​ណា​មួយ​​ត្រូវ​ធ្វើ​ឲ្យ​ប្រាកដ​ថា “ ប្រជាពល​រដ្ឋ​អាច​រស់​នៅ​ក្នុង​សុខសន្ដិភាព​ គម្រោង​វិនិ​យោគ​​នានា​ និង​ការ​អភិវឌ្ឍ​សង្គម ​​នឹង​នៅ​តែ​ដំណើរ​ការ​ជា​ធម្មតា​”។ លោក​បាន​មាន​ប្រសាសន៍​ថា ជំនួប​របស់​​លោក​​ជាមួយ​ឯកអគ្គ​រដ្ឋទូត​ទាំង​ពីរ​បាន​ផ្ដោត​ជា​សំខាន់​លើ​ “ ភាព​មិន​ប្រក្រតី​​ក្នុង​ការ​បោះ​ឆ្នោត​ និង​សន្ដិសុខ​សង្គម បន្ទាប់​ពី​ការ​បោះ​ឆ្នោត​កាលពី​ខែ​មុន​”។

នៅ​ក្នុង​​អ៊ីម៉េល​​ដាច់​ដោយ​ឡែក​ពី​គ្នា​ លោក​ វ៉ូលហ្គាំង​ ម៉ូស័រ​ (Wolfgang Moser) ឯក​អគ្គរដ្ឋទូត​អាល្លឺម៉ង់​ និង​ លោក នីកូឡាស ប៊ូឌង់ (Nicolas Baudouin) លេខាទី១ នៃ​ស្ថាន​ទូត​បារំាង​​ បាន​លើក​ឡើង​​ថា ពួក​លោក​មិន​អាច​ធ្វើ​អត្ថាធិប្បាយ​អំពី​ខ្លឹម​សារ​នៃ​ជំនួប​របស់​ខ្លួន​​​ជាមួយ​រដ្ឋមន្ត្រី​រូប​នេះ​បាន​ទេ​។

នេះ​មិន​មែន​ជា​លើក​ទី​១​ទេ ដែល​​មន្ត្រី​ជាន់​ខ្ពស់​​របស់​គណបក្ស​កាន់​អំណាច​បាន​និយាយ​បញ្ឆិត​បញ្ឆៀង​អំពី​​លទ្ធភាព​នៃ​អស្ថិរ​ភាព​​​នៅ​ក្រោយ​ថ្ងៃ​ចេញ​លទ្ធផល​បោះឆ្នោត​។ នៅ​មុន​ការ​បោះឆ្នោត លោក​នាយក​រដ្ឋ​មន្ត្រី​ ហ៊ុន​ សែន​ បាន​ព្រមាន​ម្ដង​ហើយ​ម្ដង​ទៀត​​អំពី​​ការ​វិល​ទៅ​រក​សង្គ្រាម​ស៊ីវិល​ ឬ​យុគ​សម័យ​មួយ​ ដែល​ស្រដៀង​គ្នា​ទៅ​នឹង​របប​ខ្មែរ​​ក្រហម​ ប្រសិន​បើ​គណបក្ស​របស់​លោក​ ដែល​បាន​កាន់​អំណាច​ជា​យូរ​មក​ហើយ​​នោះ ​ចាញ់​ឆ្នោត​។​ បន្ទាប់​ពី​គណបក្ស​របស់​លោក​​​បាន​ទទួល​ជ័យ​ជម្នះ​​នៅ​ក្នុង​ការ​បោះ​ឆ្នោ​តជាតិ​​កាល​ពី​ថ្ងៃ​ទី​២៨ ខែ​កក្កដា ជា​ដំបូង​លោក​ ហ៊ុន សែន​ ទំនង​ជា​​​​មាន​ឥរិយា​បថ​សម្រុះ​​សម្រួល​ ប៉ុន្តែ​កាលពី​ថ្ងៃ​សុក្រ លោក​​ បាន​ព្រមាន​ជា​ថ្មី​ម្ដង​ទៀត​​ថា  នឹង​មាន​​ភាព​ចលា​​​ចល​​ខ្លាំង​ក្នុង​សង្គម​​នៅក្នុង​រាជធានី​ភ្នំពេញ​ ប្រសិន​បើ​​គណ​បក្ស​ប្រឆាំង​ធ្វើ​បាតុ​កម្ម​ជា​សាធារណៈ​។

លោក យឹម​ សុវណ្ណ អ្នក​នាំពាក្យ​គណបក្ស​សង្គ្រោះ​ជាតិ​​បាន​មាន​ប្រសាសន៍​ថា គណ​បក្ស​របស់​លោក​គ្មាន​បំណង​បង្ក​អស្ថិរ​ភាព​ទេ​ ហើយ​បាន​អះអាងថា ការ​គោរព​ច្បាប់​គឺ​សំខាន់​​​ជាង​អ្វីៗ​ទាំង​អស់​ចំពោះ​គណបក្ស​លោក​​។​​​ លោក​ យឹម សុវណ្ណ បាន​មាន​ប្រសាសន៍​ទៀត​​ថា “ អ្វី​ដែល​យើង​បាន​ធ្វើ​ គឺ​គោរព​​ច្បាប់។ យើង​គ្មាន​អ្វី​ដែល​ល្មើស​ច្បាប់​ទេ​។​ អ្នក​ណា​ដែល​ចង់​បង្កើត​របប​ខ្មែរ​ក្រហម​ជា​ថ្មី​​ គឺ​ជា​ឧក្រិដ្ឋ​ជន​។​ ពាក្យ​ដែល​បំភិត​បំភ័យ​ប្រជា​ពលរដ្ឋ​គួរ​តែ​ចៀស​វាង​”។ លោក​បាន​មាន​ប្រសាសន៍​​ថា “ទុកឲ្យ​ប្រជាពលរដ្ឋ​ជា​អ្នក​វិនិច្ឆ័យ​ចុះ​ គាត់​ [លោក​ ស ខេង] មិន​គួរ​និយាយ​អំពី​រឿង​នោះ​ទេ​ គាត់​ជា​អ្នក​​ទទួល​ខុស​ត្រូវ​ចំពោះ​សន្ដិសុខ​ ហើយ​គាត់​មាន​មធ្យោបាយ​​នឹង​ធ្វើ​វា​ដោយ​សន្ដិវិធី​…។ លោក​គ្រប់គ្រង​ក្រសួង​មហា​ផ្ទៃ ដូច្នេះ​លោក​​ជា​អ្នក​ទទួល​ខុស​ត្រូវ​ចំពោះ​អ្វីៗ​ដែល​​កើត​ឡើង​អំឡុង​ពេល​បាតុ​កម្ម​”។

លោក​ យឹម សុវណ្ណ​ បាន​មាន​ប្រសាសន៍​បន្ថែម​ទៀត​ថា ទោះ​ជា​យ៉ាង​ណា​ បាតុកម្ម​​គឺ​ជា​ជម្រើស​ចុង​ក្រោយ​សម្រាប់​គណបក្ស​សង្គ្រោះ​ជាតិ​។​ គណៈកម្មាធិការ​ជាតិ​រៀប​ចំ​ការ​បោះ​ឆ្នោត​បាន​​ចេញ​សេចក្ដី​ថ្លែង​ការណ៍​របស់​ខ្លួន​​ពាក់ព័ន្ធ​នឹង​ក្ដី​បារម្ភ​​ចំពោះ​បញ្ហា​សន្ដិសុខ​កាល​ពី​ម្សិលមិញ ដោយ​អំពាវនាវ​ឲ្យ​សាធារណ​ជន​កុំ​ស្ដាប់​អង្គការ​ក្រៅ​រដ្ឋាភិបាល​ ឬ​ប្រព័ន្ធ​ផ្សព្វផ្សាយ ​រហូត​ទាល់​តែ​​​ចេញ​លទ្ធផល​បោះ​ឆ្នោត​ជា​ផ្លូវ​ការ​។

សេចក្ដី​ថ្លែង​ការណ៍​នោះ​​មាន​ខ្លឹម​សារ​ដូច្នេះ​​ថា “ ការ​ផ្សព្វផ្សាយ​ព័ត៌មាន​មិន​ពិត​អាច​ធ្វើឲ្យ​សាធារណជន​ភាន់​ច្រឡំ​ ដែល​នឹង​ធ្វើ​ឲ្យ​ខូច​បរិស្ថាន​ និង​ប៉ះពាល់​ដល់​សណ្ដាប់​ធ្នាប់​សង្គម​ និង​សន្តិសុខ​”។ គណបក្ស​ប្រជាជន​កម្ពុជា​​​ជា​អ្នក​ប្រកាស​លទ្ធផល​បោះឆ្នោត​មុន​គេ​ ដោយ​អះអាង​ថា ខ្លួន​​ទទួល​ជ័យ​ជម្នះ​ក្នុង​ការ​បោះឆ្នោត​ ដោយ​​ទទួល​បាន​​សំឡេង​គាំទ្រ​៦៨អាសនៈ​ រី​ឯ​គណ​បក្ស​សង្គ្រោះ​ជាតិ​ទទួល​បាន​៥៥​អាសនៈ​​ នៅ​​ម៉ោង​៧ និង​៤០​នាទី​ យប់​ថ្ងៃ​បោះឆ្នោត​៕

(រាយការណ៍​បន្ថែម​ដោយ​ Lauren Crothers)
ប្រែសម្រួលដោយ តែម សុខុម​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស