29 C
Phnom Penh

លោក សម រង្ស៊ី និយាយថា មន្ត្រីដែលនៅ​ពីក្រោយការ​បណ្តេញចេញ​នៅតំបន់​បឹងកក់សម​តែ​ជាប់​ពន្ធនាគារ

ដោយ ឌឹ ខេមបូឌា ដេលី

បទវិភាគ

កាល​ពីម្សិលមិញ​ លោក​ សម​ រង្ស៊ី មេ​ដឹក​នាំ​គណបក្ស​ប្រឆាំង​បាន​បេ្តជ្ញាយកតំបន់​បឹង​កក់​ដែ​លមាន​បញ្ហា​ច្រើន​នៅ​ក្នុង​រាជធានី​ភ្នំពេញទៅឲ្យ​អ្នកភូមិវិញ ហើយ​យកអ្នក​​ដែល​​បាន​​​ចាក់​ដី​លុប​បឹង​ដាក់​ពន្ធនាគារ​ប្រសិន​បើ ទីបំផុតគណបក្ស​សង្គ្រោះ​ជាតិ​ជា​គណ​បក្ស​ប្រឆាំងទទួល​​​បាន​​​ជោគជ័យ​​​ក្នុង​​​ការ​តវ៉ា​នឹង​លទ្ធផល​ក្រៅ ផ្លូវការ​​​​នៃការ​បោះ​ឆ្នោត​​កាល​ពីខែ​មុន​។

លោក សម រង្ស៊ី ប្រធាន​​​គណបក្ស​​​ប្រឆាំង​​​ថ្លែង​​​ទៅកាន់​​​ប្រជា​​​ពល​​​រដ្ឋ​​​នៅ​​​សហគមន៍​​​បឹងកក់​​​ក្នុង​​​រាជធានីភ្នំពេញ​​​ កាល​​​ពី​​​ម្សិលមិញ​​​។ ប្រជា​​​ព​​ល​​​រដ្ឋ​​​ជាង​​​៣.០០០​​​គ្រួសារ ត្រូវ​​​បាន​​​គេ​​​បណ្ដេញ​​​ចេញ​​​ពី​​​តំបន់​​​នេះ​​​។  (ស៊ីវ ចាន់ណា)
លោក សម រង្ស៊ី ប្រធាន​​​គណបក្ស​​​ប្រឆាំង​​​ថ្លែង​​​ទៅកាន់​​​ប្រជា​​​ពល​​​រដ្ឋ​​​នៅ​​​សហគមន៍​​​បឹងកក់​​​ក្នុង​​​រាជធានីភ្នំពេញ​​​ កាល​​​ពី​​​ម្សិលមិញ​​​។ ប្រជា​​​ព​​ល​​​រដ្ឋ​​​ជាង​​​៣.០០០​​​គ្រួសារ ត្រូវ​​​បាន​​​គេ​​​បណ្ដេញ​​​ចេញ​​​ពី​​​តំបន់​​​នេះ​​​។ (ស៊ីវ ចាន់ណា)

នៅ​តំបន់​បឹងកក់​គេឃើញ​មាន​អ្នក​ភូមិ​ប្រហែល​​​៣.០០០គ្រួសារ​ត្រូវ​បាន​បណ្តេញ​ចេញ​ដោយ​បង្ខំ​បន្ទាប់​ពីសាលា​រាជធានី​បាន​ផ្តល់​កិច្ច​សន្យា​ជួលដី​នេះ​ទៅ​ឲ្យ​លោក ឡៅ ម៉េង​ឃិន សមាជិក​ព្រឹទ្ធសភា​គណ​បក្ស​ប្រជា​ជ​ន​កម្ពុជា​ កាល​ពី​ឆ្នាំ​២០០៧​។

ចាប់​តាំង​ពី​ពេល​នោះ​មក​ តំបន់​នេះ​បាន​ក្លាយ​ជា​អំពើ​ហិង្សា​ដោយ​មាន​ការ​តវ៉ា​ប្រឆាំង​​នឹង​ការ​បណ្តេញចេញ​ពីដី​​រយៈ​ពេល​ជាច្រើន​ឆ្នាំ​នៅ​ក្នុង​រាជធានី ហើយ​ក៏​បាន​បណ្តាល​ឲ្យ​ធនាគារ​ពិភពលោក​ផ្អាក​ផ្តល់​ប្រាក់​កម្ចី​ដល់​រដ្ឋា​ភិបាល​ជុំវិញ​ការ​ប្រព្រឹត្តមិន​ត្រឹម​ត្រូវ​មក​លើអ្នក​ភូមិ​ក្នុង​តំបន់​នោះ​ផង​​​ដែរ​​​។

លោក​ សម រង្ស៊ី ដែល​បានយក​​​សិទ្ធិ​កាន់​កាប់​ដីធ្លី​ជាចំណុច​ស្នូល​នៃ​យុទ្ធ​នាការ​ឃោស​នា​បោះ​ឆ្នោត​របស់​លោក​ និង​កំពុង​តវ៉ា​នឹង​ការ​អះអាង​របស់​គណបក្ស​ប្រជា​ជន​កម្ពុជា​កំពុង​កាន់​អំណាច​ថា បា​ន​ឈ្នះការ​បោះឆ្នោត​​កាល​ពី​ថ្ងៃទី២៨​ខែ​កក្កដា​នោះបាន​ធ្វើ​ដំណើរ​​ទៅ​កាន់​តំបន់​បឹង​កក​់​រយៈពេល​ខ្លី​កាល​ពី​ម្សិល​មិញ ដែល​រួម​ដំណើរ​​ដោយ​អ្នក​ភូមិ​ដែល​មាន​ក្តីរំភើប​រីករាយ​ជាង​២០០នាក់​​​កាន់​គ្រវី​រូបសញ្ញា​គណ​បក្ស​សង្គ្រោះ​ជាតិ​។

លោក​ សម​ រង្ស៊ី បាន​និយាយ​ទៅ​កាន់​ក្រុម​មនុស្ស​នៅ​ខាង​ក្រៅ​ផ្ទះ​របស់​អ្នក​ស្រី ទេព វន្នី សកម្ម​ជន​ឈាន​មុខ​គេ​នៅ​តំបន់​នេះថា “ អ្នក​ដែល​បាន​ចាក់​ដីលុប​បឹង​នេះ​ គឺជាឧក្រិដ្ឋ​ជន​ ហើយ​ពួក​គេ​ត្រូវ​ជាប់​ពន្ធនាគារ​ ពីព្រោះ​យើង​​ត្រូវ​រក្សាទុក​បឹង​នេះ​ដើម្បី​រំដោះ​ទឹក​ជំនន់​នៅ​ក្នុង​រាជធានី​ភ្នំពេញ​ ហើយ​បឹង​នេះ​ក៏​​​ជាកន្លែង​សម្រាប់​តំបន់​ទេសចរណ៍​ផង​ដែរ​”។

លោក សម រង្ស៊ី បាន​អះអាង​ផង​ដែរ​ថា ទាំង​លោក ឡៅ ម៉េង​ឃិន សមាជិក​ព្រឹទ្ធសភា​ ដែល​​ក្រុម​ហ៊ុន​​អចលនទ្រព្យ​របស់​​លោកបាន​​​ចាក់​​​ដី​​​លុប​​​បឹង​​​នេះ និង​លោក​ កែប ជុតិមា​ អតីត​អភិ​បាល​រាជធានី​ដែល​ទទួល​​​ខុស​​​ត្រូវ​​​លើ​​​ការ​បណ្តេញ​ចេញ​នោះ​នៅ​ពេល​ដែល​លោក​ទទួល​បន្ទុក​ជាអភិបាល​រាជធានី​ភ្នំពេញ​​​​​នោះ​​​ គួរ​ទទួល​ខុស​ត្រូវ​ចំពោះ​មុខ​ច្បាប់​ពី​ទង្វើ​​របស់​ខ្លួន​។

លោក សម រង្ស៊ី បាន​មាន​ប្រសា​សន៍ថា  “ លោក កែប ជុតិមា បាន​ឃុបឃិត​ជាមួយ​លោក ឡៅ ម៉េង​ឃិន ប្រធាន​ក្រុម​ហ៊ុន ស៊ូកា​គូ អីុន ដែល​បាន​ចាក់​ដី​លុប​បឹង​នេះ ហើយ​យក​ដីនេះ​ដើម្បី​ប្រយោជន៍​ផ្ទាល់​ខ្លួន​ ដូច្នេះ​ពួក​គេ​ត្រូវ​តែ​ទទួល​ខុស​ត្រូវ​ចំពោះការ​ចាក់​ដី​លុប​បឹង​នេះ​។

លោក សម រង្ស៊ី ក៏បាន​ទាម​ទារ​ឲ្យ​ដោះ​លែង​​អ្នក​ស្រី យោ៉ម​ បុប្ផា សកម្មជន​ប្រឆាំង​ការ​បណ្តេញចេញ​នៅ​បឹងកក់​ដែល​កំពុង​អនុវត្ត​ទោស​ជាប់​ពន្ធនាគារ​រយៈពេ​ល​បី​ឆ្នាំ​ពីបទ​​ញុះ​ញង់​អ្នក​គាំទ្រ​របស់​ខ្លួន​ដែល​គេ​ជឿ​ថា ជាហេតុផល​នយោបាយ​ដើម្ប​ី​បញ្ឈប់​ការ​តវ៉ា​របស់​អ្នក​ស្រី​។ លោក សម រង្ស៊ី បាន​មាន​ប្រសាសន៍​ទៅ​កាន់​ក្រុម​មនុស្ស​ ដែល​ស្រែក​ហ៊ោអប​អរ​ដោយ​​​ការ​ទះដៃ​ថា “ យើង​មិន​ជឿ​ថា ការ​អភិ​វឌ្ឍ​បច្ចុប្បន្ន​នេះ​ត្រឹម​ត្រូវ​ទេ ពី​ព្រោះ​យើង​ឃើញ​ថា កា​រអភិវឌ្ឍ​នេះរឹប​អូស​​យក​ដី​​​ពីប្រជាពល​រដ្ឋ​ និង​បំផ្លាញ​ផ្ទះ​សំបែង​របស់​ពួកគាត់​។ ការ​​អភិវឌ្ឍ​ពិត​​​ប្រាកដ​​​ធ្វើ​ឲ្យ​មាន​ការ​រីកចម្រើន​សម្រាប់​ប្រជាពលរដ្ឋ​នៅ​ទូទាំង​ប្រទេស​”។ លោក​បាន​មាន​ប្រសាសន៍ថា “ យើង​មិន​ធ្វើ​ដូច​រដ្ឋា​ភិបាល​មុន​ ដែល​នឹង​​​​ចុះ​​​ចេញ​​​នៅ​ពេល​ឆាប់ៗ​នេះទេ​ ពីព្រោះ​ប្រជា​ពល​រដ្ឋ​បោះ​​​ឆ្នោត​ទម្លាក់​នាយក​រដ្ឋ​មន្ត្រី​ចាស់​ហើយ​”។

លោក កែប ជុតិមា ដែល​បាន​លា​លែង​តំណែង​ជា​អភិបាល​រាជធានី​ កាល​ពីដើម​ឆ្នាំនេះ​ ដើម្បី​ឈរ​ឈ្មោះ​ជាបេក្ខ​ជន​តំណាង​រាស្ត្រ​គណបក្ស​ប្រជាជន​កម្ពុជា​មណ្ឌល​ភ្នំពេញ​ បាន​បដិសេធ​ថា លោកមិន​មាន​កំហុស​​ព្រហ្មទណ្ឌ​ទេ​​នៅ​ពេល​ត្រូវ​បាន​​ទាក់​ទង​សុំ​ការ​​អត្ថាធិប្បាយ​កាល​ពីម្សិល​មិញ។

លោក កែប​ ជុតិមា បាន​មាន​​ប្រសា​សន៍ថា ​“ លោក សម រង្ស៊ី មិន​ទាន់​ក្លាយ​ជានាយក​រដ្ឋ​មន្ត្រីនៅ​ឡើយ​​ទេ​ ប៉ុន្តែ គាត់​គំរាម​ចាប់​ខ្លួន​មនុស្ស​ដាក់​ពន្ធនា​គារ​ទៅហើយ​។ ដូច្នេះ​តើ​គាត់​សមជា​មេដឹក​នាំ​នយោ​បាយ​ទេ​? ហើយ​គាត់​អាច​ធ្វើ​ឲ្យ​ប្រជាពល​រដ្ឋ​ជឿ​ទុក​ចិត្ត​លើ​គាត់​ទេ​?។លោក​បាន​មាន​ប្រសាសន៍ថា “ ខ្ញុំ​មិន​បាន​ធ្វើ​អ្វី​ខុស​ច្បាប់​ឡើយ​”។ លោក​ កែប​ ជុតិមា បាន​ទទួល​ស្គាល់​ថា គ្មាន​ការ​អភិវឌ្ឍ​ណា​ធ្វើ​ឡើង​ដោយ​​គ្មាន​កំហុស​នោះ​ទេ ប៉ុន្តែ បាន​បដិសេធ​មិន​ទទួល​ខុស​ត្រូវ​ចំពោះ​អ្វី​ដែល​បាន​កើត​ឡើង​នៅ​តំបន់បឹង​កក់​ឡើយ​ ពីព្រោះ​លោក​គ្រាន់​តែ​ធ្វើ​តាម​​សេចក្តី​បង្គាប់​មិន​ច្បាស់​លាស់​របស់​រដ្ឋាភិបាលប៉ុណ្ណោះ។ លោក​បាន​បន្ថែម​ថា  “ ខ្ញុំ​គ្រាន់​តែ​ចង់​រស់​នៅ​ក្នុង​ភាព​ស្ងប់​ស្ងាត់​ប៉ុណ្ណោះ​ ពី​ព្រោះ​​ខ្ញុំ​បាន​ចូល​និវត្ត​ហើយ​”។

លោក​ ឡៅ​ ម៉េង​ឃិន សមាជិក​ព្រឹទ្ធ​សភា និង​តំណាង​ក្រុម​ហ៊ុន​របស់​លោក​​មិន​អាច​​ទាក់​ទង​សុំ​ការ​អត្ថាធិប្បាយ​បាន​ទេ​។ អំឡុងការ​តវ៉ា​របស់​ខ្លួន​ សកម្មជន​នៅ​ក្នុង​តំបន់​បឹង​កក់​ជា​​​រឿយៗ​​​ធ្វើ​​​ជា​​​​គាំទ្រ​គណបក្ស​ប្រជាជន​កម្ពុជា ដោយ​​​កាន់​រូប​​ថត​របស់​លោក​​នាយក​រដ្ឋ​មន្ត្រី​ ហ៊ុន​ សែន និង​ភរិយា​របស់​លោក គឺលោក​ស្រី  ប៊ុន រ៉ានី​ ហើយ​សុំ​ឲ្យជួ​យ​ពួក​គាត់។

ប៉ុន្តែ អ្នក​ស្រី ទេព វន្នី ដែល​ជា​សកម្ម​ជន​នៃការ​តវ៉ា​នោះ​បាន​និយាយ​ថា ពួក​គាត់​ភាគ​ច្រើន​បាន​បាត់​បង់​ជំនឿ​លើ​គណ​បក្ស​កំពុង​កាន់​អំណាច​។ អ្នក​ស្រី​ ទេព វន្នី បា​ន​និយាយ​​​ក្រោយ​ពី​ដំណើររបស់លោក សម រង្ស៊ី មក​កាន់​កន្លែង​នេះថា “ យើង​បាត់​បង់​ជំនឿ​លើ​គណបក្ស​ប្រជាជន​  ដោយសារ​ពួកគេបាន​បណ្តេញ​​ប្រជាពល​រដ្ឋ​ចេញ​​ ដោយ​សារ​តែលោក​ កែប​ ​ជុតិមា និង​លោក ឡៅ ម៉េង​ឃិន ហើយ​ពួក​គេ​តែង​តែ​​ប្រើ​ប្រាស់​ប្រព័ន្ធ​តុលាការ​ប្រឆាំង​នឹង​អ្នក​តវ៉ា”។
អ្ន​កស្រី​បាន​​និយាយ​ថា “ ខ្ញុំ​សង្ឃឹម​ថា នាយក​រដ្ឋ​មន្ត្រី​នៅ​អាណត្តិទី៥​នេះ នឹង​ជា​ឯកឧត្តម​ សម រង្ស៊ី ហើយ​ខ្ញុំ​សង្ឃឹមថា លោក​នឹង​​មិន​ធ្វើ​ឲ្យ​​ប្រជាពល​រដ្ឋ​ខក​ចិត្ត​ឡើយ​ ហើយប្រទេស​កម្ពុជា​នឹង​ក្លាយ​​ជា​ប្រទេស​​ប្រជា​ធិបតេយ្យ​ពិត​ប្រាកដ​”។

ទោះជាយ៉ាង​ណា​ លោក សម រង្ស៊ី មិន​មាន​ឥទ្ធិពល​លើ​​​​មនុស្ស​​​គ្រប់គ្នា​​​​ឡើយ​។ អ្នក​ស្រី ហេង មុំ អតីត​សម្ពន្ធមិត្ត​របស់​អ្នកស្រី ទេព វន្នី​ បាន​និយាយ​ថា អ្នក​ស្រី​មិន​បាន​ចូល​រួម​​ជាមួយ​ដំណើរ​មកកាន់​តំបន់​នេះ​របស់​ប្រធាន​គណ​បក្ស​ប្រឆាំង​​ឡើយ​ ពី​ព្រោះអ្នក​ស្រី​ និង​អ្នក​ភូមិ​១៥គ្រួសារ​ទៀត​បាន​ព្រមព្រៀង​ជា​មួយ​មន្ត្រី​សា​លា​រាជ​ធានី​នៅ​មុន​ការ​បោះ​ឆ្នោត​ដែល​នៅក្នុង​នោះ​ពួក​គាត់​ទាំង​អស់​គ្នា​នឹង​ទទួល​បាន​ប័ណ្ណ​កម្មសិទ្ធិ​ចំពោះ​ផ្ទះសំបែង​របស់ខ្លួនដែល​រង​ការ​គំរាម​កំហែង​ជាថ្នូរ​នឹង​ការ​បោះឆ្នោត​ឲ្យ​គណបក្ស​ប្រជាជន​កម្ពុជា​កំពុង​កាន់​អំណាច​។

អ្នក​ស្រី​​និយាយថា “ សាលា​រាជ​ធានី​បាន​សន្យា​ផ្តល់​ប័ណ្ណកម្ម​សិទ្ធិ​ដី​ដល់​អ្នក​ភូមិ​តែ​១៦​គ្រួសារ​ប៉ុណ្ណោះ ពីព្រោះ​ពួកគាត់​បាន​សន្យា​​បោះ​ឆ្នោត​ឲ្យ​គណបក្ស​ប្រជា​ជន​កម្ពុជា”។ អ្នក​ស្រី ហេង​ មុំ​ បាន​និយាយថា ខ្ញុំ​បាន​ទទួល​ទូរស័ព្ទពីលោក កើត​ ឆែ ប្រធាន​រដ្ឋ​បាល​សាលា​រាជធានី​ភ្លាមៗ​បន្ទាប់​ពី​ការ​សន្យា​បោះ​ឆ្នោតដោយ​សន្យា​ចំពោះ​​គ្រួសារ​ទាំង​នេះ​ថា ប័ណ្ណ​កម្មសិទ្ធិ​នឹង​ផ្ត​ល់ឲ្យ​នៅ​ពេល​ឆាប់ៗពេល​ដែល​គណៈ​កម្មា​ធិការ​រៀប​ចំការ​បោះ​ឆ្នោត​បាន​ប្រកាស​លទ្ធផល​ផ្លូវការ​ ដែល​​រំពឹងថា នឹង​ប្រកាស​នៅពេល​ណាមួយ​ក្នុង​ខែ​កញ្ញា។គេមិន​អាច​ទាក់​ទង​លោក កើត​ ឆែ​ ដើម្បី​សុំ​ការអត្ថាធិប្បាយ​ទាក់​ទង​នឹង​ការ​បោះ​ឆ្នោត​ជា​ថ្នូរនឹង​ការ​​ព្រម​ព្រៀង​ផ្តល់​ប័ណ្ណ​​​​កម្ម​សិទ្ធិ​ដី​នោះទេ។

លោក​ ឡុង​ ឌីម៉ង់ អ្នក​នាំពាក្យ​សាលា​រាជ​ធានី​បាន​បដិសេធ​មិន​ធ្វើ​អត្ថាធិប្បាយ​ទេ​។ អង្គការ​សិទ្ធិលំនៅដ្ឋាន​​បាន​លើក​ឡើង​ថា រដ្ឋាភិបាល​បាន​រំលោភ​ច្បាប់​ភូមិ​បាល​នៅ​ក្នុង​តំបន់​បឹង​កក់​ដោយ​បដិសេធ​មិន​ផ្ត​ល់​ឱកាសក្នុងការ​​ដាក់​ពាក្យ​សុំប័ណ្ណ​កម្ម​​​​​​សិទ្ធិដី​របស់​អ្នក​ភូមិ​រាប់​ពាន់​គ្រួសារ​ដែល​ធ្លាប់​រស់នៅ​​ក្នុង​តំបន់​នោះឡើយ​៕

ប្រែសម្រួលដោយ​ សោម សារុន​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស