លោក គាត ឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានចុះហត្ថលេខាលើកិច្ចព្រមព្រៀងមួយជាមួយឯកអគ្គរដ្ឋទូតចិនប្រចាំនៅរាជធានីភ្នំពេញ ដើម្បីទទួលបានឥណទានអនុគ្រោះមួយ ដែលមានទំហំទឹកប្រាក់១២១លានដុល្លារ ដើម្បីផ្ដល់ហិរញ្ញប្បទានសម្រាប់គម្រោងស្រោចស្រព និងគម្រោងតបណ្ដាញអគ្គិសនី។
យោងតាមសេចក្ដីរាយការណ៍របស់កាសែត AKP បានឲ្យដឹងថា នៅក្នុងការសន្យាចុងក្រោយអំពីការផ្ដល់ថវិកាពីប្រទេសផ្ដល់ជំនួយធំជាងគេរបស់ប្រទេសកម្ពុជាមួយនេះ ប្រទេសចិន នឹងផ្ដល់ហិរញ្ញប្បទានដល់គម្រោងតបណ្ដាញបញ្ជូនថាមពលអគ្គិសនីមួយ ដែលតភ្ជាប់រាជធានីភ្នំពេញជាមួយក្រុងបាវិត ខេត្តស្វាយរៀង។
កាសែត AKP បានរាយការណ៍ថា ប្រាក់កម្ចីនេះត្រូវបានចុះហត្ថលេខាយល់ព្រមជាផ្លូវការជាមួយលោក ពូ ចៀនគួ (Bu Jianguo) ឯកអគ្គរដ្ឋទូតថ្មីរបស់ចិន កាលពីថ្ងៃសុក្រ ហើយក៏នឹងត្រូវផ្ដល់ហិរញ្ញប្បទានសម្រាប់ប្រព័ន្ធស្រោចស្រពអាចាង នៅខេត្តកំពង់ឆ្នាំងផងដែរ ប៉ុន្តែកាសែតនេះមិនបានបញ្ជាក់ថា តើថវិកាសម្រាប់គម្រោងនីមួយៗមានចំនួនប៉ុន្មាននោះទេ។
លោក ងី តាយី រដ្ឋលេខាធិការនៅក្រសួងសេដ្ឋកិច្ច និងហិរញ្ញវត្ថុបានបញ្ជាក់ថា កិច្ចព្រមព្រៀងស្ដីពីឥណទាននេះ ត្រូវបានចុះហត្ថលេខាកាលពីថ្ងៃសុក្រ។ លោកបានមានប្រសាសន៍ ដោយបង្វែរសំនួរទៅកាន់សេចក្ដីរាយការណ៍ផ្លូវការនេះថា “ នេះគឺជាលទ្ធផលនៃការចរចាគ្នាយ៉ាងយូរជាមួយភាគីចិន”។
លោក ជៀង អំ អភិបាលខេត្តស្វាយរៀងបានស្វាគមន៍ចំពោះកិច្ចព្រមព្រៀងនេះ ប៉ុន្តែលោកមានប្រសាសន៍ថា រូបលោកមិនមានព័ត៌មានលម្អិតស្ដីពីគម្រោងតភ្ជាប់បណ្ដាញបញ្ជូនចរន្តអគ្គិសនីនេះទេ។ លោកមានប្រសាសន៍ថា “យើងសូមស្វាគមន៍យ៉ាងជ្រាវជ្រៅចំពោះព័ត៌មានល្អនេះ ពីព្រោះយើងនឹងមានអគ្គិសនីប្រើប្រាស់កាន់តែច្រើននៅក្នុងខេត្តរបស់យើង”។
ឥណទាននេះត្រូវបានព្រមព្រៀងរយៈពេលពីរសប្ដាហ៍ បន្ទាប់ពីការបោះឆ្នោតជាតិកាលពីថ្ងៃទី២៨ ខែកក្កដា ហើយគឺជាថវិកាចុះក្រោយគេមួយ ដែលប្រទេសចិនផ្ដល់ឲ្យកម្ពុជាខ្ចីអំឡុងការគ្រប់គ្រងរបស់លោកនាយករដ្ឋមន្ត្រី ហ៊ុន សែន ដែលចាត់ទុកខ្លួនលោកថា ជាសម្ព័ន្ធមិត្តជិតស្និតរបស់មហាអំណាចថ្មីថ្មោងមួយនេះនៅរយៈពេលប៉ុន្មានឆ្នាំថ្មីៗនេះ។ ទើបតែខែនេះទេ ដែលលោក ហ៊ុន សែន មានប្រសាសន៍ថា ការគំរាមកំហែងដែលថា សហរដ្ឋអាមេរិកអាចនឹងកាត់ផ្ដាច់ទំនាក់ទំនងជាមួយប្រទេសកម្ពុជានោះ អាចនឹងត្រូវមិនអើពើ ពីព្រោះប្រទេសចិនអាចបំពេញនូវសេចក្ដីត្រូវការលើការជួយឧបត្ថម្ភពីបរទេស ដែលកម្ពុជាខ្វះ។
ក្រុមអ្នករិះគន់បានលើកឡើងថា ឥណទាន ជំនួយ ព្រមទាំងការជួយឧបត្ថម្ភខាងផ្នែកយោធាបានធ្វើឲ្យប្រទេសកម្ពុជារណបចិន។ គ្រាន់តែប៉ុន្មានថ្ងៃក្រោយការបោះឆ្នោតប៉ុណ្ណោះ ប្រទេសចិនបានផ្ដល់កំាភ្លើងខ្លីចំនួន១.០០០ដើម និងគ្រាប់ចំនួន៥០.០០០គ្រាប់ឲ្យនគរបាលជាតិកម្ពុជា។ ប្រទេសកម្ពុជាទទួលបានឧទ្ធម្ភាគចក្រពីរគ្រឿងក្នុងចំណោមឧទ្ធម្ភាគចក្រយោធាធុន Z-9 ជាង១០គ្រឿងពីប្រទេសចិននាពេលថ្មីៗនេះ៕
ប្រែសម្រួលដោយ ហួង កុកទៀន