ក្រុមមន្ត្រីបានឲ្យដឹងកាលពីម្សិលមិញថា ប្រជាជននៅក្នុងភូមិចំនួន១១នៅតាមបណ្តោយស្ទឹងសែន ក្នុងក្រុងព្រះវិហារ ត្រូវបានជម្លៀសចេញទៅកាន់ទីទួលមានសុវត្ថិភាព ក្រោយពីមានការប្រកាសអាសន្ន កាលពីថ្ងៃអាទិត្យ ដោយសារតែកម្រិតទឹកបានកើនឡើង។
លោក ចាប កុយ ប្រធានមន្ទីរធនធានទឹកនិងឧតុនិយមខេត្តព្រះវិហារ បានឲ្យដឹងថា ប្រជាពលរដ្ឋប្រហែល៣៤៩គ្រួសារត្រូវបានជម្លៀសចេញពីសង្កាត់ចំនួនពីរ បន្ទាប់ពីទឹកស្ទឹងបានឡើងដល់កម្ពស់១១ម៉ែត្រ ដែលជាកម្រិតប្រកាសអាសន្ន។ លោកបានមានប្រសាសន៍ថា “យើងបានប្រកាសពីទឹកឡើង និងទឹកជំនន់នៅជុំវិញស្ទឹងសែន កាលពីថ្ងៃអាទិត្យ បន្ទាប់ពីទឹកបានឡើងដល់កម្ពស់១១ម៉ែត្រ”។ លោកបានមានប្រសាសន៍បន្ថែមថា ទឹកបានឡើងលើសកម្ពស់១១,២៥ម៉ែត្រគិតត្រឹមព្រឹកម្សិលមិញ។ លោកបានមានប្រសាសន៍ថា “មុនពេលយើងប្រកាសអាសន្ន យើងបានជូនដំណឹងប្រាប់ប្រជាពលរដ្ឋដែលរស់នៅក្បែរស្ទឹងនេះថា ពួកគេគួរស្វែងរកទីទួលមានសុវត្ថិភាព”។
លោកស្រី ម៉ុង សំអាន ចៅសង្កាត់ប៉ាលហាល ដែលស្ថិតក្នុងចំណោមតំបន់រងការជន់លិចធ្ងន់បំផុត បានឲ្យដឹងថា គ្រួសារប្រជាពលរដ្ឋដែលរងការប៉ះពាល់ត្រូវបានជម្លៀសទៅកាន់ទីទួលមានសុវត្ថិភាពតាមទូក។ លោកស្រីបានមានប្រសាសន៍ថា “កងរាជអាវុធហត្ថ និងនគរបាលសង្កាត់បានជម្លៀសអ្នកភូមិទៅកាន់ទីទួលមានសុវត្ថិភាព ដែលមានជម្រកបណ្តោះអាសន្នបង្កើតឡើងដោយកាកបាទក្រហមកម្ពុជា និងអង្គការទស្សនពិភពលោក (Wold Vision)។ នៅទីនោះ គ្រួសារនីមួយៗទទួលបានប្រាក់ចំនួន១០.០០០រៀល និងមីមួយកេស។ ផ្ទះយ៉ាងតិច៤០ខ្នងបានរងការជន់លិច។ ការជន់លិចនៅឆ្នាំនេះគឺខ្លាំងជាងកាលពី [ខែសីហា] ឆ្នាំមុន។ កាលពីឆ្នាំមុន ទឹកជំនន់មិនបានកើតមានទេ រហូតទាល់តែដល់ខែកញ្ញា”។
លោក កុក ឈួន ចៅសង្កាត់កំពង់ប្រណាក ដែលមានការប្រកាសអាសន្នដែរនោះ បានឲ្យដឹងថា ភូមិចំនួនប្រាំពីរដែលមានប្រជាជនរស់នៅចំនួន១៨៧គ្រួសារត្រូវបានជម្លៀសចេញពីសហគមន៍របស់លោកនៅចន្លោះថ្ងៃពុធនិងថ្ងៃម្សិលមិញនេះ។ លោកបានមានប្រសាសន៍ថា “យើងបានប្រកាសអាសន្នពីទឹកជំនន់នៅស្ទឹងសែនព្រោះកម្រិតទឹកបានឡើងលើស១១ម៉ែត្រហើយ”។ លោកបានបន្ថែមថា “យើងបានជម្លៀសអ្នកស្រុកដែលងាយរងគ្រោះប្រហែល១៨៧គ្រួសារទៅកាន់ជម្រកបណ្តោះអាសន្ន ដែលជាកន្លែងពួកគេអាចស្នាក់នៅ ទទួលទានអាហារ ទឹក និងកន្លែងសម្រាកដោយសុវត្ថិភាព”។
លោក ពឹង ទ្រីដា ប្រធានមន្ទីរកសិកម្មខេត្តព្រះវិហារ បានឲ្យដឹងថា ដីស្រែចម្ការជាង២.០០០ហិកតាទៀតបានរងការជន់លិច និងត្រូវបានចាត់ទុកថា ប្រើប្រាស់លែងបានក្នុងស្រុកជាំក្សាន្ត និងស្រុកគូលែន ចាប់តាំងពីថ្ងៃសុក្រមក៕
ប្រែសម្រួលដោយ ចេវ ប៊ុននី