លោក ញឹក ប៊ុនឆៃ អគ្គលេខាធិការគណបក្សហ៊្វុនស៊ិនប៉ិចបានលើកឡើងកាលពីម្សិលមិញថា គណៈកម្មាធិការអចិន្ត្រៃយ៍របស់គណបក្សលោកបានសម្រេចចិត្តផ្ញើលិខិតមួយច្បាប់ទៅគណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប. នៅក្នុងថ្ងៃនេះ ដើម្បីស្នើឲ្យមានការស៊ើបអង្កេតលើភាពមិនប្រក្រតីនៃការបោះឆ្នោត។
លោក ញឹក ប៊ុនឆៃ បានមានប្រសាសន៍ថា ការសម្រេចចិត្តនេះត្រូវបានធ្វើឡើងបន្ទាប់ពីគណៈកម្មាធិការអចិន្ត្រៃយ៍ បានបើកកិច្ចប្រជុំមួយ ដើម្បីពិភាក្សាអំពីលទ្ធផលបឋមនៃការបោះឆ្នោត ចេញដោយគ.ជ.ប. កាលពីម្សិលមិញ ដែលបានបង្ហាញជាថ្មីម្ដងទៀតថា គណបក្សរាជានិយមមួយនេះមិនទទួលបានសូម្បីតែមួយអាសនៈនៅក្នុងរដ្ឋសភាជាលើកដំបូងចាប់តាំងពីគណបក្សនេះបានឈ្នះឆ្នោតកាលពីឆ្នាំ១៩៩៣មក។
លោក ញឹក ប៊ុនឆៃ បានថ្លែងបន្ទាប់ពីកិច្ចប្រជុំកាលពីម្សិលមិញថា “ខ្ញុំគិតថា ប្រសិនបើគ.ជ.ប. ស៊ើបអង្កេតភាពមិនប្រក្រតីនៅថ្ងៃបោះឆ្នោត គណបក្សហ៊្វុនស៊ិនប៉ិច នឹងទទួលបានអាសនៈមួយចំនួន”។ ទោះជាយ៉ាងណា លោកបានបន្ថែមថា ប្រសិនបើគណបក្សហ៊្វុនស៊ិនប៉ិចមិនទទួលបានអាសនៈណាមួយ បន្ទាប់ពីការស៊ើបអង្កេត លោកនឹងចាកចេញពីឆាកនយោបាយ ហើយបន្តមុខតំណែងជាយោធាបន្តទៀត។
លោកបានថ្លែងថា “ប្រសិនបើគណបក្សហ៊្វុនស៊ិនប៉ិចមិនទទួលបានអាសនៈណាមួយនោះ ខ្ញុំនៅតែមានមុខតំណែងមួយផ្សេងទៀតនៅក្នុងកងយោធពលខេមរភូមិន្ទជានាយឧត្តមសេនីយ៍ផ្កាយបួន ហេតុដូច្នេះហើយខ្ញុំនឹងចូលទៅកាន់មុខតំណែងនោះដោយស្វ័យប្រវត្តិ”។
លោក ញឹក ប៊ុនឆៃ ជាដំបូងបានដឹកនាំគណបក្សហ៊្វុនស៊ិនប៉ិច ដែលជាដៃគូរដ្ឋាភិបាលចម្រុះជាមួយគណបក្សប្រជាជនកម្ពុជារហូតដល់ឆ្នាំ១៩៩៨ បន្ទាប់ពីមានបញ្ហាស្រដៀងនេះជុំវិញភាពមិនប្រក្រតីនៃការបោះឆ្នោតដែលបានធ្វើឲ្យគណបក្សនេះបែកបាក់គ្នា បន្ទាប់ពីទទួលបានពីរអាសនៈក្នុងការបោះឆ្នោតជាតិកាលពីឆ្នាំ២០០៨។
កាលពីខែកក្កដា ឆ្នាំ២០០៨ គណបក្សហ៊្វុនស៊ិនប៉ិច បានចុះហត្ថលេខាលើសេចក្ដីថ្លែងការណ៍រួមមួយជាមួយគណបក្សប្រឆាំង ដោយលើកឡើងថា គណបក្សប្រជាជនកម្ពុជា និងគ.ជ.ប. បាន “ រៀបចំលទ្ធផលទុកជាមុន” នៃការបោះឆ្នោត ដើម្បីជួយឲ្យគណបក្សកាន់អំណាចទទួលជ័យជម្នះ។
ការចេញសេចក្ដីថ្លែងការណ៍រួមនេះ បានធ្វើឲ្យគណបក្សប្រជាជនកម្ពុជាកំពុងកាន់អំណាចលើកឡើងថា ខ្លួននឹងបង្កើតរដ្ឋាភិបាលចម្រុះតែជាមួយគណបក្សហ៊្វុនស៊ិនប៉ិច ដែលដឹកនាំដោយលោក ញឹក ប៊ុនឆៃ ប៉ុណ្ណោះ មិនមែនជាមួយគណបក្សហ៊្វុនស៊ិនប៉ិច ដែលដឹកនាំដោយលោក កែវ ពុទ្ធរស្មី ដែលកាលពីពេលនោះជាប្រធានគណបក្សនេះឡើយ។
លោក កែវ ពុទ្ធរស្មី ព្រះរាជសុនិសារបស់សម្ដេចឪ បានដកថយជាបណ្ដោះអាសន្ន ដើម្បីបើកផ្លូវឲ្យលោក ញឹក ប៊ុនឆៃ ដឹកនាំគណបក្ស ដែលទទួលបានពីរអាសនៈនៅក្នុងរដ្ឋសភា។ ព្រះអង្គម្ចាស់ស៊ី សុវត្ថិធម្មិកោ សមាជិកស្ថាបនិកបក្សហ៊្វុនស៊ិនប៉ិច ដែលបានចុះចូលជាមួយគណបក្សសង្គ្រោះជាតិ កាលពីដើមឆ្នាំនេះ និងដែលបានឈរឈ្មោះជាបេក្ខជនតំណាងរាស្ត្រសម្រាប់គណបក្សនេះនៅមណ្ឌលខេត្តព្រះសីហនុ បានមានបន្ទូលកាលពីម្សិលមិញថា ការបែកបាក់របស់គណបក្សហ៊្វុនស៊ិនប៉ិចអាចនឹងរស់ឡើងវិញនៅពេលខ្លួនកាត់សមាជិកដែលជិតស្និទ្ធជាមួយគណបក្សប្រជាជនកម្ពុជាចោល ហើយវិលត្រឡប់ទៅរកគណបក្សរាជានិយមដូចកាលពីមុនវិញ។
ព្រះអង្គម្ចាស់បានមានបន្ទូលដោយសំដៅទៅលើការរួបរួមគ្នារបស់គណបក្សហ៊្វុនស៊ិនប៉ិច ដែលមានចលានាតស៊ូប្រយុទ្ធប្រឆាំងនឹងរដ្ឋាភិបាលលោកនាយករដ្ឋមន្ត្រី ហ៊ុន សែន អំឡុងទសវត្សរ៍ឆ្នាំ១៩៨០ ថា “ខ្ញុំជឿជាក់ថា នៅមានមនុស្សជាច្រើននៅក្នុងគណបក្សហ៊្វុនស៊ិនប៉ិច អ្នកទាំងនោះ សុទ្ធតែជាអ្នកប្រយុទ្ធជួរមុខ ដែលធ្លាប់តែប្រយុទ្ធដើម្បីឯករាជ្យ អព្យាក្រឹតភាព និងប្រជាធិបតេយ្យរួមទាំងព្រះអង្គម្ចាស់ក្សត្រី អរុណរស្មី [បេក្ខជននាយករដ្ឋមន្ត្រីរបស់គណបក្សហ៊្វុនស៊ិនប៉ិច] ដែលមានស្មារតីបែបនេះដែរនោះ”។
ព្រះអង្គម្ចាស់បានមានបន្ទូលបន្ថែមថា “សម្រាប់ពួកគេ [ការងារដែលត្រូវធ្វើនោះ គឺ] ត្រូវពង្រឹងកម្លាំង និងទំនុកចិត្តក្នុងចំណោមប្រជាពលរដ្ឋឡើងវិញ”។ ព្រះអង្គម្ចាស់ សិរីរ័ត្ន ដែលជាសមាជិកស្ថាបនិកគណបក្សហ៊្វុនស៊ិនប៉ិចដែរនោះបានមានបន្ទូលថា គណបក្សហ៊្វុនស៊ិនប៉ិចប្រហែលជាពិចារណាពីការធ្វើជាដៃគូជាមួយគណបក្សសង្គ្រោះជាតិ បន្ទាប់ពីលទ្ធផលនៃការបោះឆ្នោតចុងក្រោយត្រូវបានបញ្ជាក់ ប៉ុន្តែព្រះអង្គម្ចាស់មានទុទិដ្ឋិនិយមអំពីឱកាសរបស់គណបក្សនេះក្នុងការធ្វើឲ្យខ្លួនឯងក្លាយជាគណបក្សឯករាជ្យឡើងវិញ។
ព្រះអង្គម្ចាស់មានបន្ទូលកាលពីម្សិលមិញថា “យើងត្រូវតែព្យាយាមឲ្យអស់ពីលទ្ធភាព។ យើងនៅមានពេលប្រាំឆ្នាំទៀត ដើម្បីពង្រឹង និងអភិវឌ្ឍគណបក្សរបស់យើងឲ្យក្លាយជាគណបក្សឯករាជ្យមួយពិតប្រាកដ”។ ប៉ុន្តែព្រះអង្គម្ចាស់បានមានបន្ទូលថា ការងារនេះប្រហែលជាលំបាក ព្រោះសមាជិកគណបក្សហ៊្វុនស៊ិនប៉ិច ដែលបានចាកចេញពីគណបក្សនេះអស់រយៈពេលជាច្រើនឆ្នាំមកហើយ ដោយសារតែមានទំនាក់ទំនងជាមួយគណបក្សប្រជាជនកម្ពុជានោះ បានជួយដណ្ដើមតំណែងពីគណបក្សហ៊្វុនស៊ិនប៉ិចទៅឲ្យគណបក្សកាន់អំណាច។
ព្រះអង្គម្ចាស់បានមានបន្ទូលដោយសំដៅទៅលើប្រធាន និងអនុប្រធានរបស់គណបក្សសង្គ្រោះជាតិថា “អ្នកទាំងនេះដូចជាលោក កឹម សុខា ដែលជាមនុស្សល្អ និងលោក សម រង្ស៊ី ដែលក៏ជាមនុស្សល្អដែរនោះសុទ្ធតែមើលឃើញពីគ្រោះថ្នាក់ ប្រសិនបើយើងបន្តធ្វើតាមអ្វីៗដែលគណបក្សកាន់អំណាចបានធ្វើ”។
លោក កឹម សុខា ធ្លាប់ធ្វើជាសមាជិកព្រឹទ្ធសភារបស់គណបក្សហ៊្វុនស៊ិនប៉ិច ចន្លោះពីឆ្នាំ១៩៩៩ដល់ឆ្នាំ២០០២ រីឯលោក សម រង្ស៊ី ធ្លាប់ធ្វើជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុរបស់គណបក្សហ៊្វុនស៊ិនប៉ិចនៅក្នុងអាណត្តិដំបូងចន្លោះពីឆ្នាំ១៩៩៣ ដល់ឆ្នាំ១៩៩៤។
ព្រះអង្គម្ចាស់បានមានបន្ទូលថា អ្នកទាំងពីរនាក់នេះឆ្លាតណាស់ ពួកគាត់បានចាកចេញពីគណបក្សមុនពេលគណបក្សរលាយ។ អ្នកខ្លះក្នុងចំណោមពួកយើងមិនបានមើលឃើញចំណុចនេះទេ”៕
ប្រែសម្រួលដោយ ស៊ា ស៊ុយឈាង