របងការពារសន្តិសុខថ្មី​ត្រូវដំឡើងជុំវិញបរិវេណរដ្ឋ​​​សភា

ការ​​​ងារ​​​សាង​​​សង់​​​របង​​​ថ្មី​​​ធ្វើ​​​ពីដែក​​​ បាន​​​ចាប់​​​ផ្តើម​​​នៅ​​​ក្រៅ​​​អគារ​​​រដ្ឋ​​​សភា ប៉ុន្តែ អ្នក​​​នាំ​​​ពាក្យ​​​ស្ថាប័ន​​​នីតិ​​​បញ្ញត្តិ​​​នេះ​​​ បាន​​​អះ​​​អាង​​​កាល​​​ពី​​​ម្សិល​​​មិញ​​​ថា របង​​​ថ្មី​​​នេះ​​​គឺ​​​មិន​​​មែន​​​ដើម្បី​​​ពង្រឹង​​​សន្តិសុខ​​​ក្នុង​​​ករណី​​​គណ​​​បក្ស​​​សង្គ្រោះ​​​ជាតិ​​​ធ្វើ​​​មហា​​​បាតុកម្មនោះ​​​ទេ។

រថពាសដែក របាំង​​​លួស​​​បន្លា និង​​​ការ​​​បង្កើន​​​វត្ត​​​មាន​​​កម្លាំង​​​នគរ​​​បាល​​​ បាន​​​បង្កើត​​​បរិយា​​​កាស​​​មួយ​​​ដែល​​​មើល​​​ទៅ​​​ឃើញ​​​ថា មាន​​​ការ​​​ពង្រឹង​​​សន្តិសុខ​​​ខ្លាំង​​​ក្នុង​​​រាជ​​​ធានី​​​ភ្នំ​​​ពេញ​​​​​​ក្រោយ​​​ថ្ងៃ​​​បោះ​​​ឆ្នោត​​​។ មន្ត្រី​​​រដ្ឋា​​​ភិបាល​​​បាន​​​អះ​​​អាង​​​ថា ការ​​​ដាក់​​​ពង្រាយ​​​កង​​​ទ័ព​​​ និង​​​រថពាស​​​ដែក ​​​ជា​​​វិធានការ​​​ចាំបាច់​​​មួយ​​​ដើម្បី​​​ធានា​​​ស្ថិរភាព​​​ក្នុង​​​ប្រទេស​​​នេះ​​​ បន្ទាប់​​​ពី​​​គណ​​​បក្ស​​​សង្គ្រោះ​​​ជាតិ​​​បាន​​​ច្រាន​​​ចោល​​​លទ្ធ​​​ផល​​​​​​នៃ​​​ការ​​​បោះ​​​ឆ្នោត​​​កាល​​​ពី​​​ខែ​​​មុន​​​ ហើយ​​​បាន​​​លើក​​​ឡើង​​​ថា ខ្លួន​​​នឹង​​​​​​បង្ខំ​​​ចិត្ត​​​ធ្វើ​​​មហា​​​បាតុកម្ម​​​ ប្រសិន​​​បើ​​​ភាព​​​មិន​​​ប្រក្រតី​​​អំឡុងពេល​​​បោះ​​​ឆ្នោត​​​មិន​​​​​​បាន​​​ឆ្លង​​​កាត់ការ​​​ស៊ើប​​​អង្កេត​​​ដែល​​​គួរ​​ឲ្យ​​​ជឿ​​​ជាក់​​​នោះ។

ប៉ុន្តែ លោក ឈាង វុន សមាជិក​​​សភា​​​គណ​​​បក្ស​​​ប្រជា​​​ជន​​​កម្ពុជា​​​ បាន​​​បដិសេធ​​​កាល​​​ពី​​​ថ្ងៃ​​​ម្សិល​​​មិញ​​​ថា របង​​​ថ្មីនេះ​​​គ្មាន​​​អ្វី​​​ពាក់​​​ព័ន្ធ​​​នឹង​​​វិធានការ​​​​​​សន្តិ​​​សុខ​​ទេ​​​ ផ្ទុយទៅ​​​វិញ​​​ ​​​គឺសម្រាប់​​​​​​ការ​​​ពារ​​​មិនឲ្យ​​​មានការ​​​បត់​​​ជើង​​​តូច​​​ពាស​​​វាល​​​ពាស​​​កាល​​​នៅ​​​ទី​​​នោះ​​​ប៉ុណ្ណោះ​​​។ លោក​​​បាន​​​មាន​​​ប្រសាសន៍​​​ថា “របង​​​នេះ​​​​​​គឺ​​​សម្រាប់​​​ការ​​​ពារ​​​កុំ​​​ឲ្យ​​​មាន​​​អ្នក​​​នោម​​​ដាក់​​​របង​​​របស់​​​យើង និង​​​ដើម្បី​​​កុំ​​​ឲ្យ​​​មាន​​​អ្នក​​​ចត​​​រថយន្ត​​​លើ​​​ចិញ្ចើម​​​ផ្លូវ​​​​​​នៅខាង​​​ក្រៅ​​​” ដោយ​​​បន្ថែម​​​ថា របង​​​នេះ​​​មិន​​​ពាក់​​​ព័ន្ធ​​​នឹង​​​ការ​​​បោះឆ្នោត​​​ឡើយ។ លោក​​​បាន​​​បន្តថា “ យើង​​​ធ្វើ​​​ការ​​​ងារ​​​​​​ជួស​​​ជុល​​​នៅ​​​រដ្ឋ​​​សភារៀង​​​រាល់​​​ប្រាំ​​​ឆ្នាំ​​​ម្តង​​​។​​​ យើង​​​ចង់​​​បង្កើត​​​បរិយាកាស​​​ល្អ​​​បំផុត​​​សម្រាប់​​​សមាជិក​​​សភា​​​គ្រប់ៗ​​​រូប​​​ មិន​​​មែន​​​តែ​​​សមាជិក​​​សភា​​​គណ​​​បក្ស​​​ប្រជា​​​ជន​​​ទេ​​​”។

នៅ​​​ខាងក្រៅ​​​រដ្ឋ​​​សភា​​​កាល​​​ពី​​​ម្សិលមិញ​​​ បង្គោល​​​ដែក​​​កម្ពស់​​​២ម៉ែត្រ​​​ ត្រូវ​​​បាន​​​ចាក់​​​បេតុង​​​លើ​​​ចិញ្ចើម​​​ផ្លូវ​​​នៅ​​​ចន្លោះ​​​ផ្លូវ​​​ថ្នល់​​​ និង​​របង​​​បេតុង​​ចាស់​​​នៅជុំវិញ​​​រដ្ឋ​​​សភា។

ខណៈ​​​បដិសេធ​​​ថា របង​​​ថ្មី​​​នេះ​​​មិន​​​ជាប់​​​ពាក់​​​ព័ន្ធ​​​នឹង​​​គម្រោងធ្វើបាតុកម្ម​​​​​​ប្រឆាំង​​​នឹង​​​លទ្ធ​​​ផល​​​នៃ​​​ការ​​​បោះ​​​ឆ្នោតដ៏​​​ចម្រូង​​​ចម្រាស​​​នោះ​​​ លោក ឈាង វុន ​​​បាន​​​បញ្ជាក់​​​ថា របងបច្ចុ​​​ប្បន្ន​​​​​​ ដែល​​​មើល​​​ទៅ​​​ពុំ​​​ឃើញ​​​មាន​​​សញ្ញា​​​ណា​​​មួយ​​​​​​បង្ហាញ​​​ពី​​​ការ​​​ខូច​​​ខាត​​​នេះ​​​ ឧស្សាហ៍​​​ត្រូវ​​​បាតុករ​​​បំពាន​​​ណាស់​​​”។ លោកបន្តថា “ ក្រុម​​​​អ្នក​​​តវ៉ា​​​ប្រើ​​​​ម៉ៃក្រូ​ហ្វូន ហើយ​​​ពួកគេ​​​ស៊ក​​​វា​​​តាម​​​​​​របង​​​ វា​​​រំខាន​​​ការ​​​ងារ​​​របស់​​​យើង​​​”។

ខណៈ​​​គណ​​​បក្ស​​​សង្គ្រោះ​​​ជាតិ​​​បាន​​​លើក​​​ឡើង​​​ថា ខ្លួន​​​នឹង​​​អំពាវ​​​នាវ​​​ឲ្យ​​​មាន​​​ការ​​​ធ្វើ​​​មហា​​​​​​បាតុកម្ម​​​តែ​​​ក្នុង​​​ករណី​​​ខ្លួន​​​ពុំមាន​​​ជម្រើស​​​ណា​​​ផ្សេង​​​នោះ រដ្ឋ​​​មន្ត្រី​​​ក្រសួង​​​មហា​​​ផ្ទៃ លោក ស​​​ ខេង បាន​​​ឲ្យ​​​ដឹង​​​ថា ការ​​​ពង្រឹង​​​សន្តិ​​​សុខ​​​នេះ​​​ ​​​​គឺ​​​ដើម្បី​​​បញ្ចៀស​​​ចលាចល​​​សង្គម​​​ក្រោយ​​​ការ​​​បោះ​​​ឆ្នោត​​​ ដែល​​​គណ​​​បក្ស​​​ធំៗទាំង​​​ពីរ​​​​​​បាន​​​អះ​​​អាង​​​ពីជ័យ​​​ជម្នះ​​​រៀងៗ​​​ខ្លួន និង​​​ដែល​​​គណ​​​បក្ស​​​ប្រឆាំង​​​អះ​​​អាង​​​ថា ត្រូវ​​​បាន​​​ញាំញី​​​​​​ដោយ​​​ការ​​​លួច​​​បន្លំ​​​សន្លឹក​​​ឆ្នោត​​​។

កាល​​​ពី​​​យប់​​​ថ្ងៃ​​​ច័ន្ទ​​​ ក្បួន​​​រថយន្ត​​​យោធា​​​​​​តូច​​​មួយ​​​ដែល​​មាន​​​បំពាក់​​​កាំភ្លើង​​​យន្ត​​​ត្រូវបាន​​​គេ​​​ឃើញ​​​បើក​​​ល្បាត​​​តាមម​​​ហាវិថី​​​ព្រះ​​​នរោត្តម​​​ក្បែរ​​​ក្រសួង​​​មហា​​​ផ្ទៃ​​​៕

ប្រែ​​​សម្រួល​​​ដោយ ភួន ច័ន្ទសេរីវុធ