កាលពីម្សិលមិញ គណបក្សប្រជាជនកម្ពុជាបានស្នើឲ្យអាជ្ញាធរចាប់ខ្លួន និងដាក់ទោសមនុស្សដែលទទួលខុសត្រូវចំពោះការផលិតខ្សែអាត់សំឡេងដែលគេអះអាងថា ជាខ្សែអាត់សំឡេងរបស់លោកនាយករដ្ឋមន្ត្រី ហ៊ុន សែន ដែលទទួលស្គាល់ជាលក្ខណៈឯកជនថា គណបក្សរបស់លោកបានចាញ់ការបោះ ឆ្នោតជាតិកាលពីថ្ងៃទី២៨ ខែកក្កដា ។ ខ្សែអាត់សំឡេងដែលត្រូវបានផ្សព្វផ្សាយជា លើកដំបូងនៅតាមហ្វេសប៊ុក និងត្រូវបានវិទ្យុអាស៊ីសេរីចាក់ផ្សាយកាលពីថ្ងៃអាទិត្យនោះហាក់ដូចជាត្រូវគ្នានឹងសុន្ទរកថា ដែលលោកបានថ្លែងកាលពីថ្ងៃទី១៦ខែឧសភា នៅក្នុងខេត្តព្រៃវែង។
ផ្ទុយពីលទ្ធផលបឋមចេញដោយគណបក្សប្រជាជនកម្ពុជា និងគណៈកម្មាធិការជាតិរៀបចំការបោះឆ្នោត (គ.ជ.ប.) ដែលបង្ហាញថា គណបក្សប្រជាជនកម្ពុជាបានឈ្នះឆ្នោត គឺទទួលបាន៦៨អាសនៈ ក្នុងខ្សែអាត់នោះគេស្តាប់ឮលោក ហ៊ុន សែន ថ្លែងពីការទទួលស្គាល់ការចាញ់ឆ្នោត។
ខ្សែអាត់សំឡេងរបស់លោក ហ៊ុន សែន មានខ្លឹមសារថា “គណបក្សប្រជាជនកម្ពុជាបានចាញ់ឆ្នោតហើយ។ មេដឹកនាំ គណបក្សប្រជាជនកម្ពុជាបានដឹងពីរឿងនេះយ៉ាងច្បាស់ ប៉ុន្តែ មានតែថ្នាក់ក្រោមទេ ដែលនៅមិនទាន់ដឹងច្បាស់”។ “ខ្ញុំសូមប្រកាសចំពោះមន្ត្រីថ្នាក់ក្រោមរបស់គណបក្សប្រជាជនកម្ពុជាថា ថ្នាក់ក្រោមមិនទាន់ដឹងថា ខ្លួនបានចាញ់ឆ្នោតនោះទេ។បញ្ហានេះខ្ញុំសូមប្រាប់ដល់សកម្មជនទាំងអស់ឲ្យផ្សព្វផ្សាយពីព័ត៌មាននេះ” ។
ប៉ុន្តែ ដោយមានប្រជាជនជាច្រើនត្រូវបានគេបោកបញ្ឆោតឲ្យគិតថា ខ្សែអាត់សំឡេងនោះបង្ហាញថា គណបក្សប្រជាជនកម្ពុជា និង គ.ជ.ប. បានកុហកអំពីលទ្ធផលបោះឆ្នោតនោះ គណបក្សប្រជាជនកម្ពុជាបានបញ្ជាក់កាលពីម្សិលមិញថា ពាក្យនេះ ចេញពីសុន្ទរកថារបស់លោក ហ៊ុន សែន ដែលបានថ្លែងនៅមុនការបោះឆ្នោត។
គណបក្សប្រជាជនកម្ពុជាបានលើក ឡើងនៅក្នុងសេចក្តីជូនដំណឹងមួយថា ខ្សែអាត់សំឡេងនេះត្រូវបានគេកាត់ត និងបានបង្ហោះតាមហ្វេសប៊ុក ដើម្បីធ្វើឲ្យសាធារណជនមានការភាន់ច្រឡំ និងបង្កអស្ថិរភាពនៅ ក្នុងសង្គម”។ សេចក្តីជូនដំណឹងនោះលើកឡើងថា “នេះគឺជាទង្វើមួយដែលក្រុមមនុស្សអគតិមួយចំនួនបានបង្កបញ្ហាមិនចេះឈប់មិនចេះឈរ នៅពេលដែលប្រជាជនខ្មែរត្រូវការសន្តិភាពដើម្បីបំពេញការងាររបស់ខ្លួនដូចធម្មតា”។ សេចក្តីជូនដំណឹងនោះបានស្នើ ឲ្យអាជ្ញាធរស៊ើបអង្កេត និងចាត់វិធានការប្រឆាំងជនល្មើស។
លោក ជាម យៀប សមាជិកសភាជាន់ខ្ពស់គណបក្សប្រជាជនកម្ពុជាបានមានប្រសាសន៍កាលពីម្សិលមិញថា ពាក្យសម្តីនេះត្រូវបានដកស្រង់ចេញពីសុន្ទរកថាដែលលោក ហ៊ុន សែន បានថ្លែងកាលពីខែឧសភា នៅឯវត្តមួយក្នុងស្រុកមេសាង ខេត្តព្រៃវែង និងជាផ្នែកមួយនៃសម្តីផ្ទាល់ដែលលោក ហ៊ុន សែន បាននិយាយតាមបន្ទូលព្រះអង្គម្ចាស់ស៊ីសុវត្ថិ ធមិ្មកោ បេក្ខជនតំណាងរាស្ត្រគណបក្សសង្គ្រោះជាតិ។ លោក ជាម យៀប បានមានប្រសាសន៍បន្តថា “វាត្រូវបានបង្កើតចេញពីរឿងពិត”។
នៅក្នុងសុន្ទរកថាកាលពីខែឧសភានោះលោក ហ៊ុន សែន បានដកស្រង់សម្តីដ៏វែងរបស់ព្រះអង្គម្ចាស់ ធម្មិកោ ដែលបានមានបន្ទូលនៅថ្ងៃទី១០ ខែឧសភា នៅក្នុងខេត្តក្រចេះ ហើយនៅក្នុងនោះអតីតជំនួយការរបស់ព្រះបរមរតនកោដ្ឋសម្តេចឪ នរោត្តម សីហនុ បានអះអាងថា គណបក្សប្រជាជនបានចាញ់ឆ្នោតហើយ គឺផ្អែកតាមការវិភាគរបស់ព្រះអង្គអំពីលទ្ធផលនៃការបោះឆ្នោតឃុំសង្កាត់កាលពីខែមិថុនា ឆ្នាំ២០១២។
លោក ហ៊ុន សែន បានប្រាប់អ្នកចូលរួមស្តាប់កាលពីខែឧសភាមុនពេលលើកឡើងពីព្រះអង្គម្ចាស់ ធម្មិកោ ថា “ខ្ញុំសូមអានអត្ថបទដកស្រង់នោះទាំងស្រុង” ។ លោក ហ៊ុន សែន បានមានប្រសាសន៍ថា “មានការឆ្លើយតបថា គេនិយាយថាចង់បានសន្តិភាព និងការអភិវឌ្ឍ ប៉ុន្តែ ការអភិវឌ្ឍ នោះគួរតែផ្តល់ទៅឲ្យថ្នាក់ក្រោមផងដែរ”។ លោកបានលើកឡើងទៀតថា លទ្ធផលបោះឆ្នោតឃុំសង្កាត់សម្រាប់គណបក្សប្រជាជនកម្ពុជា មានន័យថា មានអ្នកបោះឆ្នោតជាច្រើនមិនគាំទ្រគណបក្សកាន់អំណាចទេ ហើយជ័យជម្នះបានទៅលើគណបក្សប្រឆាំង។ លោកបានបន្តថា “គណបក្សប្រជាជនទទួលបាន៣,៥លានសំឡេង ដូច្នេះគណបក្សសង្គ្រោះជាតិទទួលបាន៦លាន។ គណបក្សប្រជាជនកម្ពុជាបានចាញ់់ឆ្នោតហើយ”។
នៅក្នុងសុន្ទរកថារបស់លោក ហ៊ុន សែន លោកបានជំទាស់នឹងចំណុចដែលព្រះអង្គម្ចាស់ ធម្មិកោ បានលើកឡើង ដោយនិយាយថា សូម្បីតែសំឡេងឆ្នោតរបស់គណបក្សប្រឆាំងពីររួមបញ្ចូលគ្នានៅក្នុងការបោះឆ្នោតឃុំសង្កាត់ក៏មិនគ្រប់គ្រាន់ដើម្បីយកឈ្នះលើគណបក្សប្រជាជនកម្ពុជាបានដែរ។
ខ្សែអាត់សំឡេងដែលអាចបណ្តាលឲ្យមានទោសព្រហ្មទណ្ឌត្រូវបាន គណបក្សប្រជាជនកម្ពុជាផ្សព្វផ្សាយនៅមុនពេលបោះឆ្នោត ដោយអង្គភាពព័ត៌មាន និងប្រតិកម្មរហ័សនៃទីស្តីការគណៈរដ្ឋមន្ត្រីចាក់ផ្សាយខ្សែអាត់សំឡេងជាច្រើនរបស់មេដឹកនាំគណបក្សប្រឆាំង ដោយបណ្តាលឲ្យមានបញ្ហាគួរឲ្យអាម៉ាស់។
ខ្សែអាត់សំឡេងខ្លះទៀតដែលនិយាយទាក់ទងគ្នារវាងលោក កឹម សុខា អនុប្រធានគណបក្សសង្គ្រោះជាតិ និងលោក សម រង្ស៊ី ប្រធានគណបក្សសង្គ្រោះជាតិដែលបាននិយាយរិះគន់គ្នាមុនពេលគណបក្សទាំងពីរ គឺគណបក្សសិទ្ធិមនុស្ស និងគណបក្សសម រង្ស៊ី រួមបញ្ចូលគ្នាកាលពីឆ្នាំមុន ដើម្បីបង្កើតគណបក្សប្រឆាំងរួមគ្នាមួយ ដើម្បីតទល់នឹងគណបក្សប្រជាជនកម្ពុជា។
ខ្សែអាត់សំឡេងមួយបានរៀបរាប់អំពីលោក កឹម សុខា ដែលអះអាងថាក្រោយពីការដួលរលំរបបខ្មែរក្រហមនៅក្នុងឆ្នាំ១៩៧៩ វៀតណាមបានក្លែងបន្លំភ័ស្តុតាងពីបទឧក្រិដ្ឋនៅគុកទួលស្លែងក្នុងរាជធានីភ្នំពេញ។
ទោះបីជាលោក កឹម សុខា បានបដិសេធថា មិនបាននិយាយបែបនេះ និងបានចោទប្រកាន់គណបក្សប្រជាជនកម្ពុជាថា បានកាត់តសំឡេងខ្សែអាត់នោះក៏ដោយ ក៏សាលាដំបូងរាជធានីភ្នំពេញបានកោះហៅលោកមកសាកសួរដែរ ក្រោយពីការអត្ថាធិប្បាយបែបនេះធ្វើឲ្យមានពាក្យបណ្តឹងពីបទបរិហារកេរ្តិ៍របស់អ្នករួចជីវិតពីពន្ធនាគារដ៏អសោចនេះ។ លោក កឹម សុខា បានធ្វើមិនដឹងមិនឮចំពោះដីកាកោះហៅរបស់តុលាការអំពីរឿងក្តីនេះដែលជារឿងក្តីមួយក្នុងចំណោមរឿងក្តីចំនួនបីដែលគេបានប្តឹងគាត់នៅមុនពេលបោះឆ្នោត៕
ប្រែសម្រួលដោយ មូល គឹមហឿន